ব্রহ্মবিদ্যা

.. ব্রহ্মবিদ্যোপনিষত্  ..

স্বাবিদ্যাতত্কার্যজাতং যদ্বিদ্যাপহ্নবং গতম্ .
তদ্ধংসবিদ্যানিষ্পন্নং রামচন্দ্রপদং ভজে ..
ॐ সহ নাববতু .. সহ নৌ ভুনক্তু ..
সহ বীর্যং করবাবহৈ ..
তেজস্বিনাবধীতমস্তু  মা বিদ্বিষাবহৈ ..
ॐ শান্তিঃ শান্তিঃ শান্তিঃ ..
অথ ব্রহ্মবিদ্যোপনিষদুচ্যতে ..
প্রসাদাদ্ব্রহ্মণস্তস্য বিষ্ণোরদ্ভুতকর্মণঃ .
রহস্যং ব্রহ্মবিদ্যাযা ধ্রুবাগ্নিং সংপ্রচক্ষতে .. ১..
ॐইত্যেকাক্ষরং ব্রহ্ম যদুক্তং ব্রহ্মবাদিভিঃ .
শরীরং তস্য বক্ষ্যামি স্থানং কালত্রযং তথা .. ২..
তত্র দেবাস্ত্রযঃ প্রোক্তা লোকা বেদাস্ত্রযোঽগ্নযঃ .
তিস্রো মাত্রার্ধমাত্রা চ ত্র্যক্ষরস্য শিবস্য তু .. ৩..
ঋগ্বেদো গার্হপত্যং চ পৃথিবী ব্রহ্ম এব চ .
আকারস্য শরীরং তু ব্যাখ্যাতং ব্রহ্মবাদিভিঃ .. ৪..
যজুর্বেদোঽন্তরিক্ষং চ দক্ষিণাগ্নিস্তথৈব চ .
বিষ্ণুশ্চ ভগবান্দেব উকারঃ পরিকীর্তিতঃ .. ৫..
সামবেদস্তথা দ্যৌশ্চাহবনীযস্তথৈব চ .
ঈশ্বরঃ পরমো দেবো মকারঃ পরিকীর্তিতঃ .. ৬..
সূর্যমণ্ডলমধ্যেঽথ হ্যকারঃ শঙ্খমধ্যগঃ .
উকারশ্চন্দ্রসংকাশস্তস্য মধ্যে ব্যবস্থিতঃ .. ৭..
মকারস্ত্বগ্নিসংকাশো বিধূমো বিদ্যুতোপমঃ .
তিস্রো মাত্রাস্তথা জ্ঞেযা সোমসূর্যাগ্নিরূপিণঃ  .. ৮..
শিখা তু দীপসংকাশা তস্মিন্নুপরি বর্ততে .
অর্ধমাত্র তথা জ্ঞেযা প্রণবস্যোপরি স্থিতা .. ৯..
পদ্মসূত্রনিভা সূক্ষ্মা শিখা সা দৃশ্যতে পরা .
সা নাডী সূর্যসংকাশা সূর্যং ভিত্ত্বা তথাপরা .. ১০..
দ্বিসপ্ততিসহস্রাণি নাডীং ভিত্ত্বা চ মূর্ধনি .
বরদঃ সর্বভূতানাং সর্বং ব্যাপ্যাবতিষ্ঠতি .. ১১..
কাংস্যঘণ্টানিনাদস্তু যথা লীযতি শান্তযে .
ওঙ্কারস্তু তথা যোজ্যঃ শান্তযে সর্বমিচ্ছতা .. ১২..
যস্মিন্বিলীযতে শব্দস্তত্পরং ব্রহ্ম গীযতে .
ধিযং হি লীযতে ব্রহ্ম সোঽমৃতত্বায কল্পতে .. ১৩..
বাযুঃ প্রাণস্তথাকাশস্ত্রিবিধো জীবসংজ্ঞকঃ .
স জীবঃ প্রাণ ইত্যুক্তো বালাগ্রশতকল্পিতঃ .. ১৪..
