ত্রিশিখিব্রহ্মন

.. ত্রিশিখিব্রাহ্মণোপনিষত্ ..

যোগজ্ঞানৈকসংসিদ্ধশিবতত্ত্বতযোজ্জ্বলম্ .
প্রতিযোগিবিনির্মুক্তং পরংব্রহ্ম ভবাম্যহম্ ..
ॐ পূর্ণমদঃ পূর্ণমিদং পূর্ণাত্পূর্ণমুদচ্যতে .
পূর্ণস্য পূর্ণমাদায পূর্ণমেবাবশিষ্যতে ..
ॐ শান্তিঃ শান্তিঃ শান্তিঃ ..
ॐ ত্রিশিখী ব্রাহ্মণ আদিত্যলোকং জগাম তং গত্বোবাচ .
ভগবন্ কিং দেহঃ কিং প্রাণঃ কিং কারণ কিমাত্মা স
হোবাচ সর্বমিদং শিব এব বিজানীহি . কিংতু নিত্যঃ শুদ্ধো
নিরঞ্জনো বিভুরদ্বযঃ শিব একঃ স্বেন ভাসেদং সর্বং
দৃষ্ট্বা তপ্তাযঃপিণ্ডবদেকং ভিন্নবদবভাসতে .
তদ্ভাসকং কিমিতি চেদুচ্যতে . সচ্ছব্দবাচ্য-
মবিদ্যাশবলং ব্রহ্ম . ব্রহ্মণোঽব্যক্তম্ . অব্যক্তান্মহত্ .
মহতোঽহঙ্কারঃ . অহঙ্কারাত্পঞ্চতন্মাত্রাণি .
পঞ্চতন্মাত্রেভ্যঃ পঞ্চমহাভূতানি .
পঞ্চমহাভূতেভ্যোঽখিলং জগত্ ..
তদখিলং কিমিতি . ভূতবিকারবিভাগাদিরিতি . একস্মিন্পিণ্ডে
কথং ভূতবিকারবিভাগ ইতি . তত্তত্কার্যকারণভেদরূপে-
ণাংশতত্ত্ববাচকবাচ্যস্থানভেদবিষযদেবতাকোশ-
ভেদবিভাগা ভবন্তি . অথাকাশোঽন্তঃকরণমনোবুদ্ধি-
চিতাহঙ্কারঃ . বাযুঃ সমানোদানব্যানাপানপ্রাণাঃ .
বহ্নিঃ শ্রোত্রত্বক্চক্ষুর্জিহ্বাঘ্রাণানি . আপঃ শব্দস্পর্শ-
রূপরসগন্ধাঃ . পৃথিবী বাক্পাণিপাদপাযূপস্থাঃ .
জ্ঞানসঙ্কল্পনিশ্চযানুসন্ধানাভিমানা আকাশ-
কার্যান্তঃকরণবিষযাঃ . সমীকরণোন্ননযনগ্রহণ-
শ্রবণোচ্ছ্বাসা বাযুকার্যপ্রাণাদিবিষযাঃ .
শব্দস্পর্শরূপরসগন্ধা অগ্নিকার্যজ্ঞানেন্দ্রিয-
বিষযা অবাশ্রিতাঃ . বচনাদানগমনবিসর্গানন্দাঃ
পৃথিবীকার্যকর্মেন্দ্রিযবিষযাঃ . কর্মজ্ঞানেন্দ্রিয-
বিষযেষু প্রাণতন্মাত্রবিষযা অন্তর্ভূতাঃ .
মনোবুদ্ধ্যোশ্চিত্তাহঙ্কারৌ চান্তর্ভূতৌ .
অবকাশবিধূতদর্শনপিণ্ডীঈকরণধারণাঃ সূক্ষ্মতমা
জৈবতন্মাত্রবিষযাঃ . এবং দ্বাদশাঙ্গানি
আধ্যাত্মিকান্যাধিভৌতিকান্যাধিদৈবিকানি . অত্র
নিশাকরচতুর্মুখদিগ্বাতার্কবরুণাশ্ব্যগ্নীন্দ্রোপেন্দ্র-
প্রজাপতিযমা ইত্যক্ষাধিদেবতারূপৈর্দ্বাদশ-
নাড্যন্তঃপ্রবৃত্তাঃ প্রাণা এবাঙ্গানি অঙ্গজ্ঞানং
তদেব জ্ঞাতেতি . অথ ব্যোমানিলানলজলান্নানাং
পঞ্চীকরণমিতি . জ্ঞাতৃত্বং সমানযোগেন শ্রোত্রদ্বারা
শব্দগুণো বাগধিষ্ঠিত আকাশে তিষ্ঠতি আকাশস্তিষ্ঠতি .
