ধনুর্বেদ (উপবেদ)

.. ধনুর্বেদ ..
          অথ ধনুর্বেদঃ
ঈশ্বরোক্তাদ্ধনুর্বেদাদ্ব্যাসস্যাপি সুভাষিতাত্ .
পদান্যাকৃষ্য রচিতো গ্রন্থঃ সংক্ষেপতো মযা .. ১.. 1714
বিনা শার্ঙ্গধরং নান্যো ধনুর্বেদার্থতত্ত্ববিত্ .
যতঃ স্বপ্নে নিশি প্রাপ্তা শিবাত্তত্ত্ববিচারণা .. ২.. 1715
অতঃ সংদেহদোলাযাং রোপণীযং ন মানসম্ .
গ্রন্থেস্মিংশ্চাপচতুরৈর্বীরচিন্তামণৌ ক্বচিত্ .. ৩.. 1716
যস্যাভ্যাসপ্রসাদেন নিষ্পদ্যন্তে ধনুর্ধরাঃ .
জেতারঃ পরসৈন্যানাং তস্যাভ্যাসো বিধীযতাম্ .. ৪.. 1717
একোঽপি যত্র নগরে প্রসিদ্ধঃ স্যাদ্ধনুর্ধরঃ .
ততো যান্ত্যরযো দূরং মৃগাঃ সিংহগৃহাদিব .. ৫.. 1718
——————————————————————————–
          অথ ধনুর্ধারণবিধিঃ
আচার্যেণ ধনুর্দেযং ব্রাহ্মণে সুপরীক্ষিতে .
লুব্ধে ধূর্তে কৃতঘ্নে চ মন্দবুদ্ধৌ ন দীযতে .. ৬.. 1719
ব্রাহ্মণায ধনুর্দেযং খড্গং বৈ ক্ষত্রিযায চ .
বৈশ্যায দাপযেত্কুন্তং গদাং শূদ্রস্য দাপযেত্ .. ৭.. 1720
ধনুশ্চক্রং চ কুন্তং চ খড্গং চ চ্ছুরিকা গদা .
সপ্তমং বাহুযুদ্ধং স্যাদেবং যুদ্ধানি সপ্তধা .. ৮.. 1721
আচার্যঃ সপ্তযুদ্ধঃ স্যাচ্চতুর্যুদ্ধস্তু ভার্গবঃ .
দ্বাভ্যাং চৈব ভবেদ্যোধ একেন গণকো ভবেত্ .. ৯.. 1722
হস্তঃ পুনর্বসুঃ পুষ্যো রোহিণী চোত্তরাত্রযম্ .
অনুরাধাশ্বিনী চৈব রেবতী দশমী তথা .. ১০ . 1723
জন্মস্থে চ তৃতীযে চ ষষ্ঠে বৈ সপ্তমে তথা .
দশমৈকাদশে চন্দ্রে সর্বকর্মাণি কারযেত্ .. ১১.. 1724
তৃতীযা পঞ্চমী চৈব সপ্তমী দশমী তথা .
ত্রযোদশী দ্বাদশী চ তিথযস্তু শুভা মতাঃ .. ১২.. 1725
সূর্যবারঃ শুক্রবারো গুরুবারস্তথৈব চ .
এতদ্বারত্রযং ধন্যং প্রারম্ভে শস্ত্রকর্মণাম্ .. ১৩.. 1726
এভির্দিনৈস্তু শিষ্যায গুরুঃ শস্ত্রাণি দাপযেত্ .
সংতর্প্য দানহোমাভ্যাং সুরান্বেদবিধানতঃ .. ১৪.. 1727
ব্রাহ্মণান্ভোজযেত্তত্র কুমারীশ্চাপ্যনেকশঃ .
তাপসানর্চযেদ্ ভক্ত্যা যে চান্যে শিবযোগিনঃ .. ১৫.. 1728
অন্নপানাদিভিশ্চৈব বস্ত্রালংকারভূষণৈঃ .
গন্ধমাল্যৈর্বিচিত্রৈশ্চ গুরুং তত্র প্রপূজযেত্ .. ১৬.. 1729
কৃতোপবাসঃ শিষ্যস্তু মৃগাজিনপরিগ্রহঃ .
বদ্ধাঞ্জলিপুটস্তত্র যাচযেদ্গুরুতো ধনুঃ .. ১৭.. 1730
অঙ্গন্যাসস্ততঃ কার্যঃ শিবোক্তঃ সিদ্ধিমিচ্ছতা .
আচার্যেণ চ শিষ্যস্য পাপঘ্নো বিঘ্ননাশনঃ .. ১৮.. 1731
শিখাস্থানে ন্যসেদীশং বাহুযুগ্মে চ কেশবম্ .
ব্রহ্মাণং নাভিকূপে তু জঙ্ঘযোশ্চ গণাধিপম্ .. ১৯.. 1732
৐ হোং শিখাস্থানে শংকরায নমঃ .
৐ হোং বাহ্বোঃ কেশবায নমঃ .
৐ হোং নাভিমধ্যে ব্রহ্মণে নমঃ .
৐ হোং জঙ্ঘযোর্গণপতযে নমঃ . 1733
ঈদৃশং কারযেন্ন্যাসং যেন শ্রেযো ভবিষ্যতি .
অন্যেঽপি দুষ্টমন্ত্রেণ ন হিংসন্তি কদাচন .. ২০ . 1734
শিষ্যায মানুষং চাপং ধনুর্মন্ত্রাভিমন্ত্রিতম্ .
কাণ্ডাত্কাণ্ডাভিমন্ত্রেণ দদ্যাদ্বেদবিধানতঃ .. ২১.. 1735
প্রথমং পুষ্পবেধং চ ফলহীনেন পত্রিণা .
ততঃ ফলযুতেনৈব মত্স্যবেধং চ কারযেত্ .. ২২.. 1736
মাংসবেধং ততঃ কুর্যাদেবং বেধো ভবেত্রিধা .
এতৈর্বেধৈঃ কৃতৈঃ পুংসাং শরাঃ স্যুঃ সর্বসাধকাঃ .. ২৩.. 1737
বেধনে চৈব মাংসস্য শরপাতো যদা ভবেত্ .
পূর্বদিগ্ভাগমাশ্রিত্য তদা স্যাদ্বিজযী সুখী .. ২৪.. 1738
দক্ষিণে কলহো ঘোরো বিদেশগমনং পুনঃ .
পশ্চিমে ধনধান্যং চ সর্বং চৈবোত্তরে শুভম্ .. ২৫.. 1739
ঐশান্যাং পতনং দুষ্টং বিদিশোঽন্যাশ্চ শোভনাঃ .
হর্ষপুষ্টিকরাশ্চৈব সিদ্ধিদাঃ শস্ত্রকর্মণি .. ২৬.. 1740
এবং বেধত্রযং কুর্যাচ্ছঙ্খদুন্দুভিনিঃ স্বনৈঃ .
ততঃ প্রণম্য গুরবে ধনুর্বাণান্নিবেদযেত্ .. ২৭.. 1741
——————————————————————————–
            অথ চাপপ্রমাণম্
প্রথমং যৌগিকং চাপং যুদ্ধচাপং দ্বিতীযকম্ .