নাভিস্থানে স্থিতং বিশ্বং শুদ্ধতত্ত্বং সুনির্মলম্ .
আদিত্যমিব দীপ্যন্তং রশ্মিভিশ্চাখিলং শিবম্ .. ১৫..
সকারং চ হকারং চ জীবো জপতি সর্বদা .
নাভিরন্ধ্রাদ্বিনিষ্ক্রান্তং বিষযব্যাপ্তিবর্জিতম্ .. ১৬..
তেনেদং নিষ্কলং বিদ্যাত্ক্ষীরাত্সর্পির্যথা তথা .
কারণেনাত্মনা যুক্তঃ প্রাণাযামৈশ্চ পঞ্চভিঃ .. ১৭..
চতুষ্কলা সমাযুক্তো ভ্রাম্যতে চ হৃদিস্থিতঃ .
গোলকস্তু যদা দেহে ক্ষীরদণ্ডেন বা হতঃ .. ১৮..
এতস্মিন্বসতে শীঘ্রমবিশ্রান্তং মহাখগঃ .
যাবন্নিশ্বসিতো জীবস্তাবন্নিষ্কলতাং গতঃ .. ১৯..
নভস্থং নিষ্কলং ধ্যাত্বা মুচ্যতে ভববন্ধনাত্
অনাহতধ্বনিযুতং হংসং যো বেদ হৃদ্গতম্ .. ২০..
স্বপ্রকাশচিদানন্দং স হংস ইতি গীযতে .
রেচকং পূরকং মুক্ত্বা কুম্ভকেন স্থিতঃ সুধীঃ .. ২১..
নাভিকন্দে সমৌ কৃত্বা প্রাণাপানৌ সমাহিতঃ .
মস্তকস্থামৃতাস্বাদং পীত্বা ধ্যানেন সাদরম্ .. ২২..
দীপাকারং মহাদেবং জ্বলন্তং নাভিমধ্যমে .
অভিষিচ্যামৃতেনৈব হংস হংসেতি যো জপেত্ .. ২৩..
জরামরণরোগাদি ন তস্য ভুবি বিদ্যতে .
এবং দিনে দিনে কুর্যাদণিমাদিবিভূতযে .. ২৪..
ঈশ্বরত্বমবাপ্নোতি সদাভ্যাসরতঃ পুমান্ .
বহবো নৈকমার্গেণ প্রাপ্তা নিত্যত্বমাগতাঃ .. ২৫..
হংসবিদ্যামৃতে লোকে নাস্তি নিত্যত্বসাধনম্ .
যো দদাতি মহাবিদ্যাং হংসাখ্যাং পারমেশ্বরীম্ .. ২৬..
তস্য দাস্যং সদা কুর্যাত্প্রজ্ঞযা পরযা সহ .
শুভং বাঽশুভমন্যদ্বা যদুক্তং গুরুণা ভুবি .. ২৭..
তত্কুর্যাদবিচারেণ শিষ্যঃ সন্তোষসংযুতঃ .
হংসবিদ্যামিমাং লব্ধ্বা গুরুশুশ্রূষযা নরঃ .. ২৮..
আত্মানমাত্মনা সাক্ষাদ্ব্রহ্ম বুদ্ধ্বা সুনিশ্চলম্ .
দেহজাত্যাদিসম্বন্ধান্বর্ণাশ্রমসমন্বিতান্ .. ২৯..
বেদশাস্ত্রাণি চান্যানি পদপাংসুমিব ত্যজেত্ .
গুরুভক্তিং সদা কুর্যাচ্ছ্রেযসে ভূযসে নরঃ .. ৩০..
গুরুরেব হরিঃ সাক্ষান্নান্য ইত্যব্রবীচ্ছৃতিঃ .. ৩১..
শ্রুত্যা যদুক্তং পরমার্থমেব
          তত্সংশযো নাত্র ততঃ সমস্তম্ .