মনোব্যানযোগেন ত্বগ্দ্বারা স্পর্শগুণঃ পাণ্যধিষ্ঠিতো
বাযৌ তিষ্ঠতি বাযুস্তিষ্ঠতি . বুদ্ধিরুদানযোগেন
চক্ষুর্দ্বারা রূপগুণঃ পাদাধিষ্ঠিতোঽগ্নৌ
তিষ্ঠত্যগ্নিস্তিষ্ঠতি . চিত্তমপানযোগেন জিহ্বাদ্বারা
রসগুণ উপস্থাধিষ্ঠিতোঽপ্সু তিষ্ঠত্যাপস্তিষ্ঠন্তি .
অহঙ্কারঃ প্রাণযোগেন ঘ্রাণদ্বারা গন্ধগুণো
গুদাধিষ্ঠিতঃ পৃথিব্যাং তিষ্ঠতি পৃথিবী তিষ্ঠতি
য এবং বেদ . অত্রৈতে শ্লোকা ভবন্তি .
পৃথগ্ভূতে ষোডশ কলাঃ স্বার্থভাগান্পরান্ক্রমাত্ .
অন্তঃকরণব্যানাক্ষিরসপাযুনভঃক্রমাত্ .. ১..
মুখ্যাত্পূর্বোত্তরৈর্ভাগৈর্ভূতেভূতে চতুশ্চতুঃ .
পূর্বমাকাশমাশ্রিত্য পৃথিব্যাদিষু সংস্থিতাঃ .. ২..
মুখ্যাদূর্ধ্বে পরা জ্ঞেযা ন পরানুত্তরান্বিদুঃ .
এবমংশো হ্যভূত্তস্মাত্তেভ্যশ্চাংশো হ্যভূত্তথা .. ৩..
তস্মাদন্যোন্যমাশ্রিত্য হ্যোতং প্রোতমনুক্রমাত্ .
পঞ্চভূতমযী ভূমিঃ সা চেতনসমন্বিতা .. ৪..
তত ওষধযোঽন্নং চ ততঃ পিণ্ডাশ্চতুর্বিধাঃ .
রসাসৃঙ্মাংসমেদোঽস্থিমজ্জাশুক্রাণি ধাতবঃ .. ৫..
কেচিত্তদ্যোগতঃ পিণ্ডা ভূতেভ্যঃ সংভবাঃ ক্বচিত্ .
তস্মিন্নন্নমযঃ পিণ্ডো নাভিমণ্ডলসংস্থিতাঃ .. ৬..
অস্য মধ্যেঽস্তি হৃদযং সনালং পদ্মকোশবত্ .
সত্ত্বান্তর্বর্তিনো দেবাঃ কর্ত্রহঙ্কারচেতনাঃ .. ৭..
অস্য বীজং তমঃপিণ্ডং মোহরূপং জডং ঘনম্ .
বর্ততে কণ্ঠমাশ্রিত্য মিশ্রীভূতমিদং জগত্ .. ৮..
প্রত্যগানন্দরূপাত্মা মূর্ধ্নি স্থানে পরে পদে .
অনন্তশক্তিসংযুক্তো জগদ্রূপেণ ভাসতে .. ৯..
সর্বত্র বর্ততে জাগ্রত্স্বপ্নং জাগ্রতি বর্ততে .
সুষুপ্তং চ তুরীযং চ নান্যাবস্থাসু কুত্রচিত্ .. ১০..
সর্বদেশেষ্বনুস্যূতশ্চতূরূপঃ শিবাত্মকঃ .
যথা মহাফলে সর্বে রসাঃ সর্বপ্রবর্তকাঃ .. ১১..
তথৈবান্নমযে কোশে কোশাস্তিষ্ঠন্তি চান্তরে .
যথা কোশস্তথা জীবো যথা জীবস্তথা শিবঃ .. ১২..
সবিকারস্তথা জীবো নির্বিকারস্তথা শিবঃ .
কোশাস্তস্য বিকারাস্তে হ্যবস্থাসু প্রবর্তকাঃ .. ১৩..
যথা রসাশযে ফেনং মথনাদেব জাযতে .