নিজবাহুবলান্মানাত্কিংচিদূনং শুভং ধনুঃ .. ২৮.. 1742
বরং প্রাণাধিকো ধন্বী ন তু প্রাণাধিকং ধনুঃ .
ধনুষা পীড্যমানস্তু ধন্বী লক্ষ্যং ন পশ্যতি .. ২৯.. 1743
অতো নিজবলোন্মানং চাপং স্যাচ্ছুভকারকম্ .
দেবানামুত্তমং চাপং ততো ন্যূনং চ মানবম্ .. ৩০ . 1744
অর্ধপঞ্চমহস্তং তু শ্রেষ্ঠং চাপং প্রকীর্তিতম্ .
তদ্বিজ্ঞেযং ধনুর্দিব্যং শংকরেণ ধৃতং পুরা .. ৩১.. 1745
তস্মাত্পরশুরামেণ ততো দ্রোণেন ধারিতম্ .
দ্রোণাদ্ গৃহীতং পার্থেন ততঃ সাত্যকিনা ধৃতম্ .. ৩২.. 1746
কৃতে যুগে মহাদেবস্ত্রেতাযাং চাপি রাঘবঃ .
দ্বাপরে দ্রোণবিপ্রশ্চ দৈবং চাপমধারযত্ .. ৩৩.. 1747
চতুর্বিশাঙ্গুলো হস্তশ্চতুর্হস্তং ধনুঃ স্মৃতম্ .
তদ্ভবেন্মানবং চাপং সর্বলক্ষণসংযুতম্ .. ৩৪.. 1748
ত্রিপর্ব পঞ্চপর্ব চ সপ্তপর্ব প্রকীর্তিতম্ .
নবপর্ব চ কোদণ্ডং চতুর্ধা শুভকারকম্ .. ৩৫.. 1749
চতুঃপর্ব চ ষট্পর্ব অষ্টপর্ব বিবর্জযেত্ .
কেষাংচিচ্চ ভবেচ্চাপং বিতস্তিনবসংমিতম্ .. ৩৬.. 1750
অতিজীর্ণমপক্বং চ জ্ঞাতিধৃষ্টং তথৈব চ .
দগ্ধং ছিদ্রং ন কর্তব্যং বাহ্যাভ্যন্তরহস্তকম্ .. ৩৭.. 1751
গুণহীনং গুণাক্রান্তং কাণ্ডদোষসমন্বিতম্ .
গলগ্রন্থি ন কর্তব্যং তলমধ্যে তথৈব চ .. ৩৮.. 1752
অপক্বং ভঙ্গমাযাতি অতিজীর্ণং তু কর্কশম্ .
জ্ঞাতিধৃষ্টং তু সোদ্বেগং কলহো বান্ধবৈঃ সহ .. ৩৯.. 1753
দগ্ধেন দহ্যতে বেশ্ম ছিদ্রং যুদ্ধবিনাশনম্ .
বাহ্যে লক্ষ্যং ন লভ্যেত তথৈবাভ্যন্তরেপি বা .. ৪০ . 1754
হীনে তু সংধিতে বাণে সংগ্রামে ভঙ্গকারকম্ .
আক্রান্তে তু পুনঃ ক্বাপি ন লক্ষ্যং প্রাপ্যতে দৃঢম্ .. ৪১.. 1755
গলগ্রন্থি তলগ্রন্থি ঘনহানিকরং ধনুঃ .
এভির্দোষৈর্বিনির্মুক্তং সর্বকার্যকরং স্মৃতম্ .. ৪২.. 1756
শার্ঙ্গ পুনর্ধনুর্দিব্যং বিষ্ণোঃ পরমমাযুধম্ .
বিতস্তিসপ্তসংমানং নির্মিতং বিশ্বকর্মণা .. ৪৩.. 1757
ন চ স্বর্গে ন পাতালে ন ভূমৌ কস্যচিত্করে .
তদ্ধনুর্বশমাযাতি মুক্ত্বৈকং পুরুষোত্তমম্ .. ৪৪.. 1758
পৌরুষেযং তু যচ্ছার্ঙ্গ বহুবত্সরশোষিতম্ .
বিতস্তিভিঃ সার্ধষড্ভির্মিতং সর্বার্থসাধনম্ .. ৪৫.. 1759
প্রাযো যোগ্যং ধনুঃ শার্ঙ্গ গজারোহাশ্বসাদিনাম্ .
রথিনাং চ পদাতীনাং বাংশং চাপং প্রকীর্তিতম্ .. ৪৬.. 1760
——————————————————————————–
           অথ গুণলক্ষণানি
গুণানাং লক্ষণং বক্ষ্যে যাদৃশং কারযেদ্গুণম্ .
পট্টসূত্রো গুণঃ কার্যঃ কনিষ্ঠামানসংমিতঃ .. ৪৭.. 1761
ধনুঃপ্রমাণো নিঃসন্ধিঃ শুদ্ধৈস্ত্রিগুণতন্তুভিঃ .
বর্তিতঃ স্যাদ্গুণঃ শ্লক্ষ্ণঃ সর্বকর্মসহো যুধি .. ৪৮.. 1762
অভাবে পট্টসূত্রস্য হারিণী স্নাযুরিষ্যতে .
গুণার্থমথবা গ্রাহ্যাঃ স্নাযবো মহিষীগবাম্ .. ৪৯.. 1763
তত্কালহতগোকর্ণচর্মণা ছাগলেন বা .
নির্লোম্না তন্তুরূপেণ কুর্যাদ্ধা গুণমুত্তমম্ .. ৫০ . 1764
পক্ববংশত্বচা কার্যো গুণস্তু স্থাবরো দৃঢঃ .
পট্টসূত্রেণ সংনদ্ধঃ সর্বকর্মসহো যুধি .. ৫১.. 1765
প্রাপ্তে ভাদ্রপদে মাসি ত্বগর্কস্য প্রশস্যতে .
তস্যাস্তত্র গুণঃ কার্যঃ পবিত্রঃ স্থাবরো দৃঢঃ .. ৫২.. 1766
বৃত্তার্কসূত্রতন্তূনাং হস্তাস্ত্বষ্টাদশ স্মৃতাঃ .
সদ্বৃত্তং ত্রিগুণং কার্যং প্রমাণোঽযং গুণে স্মৃতঃ .. ৫৩.. 1767
——————————————————————————–
            অথ শরলক্ষণানি
অতঃ পরং প্রবক্ষ্যামি শরাণাং লক্ষণং শুভম্ .
স্থূলং ন চাতিসূক্ষ্মং চ ন পক্বং ন কুভূমিজম্ .
হীনগ্রন্থিবিদীর্ণং চ বর্জযেদীদৃশং শরম্ .. ৫৪.. 1768
পূর্ণগ্রন্থি সুপক্বং চ পাণ্ডুরং সমযাহৃতম্ .
কঠিনং বর্তুলং কাণ্ডং গৃহ্ণীযাত্সুপ্রদেশজম্ .. ৫৫.. 1769
দ্বৌ হস্তৌ মুষ্টিহীনৌ তু দৈর্ঘ্যে স্থৌল্যে কনিষ্ঠিকা .