শ্রুত্যা বিরোধে ন ভবেত্প্রমাণং
          ভবেদনর্থায বিনা প্রমাণম্ .. ৩২..
দেহস্থঃ সকলো জ্ঞেযো নিষ্কলো দেহবর্জিতঃ .
আপ্তোপদেশগম্যোঽসৌ সর্বতঃ সমবস্থিতঃ .. ৩৩..
হংসহংসেতি যো ব্রূযাদ্ধংসো ব্রহ্মা হরিঃ শিবঃ .
গুরুবক্ত্রাত্তু লভ্যেত প্রত্যক্ষং সর্বতোমুখম্ .. ৩৪..
তিলেষু চ যথা তৈলং পুষ্পে গন্ধ ইবাশ্রিতঃ .
পুরুষস্য শরীরেঽস্মিন্স বাহ্যাভ্যন্তরে তথা .. ৩৫..
উল্কাহস্তো যথালোকে দ্রব্যমালোক্য তাং ত্যজেত্ .
জ্ঞানেন জ্ঞেযমালোক্য পশ্চাজ্জ্ঞানং পরিত্যজেত্ .. ৩৬..
পুষ্পবত্সকলং বিদ্যাদ্গন্ধস্তস্য তু নিষ্কলঃ .
বৃক্ষস্তু সকলং বিদ্যাচ্ছাযা তস্য তু নিষ্কলা .. ৩৭..
নিষ্কলঃ সকলো ভাবঃ সর্বত্রৈব ব্যবস্থিতঃ .
উপাযঃ সকলস্তদ্বদুপেযশ্চৈব নিষ্কলঃ .. ৩৮..
সকলে সকলো ভাবো নিষ্কলে নিষ্কলস্তথা .
একমাত্রো দ্বিমাত্রশ্চ ত্রিমাত্রশ্চৈব ভেদতঃ .. ৩৯..
অর্ধমাত্র পরা জ্ঞেযা তত ঊর্ধ্বং পরাত্পরম্ .
পঞ্চধা পঞ্চদৈবত্যং সকলং পরিপঠ্যতে .. ৪০..
ব্রহ্মণো হৃদযস্থানং কণ্ঠে বিষ্ণুঃ সমাশ্রিতঃ .
তালুমধ্যে স্থিতো রুদ্রো ললাটস্থো মহেশ্বরঃ .. ৪১..
নাসাগ্রে অচ্যুতং বিদ্যাত্তস্যান্তে তু পরং পদম্ .
পরত্বাত্তু পরং নাস্তীত্যেবং শাস্ত্রস্য নির্ণযঃ .. ৪২..
দেহাতীতং তু তং বিদ্যান্নাসাগ্রে দ্বাদশাঙ্গুলম্ .
তদন্তং তং বিজানীযাত্তত্রস্থো ব্যাপযেত্প্রভুঃ .. ৪৩..
মনোঽপ্যন্যত্র নিক্ষিপ্তং চক্ষুরন্যত্র পাতিতম্ .
তথাপি যোগিনাং যোগো হ্যবিচ্ছিন্নঃ প্রবর্ততে .. ৪৪..
এতত্তু পরমং গুহ্যমেতত্তু পরমং শুভম্ .
নাতঃ পরতরং কিঞ্চিন্নাতঃ পরতরং শুভম্ .. ৪৫..
শুদ্ধজ্ঞানামৃতং প্রাপ্য পরমাক্ষরনির্ণযম্ .
গুহ্যাদ্গুহ্যতমং গোপ্যং গ্রহণীযং প্রযত্নতঃ .. ৪৬..
নাপুত্রায প্রদাতব্যং নাশিষ্যায কদাচন .
গুরুদেবায ভক্তায নিত্যং ভক্তিপরায চ .. ৪৭..
প্রদাতব্যমিদং শাস্ত্রং নেতরেভ্যঃ প্রদাপযেত্ .
দাতাস্য নরকং যাতি সিদ্ধ্যতে ন কদাচন .. ৪৮..
