আত্মবোধ

.. আত্মবোধোপনিষত্ ..
.. আত্মবোধোপনিষত্ ..    42
শ্রীমন্নারাযণাকারমষ্টাক্ষরমহাশযম্ .
স্বমাত্রানুভবাত্সিদ্ধমাত্মবোধং হরিং ভজে ..
ॐ বাঙ্মে মনসীতি শান্তিঃ ..
ॐ প্রত্যগানন্দং ব্রহ্মপুরুষং প্রণবস্বরূপং অকার উকার
মকার ইতি ত্র্যক্ষরং প্রণবং তদেতদোমিতি . যমুক্ত্বা মুচ্যতে
যোগী জন্মসংসারবন্ধনাত্ . ॐ নমো নারাযণায
শঙ্খচক্রগদাধরায তস্মাত্ ॐ নমো নারাযণাযেতি
মন্ত্রোপাসকো বৈকুণ্ঠভবনং গমিষ্যতি . অথ যদিদং
ব্রহ্মপুরং পুণ্ডরীকং তস্মাত্তডিতাভমাত্রং
দীপবত্প্রকাশম্ ..
ব্রহ্মণ্যো দেবকীপুত্রো ব্রহ্মণ্যো মধুসূদনঃ .
ব্রহ্মণ্যঃ পুণ্ডরীকাক্ষো ব্রহ্মণ্যো বিষ্ণুরচ্যুতঃ ..
সর্বভূতস্থমেকং নারাযণং কারণপুরুষমকারণং পরং
ব্রহ্মোম্ . শোকমোহবিনির্মুক্তো বিষ্ণুং ধ্যাযন্ন সীদতি .
দ্বৈতাদ্বৈতমভযং ভবতি . মৃত্যোঃ স মৃত্যুমাপ্নোতি য ইহ
নানেব পশ্যতি . হৃত্পদ্মমধ্যে সর্বং যত্তত্প্রজ্ঞানে
প্রতিষ্ঠিতম্ . প্রজ্ঞানেত্রো লোকঃ প্রজ্ঞা প্রতিষ্ঠা
প্রজ্ঞানং ব্রহ্ম . স এতেন
প্রজ্ঞেনাত্মনাস্মাল্লোকাদুত্ক্রম্যামুষ্মিন্স্বর্গে লোকে
সর্বান্কামানাপ্ত্বাঽমৃতঃ সমভবদমৃতঃ সমভবত্ .
যত্র জ্যোতিরজস্রং যস্মিংল্লোকেঽভ্যর্হিতম্ . তস্মিন্মাং দেহি
স্বমানমৃতে লোকে অক্ষতে অচ্যুতে লোকে অক্ষতে অমৃতত্বং চ
গচ্ছত্যোং নমঃ .. ১..
প্রগলিতনিজমাযোঽহং নিস্তুলদৃশিরূপবস্তুমাত্রোঽহম্ .
অস্তমিতাহন্তোঽহং প্রগলিতজগদীশজীবভেদোঽহম্ .. ১..
প্রত্যগভিন্নপরোঽহং বিধ্বস্তাশেষবিধিনিষেধোঽহম্ .
সমুদস্তাশ্রমিতোঽহং প্রবিততসুখপূর্ণসংবিদেবাহম্ .. ২..
সাক্ষ্যহমনপেক্ষোঽহং নিজমহিম্নি সংস্থিতোঽহমচলোঽহম্ .
অজরোঽহমব্যযোঽহং পক্ষবিপক্ষাদিভেদবিধুরোঽহম্ .. ৩..
অববোধৈকরসোঽহং মোক্ষানন্দৈকসিন্ধুরেবাহম্ .
সূক্ষ্মোঽহমক্ষরোঽহং বিগলিতগুণজালকেবলাত্মাঽহম্ .. ৪..
নিস্ত্রৈগুণ্যপদোঽহং কুক্ষিস্থানেকলোককলনোঽহম্ .
কূটস্থচেতনোঽহং নিষ্ক্রিযধামাহমপ্রতর্ক্যোঽহম্ .. ৫..
একোঽহমবিকলোঽহং নির্মলনির্বাণমূর্তিরেবাহম্ .
নিরবযোঽহমজোঽহং কেবলসন্মাত্রসারভূতোঽহম্ .. ৬..
নিরবধিনিজবোধোঽহং শুভতরভাবোঽহমপ্রভেদ্যোঽহম্ .
বিভুরহমনবদ্যোঽহং নিরবধিনিঃসীমতত্ত্বমাত্রোঽহম্ .. ৭..
বেদ্যোঽহমগমাস্তৈরারাধ্যোঽহং সকলভুবনহৃদ্যোঽহম্ .
পরমানন্দঘনোঽহম্ পরমানন্দৈকভূমরূপোঽহম্ .. ৮..
শুদ্ধোঽহমদ্বযোঽহং সন্ততভাবোঽহমাদিশূন্যোঽহম্ .
শমিতান্তত্রিতযোঽহং বদ্ধো মুক্তোঽহমদ্ভুতাত্মাহম্ .. ৯..
শুদ্ধোঽহমান্তরোঽহং শাশ্বতবিজ্ঞানসমরসাত্মাহম্ .