বিধেযা শরমানেষু যন্ত্রেষ্বাকর্ষযেত্ততঃ .. ৫৬.. 1770
কঙ্কহংসশশাদানাং মত্স্যাদক্রৌঞ্চকেকিনাম্ .
গৃধ্রাণাং কুক্কুটানাং চ পক্ষা এতেষু শোভনাঃ .. ৫৭.. 1771
একৈকস্য শরস্যৈব চতুষ্পক্ষাণি যোজযেত্ .
ষডঙ্গুলপ্রমাণেন পক্ষচ্ছেদং চ কারযেত্ .. ৫৮.. 1772
দশাঙ্গুলমিতাঃ পক্ষাঃ শার্ঙ্গচাপস্য মার্গণে .
যোজ্যা দৃঢাশ্চতুঃসংখ্যাঃ সংনদ্ধাঃ স্নাযুতন্তুভিঃ .. ৫৯.. 1773
শরাশ্চ ত্রিবিধা জ্ঞেযাঃ স্ত্রী পুমাংশ্চ নপুংসকঃ .
অগ্রে স্থূলো ভবেন্নারী পশ্চাত্স্থূলো ভবেত্পুমান্ .. ৬০.. 1774
সমং নপুংসকং জ্ঞেযং তল্লক্ষ্যার্থং প্রশস্যতে .
দূরাপাতং যুবত্যা চ পুরুষো ভেদযেদ্ দৃঢম্ .. ৬১.. 1775
——————————————————————————–
            অথ ফললক্ষণানি
ফলং তু শুদ্ধলোহস্য সুধারং তীক্ষ্ণমক্ষতম্ .
যোজযেদ্বজ্রলেপেন শরে পক্ষানুমানতঃ .. ৬২.. 1776
আরামুখং ক্ষুরপ্রং চ গোপুচ্ছং চার্ধচন্দ্রকম্ .
সূচিমুখং চ ভল্লং চ বত্সদন্তং দ্বিভল্লকম্ .. ৬৩.. 1777
কর্ণিকং কাকতুণ্ডং চ তথান্যান্যপ্যনেকশঃ .
ফলানি দেশভেদেষু ভবন্তি বহুরূপতঃ .. ৬৪.. 1778
আরামুখেন বৈ চর্ম ক্ষুরপ্রেণ চ কার্মুকম্ .
সূচীমুখেন কবচমর্ধচন্দ্রেণ মস্তকম্ .. ৬৫.. 1779
ভল্লেন হৃদযং বেধ্যং দ্বিভল্লেন গুণঃ শরঃ .
লোহং চ কাকতুণ্ডেন লক্ষ্যং গোপুচ্ছকেন চ .. ৬৬.. 1780
অন্যদ্গোপুচ্ছকং জ্ঞেযং শুদ্ধকাষ্ঠবিনির্মিতম্ .
মুখে চ লোহকণ্টেন বেধ্যং ত্র্যঙ্গুলসংমিতম্ .. ৬৭.. 1781
——————————————————————————–
            অথ ফলপাযনম্
ফলস্য পাযনং বক্ষ্যে দিব্যৌষধিবিলেপনৈঃ .
যেন দুর্ভেদ্যবর্মাণি ভেদযেত্তরুপর্ণবত্ .. ৬৮.. 1782
পিপ্পলী সৈন্ধবং কুষ্ঠং গোমূত্রেণ তু পেষযেত্ .
অনেন লেপযেচ্ছস্ত্রং লিপ্তং চাগ্নৌ প্রতাপযেত্ .. ৬৯.. 1783
অবিশীতমনাবিদ্ধং পীতনষ্টং তথৌষধম্ .
ততো নির্বাপিতং তৈলে লোহং তত্র বিশিষ্যতে .. ৭০.. 1784
পঞ্চভির্লবণৈঃ পিষ্টৈর্মধুসিক্তৈঃ সসর্ষপৈঃ .
এভিঃ প্রলেপযেচ্ছস্ত্রং লিপ্তং চাগ্নৌ প্রতাপযেত্ .. ৭১.. 1785
শিখিগ্রীবানুবর্ণাভং তপ্তপীতং তথৌষধম্ .
ততস্তু বিমলং তোযং পাযযেচ্ছস্ত্রমুত্তমম্ .. ৭২.. 1786
——————————————————————————–
            অথ নারাচনালীকৌ
সর্বলোহাস্তু যে বাণা নারাচাস্তে প্রকীর্তিতাঃ .
পঞ্চভিঃ পৃথুলৈঃ পক্ষৈর্যুক্তাঃ সিদ্ধ্যন্তি কস্যচিত্ .. ৭৩.. 1787
নালীকা লঘবো বাণা তলযন্ত্রেণ চোদিতাঃ .
অত্যুচ্চদূরপাতেষু দুর্গযুদ্ধেষু তে মতাঃ .. ৭৪.. 1788
——————————————————————————–
            অথ স্থানমুষ্টযাকর্ষণলক্ষণানি
স্থানান্যষ্টৌ বিধেযানি যোজনে ভিন্নকর্মণাম্ .
মুষ্টযঃ পঞ্চ সমাখ্যাতা ব্যাযাঃ পঞ্চ প্রকীর্তিতা .. ৭৫.. 1789
অগ্রতো বামপাদং চ দক্ষিণং জানু কুঞ্চিতম্ .
আলীঢং তু প্রকর্তব্যং হস্তদ্বযসবিস্তরম্ .. ৭৬.. 1790
প্রত্যালীঢং তু কর্তব্যং সব্যং চেবানুকুঞ্চিতম্ .
দক্ষিণং চ পুরস্তদ্বদ্দূরপাতে বিশিষ্যতে .. ৭৭.. 1791
পাদৌ সুবিস্তরৌ কার্যৌ সমৌ হস্তপ্রমাণতঃ .
বিশাখস্থানকং জ্ঞেযং কূটলক্ষ্যস্য বেধনে .. ৭৮.. 1792
সমপাদে সমৌ পাদৌ নিষ্কম্পৌ চ সুসংগতৌ .
অসমে চ পুরো বামো হস্তমাত্রে নতং বপুঃ .. ৭৯.. 1793
আকুঞ্চিতোরূ দ্বৌ যত্র জানুভ্যাং ধরণিং গতৌ .
দর্দুরক্রমমিত্যাহুঃ স্থানকং দৃঢভেদনে .. ৮০.. 1794
সব্যং জানু গতং ভূমৌ দক্ষিণং চ সকুঞ্চিতম্ .
অগ্রতো যত্র বাতব্যং তং বিদ্যাদ্গরুডক্রমম্ .. ৮১.. 1795
পদ্মাসনং প্রসিদ্ধং তু উপবিশ্য যথাক্রমম্ .
ধন্বিনাং তত্তু বিজ্ঞেযং স্থানকং শুভলক্ষণম্ .. ৮২.. 1796
——————————————————————————–
            অথ গুণমুষ্টযঃ
পতাকা বজ্রমুষ্টিশ্চ সিংহকণীং তথৈব চ .
মত্সরী কাকতুণ্ডী চ যোজনীযা যথাক্রমম্ .. ৮৩.. 1797
দীর্ঘা তু তর্জনী যত্র আশ্রিতাঙ্গুষ্ঠমূলকম্ .