গৃহস্থো ব্রহ্মচারী চ বানপ্রস্থশ্চ ভিক্ষুকঃ .
যত্র তত্র স্থিতো জ্ঞানী পরমাক্ষরবিত্সদা .. ৪৯..
বিষযী বিষযাসক্তো যাতি দেহান্তরে শুভম্ .
জ্ঞানাদেবাস্য শাস্ত্রস্য সর্বাবস্থোঽপি মানবঃ .. ৫০..
ব্রহ্মহত্যাশ্বমেধাদ্যৈঃ পুণ্যপাপৈর্ন লিপ্যতে .
চোদকো বোধকশ্চৈব মোক্ষদশ্চ পরঃ স্মৃতঃ .. ৫১..
ইত্যেষং ত্রিবিধো জ্ঞেয আচার্যস্তু মহীতলে .
চোদকো দর্শযেন্মার্গং বোধকঃ স্থানমাচরেত্ .. ৫২..
মোক্ষদস্তু পরং তত্ত্বং যজ্জ্ঞাত্বা পরমশ্নুতে .
প্রত্যক্ষযজনং দেহে সংক্ষেপাচ্ছৃণু গৌতম .. ৫৩..
তেনেষ্ট্বা স নরো যাতি শাশ্বতং পদমব্যযম্ .
স্বযমেব তু সংপশ্যেদ্দেহে বিন্দুং চ নিষ্কলম্ .. ৫৪..
অযনে দ্বে চ বিষুবে সদা পশ্যতি মার্গবিত্ .
কৃত্বাযামং পুরা বত্স রেচপূরককুম্ভকান্ .. ৫৫..
পূর্বং চোভযমুচ্চার্য অর্চযেত্তু যথাক্রমম্ .
নমস্কারেণ যোগেন মুদ্রযারভ্য চার্চযেত্ .. ৫৬..
সূর্যস্য গ্রহণং বত্স প্রত্যক্ষযজনং স্মৃতম্ .
জ্ঞানাত্সাযুজ্যমেবোক্তং তোযে তোযং যথা তথা .. ৫৭..
এতে গুণাঃ প্রবর্তন্তে যোগাভ্যাসকৃতশ্রমৈঃ .
তস্মাদ্যোগং সমাদায সর্বদুঃখবহিষ্কৃতঃ .. ৫৮..
যোগধ্যানং সদা কৃত্বা জ্ঞানং তন্মযতাং ব্রজেত্ .
জ্ঞানাত্স্বরূপং পরমং হংসমন্ত্রং সমুচ্চরেত্ .. ৫৯..
প্রাণিনাং দেহমধ্যে তু স্থিতো হংসঃ সদাচ্যুতঃ .
হংস এব পরং সত্যং হংস এব তু শক্তিকম্ .. ৬০..
হংস এব পরং বাক্যং হংস এব তু বাদিকম্ .
হংস এব পরো রুদ্রো হংস এব পরাত্পরম্ .. ৬১..
সর্বদেবস্য মধ্যস্থো হংস এব মহেশ্বরঃ .
পৃথিব্যাদিশিবান্তং তু অকারাদ্যাশ্চ বর্ণকাঃ .. ৬২..
কূটান্তা হংস এব স্যান্মাতৃকেতি ব্যবস্থিতাঃ .
মাতৃকারহিতং মন্ত্রমাদিশন্তে ন কুত্রচিত্ .. ৬৩..
হংসজ্যোতিরনূপম্যং মধ্যে দেবং ব্যবস্থিতম্ .
দক্ষিণামুখমাশ্রিত্য জ্ঞানমুদ্রাং প্রকল্পযেত্ .. ৬৪..
সদা সমাধিং কুর্বীত হংসমন্ত্রমনুস্মরন্ .
নির্মলস্ফটিকাকারং দিব্যরূপমনুত্তমম্ .. ৬৫..
মধ্যদেশে পরং হংসং জ্ঞানমুদ্রাত্মরূপকম্ .
