রুদ্রহৃদয়

.. রুদ্রহৃদযোপনিষত্ ..

যদ্ব্রহ্ম রুদ্রহৃদযমহাবিদ্যাপ্রকাশিতম্ .
তদ্ব্রহ্মমাত্রাবস্থানপদবীমধুনা ভজে ..
ॐ সহ নাববতু .. সহ নৌ ভুনক্তু .. সহ বীর্যং করবাবহৈ ..
তেজস্বিনাবধীতমস্তু মা বিদ্বিষাবহৈ ..
ॐ শান্তিঃ শান্তিঃ শান্তিঃ ..
হরিঃ ॐ ..
হৃদযং কুণ্ডলী ভস্মরুদ্রাক্ষগণদর্শনম্ .
তারসারং মহাবাক্যং পঞ্চব্রহ্মাগ্নিহোত্রকম্ .. ১..
প্রণম্য শিরসা পাদৌ শুকো ব্যাসমুবাচ হ .
কো দেবঃ সর্বদেবেষু কস্মিন্দেবাশ্চ সর্বশঃ .. ২..
কস্য শুশ্রূষণান্নিত্যং প্রীতা দেবা ভবন্তি মে .
তস্য তদ্বচনং শ্রুত্বা প্রত্যুবাচ পিতা শুকম্ .. ৩..
সর্বদেবাত্মকো রুদ্রঃ সর্বে দেবাঃ শিবাত্মকাঃ .
রুদ্রস্য দক্ষিণে পার্শ্বে রবির্ব্রহ্মা ত্রযোঽগ্নযঃ .. ৪..
বামপার্শ্বে উমা দেবী বিষ্ণুঃ সোমোঽপি তে ত্রযঃ .
যা উমা সা স্বযং বিষ্ণুর্যো বিষ্ণুঃ স হি চন্দ্রমাঃ .. ৫..
যে নমস্যন্তি গোবিন্দং তে নমস্যন্তি শঙ্করম্ .
যেঽর্চযন্তি হরিং ভক্ত্যা তেঽর্চযন্তি বৃষধ্বজম্ .. ৬..
যে দ্বিষন্তি বিরূপাক্ষং তে দ্বিষন্তি জনার্দনম্ .
যে রুদ্রং নাভিজানন্তি তে ন জানন্তি কেশবম্ .. ৭..
রুদ্রাত্প্রবর্ততে বীজং বীজযোনির্জনার্দনঃ .
যো রুদ্রঃ স স্বযং ব্রহ্মা যো ব্রহ্মা স হুতাশনঃ .. ৮..
ব্রহ্মবিষ্ণুমযো রুদ্র অগ্নীষোমাত্কং জগত্ .
পুংলিঙ্গং সর্বমীশানং স্ত্রীলিঙ্গং ভগবত্যুমা .. ৯..
উমারুদ্রাত্মিকাঃ সর্বাঃ গ্রজাঃ স্থাবরজঙ্গমাঃ .
ব্যক্তং সর্বমুমারূপমব্যক্তং তু মহেশ্বরম্ .. ১০..
উমা শঙ্করযোগো যঃ স যোগো বিষ্ণুরুচ্যতে .
যস্তু তস্মৈ নমস্কারং কুর্যাদ্ভক্তিসমন্বিতঃ .. ১১..
আত্মানং পরমাত্মানমন্তরাত্মানমেব চ .
জ্ঞাত্বা ত্রিবিধমাত্মানং পরমাত্মানমাশ্রযেত্ .. ১২..
অন্তরাত্মা ভবেদ্ব্রহ্মা পরমাত্মা মহেশ্বরঃ .
সর্বেষামেব ভূতানাং বিষ্ণুরাত্মা সনাতনঃ .. ১৩..
অস্য ত্রৈলোক্যবৃক্ষস্য ভূমৌ বিটপশাখিনঃ .
অগ্রং মধ্যং তথা মূলং বিষ্ণুব্রহ্মমহেশ্বরাঃ .. ১৪..
কার্যং বিষ্ণুঃ ক্রিযা ব্রহ্মা কারণং তু মহেশ্বরঃ .
প্রযোজনার্থং রুদ্রেণ মূর্তিরেকা ত্রিধা কৃতা .. ১৫..
ধর্মো রুদ্রো জগদ্বিষ্ণুঃ সর্বজ্ঞানং পিতামহঃ .
শ্রীরুদ্র রুদ্র রুদ্রেতি যস্তং ব্রূযাদ্বিচক্ষণঃ .. ১৬..