পতাকা সা চ বিজ্ঞেযা নলিকা দূরমোক্ষণে .. ৮৪.. 1798
তর্জনী মধ্যমামধ্যমঙ্গুষ্ঠো বিশতে যদি .
বজ্রমুষ্টিস্তু সা জ্ঞেযা স্থূলে নারাচমোক্ষণে .. ৮৫.. 1799
অঙ্গুষ্ঠনখমূলে তু তর্জন্যগ্রং সুসংস্থিতম্ .
মত্সরী সা চ বিজ্ঞেযা চিত্রলক্ষ্যস্য বেধনে .. ৮৬.. 1800
অঙ্গুষ্ঠাগ্রে তু তর্জন্যা মুখং যত্র নিবেশিতম্ .
কাকতুণ্ডী চ বিজ্ঞেযা সূক্ষ্মলক্ষ্যেষু যোজিতা .. ৮৭.. 1801
——————————————————————————–
            অথ ধনুর্মুষ্টিসংধানম্
সংধানং ত্রিবিধং প্রোক্তমধ ঊর্ধ্বং সমং তথা .
যোজযেত্ ত্রিপ্রকারং হি কার্যেষ্বপি যথাক্রমম্ .. ৮৮.. 1802
অধশ্চ দূরপাতিত্বং সমে লক্ষ্যং সুনিশ্চিতম্ .
দৃঢস্ফোটং প্রকুর্বীত ঊর্ধ্বসংস্থানযোগতঃ .. ৮৯.. 1803
——————————————————————————–
            অথ ব্যাযাঃ
কৈশিকঃ কেশমূলে চেচ্ছরঃ শৃঙ্গে চ সাত্ত্বিকঃ .
শ্রবণে বত্সকর্ণশ্চ গ্রীবাযাং ভরতো ভবেত্ .. ৯০.. 1804
অংসকে স্কন্ধনামা চ ব্যাযাঃ পঞ্চ প্রকীর্তিতাঃ .
কৈশিকশ্চিত্রযুদ্ধেষু অধোলক্ষ্যেষু সাত্ত্বিকঃ .. ৯১.. 1805
বত্সকর্ণঃ স বিজ্ঞেযো ভরতো দৃঢভেদনে .
দৃঢভেদে চ দূরে চ স্কন্ধনামানমুদ্দিশেত্ .. ৯২.. 1806
——————————————————————————–
            অথ লক্ষ্যম্
লক্ষ্যং চতুর্বিধং জ্ঞেযং স্থিরং চৈব চলং তথা .
বেধযেত্রিপ্রকারং তু স্থিরবেধী স উচ্যতে .. ৯৩.. 1807
আত্মানং সুস্থিরং কৃত্বা লক্ষ্যং চৈব স্থিরং বুধঃ .
বেধযেত্ ত্রিপ্রকারং তু স্থিরবেধী স উচ্যতে .. ৯৪.. 1808
চলং তু বেধযেদ্যস্তু আত্মনা স্থিরসংস্থিতঃ .
চললক্ষ্যং তু তত্প্রোক্তমাচার্যেণ সুধীমতা .. ৯৫.. 1809
ধন্বী তু চলতে যত্র স্থিরলক্ষ্যে সমাহিতঃ .
চলাচলং ভবেত্তত্র অপ্রমেযমনিন্দিতম্ .. ৯৬.. 1810
উভাবেব চলৌ যত্র লক্ষ্যং চাপি ধনুর্ধরঃ .
তদ্বিজ্ঞেযং দ্বযচলং শ্রমেণৈব হি সাধ্যতে .. ৯৭.. 1811
শ্রমেণাস্খলিতং লক্ষ্যং দূরং চ বহুভেদনম্ .
শ্রমেণ কঠিনা মুষ্টিঃ শীঘ্রসংধানমাপ্যতে .. ৯৮.. 1812
শ্রমেণ চিত্রযোধিত্বং শ্রমেণ প্রাপ্যতে জযঃ .
তস্মাদ্গুরুসমক্ষং হি শ্রমঃ কার্যো বিজানতা .. ৯৯.. 1813
প্রথমং বামহস্তেন যঃ শ্রমং কুরুতে নরঃ .
তস্য চাপক্রিযাসিদ্ধিরচিরাদেব জাযতে .. ১০০.. 1814
বামহস্তে তু সংসিদ্ধে পশ্চাদ্দক্ষিণমারভেত্ .
উভাভ্যাং চ শ্রমং কুর্যান্নারাচৈশ্চ শরৈস্তথা .. ১০১.. 1815
বামেনৈব শ্রমং কুর্যাত্সুসিদ্ধে দক্ষিণে করে .
বিশাখেনাসমেনৈব তথা ব্যাযে চ কৈশিকে .. ১০২.. 1816
উদিতে ভাস্করে লক্ষ্যং পশ্চিমাযাং নিবেশযেত্ .
অপরাহ্নে চ কর্তব্যং লক্ষ্যং পূর্বদিগাশ্রিতম্ .. ১০৩.. 1817
উত্তরেণ সদা কার্যং প্রাণস্য ন বিরোধকম্ .
সংগ্রামেণ বিনা কার্যং ন লক্ষ্যং দক্ষিণামুখম্ .. ১০৪.. 1818
ষষ্টিধন্বন্তরে লক্ষ্যং জ্যেষ্ঠলক্ষ্যং প্রকীর্তিতম্ .
চত্বারিংশন্মধ্যমং চ বিংশতিশ্চ কনিষ্ঠকম্ .. ১০৫.. 1819
শরাণাং কথিতং হ্যেতন্নারাচানামথোচ্যতে .
চত্বারিংশচ্চ ত্রিংশচ্চ ষোডশৈব ভবেত্ততঃ .. ১০৬.. 1820
চতুঃশতৈশ্চ কাণ্ডানাং যো হি লক্ষ্যং বিসর্জযেত্ .
সূর্যোদযে চাস্তমযে স জ্যেষ্ঠো ধন্বিনাং ভবেত্ .. ১০৭.. 1821
ত্রিশতৈর্মধ্যমশ্চৈব দ্বিশতাভ্যাং কনিষ্ঠকঃ .
লক্ষ্যং চ পুরুষোন্মানং কুর্যাচ্চন্দ্রকসংযুতম্ .. ১০৮.. 1822
ঊর্ধ্ববেদী ভবেজ্জ্যেষ্ঠো নাভিবেধী চ মধ্যমঃ .
যঃ পাদবেধী লক্ষ্যস্য স কনিষ্ঠো মতো মযা .. ১০৯.. 1823
——————————————————————————–
            অথানধ্যাযঃ
অষ্টমী চ অমাবাস্যা বর্জনীযা চতুর্দশী .
পূর্ণিমার্ধদিনং যাবন্নিষিদ্ধা সর্বকর্মসু .. ১১০.. 1824
অকালে গর্জিনে দেবে দুর্দিনং বাথবা ভবেত্ .
পূর্বকাণ্ডহতং লক্ষ্যমনধ্যাযং প্রচক্ষতে .. ১১১.. 1825
শ্রমং চ কুর্বতস্তত্র ভুজংগো যদি দৃশ্যতে .
অথবা ভজ্যতে চাপং যদৈব শ্রমকর্মণি .. ১১২.. 1826
ত্রুট্যতে বা গুণো যত্র প্রথমে বাণমোক্ষণে .