প্রাণোঽপানঃ সমানশ্চোদানব্যানৌ চ বাযবঃ .. ৬৬..
পঞ্চকর্মেন্দ্রিযৈরুক্তাঃ ক্রিযাশক্তিবলোদ্যতাঃ .
নাগঃ কূর্মশ্চ কৃকরো দেবদত্তো ধনঞ্জযঃ .. ৬৭..
পঞ্চজ্ঞানেন্দ্রিযৈর্যুক্তা জ্ঞানশক্তিবলোদ্যতাঃ .
পাবকঃ শক্তিমধ্যে তু নাভিচক্রে রবিঃ স্থিতঃ .. ৬৮..
বন্ধমুদ্রা কৃতা যেন নাসাগ্রে তু স্বলোচনে .
অকারেবহ্নিরিত্যাহুরুকারে হৃদি সংস্থিতঃ .. ৬৯..
মকারে চ ভ্রুবোর্মধ্যে প্রাণশক্ত্যা প্রবোধযেত্ .
ব্রহ্মগ্রন্থিরকারে চ বিষ্ণুগ্রন্থির্হৃদি স্থিতঃ .. ৭০..
রুদ্রগ্রন্থির্ভ্রুবোর্মধ্যে ভিদ্যতেঽক্ষরবাযুনা .
অকারে সংস্থিতো ব্রহ্মা উকারে বিষ্ণুরাস্থিতঃ .. ৭১..
মকারে সংস্থিতো রুদ্রস্ততোঽস্যান্তঃ পরাত্পরঃ .
কণ্ঠং সঙ্কুচ্য নাড্যাদৌ স্তম্ভিতে যেন শক্তিতঃ .. ৭২..
রসনা পীড্যমানেযং ষোডশী বোর্ধ্বগামিনি .
ত্রিকূটং ত্রিবিধা চৈব গোলাখং নিখরং তথা .. ৭৩..
ত্রিশঙ্খবজ্রমোঙ্কারমূর্ধ্বনালং ভ্রুবোর্মুখম্ .
কুণ্ডলীং চালযন্প্রাণান্ভেদযন্শশিমণ্ডলম্ .. ৭৪..
সাধযন্বজ্রকুম্ভানি নবদ্বারাণি বন্ধযেত্ .
সুমনঃপবনারূঢঃ সরাগো নির্গুণস্তথা .. ৭৫..
ব্রহ্মস্থানে তু নাদঃ স্যাচ্ছাকিন্যামৃতবর্ষিণী .
ষট্চক্রমণ্ডলোদ্ধারং জ্ঞানদীপং প্রকাশযেত্ .. ৭৬..
সর্বভূতস্থিতং দেবং সর্বেশং নিত্যমর্চযেত্ .
আত্মরূপং তমালোক্য জ্ঞানরূপং নিরামযম্ .. ৭৭..
দৃশ্যন্তং দিব্যরূপেণ সর্বব্যাপী নিরঞ্জনঃ .
হংস হংস বদেদ্বাক্যং প্রাণিনাং দেহমাশ্রিতঃ .
সপ্রাণাপানযোর্গ্রন্থিরজপেত্যভিধীযতে .. ৭৮..
সহস্রমেকং দ্বযুতং ষট্শতং চৈব সর্বদা .
উচ্চরন্পঠিতো হংসঃ সোঽহমিত্যভিধীযতে .. ৭৯..
পূর্বভাগে হ্যধোলিঙ্গং শিখিন্যাং চৈব পশ্চিমম্ .
জ্যোতির্লিঙ্গং ভ্রুবোর্মধ্যে নিত্যং ধ্যাযেত্সদা যতিঃ .. ৮০..
অচ্যুতোঽহমচিন্ত্যোঽহমতর্ক্যোঽহমজোঽস্ম্যহম্ .
অপ্রাণোঽহমকাযোঽহমনঙ্গোঽস্ম্যভযোঽস্ম্যহম্ .. ৮১..