মনো নির্মথনাদেব বিকল্পা বহবস্তথা .. ১৪..
কর্মণা বর্ততে কর্মী তত্ত্যাগাচ্ছান্তিমাপ্নুযাত্ .
অযনে দক্ষিণে প্রাপ্তে প্রপঞ্চাভিমুখং গতঃ .. ১৫..
অহঙ্কারাভিমানেন জীবঃ স্যাদ্ধি সদাশিবঃ .
স চাবিবেকপ্রকৃতিসঙ্গত্যা তত্র মুহ্যতে .. ১৬..
নানাযোনিশতং গত্বা শেতেঽসৌ বাসনাবশাত্ .
বিমোক্ষাত্সংচরত্যেব মত্স্যঃ কূলদ্বযং যথা .. ১৭..
ততঃ কালবশাদেব হ্যাত্মজ্ঞানবিবেকতঃ .
উত্তরাভিমুখো ভূত্বা স্থানাত্স্থানান্তরং ক্রমাত্ .. ১৮..
মূর্ধ্ন্যাধাযাত্মনঃ প্রাণান্যোগাভ্যাসং স্থিতশ্চরন্ .
যোগাত্সঞ্জাযতে জ্ঞানং জ্ঞানাদ্যোগঃ প্রবর্ততে .. ১৯..
যোগজ্ঞানপরো নিত্যং স যোগী ন প্রণশ্যতি .
বিকারস্থং শিবং পশ্যেদ্বিকারশ্চ শিবেন তু .. ২০..
যোগপ্রকাশকং যোগৈর্ধ্যাযেচ্চানন্য ভাবনঃ .
যোগজ্ঞানে ন বিদ্যেতে তস্য ভাবো ন সিদ্ধ্যতি .. ২১..
তস্মাদভ্যাসযোগেন মনঃপ্রাণান্নিরোধযেত্ .
যোগী নিশিতধারেণ ক্ষুরেণৈব নিকৃন্তযেত্ .. ২২..
শিখা জ্ঞানমযী বৃত্তির্যমাদ্যষ্টাঙ্গসাধনৈঃ .
জ্ঞানযোগঃ কর্মযোগ ইতি যোগো দ্বিধা মতঃ .. ২৩..
ক্রিযাযোগমথেদানীং শ্রুণু ব্রাহ্মণসত্তম .
অব্যাকুলস্য চিত্তস্য বন্ধনং বিষযে ক্বচিত্ .. ২৪..
যত্সংযোগো দ্বিজশ্রেষ্ঠ স চ দ্বৈবিধ্যমশ্নুতে .
কর্ম কর্তব্যমিত্যেব বিহিতেষ্বেব কর্মসু .. ২৫..
বন্ধনং মনসো নিত্যং কর্মযোগঃ স উচ্যতে .
যত্ত চিত্তস্য সততমর্থে শ্রেযসি বন্ধনম্ .. ২৬..
জ্ঞানযোগঃ স বিজ্ঞেযঃ সর্বসিদ্ধিকরঃ শিবঃ .
যস্যোক্তলক্ষণে যোগে দ্বিবিধেঽপ্যব্যযং মনঃ .. ২৭..
স যাতি পরমং শ্রেযো মোক্ষলক্ষণমঞ্জসা .
দেহেন্দ্রিযেষু বৈরাগ্যং যম ইত্যুচ্যতে বুধৈঃ .. ২৮..
অনুরক্তিঃ পরে তত্ত্বে সততং নিযমঃ স্মৃতঃ .
সর্ববস্তুন্যুদাসীনভাবমাসনমুত্তমম্ .. ২৯..
জগত্সর্বমিদং মিথ্যাপ্রতীতিঃ প্রাণসংযমঃ .
চিত্তস্যান্তর্মুখীভাবঃ প্রত্যাহারস্তু সত্তম .. ৩০..
চিত্তস্য নিশ্চলীভাবো ধারণা ধারণং বিদুঃ .
সোঽহং চিন্মাত্রমেবেতি চিন্তনং ধ্যানমুচ্যতে .. ৩১..
ধ্যানস্য বিস্মৃতিঃ সম্যক্সমাধিরভিধীযতে .
অহিংসা সত্যমস্তেযং ব্রহ্মচর্যং দযার্জবম্ .. ৩২..
ক্ষমা ধৃতির্মিতাহারঃ শৌচং চেতি যমাদশ .
তপঃসন্তুষ্টিরাস্তিক্যং দানমারাধনং হরেঃ .. ৩৩..