শ্রমং তত্র ন কুর্বীত শস্ত্রে মতিমতাং বরঃ .. ১১৩.. 1827
——————————————————————————–
            অথ শ্রমক্রিযা
ক্রিযাকলাপান্বক্ষ্যামি শ্রমসাধ্যাঞ্শুচিষ্মতাম্ .
যেষাং বিজ্ঞানমাত্রেণ সিদ্ধির্ভবতি নান্যথা .. ১১৪.. 1828
প্রথমং চাপমারোপ্য চূলিকাং বন্ধযেত্ততঃ .
স্থানকং তু ততঃ কৃত্বা বাণোপরি করং ন্যসেত্ .. ১১৫.. 1829
তুলনং ধনুষশ্চৈব কর্তব্যং বামপাণিনা .
আদানং চ ততঃ কৃত্বা সংধানং চ ততঃ পরম্ .. ১১৬.. 1830
সকৃদাকৃষ্টচাপেন ভূমিবেধং তু কারযেত্ .
নমস্কুর্যাচ্ছিবং বিঘ্নরাজং গুরুধনুঃশরান্ .. ১১৭.. 1831
যাচিতব্যা গুরোরাজ্ঞা বাণস্যাকর্ষণং প্রতি .
প্রাণবাযুং প্রযত্নেন বাণেন সহ পূরযেত্ .. ১১৮.. 1832
কুম্ভকেন স্থিরং কৃত্বা হুংকারেণ বিসর্জযেত্ .
ইত্যভ্যাসক্রিযা কার্যা ধন্বিনা সিদ্ধিমিচ্ছতা .. ১১৯.. 1833
ষণ্মাসাত্সিদ্ধ্যতে মুষ্টিঃ শরাঃ সংবত্সরেণ তু .
নারাচাস্তস্য সিদ্ধযন্তি যস্য তুষ্টো মহেশ্বরঃ .. ১২০.. 1834
পুষ্পবদ্ধারযেদ্ বাণং সর্পবত্পীডযেদ্ধনুঃ .
ধনবচ্চিন্তযেল্লক্ষ্যং যদীচ্ছেত্সিদ্ধিমাত্মনঃ .. ১২১.. 1835
ক্রিযামিচ্ছন্তি আচার্যা দূরমিচ্ছন্তি ভার্গবাঃ .
রাজানো দৃষ্টিমিচ্ছন্তি লক্ষ্যমিচ্ছন্তি চেতরে .. ১২২.. 1836
জনানাং রঞ্জনং যেন লক্ষ্যঘাতাত্প্রজাযতে .
হীনেনাপীষুণা তস্মাত্প্রশস্তং লক্ষ্যবেধনম্ .. ১২৩.. 1837
বিশাখস্থানকে স্থিত্বা সমসংধানমাচরেত্ .
গোপুচ্ছমুখবাণেন সিংহকর্ণ্যা চ মুষ্টিনা .. ১২৪.. 1838
আকর্ষেত্কৈশিকব্যাযে ন শিখাং চালযেত্ততঃ .
পূর্বাপরৌ সমৌ কার্যৌ সমাংসৌ নিশ্চলৌ করৌ .. ১২৫.. 1839
চক্ষুষী স্পন্দযেন্নৈব দৃষ্টিং লক্ষ্যে নিযোজযেত্ .
মুষ্টিনাচ্ছাদিতং লক্ষ্যং শরস্যাগ্রে নিযোজযেত্ .. ১২৬.. 1840
মনো দৃষ্টিগতং জ্ঞাত্বা ততঃ কাণ্ডং বিসর্জযেত্ .
স্খলত্যেবং কদাচিন্ন লক্ষ্যে যোধো জিতশ্রমঃ .. ১২৭.. 1841
আদানং চৈব তূণীরাত্সংধানং কর্ষণং তথা .
ক্ষেপণং চ ত্বরাযুক্তো বাণস্য কুরুতে তু যঃ . 1842
নিত্যাভ্যাসবশাত্তস্য শীঘ্রসংধানতা ভবেত্ .. ১২৮. .
প্রত্যালীঢে কৃতে স্থানে অধঃসংধানমাচরেত্ .
মুষ্ট্যা পতাকযা বাণং স্ত্রীচিহ্নং দূরপাতনম্ .. ১২৯.. 1843
দর্দুরক্রমমাস্থায ঊর্ধ্বসংধানমাচরেত্ .
স্কন্ধব্যাযেন বজ্রস্য মুষ্ট্যা পুংমার্গণেন চ . 1844
অত্যন্তসৌষ্ঠবাদ্বাহ্বোর্জাযতে দৃঢবেধিতা .. ১৩০. .
সূচীমুখা মীনপুচ্ছা ভ্রমরী চ তৃতীযকা .
শরাণাং গতযস্তিস্রঃ প্রশস্তাঃ কথিতা বুধৈঃ .. ১৩১.. 1845
সূচীমুখগতিস্তস্য সাযকস্য প্রজাযতে .
পত্রং বিলোমিতং যস্য অথবা হীনপত্রকম্ .. ১৩২.. 1846
কর্কশেন তু চাপেন যঃ কৃষ্টো হীনমুষ্টিনা .
মত্স্যপুচ্ছা গতিস্তস্য সাযকস্য প্রকীর্তিতা .. ১৩৩.. 1847
ভ্রমরী কথিতা হ্যেষা বিদ্বদ্ভিঃ শ্রমকর্মণি .
ঋজুত্বেন বিনা যাতি ক্ষেপ্যমাণস্তু সাযকঃ .. ১৩৪.. 1848
বামগা দক্ষগা চৈব ঊর্ধ্বগাধোগমা তথা .
চতস্রো গতযঃ প্রোক্তা বাণস্খলনহেতবঃ .. ১৩৫.. 1849
কম্পতে গুণমুষ্টিস্তু মার্গণস্য হি পৃষ্ঠতঃ .
সংমুখী স্যাদ্ধনুর্মুষ্ঠিস্তদা বামে গতির্ভবেত্ .. ১৩৬.. 1850
গ্রহণং শিথিলং যস্য ঋজুত্বেন বিসর্জিতম্ .
পার্শ্বং তু দক্ষিণং যাতি সাযকস্য ন সংশযঃ .. ১৩৭.. 1851
ঊর্ধ্বং যাতি চাপমুষ্টির্গুণমুষ্টিরধো ভবেত্ .
স মুক্তো মার্গণো লক্ষ্যাদ্দূরং যাতি ন সংশযঃ .. ১৩৮.. 1852
মোক্ষণে চৈব বাণস্য চাপমুষ্টিরধো ভবেত্ .
গুণমুষ্টির্ভবেদূর্ধ্বং তদাধোগামিনী গতিঃ .. ১৩৯.. 1853
লক্ষ্যবাণাগ্রদৃষ্টীনাং সংগতিস্তু যদা ভবেত্ .
তদানীমুজ্ঝিতো বাণো লক্ষ্যান্ন স্খলতি ধ্রুবম্ .. ১৪০.. 1854
নির্দোষঃ শব্দহীনশ্চ সমমুষ্টিদ্বযোজ্ঝিতঃ .