কীর্তনাত্সর্বদেবস্য সর্বপাপৈঃ প্রমুচ্যতে .
রুদ্রো নর উমা নারী তস্মৈ তস্যৈ নমো নমঃ .. ১৭..
রুদ্রো ব্রহ্মা উমা বাণী তস্মৈ তস্যৈ নমো নমঃ .
রুদ্রো বিষ্ণুরুমা লক্ষ্মীস্তস্মৈ তস্যৈ নমো নমঃ .. ১৮..
রুদ্রঃ সূর্য উমা ছাযা তস্মৈ তস্যৈ নমো নমঃ .
রুদ্রঃ সোম উমা তারা তস্মৈ তস্যৈ নমো নমঃ .. ১৯..
রুদ্রো দিবা উমা রাত্রিস্তস্মৈ তস্যৈ নমো নমঃ .
রুদ্রো যজ্ঞ উমা বেদিস্তস্মৈ তস্যৈ নমো নমঃ .. ২০..
রুদ্রো বহ্নিরুমা স্বাহা তস্মৈ তস্যৈ নমো নমঃ .
রুদ্রো বেদ উমা শাস্তং তস্মৈ তস্যৈ নমো নমঃ .. ২১..
রুদ্রো বৃক্ষ উমা বল্লী তস্মৈ তস্যৈ নমো নমঃ .
রুদ্রো গন্ধ উমা পুষ্পং তস্মৈ তস্যৈ নমো নমঃ .. ২২..
রুদ্রোঽর্থ অক্ষরঃ সোমা তস্মৈ তস্যৈ নমো নমঃ .
রুদ্রো লিঙ্গমুমা পীঠং তস্মৈ তস্যৈ নমো নমঃ .. ২৩..
সর্বদেবাত্মকং রুদ্রং নমস্কুর্যাত্পৃথক্পৃথক্ .
এভির্মন্ত্রপদৈরেব নমস্যামীশপার্বতী .. ২৪..
যত্র যত্র ভবেত্সার্ধমিমং মন্ত্রমুদীরযেত্ .
ব্রহ্মহা জলমধ্যে তু সর্বপাপৈঃ প্রমুচ্যতে .. ২৫..
সর্বাধিষ্ঠানমদ্বন্দ্বং পরং ব্রহ্ম সনাতনম্ .
সচ্চিদানন্দরূপং তদবাঙ্মনসগোচরম্ .. ২৬..
তস্মিন্সুবিদিতে সর্বং বিজ্ঞাতং স্যাদিদং শুক .
তদাত্মকত্বাত্সর্বস্য তস্মাদ্ভিন্নং নহি ক্বচিত্ .. ২৭..
দ্বে বিদ্যে বেদিতব্যে হি পরা চৈবাপরা চ তে .
তত্রাপরা তু বিদ্যৈষা ঋগ্বেদো যজুরেব চ .. ২৮..
সামবেদস্তথাথর্ববেদঃ শিক্ষা মুনীশ্বর .
কল্পো ব্যাকরণং চৈব নিরুক্তং ছন্দ এব চ .. ২৯..
জ্যোতিষং চ যথা নাত্মবিষযা অপি বুদ্ধযঃ .
অথৈষা পরমা বিদ্যা যযাত্মা পরমাক্ষরম্ .. ৩০..
যত্তদদ্রেশ্যমগ্রাহ্যমগোত্রং রূপবর্জিতম্ .
অচক্ষুঃশ্রোত্রমত্যর্থং তদপাণিপদং তথা .. ৩১..
নিত্যং বিভুং সর্বগতং সুসূক্ষ্মং চ তদব্যযম্ .
তদ্ভূতযোনিং পশ্যন্তি ধীরা আত্মানমাত্মনি .. ৩২..
যঃ সর্বজ্ঞঃ সর্ববিদ্যো যস্য জ্ঞানমযং তপঃ .
তস্মাদত্রান্নরূপেণ জাযতে জগদাবলিঃ .. ৩৩..
সত্যবদ্ভাতি তত্সর্বং রজ্জুসর্পবদাস্থিতম্ .
তদেতদক্ষরং সত্যং তদ্বিজ্ঞায বিমুচ্যতে .. ৩৪..
জ্ঞানেনৈব হি সংসারবিনাশো নৈব কর্মণা .
শ্রোত্রিযং ব্রহ্মনিষ্ঠং স্বগুরুং গচ্ছেদ্যথাবিধি .. ৩৫..
