বেদসারশিবস্তোত্রম্

.. বেদসারশিবস্তোত্রম্ ..
               .. শ্রীঃ..
     .. অথ বেদসারশিবস্তোত্রম্..
পশূনাং পতিং পাপনাশং পরেশং
     গজেন্দ্রস্য কৃত্তিং বসানং বরেণ্যম্ .
জটাজূটমধ্যে স্ফুরদ্গাঙ্গবারিং
     মহাদেবমেকং স্মরামি স্মরারিম্ .. ১..

মহেশং সুরেশং সুরারাতিনাশং
     বিভুং বিশ্বনাথং বিভূত্যঙ্গভূষম্ .
বিরূপাক্ষমিন্দ্বর্কবহ্নিত্রিনেত্রং
     সদানন্দমীডে প্রভুং পঞ্চবক্ত্রম্ .. ২..

গিরীশং গণেশং গলে নীলবর্ণং
     গবেন্দ্রাধিরূঢং গুণাতীতরূপম্ .
ভবং ভাস্বরং ভস্মনা ভূষিতাঙ্গং
     ভবানীকলত্রং ভজে পঞ্চবক্ত্রম্ .. ৩..

শিবাকান্ত শংভো শশাঙ্কার্ধমৌলে
     মহেশান শূলিঞ্জটাজূটধারিন্ .
ত্বমেকো জগদ্ব্যাপকো বিশ্বরূপঃ
     প্রসীদ প্রসীদ প্রভো পূর্ণরূপ .. ৪..

পরাত্মানমেকং জগদ্বীজমাদ্যং
     নিরীহং নিরাকারমোংকারবেদ্যম্ .
যতো জাযতে পাল্যতে যেন বিশ্বং
     তমীশং ভজে লীযতে যত্র বিশ্বম্ .. ৫..

ন ভূমির্নং চাপো ন বহ্নির্ন বাযু-
     র্ন চাকাশমাস্তে ন তন্দ্রা ন নিদ্রা .
ন চোষ্ণং ন শীতং ন দেশো ন বেষো
     ন যস্যাস্তি মূর্তিস্ত্রিমূর্তিং তমীডে .. ৬..

অজং শাশ্বতং কারণং কারণানাং
     শিবং কেবলং ভাসকং ভাসকানাম্ .
তুরীযং তমঃপারমাদ্যন্তহীনং
     প্রপদ্যে পরং পাবনং দ্বৈতহীনম্ .. ৭..

নমস্তে নমস্তে বিভো বিশ্বমূর্তে
     নমস্তে নমস্তে চিদানন্দমূর্তে .
নমস্তে নমস্তে তপোযোগগম্য
     নমস্তে নমস্তে শ্রুতিজ্ঞানগম্য .. ৮..

প্রভো শূলপাণে বিভো বিশ্বনাথ
     মহাদেব শংভো মহেশ ত্রিনেত্র .
শিবাকান্ত শান্ত স্মরারে পুরারে
     ত্বদন্যো বরেণ্যো ন মান্যো ন গণ্যঃ .. ৯..

শংভো মহেশ করুণাময শূলপাণে
     গৌরীপতে পশুপতে পশুপাশনাশিন্ .
কাশীপতে করুণযা জগদেতদেক-
     স্ত্বংহংসি পাসি বিদধাসি মহেশ্বরোঽসি .. ১০..

ত্বত্তো জগদ্ভবতি দেব ভব স্মরারে
     ত্বয্যেব তিষ্ঠতি জগন্মৃড বিশ্বনাথ .
ত্বয্যেব গচ্ছতি লযং জগদেতদীশ
     লিঙ্গাত্মকে হর চরাচরবিশ্বরূপিন্ .. ১১..

ইতি শ্রীমত্পরমহংসপরিব্রাজকাচার্যস্য
শ্রীগোবিন্দভগবত্পূজ্যপাদশিষ্যস্য
শ্রীমচ্ছংকরভগবতঃ কৃতৌ
বেদসারশিবস্তোত্রং সংপূর্ণম্ .