ভিনত্তি দৃঢবেধ্যানি সাযকো নাস্তি সংশযঃ .. ১৪১.. 1855
স্বাকৃষ্টস্তেজিতো যশ্চ সুশুদ্ধো গাঢমুক্তিতঃ .
নরনাগাশ্বকাযেষু ন স তিষ্ঠতি মার্গণঃ .. ১৪২.. 1856
যস্য তৃণসমা বাণা যস্যেন্ধনসমং ধনুঃ .
যস্য প্রাণসমা মৌর্বী স ধন্বী ধন্বিনাং বরঃ .. ১৪৩.. 1857
অযশ্চর্ম ঘতশ্চৈব মৃত্পিণ্ডং চ চতুষ্টযম্ .
যো ভিনত্তি হি তস্যেষুর্বজ্রেণাপি ন ধার্যতে .. ১৪৪.. 1858
সার্ধাঙ্গুলপ্রমাণেন লোহপাত্রাণি কারযেত্ .
তানি ভিত্ত্বৈকবাণেন দৃঢঘাতী ভবেন্নরঃ .. ১৪৫.. 1859
চতুর্বিংশতিচর্মাণি ভিনত্ত্যেকেষুণা নরঃ .
তস্য বাণো গজেন্দ্রস্য কাযং নির্ভিদ্য গচ্ছতি .. ১৪৬.. 1860
ভ্রাম্যঞ্জলে ঘটো বেদ্ধ্যশ্চক্রে মৃত্পিণ্ডকং তথা .
ভ্রমন্তং বেধযেদ্যস্তু দৃঢভেদী স উচ্যতে .. ১৪৭.. 1861
অযস্তু কাকতুণ্ডেন চর্ম আরামুখেন হি .
মৃত্পিণ্ডং চ ঘটং চৈব বিধ্যেত্সূচিমুখেন হি .. ১৪৮.. 1862
বাণভঙ্গং করাবর্তং কাষ্ঠচ্ছেদনমেব চ .
বিন্দুকং গোলকযুগং যো বেত্তি স জযী ভবেত্ .. ১৪৯.. 1863
লক্ষ্যস্থানে ধৃতং কাণ্ডং সসুখং ছেদযেত্ততঃ .
কিংচিন্মুষ্টিং বিধায স্বাং তির্যগ্বিফলিকেষুণা .. ১৫০.. 1864
সংমুখং বা সমাযান্তং তির্যক্ছাযং তমম্বরে .
শরং শরেণ যশ্ছিন্দ্যাদ্বাণচ্ছেদী স জাযতে .. ১৫১.. 1865
কাষ্ঠেঽশ্বকেশং সংযম্য তত্র বদ্ধ্বা বরাটিকাম্ .
হস্তেন ভ্রাম্যমাণাং চ যো হন্তি স ধনুর্ধরঃ .. ১৫২.. 1866
লক্ষ্যস্থানে ন্যসেত্কাষ্ঠং সার্দ্রং গোপুচ্ছসংনিভম্ .
যশ্ছিন্দ্যাত্তং ক্ষুরপ্রেণ কাষ্ঠচ্ছেত্তা স জাযতে .. ১৫৩.. 1867
লক্ষ্যে বিন্দুং ন্যসেচ্ছুভ্রং শুভ্রবন্ধূকপুষ্পবত্ .
হন্তি তং বিন্দুকং যস্তু চিত্রযোধী স জাযতে .. ১৫৪.. 1868
কাষ্ঠগোলযুগং ক্ষিপ্তং দূরমূর্ধ্বপুরঃস্থিতৈঃ .
অপ্রাপ্তধারং পৃষ্ঠেন গচ্ছেত্পুচ্ছমুখেন হি .. ১৫৫.. 1869
যো হন্তি শরযুগ্মেন শীঘ্রসংধানযোগতঃ .
স স্যাদ্ধনুর্ভৃতাং শ্রেষ্ঠঃ পূজিতঃ সর্বপার্থিবৈঃ .. ১৫৬.. 1870
রথস্থেন গজস্থেন হযস্থেন চ পত্তিনা .
ধাবতা বৈ শ্রমঃ কার্যো লক্ষ্যং হন্তুং সুনিশ্চিতম্ .. ১৫৭.. 1871
লক্ষ্যস্থানে ন্যসেত্কাংস্যপাত্রং হস্তদ্বযান্তরে .
তাডযেচ্ছর্করাভিস্তচ্ছব্দঃ সংজাযতে যথা .. ১৫৮.. 1872
যত্রৈবোত্পদ্যতে শব্দস্তং সম্যক্তত্র চিন্তযেত্ .
কর্ণেন্দ্রিযমনোযোগাল্লক্ষ্যংনিশ্চযতাং নযেত্ .. ১৫৯.. 1873
পুনঃ শর্করযা তচ্চ তাডযেচ্ছব্দহেতবে .
পুনর্নিশ্চযতাং নেযং শব্দস্থানানুসারতঃ .. ১৬০.. 1874
ততঃ কিংচিত্কৃতং দূরে নিত্যং নিত্যং বিধানতঃ .
লক্ষ্যং সমভ্যসেদ্ধ্বান্তে শব্দব্যধনহেতবে .. ১৬১.. 1875
ততো বাণেন হন্যাত্তদবধানেন তীক্ষ্ণধীঃ .
এতচ্চ দুষ্করং কর্ম ভাগ্যৈঃ কস্যাপি সিদ্ধযতি .. ১৬২.. 1876
এবং শ্রমবিধিং কুর্যাদ্যাবত্সিদ্ধিঃ প্রজাযতে .
শ্রমে সিদ্ধে চ বর্ষাসু নৈব গ্রাহ্যং ধনুঃ করে .. ১৬৩.. 1877
পূর্বাভ্যাসস্য শস্ত্রাণামবিস্মরণহেতবে .
মাসদ্বযং শ্রমং কুর্যাত্প্রতিবর্ষং শরদৃতৌ .. ১৬৪.. 1878
জাতে বাশ্বযুজে মাসি নক্মীদেবতাদিনে .
পূজযেদীশ্বরং চণ্ডীং গুরুং শস্ত্রাণি বাজিনঃ .. ১৬৫.. 1879
বিপ্রেভ্যো দক্ষিণাং দত্ত্বা কুমারী ভোজযেত্তত্তঃ .
দেব্যৈ পশুবলিং দত্ত্বা হৃষ্টো বাদিত্রমঙ্গলৈঃ .. ১৬৬.. 1880
ততস্তু সাধযেন্মন্ত্রান্বেদোক্তাংশ্চাগমোদিতান্ .
অস্ত্রাণাং কর্মসিদ্ধ্যর্থং জপহোমবিধানতঃ .. ১৬৭.. 1881
ব্রাহ্মং নারাযণং শৈবমৈন্দ্রং বাযব্যবারুণে .
আগ্নেযং চাপরাস্ত্রাণি গুরুদত্তানি সাধযেত্ .. ১৬৮.. 1882
মনোবাক্কর্মভির্ভাব্যং লব্ধাস্ত্রেণ শুচিষ্মতা .
অপাত্রমসমর্থং চ ঘ্নত্যস্ত্রাণি কুপূরুষম্ .. ১৬৯.. 1883
প্রযোগং চোপসংহারং যো বেত্তি স ধনুর্ধরঃ .
