বসিষ্ঠ গীতা

 || বসিষ্ঠ গীতা ||

নির্বাণ প্রকরণ উত্তরার্ধ সর্গঃ ৩৯
|| অথ বসিষ্ঠ গীতা ||
শ্রীবসিষ্ঠ উবাচ |
সঞ্জাতাকৃত্রিমক্ষীণসংসৃতিপ্রত্যয়ঃ পুমান্ |
সঙ্কল্পো ন সঙ্কল্পং বেত্তি তেনাসদেব সঃ || ১||
শ্বাসান্ম্লানিরিবাদর্শে কুতোঽপ্যহমিতি স্থিতা |
বিদি সাঽকারণং দৃষ্টা নশ্যন্ত্যাশু ন লভ্যতে || ২||
যস্য ক্ষীণাবরণতা শান্তসর্বেহতোদিতা |
পরমামৃতপূর্ণাত্মা সত্তয়ৈব স রাজতে || ৩||
সর্বসন্দেহদুর্ধ্বান্তমিহিকামাতরিশ্বনা |
ভাতি ভাস্বদ্ধিয়া দেশস্তেন পূর্ণেন্দুনেব খম্ || ৪||
বিসংসৃতির্বিসন্দেহো লব্ধজ্যোতির্নিরাবৃতিঃ |
শরদাকাশবিশদো জ্ঞেয়ো বিজ্ঞায়তে বুধঃ || ৫||
নিঃসঙ্কল্পো নিরাধারঃ শান্তঃ স্পর্শাৎপবিত্রতাম্ |
অন্তঃশীতল আধত্তে ব্রহ্মলোকাদিবানিলঃ || ৬||
অসদ্রূপোপলম্ভানামিয়ং বস্তুস্বভাবতা |
যৎস্বর্গবেদনং স্বপ্নবন্ধ্যাপুত্রোপলম্ভবৎ || ৭||
অবিদ্যমানমেবেদং জগদ্যদনুভূয়তে |
অসদ্রূপোপলম্ভস্য সৈষা বস্তুস্বভাবতা || ৮||
অসত্যেষ্বেব সংসারেষ্বাস্তামর্থঃ কুতো ভবেৎ |
সর্গাপবর্গয়োঃ শব্দাবেব বন্ধ্যাসুতোপমৌ || ৯||
জগদ্ব্রহ্মতয়া সত্যমনির্মিতমভাবিতম্ |
অনিষ্ঠিতং চান্যথা তু নাহং নাবগতং চ তৎ || ১০||
আত্মস্বভাববিশ্রান্তেরিয়ং বস্তুস্বভাবতা |
যদহন্তাদিসর্গাদিদুঃখাদ্যনুপলম্ভতা || ১১||
ক্ষণাদ্যোজনলক্ষান্তং প্রাপ্তে দেশান্তরে চিতঃ |
চেতনেঽযস্য তদ্রূপং মার্গমধ্যে নিরঞ্জনম্ || ১২||
অস্পন্দবাতসদৃশং খকোশাভাসচিন্ময়ম্ |
অচেত্যং শান্তমুদিতং লতাবিকসনোপমম্ || ১৩||
সর্বস্য জন্তুজাতস্য তৎস্বভাবং বিদুর্বুধাঃ |
সর্গোপলম্ভো গলতি তত্রস্থস্য বিবেকিনঃ || ১৪||
সুষুপ্তে স্বপ্নধীর্নাস্তি স্বপ্নে নাস্তি সুষুপ্তধীঃ |
সর্গনির্বাণয়োর্ভ্রান্তী সুষুপ্তস্বপ্নয়োরিব || ১৫||
ভ্রান্তিবস্তুস্বভাবোঽসৌ ন স্বপ্নো ন সুষুপ্ততা |
ন সর্গো ন চ নির্বাণং সত্যং শান্তমশেষতঃ || ১৬||
ভ্রান্তিস্ত্বসন্মাত্রময়ী প্রেক্ষিতা চেন্ন লভ্যতে |
শুক্তিরূপ্যমিবাসত্যং কিল সংপ্রাপ্যতে কথম্ || ১৭||
যন্ন লব্ধং চ তন্নাস্তি তেন ভ্রান্তেরসংভবঃ |