বেদান্তশ্রবণং চৈব হ্রীর্মতিশ্চ জপো ব্রতম্ .. ইতি .
আসনানি তদঙ্গানি স্বস্তিকাদীনি বৈ দ্বিজ .. ৩৪..
বর্ণ্যন্তে স্বস্তিকং পাদতলযোরুভযোরপি .
পূর্বোত্তরে জানুনী দ্বে কৃত্বাসনমুদীরিতম্ .. ৩৫..
সব্যে দক্ষিণগুল্ফং তু পৃষ্ঠপার্শ্বে নিযোজযেত্ .
দক্ষিণেঽপি তথা সব্যং গোমুখং গোর্মুখং যথা .. ৩৬..
এক.ম্ চরণমন্যস্মিন্নূরাবারোপ্য নিশ্চলঃ .
আস্তে যদিদমেনোঘ্নং বীরাসনমুদীরিতম্ .. ৩৭..
গুদং নিযম্য গুল্ফাভ্যাং ব্যুত্ক্রমেণ সমাহিতঃ .
যোগাসনং ভবেদেতদিতি যোগবিদো বিদুঃ .. ৩৮..
ঊর্বোরুপরিবৈ ধত্তে যদা পাদতলে উভে .
পদ্মাসনং ভবেদেতত্সর্বব্যাধিবিষাপহম্ .. ৩৯..
পদ্মাসনং সুসংস্থাপ্য তদঙ্গুষ্ঠদ্বযং পুনঃ .
ব্যুত্ক্রমেণৈব হস্তাভ্যাং বদ্ধপদ্মাসনং ভবেত্ .. ৪০..
পদ্মাসনং সুসংস্থাপ্য জানূর্বোরন্তরে করৌ .
নিবেশ্য ভূমাবাতিষ্ঠেদ্ব্যোমস্থঃ কুক্কুটাসনঃ .. ৪১..
কুক্কুটাসনবন্ধস্থো দোর্ভ্যাং সংবধ্য কন্ধরম্ .
শেতে কূর্মবদুত্তান এতদুত্তানকূর্মকম্ .. ৪২..
পাদাঙ্গুষ্ঠৌ তু পাণিভ্যাং গৃহীত্বা শ্রবণাবধি .
ধনুরাকর্ষকাকৃষ্টং ধনুরাসনমীরিতম্ .. ৪৩..
সীবনীং গুল্ফদেশাভ্যাং নিপীড্য ব্যুত্ক্রমেণ তু .
প্রসার্য জানুনোর্হস্তাবাসনং সিংহরূপকম্ .. ৪৪..
গুল্ফৌ চ বৃষণস্যাধঃ সীবন্যুভযপার্শ্বযোঃ .
নিবেশ্য পাদৌ হস্তাভ্যাং বধ্বা ভদ্রাসনং ভবেত্ .. ৪৫..
সীবনীপার্শ্বমুভযং গুল্ফাভ্যাং ব্যুত্ক্রমেণ তু .
নিপীড্যাসনমেতচ্চ মুক্তাসনমুদীরিতম্ .. ৪৬..
অবষ্টভ্য ধরাং সম্যক্তলাভ্যাং হস্তযোর্দ্বযোঃ .
কূর্পরৌ নাভিপার্শ্বে তু স্থাপযিত্বা মযূরবত্ .. ৪৭..
সমুন্নতশিরঃপাদং মযূরাসনমিষ্যতে .
বামোরুমূলে দক্ষাঙ্ঘ্রিং জান্বোর্বেষ্টিতপাণিনা .. ৪৮..
বামেন বামাঙ্গুষ্ঠং তু গৃহীতং মত্স্যপীঠকম্ .
যোনিং বামেন সংপীড্য মেঢ্রাদুপরি দক্ষিণম্ .. ৪৯..
ঋজুকাযঃ সমাসীনঃ সিদ্ধাসনমুদীরিতম্ .
প্রসার্য ভুবি পাদৌ তু দোর্ভ্যামঙ্গুষ্ঠমাদরাত্ .. ৫০..
জানূপরি ললাটং তু পশ্চিমং তানমুচ্যতে .
যেনকেন প্রকারেণ সুখং ধার্যং চ জাযতে .. ৫১..
তত্সুখাসনমিত্যুক্তমশক্তস্তত্সমাচরেত্ .
আসনং বিজিতং যেন জিতং তেন জগত্ত্রযম্ .. ৫২..