গুরুস্তস্মৈ পরাং বিদ্যাং দদ্যাদ্ব্রহ্মাত্মবোধিনীম্ .
গুহাযাং নিহিতং সাক্ষাদক্ষরং বেদ চেন্নরঃ .. ৩৬..
ছিত্বাঽবিদ্যামহাগ্রন্থিং শিবং গচ্ছেত্সনাতনম্ .
তদেতদমৃতং সত্যং তদ্বোদ্ধব্যং মুমুক্ষিভিঃ .. ৩৭..
ধনুস্তারং শরো হ্যাত্মা ব্রহ্ম তল্লক্ষ্যমুচ্যতে .
অপ্রমত্তেন বেদ্ধব্যং শরবত্তন্মযো ভবেত্ .. ৩৮..
লক্ষ্যং সর্বগতং চৈব শরঃ সর্বগতো মুখঃ .
বেদ্ধা সর্বগতশ্চৈব শিবলক্ষ্যং ন সংশযঃ .. ৩৯..
ন তত্র চন্দ্রার্কবপুঃ প্রকাশতে
ন বান্তি বাতাঃ সকলা দেবতাশ্চ .
স এষ দেবঃ কৃতভাবভূতঃ
স্বযং বিশুদ্ধো বিরজঃ প্রকাশতে .. ৪০..
দ্বৌ সুপর্ণৌ শরীরেঽস্মিঞ্জীবেশাক্ষ্যৌ সহ স্থিতৌ .
তযোর্জীবঃ ফলং ভুঙ্ক্তে কর্মণো ন মহেশ্বরঃ .. ৪১..
কেবলং সাক্ষিরূপেণ বিনা ভোগং মহেশ্বরঃ .
প্রকাশতে স্বযং ভেদঃ কল্পিতো মাযযা তযোঃ .. ৪২..
ঘটাকাশমঠাকাশৌ যথাকাশপ্রভেদতঃ .
কল্পিতৌ পরমৌ জীবশিবরূপেণ কল্পিতৌ .. ৪৩..
তত্ত্বতশ্চ শিবঃ সাক্ষাচ্চিজ্জীবশ্চ স্বতঃ সদা .
চিচ্চিদাকারতো ভিন্না ন ভিন্না চিত্ত্বহানিতঃ .. ৪৪..
চিতশ্চিন্ন চিদাকারদ্ভিদ্যতে জডরূপতঃ .
ভিদ্যতে চেজ্জডো ভেদশ্চিদেকা সর্বদা খলু .. ৪৫..
তর্কতশ্চ প্রমাণাচ্চ চিদেকত্বব্যবস্থিতেঃ .
চিদেকত্বপরিজ্ঞানে ন শোচতি ন মুহ্যতি .. ৪৬..
অদ্বৈতং পরমানন্দং শিবং যাতি তু কৈবলম্ .. ৪৭..
অধিষ্ঠানং সমস্তস্য জগতঃ সত্যচিদ্ঘনম্ .
অহমস্মীতি নিশ্চিত্য বীতশোকো ভবেন্মুনিঃ .. ৪৮..
স্বশরীরে স্বযং জ্যোতিঃস্বরূপং সর্বসাক্ষিণম্ .
ক্ষীণদোষাঃ প্রপশ্যন্তি নেতরে মাযযাবৃতাঃ .. ৪৯..
এবং রূপপরিজ্ঞানং যস্যাস্তি পরযোগিনঃ .
কুত্রচিদ্গমনং নাস্তি তস্য পূর্ণস্বরূপিণঃ .. ৫০..
আকাশমেকং সংপূর্ণং কুত্রচিন্নৈব গচ্ছতি .
তদ্বত্স্বাত্মপরিজ্ঞানী কুত্রচিন্নৈব গচ্ছতি .. ৫১..
স যো হ বৈ তত্পরমং ব্রহ্ম যো বেদ বৈ মুনিঃ .
ব্রহ্মৈব ভবতি স্বস্থঃ সচ্চিদানন্দ মাতৃকঃ .. ৫২..
ইত্যুপনিষত্ ..
ॐ সহ নাববতু .. সহ নৌ ভুনক্তু .. সহ বীর্যং করবাবহৈ ..
তেজস্বিনাবধীতমস্তু মা বিদ্বিষাবহৈ ..
ॐ শান্তিঃ শান্তিঃ শান্তিঃ ..
ইতি রুদ্রহৃদযোপনিষত্সমাপ্তা ..