শোধিতপরতত্ত্বোঽহং বোধানন্দৈকমূর্তিরেবাহম্ .. ১০..
বিবেকযুক্তিবুদ্ধ্যাহং জানাম্যাত্মানমদ্বযম্ .
তথাপি বন্ধমোক্ষাদিব্যবহারঃ প্রতীযতে .. ১১..
নিবৃত্তোঽপি প্রপঞ্চো মে সত্যবদ্ভাতি সর্বদা .
সর্পাদৌ রজ্জুসত্তেব ব্রহ্মসত্তৈব কেবলম্ .
প্রপঞ্চাধাররূপেণ বর্ততেঽতো জগন্ন হি .. ১২..
যথেক্ষুরসসংব্যাপ্তা শর্করা বর্ততে তথা .
অদ্বযব্রহ্মরূপেণ ব্যাপ্তোঽহং বৈ জগত্ত্রযম্ .. ১৩..
ব্রহ্মাদিকীটপর্যন্তাঃ প্রাণিনো মযি কল্পিতাঃ .
বুদ্বুদাদিবিকারান্তস্তরঙ্গঃ সাগরে যথা .. ১৪..
তরঙ্গস্থং দ্রবং সিন্ধুর্ন বাঞ্ছতি যথা তথা .
বিষযানন্দবাঞ্ছা মে মা ভূদানন্দরূপতঃ .. ১৫..
দারিদ্র্যাশা যথা নাস্তি সংপন্নস্য তথা মম .
ব্রহ্মানন্দে নিমগ্নস্য বিষযাশা ন তদ্ভবেত্ .. ১৬..
বিষং দৃষ্ট্বাঽমৃতং দৃষ্ট্বা বিষং ত্যজতি
বুদ্ধিমান্ .
আত্মানমপি দৃষ্ট্বাহমনাত্মানং ত্যজাম্যহম্ .. ১৭..
ঘটাবভাসকো ভানুর্ঘটনাশে ন নশ্যতি .
দেহাবভাসকঃ সাক্ষী দেহনাশে ন নশ্যতি .. ১৮..
ন মে বন্ধো ন মে মুক্তির্ন মে শাস্ত্রং ন মে গুরুঃ .
মাযামাত্রবিকাসত্বান্মাযাতীতোঽহমদ্বযঃ .. ১৯..
প্রাণাশ্চলন্তু তদ্ধর্মৈঃ কামৈর্বা হন্যতাং মনঃ .
আনন্দবুদ্ধিপূর্ণস্য মম দুঃখং কথং ভবেত্ .. ২০..
আত্মানমঞ্জসা বেদ্মি ক্বাপ্যজ্ঞানং পলাযিতম্ .
কর্তৃত্বমদ্য মে নষ্টং কর্তব্যং বাপি ন ক্বচিত্ .. ২১..
ব্রাহ্মণ্যং কুলগোত্রে চ নামসৌন্দর্যজাতযঃ .
স্থূলদেহগতা এতে স্থূলাদ্ভিন্নস্য মে নহি .. ২২..
ক্ষুত্পিপাসান্ধ্যবাধির্যকামক্রোধাদযোঽখিলাঃ .
লিঙ্গদেহগতা এতে হ্যলিঙ্গস্য ন সন্তি হি .. ২৩..
জডত্বপ্রিযমোদত্বধর্মাঃ কারণদেহগাঃ .
ন সন্তি মম নিত্যস্য নির্বিকারস্বরূপিণঃ .. ২৪..
উলূকস্য যথা ভানুরন্ধকারঃ প্রতীযতে .
স্বপ্রকাশে পরানন্দে তমো মূঢস্য জাযতে .. ২৫..
চক্ষুর্দৃষ্টিনিরোধেঽভ্রৈঃ সূর্যো নাস্তীতি মন্যতে .
তথাঽজ্ঞানাবৃতো দেহী ব্রহ্ম নাস্তীতি মন্যতে .. ২৬..
যথামৃতং বিষাদ্ভিন্নং বিষদোষৈর্ন লিপ্যতে .
ন স্পৃশামি জডাদ্ভিন্নো জডদোষান্প্রকাশতঃ .. ২৭..
স্বল্পাপি দীপকণিকা বহুলং নাশযেত্তমঃ .
স্বল্পোঽপি বোধো নিবিডে বহুলং নাশযেত্তমঃ .. ২৮..
কালত্রযে যথা সর্পো রজ্জৌ নাস্তি তথা মযি .
অহঙ্কারাদিদেহান্তং জগন্নাস্ত্যহমদ্বযঃ .. ২৯..
চিদ্রূপত্বান্ন মে জাড্যং সত্যত্বান্নানৃতং মম .
আনন্দত্বান্ন মে দুঃখমজ্ঞানাদ্ভাতি সত্যবত্ .. ৩০..
আত্মপ্রবোধোপনিষদং মুহূর্তমুপাসিত্বা ন স পুনরাবর্ততে ন
স পুনরাবর্তত ইত্যুপনিষত্ ..
ॐ বাঙ্মে মনসীতি শান্তিঃ ..
ইতি আত্মবোধোপনিষত্সমাপ্তা ..