দক্ষিণামূর্তিবর্ণমালাস্তোত্রম্

.. দক্ষিণামূর্তিবর্ণমালাস্তোত্রম্ ..
৐মিত্যেতদ্যস্য বুধৈর্নাম গৃহীতং
যদ্ভাসেদং ভাতি সমস্তং বিযদাদি .
যস্যাজ্ঞাতঃ স্বস্বপদস্থা বিধিমুখ্যা-
স্তং প্রত্যঞ্চং দক্ষিণবক্ত্রং কলযামি .. ১..
নম্রাঙ্গাণাং ভক্তিমতাং যঃ পুরুষার্থা-
ন্দত্বা ক্ষিপ্রং হন্তি চ তত্সর্ববিপত্তীঃ .
পাদাম্ভোজাধস্তনিতাপস্মৃতিমীশং
তং প্রত্যঞ্চং দক্ষিণবক্ত্রং কলযামি .. ২..
মোহধ্বস্ত্যৈ বৈণিকবৈযাসিকিমুখ্যাঃ
সংবিন্মুদ্রাপুস্তকবীণাক্ষগুণান্যম্ .
হস্তাম্ভোজৈর্বিভ্রতমারাধিতবন্ত-
স্তং প্রত্যঞ্চং দক্ষিণবক্ত্রং কলযামি .. ৩..
ভদ্রারূঢং ভদ্রদমারাধযিতৃণাং
ভক্তিশ্রদ্ধাপূর্বকমীশং প্রণমন্তি .
আদিত্যা যং বাঞ্ছিতসিদ্ধ্যৈ করুণাব্ধিং
তং প্রত্যঞ্চং দক্ষিণবক্ত্রং কলযামি .. ৪..
গর্ভান্তঃস্থাঃ প্রাণিন এতে ভবপাশ-
চ্ছেদে দক্ষং নিশ্চিতবন্তঃ শরণং যম্ .
আরাধ্যাঙ্ঘ্রিপ্রস্ফুরদম্ভোরুহযুগ্মং
তং প্রত্যঞ্চং দক্ষিণবক্ত্রং কলযামি .. ৫..
বক্ত্রং ধন্যাঃ সংসৃতিবার্ধেরতিমাত্রা-
দ্ভীতাঃ সন্তঃ পূর্ণশশাঙ্কদ্যুতি যস্য .
সেবেন্তেঽধ্যাসীনমনন্তং বটমূলং
তং প্রত্যঞ্চং দক্ষিণবক্ত্রং কলযামি .. ৬..
তেজঃস্তোমৈরঙ্গদসংঘট্টিতভাস্ব-
ন্মাণিক্যোত্থৈর্ভাসিতবিশ্বো রুচিরৈর্যঃ .
তেজোমূর্তিং খানিলতেজঃপ্রমুখাব্ধিং
তং প্রত্যঞ্চং দক্ষিণবক্ত্রং কলযামি .. ৭..
দধ্যাজ্যাদিদ্রব্যককর্মাণ্যখিলানি
ত্যক্ত্বা কাঙ্ক্ষা কর্মফলেষ্বত্র করোতি .
যজ্জিজ্ঞাসাং রূপফলার্থী ক্ষিতিদেব-
স্তং প্রত্যঞ্চং দক্ষিণবক্ত্রং কলযামি .. ৮..
ক্ষিপ্রং লোকে যং ভজমানঃ পৃথুপুণ্যঃ
প্রধ্বস্তাধিঃ প্রোজ্ঝিতসংসৃত্যখিলার্তিঃ .
প্রত্যগ্ভূতং ব্রহ্ম পরং সন্রমতে য-
স্তং প্রত্যঞ্চং দক্ষিণবক্ত্রং কলযামি .. ৯..
ণানেত্যেবং যন্মনুমধ্যস্থিতবর্ণা-
ন্ভক্তাঃ কালে বর্ণগৃহীত্যৈ প্রজপন্তঃ .
মোদন্তে সংপ্রাপ্তসমস্তশ্রুতিতন্ত্রা-
স্তং প্রত্যঞ্চং দক্ষিণবক্ত্রং কলযামি .. ১০..
মূর্তিশ্ছাযানির্জিতমন্দাকিনিকুন্দ-
প্রালেযাম্ভোরাশিসুধাভূতিসুরেভা .
যস্যাভ্রাভা হাসবিধৌ দক্ষশিরোধি-
স্তং প্রত্যঞ্চং দক্ষিণবক্ত্রং কলযামি .. ১১..
তপ্তস্বর্ণচ্ছাযজটাজূটকটাহ-
প্রোদ্যদ্বীচীবল্লিবিরাজত্সুরসিন্ধুম্ .
নিত্যং সূক্ষ্মং নিত্যনিরস্তাখিলদোষং
তং প্রত্যঞ্চং দক্ষিণবক্ত্রং কলযামি .. ১২..
যেন জ্ঞাতেনৈব সমস্তং বিদিতং স্যা-
দ্যস্মাদন্যদ্বস্তু জগত্যাং শশশৃঙ্গম্ .