স্বভাবাদুপলম্ভোঽন্যো নাস্তি কস্য ন কস্যচিৎ || ১৮||
স্বভাব এব সর্বস্মৈ স্বদতে কিল সর্বদা |
অনানৈব হি নানেব কিং বাদৈঃ সংবিভাব্যতাম্ || ১৯||
অস্বভাবে মহদ্দুঃখং স্বভাবে কেবলং শমঃ |
ইতি বুদ্ধ্যা বিচার্যান্তর্যদিষ্টং তদ্বিধীয়তাম্ || ২০||
সূক্ষ্মে বীজেঽস্ত্যগঃ স্থূলো দৃষ্টমিত্যুপপদ্যতে |
শিবে মূর্তে জগন্মূর্তমস্তীত্যুত্তমসংকথা || ২১||
রূপালোকমনস্কারবুদ্ধ্যহন্তাদয়ঃ পরে |
স্বরূপভূতাঃ সলিলে দ্রবৎবমিব খাত্মকাঃ || ২২||
মূর্তো যথা স্বসদৃশৈঃ করোত্যবয়বৈঃ ক্রিয়াঃ |
আত্মভূতৈস্তথা ভূতৈশ্চিদাকাশমকর্তৃ সৎ || ২৩||
আত্মস্থাদহমিত্যাদিরস্মদাদেরসংসৃতেঃ |
শব্দোঽর্থভাবমুক্তো যঃ পটহাদিষু জায়তে || ২৪||
যদ্ভাতং প্রেক্ষয়া নাস্তি তন্নাস্ত্যেব নিরন্তরম্ |
জগদ্রূপমরূপাত্ম ব্রহ্ম ব্রহ্মণি সংস্থিতম্ || ২৫||
যেষামস্তি জগৎস্বপ্নস্তে স্বপ্নপুরুষা মিথঃ |
ন সন্তি হ্যাত্মনি মিথো নাস্মাস্বম্বরপুষ্পবৎ || ২৬||
ময়ি ব্রহ্মৈকরূপং তে শান্তমাকাশকোশবৎ |
বায়োঃ স্পন্দৈরিবাভিন্নৈর্ব্যবহারৈশ্চ তন্ময়ি || ২৭||
অহং তু সন্ময়স্তেষাং স্বপ্নঃ স্বপ্নবতামিব |
তে তু নূনমসন্তো মে সুষুপ্তস্বপ্নকা ইব || ২৮||
তৈস্তু যো ব্যবহারো মে তদ্ব্রহ্ম ব্রহ্মণি স্থিতম্ |
তে যৎপশ্যন্তি পশ্যন্তু তত্তৈরলমলং মম || ২৯||
অহমাত্মনি নৈবাস্মি ব্রহ্মসত্তেয়মাততা |
ৎবদর্থং সমুদেতীব তথারূপৈব বাগিয়ম্ || ৩০||
অবিরুদ্ধবিরুদ্ধস্য শুদ্ধসংবিন্ময়াত্মনঃ |
ন ভোগেচ্ছা ন মোক্ষেচ্ছা হৃদি স্ফুরতি তদ্বিদঃ || ৩১||
স্বভাবমাত্রায়ত্তেঽস্মিন্বন্ধমোক্ষক্রমে নৃণাম্ |
কদর্থনেত্যহো মোহাদ্গোষ্পদেঽপ্যুদধিভ্রমঃ || ৩২||
স্বভাবসাধনে মোক্ষেঽভাবোপশমরূপিণি |
ন ধনান্যুপকুর্বন্তি ন মিত্রাণি ন চ ক্রিয়াঃ || ৩৩||
তৈলবিন্দুর্ভবত্যুচ্চৈশ্চক্রমপ্পতিতো যথা |
তথাশু চেত্যসংকল্পে স্থিতা ভবতি চিজ্জগৎ || ৩৪||
জাগ্রতি স্বপ্নবৃত্তান্তস্থিতির্যাদৃগ্রসা স্মৃতৌ |
তাদৃগ্রসাহংৎবজগজ্জালসংস্থা বিবেকিনঃ || ৩৫||
তেনৈবাভ্যাসয়োগেন যাতি তত্তনুতাং তথা |
যথা নাহং ন সংসারঃ শান্তমেবাবশিষ্যতে || ৩৬||
যদা যদা স্বভাবার্কঃ স্থিতিমেতি তদা তদা |