সামান্যে কর্মণি প্রাজ্ঞো নৈবাস্ত্রাণি প্রযোজযেত্ .. ১৭০.. 1884
হস্তার্কে লাঙ্গলীকন্দং গৃহীত্বা তস্য লেপতঃ .
শূরস্যাপি রণে পুংসো দর্পং হরতি সত্বরঃ .. ১৭১.. 1885
গৃহীতং যোগনক্ষত্রৈরপামার্গস্য মূলকম্ .
লেপমাত্রেণ বীরাণাং সর্বশস্ত্রনিবারণম্ .. ১৭২.. 1886
অধঃপুষ্পী শঙ্খপুষ্পী লজ্জালুর্গিরিকর্ণিকা .
নীলিনী সহদেবা চ পুত্রমার্জারিকা তথা .. ১৭৩.. 1887
বিষ্ণুক্রান্তা চ সর্বাসাং জটা গ্রাহ্যা রবের্দিনে .
বদ্ধা ভুজে বিলেপাদ্বা কাযে শস্ত্রৌঘবারিকা .. ১৭৪.. 1888
সর্পব্যাঘ্রাদিসত্ত্বানাং ভূতাদীনাং ন জাযতে .
ভীতিস্তস্য স্থিতা যস্য মাতরোঽষ্টৌ শরীরকে .. ১৭৫.. 1889
গৃহীতং হস্তনক্ষত্রে চূর্ণং ছুচ্ছুন্দরীভবম্ .
তত্প্রভাবাদ্গজঃ পুংসঃ সংমুখো নৈতি নিশ্চিতম্ .. ১৭৬.. 1890
ছুচ্ছুন্দরী শ্রীফলপুষ্পচূর্ণৈ-
রালিপ্তগাত্রস্য নরস্য দূরাত্ .
আঘ্রায গন্ধং দ্বিরদোঽতিমত্তো
মদং ত্যজেত্কেসরিণো যথোগ্রম্ .. ১৭৭.. 1891
শ্বেতাদ্রিকর্ণিকামূলং পাণিস্থং বারযেদ্গজম্ .
শ্বেতকণ্টারিকামূলং ব্যাঘ্রাদীনাং ভযং হরেত্ .. ১৭৮.. 1892
পুষ্যার্কোত্পাটিতে মূলে পাঠাযা মুখসংস্থিতে .
দেহে স্ফুটতি নো তীক্ষ্ণং মণ্ডলাগ্রং রণে নৃণাম্ .. ১৭৯.. 1893
গন্ধার্যা উত্তরং মূলং মুখস্থং সংমুখাগতম্ .
শস্ত্রৌঘং বারযত্যেব পুষ্যার্কে বিধিনা ধৃতম্ .. ১৮০.. 1894
শুভ্রাযাঃ শরপুঙ্খাযা জটানীলীজটাথবা .
ভুজে শিরসি বক্ত্রে বা স্থিতা শস্ত্রনিবারিকা . 1895
ভূপাহিচৌরভীতিঘ্নী গৃহীতা পুষ্যভাস্করে .. ১৮১. .
প্রথমং ক্রিযতে স্নানং শুক্লবস্ত্রাবৃতো ভবেত্ .
মঙ্গল্যগীতসংযুক্তো দেববিপ্রাংশ্চ পূজযেত্ .. ১৮২.. 1896
ক্ষেত্রপালস্য নাম্না চ বলিং দদ্যাদ্দিশো দশ .
শস্ত্রাণি চাপি সংপূজ্য রক্ষামন্ত্রং স্মরেত্ততঃ .. ১৮৩.. 1897
৐ শূলেন পাহি নো দেবি পাহি খঙ্গেন চাম্বিকে .
ঘণ্টাস্বনেন নঃ পাহি চাপজ্যানিঃস্বনেন চ .. ১৮৪.. 1898
প্রাচ্যাং রক্ষ প্রতীচ্যাং চ চণ্ডিকে রক্ষ দক্ষিণে .
ভ্রামণেনাত্মশূলস্য উত্তরস্যাং তথেশ্বরি .. ১৮৫.. 1899
সৌম্যানি যানি রূপাণি ত্রৈলোক্যে বিচরন্তি তে .
যানি চাত্যন্তঘোরাণি তৈ রক্ষাস্মাংস্তথা ভুবম্ .. ১৮৬.. 1900
খঙ্গশূলগদাদীনি যানি চাস্ত্রাণি তেঽম্বিকে .
করপল্লবসঙ্গীনি তৈরস্মান্ রক্ষ সর্বতঃ .. ১৮৭.. 1901
দিব্যৌষধীনাং লেপং চ রক্ষাবন্ধং চ কারযেত্ .
কিংচিদ্ ভুক্ত্বা চ পীত্বা চ ততঃ সংনাহমাচরেত্ .. ১৮৮.. 1902
সেনাপতিং গজারোহানন্যাংশ্চ সুভটাংস্তথা .
মুখ্যানন্যানপি ধনৈর্বস্ত্রৈশ্চ পরিতোষযেত্ .. ১৮৯.. 1903
পূর্বং সারথিমারোপ্য রথে সজ্জেত্ততঃ স্বযম্ .
যোজযেদ্বাজিনঃ শুদ্ধান্সুসংতুষ্টাঞ্জিতশ্রমান্ .. ১৯০.. 1904
রথে চ ধারযেদ্ ভদ্রং কার্মুকাণাং চতুষ্টযম্ .
চতুঃশতানি বাণানাং তূণীরে চ প্রযোজযেত্ .. ১৯১.. 1905
খঙ্গং চর্ম গদাং শক্তিং পরিঘং মুদ্গরং তথা .
নারাচং পরশুং কুন্তং পট্টিশাদীংশ্চ ধারযেত্ .. ১৯২.. 1906
ন রথা ন গজা যস্য সোঽশ্বমেব সমারুহেত্ .
কটিবদ্ধৈকতূণীরঃ খঙ্গশক্তিধনুর্যুতঃ .. ১৯৩.. 1907
ততোর্জুনস্য নামানি বিষ্ণুস্মরণপূর্বকম্ .
জপেত্ততঃ প্রতিষ্ঠেত চতুরঙ্গবলৈর্যুতঃ .. ১৯৪.. 1908
লাভস্তেষাং জযস্তেষাং কুতস্তেষাং পরাজযঃ .
যেষামিন্দীবরশ্যামো হৃদযস্থো জনার্দনঃ .. ১৯৫.. 1909
অর্জুনঃ ফাল্গুনঃ পার্থঃ কিরীটী শ্বেতবাহনঃ .
বীভত্সুর্বিজযী কৃষ্ণঃ সব্যসাচী ধনংজযঃ .. ১৯৬.. 1910
খং তথা স্বরবস্বিন্দুনেত্রৈরক্ষৌহিণী মতা .
অক্ষৌহিণ্যাং সংপ্রদিষ্টা রথানাং বর্মধারিণাম্ . 1911
সংখ্যা গণিততত্ত্বজ্ঞৈঃ সহস্রাণ্যেকবিংশতিঃ .. ১৯৭. .
উপর্যষ্টৌ শতান্যাহুস্তথা ভূযশ্চ সপ্ততিঃ .