যমৈশ্চ নিযমৈশ্চৈব আসনৈশ্চ সুসংযতঃ .
নাডীশুদ্ধিং চ কৃত্বাদৌ প্রাণাযামং সমাচরেত্ .. ৫৩..
দেহমানং স্বাঙ্গুলিভিঃ ষণ্ণবত্যঙ্গুলাযতম্ .
প্রাণঃ শরীরাদধিকো দ্বাদশাঙ্গুলমানতঃ .. ৫৪..
দেহস্থমনিলং দেহসমুদ্ভূতেন বহ্নিনা .
ন্যূনং সমং বা যোগেন কুর্বন্ব্রহ্মবিদিষ্যতে .. ৫৫..
দেহমধ্যে শিখিস্থানং তপ্তজাম্বূনদপ্রভম্ .
ত্রিকোণং দ্বিপদামন্যচ্চতুরস্রং চতুষ্পদম্ .. ৫৬..
বৃত্তং বিহঙ্গমানাং তু ষডস্রং সর্পজন্মনাম্ .
অষ্টাস্রং স্বেদজানাং তু তস্মিন্দীপবদুজ্জ্বলম্ .
কন্দস্থানং মনুষ্যাণাং দেহমধ্যং নবাঙ্গুলম্ .
চতুরঙ্গুলমুত্সেধং চতুরঙ্গুলমাযতম্ .. ৫৭..
অণ্ডাকৃতি তিরশ্চাং চ দ্বিজানাং চ চতুষ্পদাম্ .
তুন্দমধ্যং তদিষ্টং বৈ তন্মধ্যং নাভিরিপ্যতে .. ৫৮..
তত্র চক্রং দ্বাদশারং তেষু বিষ্ণ্বাদিমূর্তযঃ .
অহং তত্র স্থিতশ্চক্রং ভ্রামযামি স্বমাযযা .. ৫৯..
অরেষু ভ্রমতে জীবঃ ক্রমেণ দ্বিজসত্তম .
তন্তুপঞ্জরমধ্যস্থা যথা ভ্রমতি লূতিকা .. ৬০..
প্রাণাধিরূঢশ্চরতি জীবস্তেন বিনা নহি .
তস্যোর্ধ্বে কুণ্ডলীস্থানং নাভেস্তির্যগথোর্ধ্বতঃ .. ৬১..
অষ্টপ্রকৃতিরূপা সা চাষ্টধা কুণ্ডলীকৃতা .
যথাবদ্বাযুসারং চ জ্বলনাদি চ নিত্যশঃ .. ৬২
পরিতঃ কন্দপার্শ্বে তু নিরুধ্যেব সদা স্থিতা .
মুখেনৈব সমাবেষ্ট্য ব্রহ্মরন্ধ্রমুখং তথা .. ৬৩..
যোগকালেন মরুতা সাগ্নিনা বোধিতা সতী .
স্ফুরিতা হৃদযাকাশে নাগরূপা মহোজ্জ্বলা .. ৬৪..
অপনাদ্দ্বযঙ্গুলাদূর্ধ্বমধো মেঢ্রস্য তাবতা .
দেহমধ্যং মনুষ্যাণাং হৃন্মধ্যং তু চতুষ্পদাম্ .. ৬৫..
ইতরেষাং তুন্দমধ্যে প্রাণাপানসমাযুতাঃ .
চতুষ্প্রকারদ্ব্যযুতে দেহমধ্যে সুষুম্নযা .. ৬৬..
কন্দমধ্যে স্থিতা নাডী সুষুম্না সুপ্রতিষ্ঠিতা .
পদ্মসূত্রপ্রতীকাশা ঋজুরূর্ধ্বপ্রবর্তিনী .. ৬৭..
ব্রহ্মণো বিবরং যাবদ্বিদ্যুদাভাসনালকম্ .
বৈষ্ণবী ব্রহ্মনাডী চ নির্বাণপ্রাপ্তিপদ্ধতিঃ .. ৬৮..
ইডা চ পিঙ্গলা চৈব তস্যাঃ সব্যেতরে স্থিতে .
ইডা সমুত্থিতা কন্দাদ্বামনাসাপুটাবধি .. ৬৯..
পিঙ্গলা চোত্থিতা তস্মাদ্দক্ষনাসাপুটাবধি .
গান্ধারী হস্তিজিহ্বা চ দ্বে চান্যে নাডিকে স্থিতে .. ৭০..