অশব্দোঽহমরূপোঽহমস্পর্শোঽস্ম্যহমদ্বযঃ .
অরসোঽহমগন্ধোঽহমনাদিরমৃতোঽস্ম্যহম্ .. ৮২..
অক্ষযোঽহমলিঙ্গোঽহমজরোঽস্ম্যকলোঽস্ম্যহম্ .
অপ্রাণোঽহমমূকোঽহমচিন্ত্যোঽস্ম্যকৃতোঽস্ম্যহম্ .. ৮৩..
অন্তর্যাম্যহমগ্রাহ্যোঽনির্দেশ্যোঽহমলক্ষণঃ .
অগোত্রোঽহমগাত্রোঽহমচক্ষুষ্কোঽস্ম্যবাগহম্ .. ৮৪..
অদৃশ্যোঽহমবর্ণোঽহমখণ্ডোঽস্ম্যহমদ্ভুতঃ .
অশ্রুতোঽহমদৃষ্টোঽহমন্বেষ্টব্যোঽমরোঽস্ম্যহম্ .. ৮৫..
অবাযুরপ্যনাকাশোঽতেজস্কোঽব্যভিচার্যহম্ .
অমতোঽহমজাতোঽহমতিসূক্ষ্মোঽবিকার্যহম্ .. ৮৬..
অরজস্কোঽতমস্কোঽহমসত্ত্বোস্ম্যগুণোঽস্ম্যহম্ .
অমাযোঽনুভবাত্মাহমনন্যোঽবিষযোঽস্ম্যহম্ .. ৮৭..
অদ্বৈতোঽহমপূর্ণোঽহমবাহ্যোঽহমনন্তরঃ .
অশ্রোতোঽহমদীর্ঘোঽহমব্যক্তোঽহমনামযঃ .. ৮৮..
অদ্বযানন্দবিজ্ঞানঘনোঽস্ম্যহমবিক্রিযঃ .
অনিচ্ছোঽহমলেপোঽহমকর্তাস্ম্যহমদ্বযঃ .. ৮৯..
অবিদ্যাকার্যহীনোঽহমবাগ্রসনগোচরঃ .
অনল্পোঽহমশোকোঽহমবিকল্পোঽস্ম্যবিজ্বলন্ .. ৯০..
আদিমধ্যান্তহীনোঽহমাকাশসদৃশোঽস্ম্যহম্ .
আত্মচৈতন্যরূপোঽহমহমানন্দচিদ্ঘনঃ .. ৯১..
আনন্দামৃতরূপোঽহমাত্মসংস্থোহমন্তরঃ .
আত্মকামোহমাকাশাত্পরমাত্মেশ্বরোস্ম্যহম্ .. ৯২..
ঈশানোস্ম্যহমীড্যোঽহমহমুত্তমপূরুষঃ .
উত্কৃষ্টোঽহমুপদ্রষ্টা অহমুত্তরতোঽস্ম্যহম্ .. ৯৩..
কেবলোঽহং কবিঃ কর্মাধ্যক্ষোঽহং করণাধিপঃ .
গুহাশযোঽহং গোপ্তাহং চক্ষুষশ্চক্ষুরস্ম্যহম্ .. ৯৪..
চিদানন্দোঽস্ম্যহং চেতা চিদ্ঘনশ্চিন্মযোঽস্ম্যহম্ .
জ্যোতির্মযোঽস্ম্যহং জ্যাযাঞ্জ্যোতিষাং জ্যোতিরস্ম্যহম্ .. ৯৫..
তমসঃ সাক্ষ্যহং তুর্যতুর্যোঽহং তমসঃ পরঃ .
দিব্যো দেবোঽস্মি দুর্দর্শো দৃষ্টাধ্যাযো ধ্রুবোঽস্ম্যহম্ .. ৯৬..
নিত্যোঽহং নিরবদ্যোঽহং নিষ্ক্রিযোঽস্মি নিরঞ্জনঃ .