গজানাং তু পরীমাণমেতদেব বিনির্দিশেত্ .. ১৯৮.. 1912
জ্ঞেযং লক্ষং পদাতীনাং সহস্রাণি তথা নব .
শতানি ত্রীণি পঞ্চাশচ্ছূরাণাং শস্ত্রধারিণাম্ .. ১৯৯.. 1913
পঞ্চষষ্টিসহস্রাণি তথাশ্বানাং শতানি চ .
দশোত্তরাণি ষট্ প্রাহুঃ সংখ্যাতত্ত্ববিদো জনাঃ .. ২০০.. 1914
খদ্বযং নিধিবেদাক্ষিচন্দ্রাক্ষ্যগ্নিহিমাংশুভিঃ .
মহাক্ষৌহিণিকা প্রোক্তা সংখ্যা গণিতকোবিদৈঃ .. ২০১.. 1915
কোটযস্ত্রযোদশ প্রোক্তা লক্ষাণামেকবিংশতিঃ .
চতুর্বিংশত্সহস্রাণি তথা নবশতানি চ .. ২০২.. 1916
মহাক্ষৌহিণিকাং প্রাহুরিমাং তত্ত্ববিদো জনাঃ .
মহাক্ষৌহিণিকাযাং তু রথাঃ কোটিমিতাঃ স্মৃতাঃ . 1917
সপ্তত্রিংশচ্চ লক্ষাণি গীযন্তে তত্ত্বভেদিভিঃ .. ২০৩. .
দ্বাদশৈব সহস্রাণি চত্বার্যেব শতানি চ .
প্রোক্তানি নবতিস্তদ্বদেবমেব মতংগজাঃ .. ২০৪.. 1918
অশ্বাশ্চতুষ্কোটিমিতা লক্ষাণ্যেকাদশৈব চ .
সপ্তত্রিংশত্সহস্রাণি তথা শতচতুষ্টযম্ .. ২০৫.. 1919
সপ্ততিশ্চৈব সংখ্যাতাঃ প্রোচ্যন্তে পত্তযস্ততঃ .
ষট্কোটযোঽশীতিলক্ষাণি পঞ্চাধিকমিতানি চ .. ২০৬.. 1920
দ্বিষষ্টি চ সহস্রাণি তথা শতচতুষ্টযম্ .
পঞ্চাশদিতি সংখ্যাতা মহাক্ষৌহিণিকা বুধৈঃ .. ২০৭.. 1921
মুখে রথা গজাঃ পৃষ্ঠে তত্পৃষ্ঠে চ পদাতযঃ .
পার্শ্বযোশ্চ হযাঃ কার্যা ব্যূহস্যাযং বিধিঃ স্মৃতঃ .. ২০৮.. 1922
অর্ধচন্দ্রং চ চক্রং চ শকটং মকরং তথা .
কমলং শ্রেণিকাং গুল্মং ব্যূহানেবং প্রকল্পযেত্ .. ২০৯.. 1923
যে রাজপুত্রাঃ সামন্তা আপ্তাঃ সেবকজাতযঃ .
তান্সর্বানাত্মনঃ পার্শ্বে রক্ষাযৈ স্থাপযেন্নৃপঃ .. ২১০.. 1924
যস্মিন্কুলে যঃ পুরুষঃ প্রধানঃ
স সর্বযত্নেন হি রক্ষণীযঃ .
তস্মিন্বিনষ্টে কিল সারভূতে
ন নাভিভঙ্গে হ্যরকা বহন্তি .. ২১১.. 1925
ক্ষত্রসারভৃতং শূরং শস্ত্রজ্ঞমনুরাগি চেত্ .
অপি স্বল্পং শ্রিযে সৈন্যং বৃথেযং মুণ্ডমণ্ডলী .. ২১২.. 1926
অপি পঞ্চশতং শূরা মৃদ্নন্তি মহতীং চমূম্ .
অথবা পঞ্চ ষট্ সপ্ত বিজযন্তেঽনিবর্তিনঃ .. ২১৩.. 1927
ধনুঃসংগতিসংশুদ্ধা বাজিনো মুখদুর্বলাঃ .
আকর্ণপলিতা যোধাঃ সংগ্রামে জযবাদিনঃ .. ২১৪.. 1928
পরস্পরানুরক্তা যে যোধাঃ শার্ঙ্গধনুর্ধরাঃ .
যুদ্ধজ্ঞাস্তুরগারূঢাস্তে জযন্তি রণে রিপূন্ .. ২১৫.. 1929
একঃ কাপুরুষো দীর্ণো দারযেন্মহতীং চমূম্ .
তং দীর্ণমনু দীর্যন্তে যোধাঃ শূরতমা অপি .. ২১৬.. 1930
দুর্নিবারতরা চৈব প্রভগ্না মহতী চমূঃ .
অপামিব মহাবেগত্রস্তা মৃগগণা ইব .. ২১৭.. 1931
যস্তু ভগ্নেষু সৈন্যেষু বিদ্রুতেষু নিবর্ততে .
পদে পদেঽশ্বমেধস্য লভতে ফলমক্ষযম্ .. ২১৮.. 1932
দ্বাবিমৌ পুরুষৌ লোকে সূর্যমণ্ডলভেদিনৌ .
পরিব্রাড্ যোগযুক্তশ্চ রণে চাভিমুখো হতঃ .. ২১৯.. 1933
যত্র যত্র হতঃ শূরঃ শত্রুভিঃ পরিবেষ্টিতঃ .
অক্ষযং লভতে লোকং যদি ক্লীবং ন ভাষতে .. ২২০.. 1934
মূর্ছিতং নৈব বিকলং নাশস্ত্রং নান্যযোধিনম্ .
পলাযমানং শরণং গতং চৈব ন হিংসযেত্ .. ২২১.. 1935
ভীরুঃ পলাযমানোঽপি নান্বেষ্টব্যো বলীযসা .
কদাচিচ্ছূরতাং যাতি মরণে কৃতনিশ্চযঃ .. ২২২.. 1936
সংভৃত্য মহতীং সেনাং চতুরঙ্গাং মহীপতিঃ .
ব্যূহযিত্বাগ্রতঃ শূরান্স্থাপযেজ্জযলিপ্সযা .. ২২৩.. 1937
অল্পাযাং বা মহত্যাং বা সেনাযামিতি নিশ্চযঃ .
হর্ষো যোধগণস্যৈকো জযলক্ষণমুচ্যতে .. ২২৪.. 1938
অন্বেতং বাযবো যান্তি পৃষ্ঠে ভানুর্বযাংসি চ .
অনুপ্লবন্তে মেঘাশ্চ যস্য তস্য রণে জযঃ .. ২২৫.. 1939
অপূর্ণে নৈব মর্তব্যং সংপূর্ণেং নৈব জীবতি .
তস্মাদ্ধৈর্যং বিধাতব্যং হন্তব্যা পরবাহিনী .. ২২৬.. 1940
জিতে লক্ষ্মীর্মৃতে স্বর্গঃ কীর্তিশ্চ ধরণীতলে .
তস্মাদ্ধৈর্যং বিধাতব্যং হন্তব্যা পরবাহিনী .. ২২৭.. 1941
এতম্ শিবধনুর্বেদস্য ভগবতো ব্যাসস্য চ .