ভোগান্ধকারো গলতি ন সন্নপ্যনুভূয়তে || ৩৭||
মোহমহত্তারহিতঃ
স্ফুরতি মৃতৌ ভবতি ভাসতে চ তথা |
বুদ্ধ্যাদিকরণনিকরো
যস্মাদ্দীপাদিবালোকঃ || ৩৮||
ইত্যার্ষে শ্রীবাসিষ্ঠমহারামায়ণে
বাল্মিকীয়ে দেবদূতোক্তে মোক্ষোপায়ে নির্বাণপ্রকরণে
উত্তরার্ধে বসিষ্ঠগীতাসু স্বভাববিশ্রান্তিয়োগোপদেশো
নামৈকোনচৎবারিংশঃ সর্গঃ || ৩৯||

|| সর্গঃ ৪০ ||
শ্রীবসিষ্ঠ উবাচ –
রূপালোকমনস্কারবুদ্ধ্যাদীন্দ্রিয়বেদনম্ |
স্বরূপং বিদুরম্লানমস্বভাবস্য বস্তুনঃ || ১||
অস্বভাবতনুৎবেন স্বভাবস্থিতিরাততা |
যদোদেতি তদা সর্গো ভ্রমাভঃ প্রতিভাসতে || ২||
যদা স্বভাববিশ্রান্তিঃ স্থিতিমেতি শমাত্মিকা |
জগদ্দৃশ্যং তদা স্বপ্নঃ সুষুপ্ত ইব শাম্যতি || ৩||
ভোগা ভবমহারোগা বন্ধবো দৃঢবন্ধনম্ |
অনর্থায়ার্থসংপত্তিরাত্মনাত্মনি শাম্যতাম্ || ৪||
অস্বভাবাত্মতা সর্গঃ স্বভাবৈকাত্মতা শিবঃ |
ভূয়তাং পরমব্যোম্না শাম্যতাং মেহ তাম্যতাম্ || ৫||
নাত্মানমবগচ্ছামি ন দৃশ্যং চ জগদ্ভ্রমম্ |
ব্রহ্ম শান্তং প্রবিষ্টোঽস্মি ব্রহ্মৈবাস্মি নিরাময়ঃ || ৬||
ৎবমেব পশ্যসি ৎবন্ত্বং সত্ত্বং শব্দার্থজৃম্ভিতম্ |
পশ্যামি শান্তমেবাহং কেবলং পরমং নভঃ || ৭||
ব্রহ্মণ্যেব পরাকাশে রূপালোকমনোময়াঃ |
বিভ্রমাস্তব সংজাতকল্পাঃ স্পন্দা ইবানিলে || ৮||
ব্রহ্মাত্মা বেত্তি নো সর্গং সর্গাত্মা ব্রহ্ম বেত্তি নো |
সুষুপ্তো বেত্তি নো স্বপ্নং স্বপ্নস্থো ন সুষুপ্তকম্ || ৯||
প্রবুদ্ধো ব্রহ্মজগতোর্জাগ্রৎস্বপ্নদৃশোরিব |
রূপং জানাতি ভারূপং জীবন্মুক্তঃ প্রশান্তধীঃ || ১০||
যথাভূতমিদং সর্বং পরিজানাতি বোধবান্ |
সংশাম্যতি চ শুদ্ধাত্মা শরদীব পয়োধরঃ || ১১||
স্মৃতিস্থঃ কল্পনস্থো বা যথাখ্যাতশ্চ সংগরঃ |
সদসদ্ভ্রান্ততামাত্রস্তথাহংৎবজগদ্ভ্রমঃ || ১২||
আত্মন্যপি নাস্তি হি যা
দ্রষ্টা যস্যা ন বিদ্যতে কশ্চিৎ |
ন চ শূন্যং নাশূন্যং
ভ্রান্তিরিয়ং ভাসতে সেতি || ১৩||
ইত্যার্ষে শ্রীবাসিষ্ঠমহারামায়ণে
বাল্মিকীয়ে দেবদূতোক্তে মোক্ষোপায়ে নির্বাণপ্রকরণে
উত্তরার্ধে বসিষ্ঠগীতাসু আত্মবিশ্রান্তিকথনং
নাম চৎবারিংশঃ সর্গঃ || ৪০||