যং প্রাপ্তানাং নাস্তি পরং প্রাপ্যমনাদিং
তং প্রত্যঞ্চং দক্ষিণবক্ত্রং কলযামি .. ১৩..
মত্তো মারো যস্য ললাটাক্ষিভবাগ্নি-
স্ফূর্জত্কীলপ্রোষিতভস্মীকৃতদেহঃ .
তদ্ভস্মাসীদ্যস্য সুজাতঃ পটবাস-
স্তং প্রত্যঞ্চং দক্ষিণবক্ত্রং কলযামি .. ১৪..
হ্যম্ভোরাশৌ সংসৃতিরূপে লুঠতাং ত-
ত্পারং গন্তুং যত্পদভক্তির্দৃঢনৌকা .
সর্বারাধ্যং সর্বগমানন্দপযোনিধিং
তং প্রত্যঞ্চং দক্ষিণবক্ত্রং কলযামি .. ১৫..
মেধাবী স্যাদিন্দুবতংসং ধৃতবীণং
কর্পূরাভং পুস্তকহস্তং কমলাক্ষম্ .
চিত্তে ধ্যাযন্যস্য বপুর্দ্রাঙ্নিমিষার্ধং
তং প্রত্যঞ্চং দক্ষিণবক্ত্রং কলযামি .. ১৬..
ধাম্নাং ধাম প্রৌঢরুচীনাং পরমং য-
ত্সূর্যাদীনাং যস্য স হেতুর্জগদাদেঃ .
এতাবান্যো যস্য ন সর্বেশ্বরমীড্যং
তং প্রত্যঞ্চং দক্ষিণবক্ত্রং কলযামি .. ১৭..
প্রত্যাহারপ্রাণনিরোধাদিসমর্থৈ-
র্ভক্তৈর্দান্তৈঃ সংযতচিত্তৈর্যতমানৈঃ .
স্বাত্মত্বেন জ্ঞাযত এব ত্বরযা য-
স্তং প্রত্যঞ্চং দক্ষিণবক্ত্রং কলযামি .. ১৮..
জ্ঞাংশীভূতান্প্রাণিন এতান্ফলদাতা
চিত্তান্তঃস্থঃ প্রেরযতি স্বে সকলেঽপি .
কৃত্যে দেবঃ প্রাক্তনকর্মানুসরঃ সং-
স্তং প্রত্যঞ্চং দক্ষিণবক্ত্রং কলযামি .. ১৯..
প্রজ্ঞামাত্রং প্রাপিতসংবিন্নিজভক্তং
প্রাণাক্ষাদেঃ প্রেরযিতারং প্রণবার্থম্ .
প্রাহুঃ প্রাজ্ঞা বিদিতানুশ্রবতত্ত্বা-
স্তং প্রত্যঞ্চং দক্ষিণবক্ত্রং কলযামি .. ২০..
যস্যাংজ্ঞানাদেব নৃণাং সংসৃতিবোধো
যস্য জ্ঞানাদেব বিমোক্ষো ভবতীতি .
স্পষ্টং ব্রূতে বেদশিরো দেশিকমাদ্যং
তং প্রত্যঞ্চং দক্ষিণবক্ত্রং কলযামি .. ২১..
ছন্নেঽবিদ্যারূপপটেনৈব চ বিশ্বং
যত্রাধ্যস্তং জীবপরেশত্বমপীদম্ .
ভানোর্ভানুষ্বম্বুবদস্তাখিলভেদং
তং প্রত্যঞ্চং দক্ষিণবক্ত্রং কলযামি .. ২২..
স্বাপস্বপ্নৌ জাগ্রদবস্থাপি ন যত্র
প্রাণশ্বেতঃ সর্বগতো যঃ সকলাত্মা .
কূটস্থো যঃ কেবলসচ্চিত্সুখরূপ-
স্তং প্রত্যঞ্চং দক্ষিণবক্ত্রং কলযামি .. ২৩..
হা হেত্যেবং বিস্মযমীযুর্মুনিমুখ্যা
জ্ঞাতে যস্মিন্স্বাত্মতযানাত্মবিমোহঃ .
প্রত্যগ্ভূতে ব্রহ্মণি যাতঃ কথমিত্থং
তং প্রত্যঞ্চং দক্ষিণবক্ত্রং কলযামি .. ২৪..
যৈষা রম্যৈর্মত্তমযূরাভিধবৃত্তৈ-
রাদৌ ক্লৃপ্তা যন্মনুবর্ণৈর্মুনিভঙ্গী .
তামেবৈতাং দক্ষিণবক্ত্রঃ কৃপযাসা-
বূরীকুর্যাদ্দেশিকসম্রাট্ পরমাত্মা .. ২৫..
ইতি শ্রীমত্পরমহংসপরিব্রজকাচার্যস্য
শ্রিগোবিন্দভগবত্পূজ্যপাদশিষ্যস্য
শ্রীমচ্ছংকরভগবতঃ কৃতৌ
শ্রীদক্ষিণামূর্তিবর্ণমালাস্তোত্রং সংপূর্ণম্ ..