নির্মলো নির্বিকল্পোঽহং নিরাখ্যাতোঽস্মি নিশ্চলঃ .. ৯৭..
নির্বিকারো নিত্যপূতো নির্গুণো নিঃস্পৃহোঽস্ম্যহম্ .
নিরিন্দ্রিযো নিযন্তাহং নিরপেক্ষোঽস্মি নিষ্কলঃ .. ৯৮..
পুরুষঃ পরমাত্মাহং পুরাণঃ পরমোঽস্ম্যহম্ .
পরাবরোঽস্ম্যহং প্রাজ্ঞঃ প্রপঞ্চোপশমোঽস্ম্যহম্ .. ৯৯..
পরামৃতোঽস্ম্যহং পূর্ণঃ প্রভুরস্মি পুরাতনঃ .
পূর্ণানন্দৈকবোধোঽহং প্রত্যগেকরসোঽস্ম্যহম্ .. ১০০..
প্রজ্ঞাতোঽহং প্রশান্তোঽহং প্রকাশঃ পরমেশ্বরঃ .
একদা চিন্ত্যমানোঽহং দ্বৈতাদ্বৈতবিলক্ষণঃ .. ১০১..
বুদ্ধোঽহং ভূতপালোঽহং ভারূপো ভগবানহম্ .
মহাজ্ঞেযো মহানস্মি মহাজ্ঞেযো মহেশ্বরঃ .. ১০২..
বিমুক্তোঽহং বিভুরহং বরেণ্যো ব্যাপকোঽস্ম্যহম্ .
বৈশ্বানরো বাসুদেবো বিশ্বতশ্চক্ষুরস্ম্যহম্ .. ১০৩..
বিশ্বাধিকোঽহং বিশদো বিষ্ণুর্বিশ্বকৃদস্ম্যহম্ .
শুদ্ধোঽস্মি শুক্রঃ শান্তোঽস্মি শাশ্বতোঽস্মি শিবোঽস্ম্যহম্ .. ১০৪..
সর্বভূতান্তরাত্মহমহমস্মি সনাতনঃ .
অহং সকৃদ্বিভাতোঽস্মি স্বে মহিম্নি সদা স্থিতঃ .. ১০৫..
সর্বান্তরঃ স্বযংজ্যোতিঃ সর্বাধিপতিরস্ম্যহম্ .
সর্বভূতাধিবাসোঽহং সর্বব্যাপী স্বরাডহম্ .. ১০৬..
সমস্তসাক্ষী সর্বাত্মা সর্বভূতগুহাশযঃ .
সর্বেন্দ্রিযগুণাভাসঃ সর্বেন্দ্রিযবিবর্জিতঃ .. ১০৭..
স্থানত্রযব্যতীতোঽহং সর্বানুগ্রাহকোঽস্ম্যহম্ .
সচ্চিদানন্দ পূর্ণাত্মা সর্বপ্রেমাস্পদোঽস্ম্যহম্ .. ১০৮..
সচ্চিদানন্দমাত্রোঽহং স্বপ্রকাশোঽস্মি চিদ্ঘনঃ .
সত্ত্বস্বরূপসন্মাত্রসিদ্ধসর্বাত্মকোঽস্ম্যহম্ .. ১০৯..
সর্বাধিষ্ঠানসন্মাত্রঃ স্বাত্মবন্ধহরোঽস্ম্যহম্ .
সর্বগ্রাসোঽস্ম্যহং সর্বদ্রষ্টা সর্বানুভূরহম্ .. ১১০..
এবং যো বেদ তত্ত্বেন স বৈ পুরুষ উচ্যত ইত্যুপনিষত্ ..
ॐ সহ নাববতু .. সহ নৌ ভুনক্তু .. সহ বীর্যং করবাবহৈ ..
তেজস্বিনাবধীতমস্তু মা বিদ্বিষাবহৈ ..
ॐ শান্তিঃ শান্তিঃ শান্তিঃ ..
ইতি ব্রহ্মবিদ্যোপনিষত্সমাপ্তা ..