ব্রহ্মগীতা

.. ব্রহ্মগীতা ..

২০
বা
অত্রাপ্যুদাহরন্তীমমিতিহাসং পুরাতনম্ .
দম্পত্যোঃ পার্থ সংবাদমভযং নাম নামতঃ .. ১..
ব্রাহ্মণী ব্রাহ্মণং কং চিজ্জ্ঞানবিজ্ঞানপারগম্ .
দৃষ্ট্বা বিবিক্ত আসীনং ভার্যা ভর্তারমব্রবীত্ .. ২..
কং নু লোকং গমিষ্যামি ত্বামহং পতিমাশ্রিতা .
ন্যস্তকর্মাণমাসীনং কীনাশমবিচক্ষণম্ .. ৩..
ভার্যাঃ পতিকৃতাঁল্লোকানাপ্নুবন্তীতি নঃ শ্রুতম্ .
ত্বামহং পতিমাসাদ্য কাং গমিষ্যামি বৈ গতিম্ .. ৪..
এবমুক্তঃ স শান্তাত্মা তামুবাচ হসন্নিব .
সুভগে নাভ্যসূযামি বাক্যস্যাস্য তবানঘে .. ৫..
গ্রাহ্যং দৃশ্যং চ শ্রাব্যং চ যদিদং কর্ম বিদ্যতে .
এতদেব ব্যবস্যন্তি কর্ম কর্মেতি কর্মিণঃ .. ৬..
মোহমেব নিযচ্ছন্তি কর্মণা জ্ঞানবর্জিতাঃ .
নৈষ্কর্ম্যং ন চ লোকেঽস্মিন্মৌর্তমিত্যুপলভ্যতে .. ৭..
কর্মণা মনসা বাচা শুভং বা যদি বাশুভম্ .
জন্মাদি মূর্তি ভেদানাং কর্ম ভূতেষু বর্ততে .. ৮..
রক্ষোভির্বধ্যমানেষু দৃশ্যদ্রব্যেষু কর্মসু .
আত্মস্থমাত্মনা তেন দৃষ্টমাযতনং মযা .. ৯..
যত্র তদ্ব্রহ্ম নির্দ্বন্দ্বং যত্র সোমঃ সহাগ্নিনা .
ব্যবাযং কুরুতে নিত্যং ধীরো ভূতানি ধারযন্ .. ১০..
যত্র ব্রহ্মাদযো যুক্তাস্তদক্ষরমুপাসতে .
বিদ্বাংসঃ সুব্রতা যত্র শান্তাত্মানো জিতেন্দ্রিযাঃ .. ১১..
ঘ্রাণেন ন তদাঘ্রেযং ন তদাদ্যম্চ জিহ্বযা .
স্পর্শেন চ ন তত্স্পৃশ্যং মনসা ত্বেব গম্যতে .. ১২..
চক্ষুষা ন বিষহ্যং চ যত্কিং চিচ্ছ্রবণাত্পরম্ .
অগন্ধমরস স্পর্শমরূপাশব্দমব্যযম্ .. ১৩..
যতঃ প্রবর্ততে তন্ত্রং যত্র চ প্রতিতিষ্ঠতি .
প্রাণোঽপানঃ সমানশ্চ ব্যানশ্চোদান এব চ .. ১৪..
তত এব প্রবর্তন্তে তমেব প্রবিশন্তি চ .
সমানব্যানযোর্মধ্যে প্রাণাপানৌ বিচেরতুঃ .. ১৫..
তস্মিন্সুপ্তে প্রলীযেতে সমানো ব্যান এব চ .
অপান প্রাণযোর্মধ্যে উদানো ব্যাপ্য তিষ্ঠতি .
তস্মাচ্ছযানং পুরুষং প্রাণাপানৌ ন মুঞ্চতঃ .. ১৬..
প্রাণানাযম্যতে যেন তদুদানং প্রচক্ষতে .
তস্মাত্তপো ব্যবস্যন্তি তদ্ভবং ব্রহ্মবাদিনঃ .. ১৭..
তেষামন্যোন্যভক্ষাণাং সর্বেষাং দেব চারিণাম্ .
অগ্নির্বৈশ্বানরো মধ্যে সপ্তধা বিহিতোঽন্তরা .. ১৮..
ঘ্রাণং জিহ্বা চ চক্ষুশ্চ ত্বক্চ শ্রোত্রং চ পঞ্চমম্ .
মনো বুদ্ধিশ্চ সপ্তৈতা জিহ্বা বৈশ্বানরার্চিষঃ .. ১৯..
ঘ্রেযং পেযং চ দৃশ্যং চ স্পৃশ্যং শ্রব্যং তথৈব চ .
মন্তব্যমথ বোদ্ধব্যং তাঃ সপ্ত সমিধো মম .. ২০..
ঘ্রাতা ভক্ষযিতা দ্রষ্টা স্প্রষ্টা শ্রোতা চ পঞ্চমঃ .
মন্তা বোদ্ধা চ সপ্তৈতে ভবন্তি পরমর্ত্বিজঃ .. ২১..
ঘ্রেযে পেযে চ দেশ্যে চ স্পৃশ্যে শ্রব্যে তথৈব চ .
হবীংষ্যগ্নিষু হোতারঃ সপ্তধা সপ্ত সপ্তসু .
সম্যক্প্রক্ষিপ্য বিদ্বাংসো জনযন্তি স্বযোনিষু .. ২২..
পৃথিবী বাযুরাকাশমাপো জ্যোতিশ্চ পঞ্চমম্ .
মনো বুদ্ধিশ্চ সপ্তৈত যোনিরিত্যেব শব্দিতাঃ .. ২৩..
হবির্ভূতা গুণাঃ সর্বে প্রবিশন্ত্যগ্নিজং মুখম্ .
অন্তর্বাসমুষিত্বা চ জাযন্তে স্বাসু যোনিষু .
তত্রৈব চ নিরুধ্যন্তে প্রলযে ভূতভাবনে .. ২৪..
ততঃ সঞ্জাযতে গন্ধস্ততঃ সঞ্জাযতে রসঃ .
ততঃ সঞ্জাযতে রূপং ততঃ স্পর্শোঽভিজাযতে .. ২৫..
ততঃ সঞ্জাযতে শব্দঃ সংশযস্তত্র জাযতে .
ততঃ সঞ্জাযতে নিষ্ঠা জন্মৈতত্সপ্তধা বিদুঃ .. ২৬..
অনেনৈব প্রকারেণ প্রগৃহীতং পুরাতনৈঃ .
পূর্ণাহুতিভিরাপূর্ণাস্তেঽভিপূর্যন্তি তেজসা .. ২৭..

.. ইতি ব্রহ্মগীতা সমাপ্তা ..