পুরতঃ পৃষ্ঠতস্তস্য বামেতরদৃশৌ প্রতি .
পূষা যশস্বিনী নাড্যৌ তস্মাদেব সমুত্থিতে .. ৭১..
সব্যেতরশ্রুত্যবধি পাযুমূলাদলম্বুঅসা .
অধোগতা শুভা নাডী মেঢ্রান্তাবধিরাযতা .. ৭২..
পাদাঙ্গুষ্ঠাবধিঃ কন্দাদধোযাতা চ কৌশিকী .
দশপ্রকারভূতাস্তাঃ কথিতাঃ কন্দসম্ভবাঃ .. ৭৩..
তন্মূলা বহবো নাড্যঃ স্থূলসূক্ষ্মাশ্চ নাডিকাঃ .
দ্বাসপ্ততিসহস্রাণি স্থূলাঃ সূক্ষ্মাশ্চ নাডযঃ .. ৭৪..
সংখ্যাতুং ন শক্যন্তে স্থূলমূলাঃ পৃথগ্বিধাঃ .
যথাশ্বত্থদলে সূক্ষ্মাঃ স্থূলাশ্চ বিততাস্তথা .. ৭৫..
প্রাণাপানৌ সমানশ্চ উদানো ব্যান এব চ .
নাগঃ কূর্মশ্চ কৃকরো দেবদত্তো ধনঞ্জযঃ .. ৭৬..
চরন্তি দশনাডীষু দশ প্রাণাদিবাযবঃ .
প্রাণাদিপঞ্চকং তেষু প্রধানং তত্র চ দ্বযম্ .. ৭৭..
প্রাণ এবাথবা জ্যেষ্ঠো জীবাত্মানং বিভর্তি যঃ .
আস্যনাসিকযোর্মধ্যং হৃদযং নাভিমণ্ডলম্ .. ৭৮..
পাদাঙ্গুষ্ঠমিতি প্রাণস্থানানি দ্বিজসত্তম .
অপানশ্চরতি ব্রহ্মন্গুদমেঢ্রোরুজানুষু .. ৭৯..
সমানঃ সর্বগাত্রেষু সর্বব্যাপী ব্যবস্থিতঃ .
উদানঃ সর্বসন্ধিস্থঃ পাদযোর্হস্তযোরপি .. ৮০..
ব্যানঃ শ্রোত্রোরুকট্যাং চ গুল্ফস্কন্ধগলেষু চ .
নাগাদিবাযবঃ পঞ্চ ত্বগস্থাদিষু সংস্থিতাঃ .. ৮১..
তুন্দস্থজলমন্নং চ রসাদীনি সমীকৃতম্ .
তুন্দমধ্যগতঃ প্রাণস্তানি কুর্যাত্পৃথক্পৃথক্ .. ৮২..
ইত্যাদিচেষ্টনং প্রাণঃ করোতি চ পৃথক্স্থিতম্ .
অপানবাযুর্মূত্রাদেঃ করোতি চ বিসর্জনম্ .. ৮৩..
প্রাণাপানাদিচেষ্টাদি ক্রিযতে ব্যানবাযুনা .
উজ্জীর্যতে শরীরস্থমুদানেন নভস্বতা .. ৮৪..
পোষণাদিশরীরস্য সমানঃ কুরুতে সদা .
উদ্গারাদিক্রিযো নাগঃ কূর্মোঽক্ষাদিনিমীলনঃ .. ৮৫..
কৃকরঃ ক্ষুতযোঃ কর্তা দত্তো নিদ্রাদিকর্মকৃত্ .
মৃতগাত্রস্য শোভাদের্ধনঞ্জয উদাহৃতঃ .. ৮৬..
নাডীভেদং মরুদ্ভেদং মরুতাং স্থানমেব চ .
চেষ্টাশ্চ বিবিধাস্তেষাং জ্ঞাত্বৈব নিজসত্তম .. ৮৭..
শুদ্ধৌ যতেত নাডীনাং পূর্বোক্তজ্ঞানসংযুতঃ .
বিবিক্তদেশমাসাদ্য সর্বসংবন্ধবর্জিতঃ .. ৮৮..
যোগাঙ্গদ্রব্যসংপূর্ণং তত্র দারুমযে শুভে .
আসনে কল্পিতে দর্ভকুশকৃষ্ণাজিনাদিভিঃ .. ৮৯..
তাবদাসনমুত্সেধে তাবদ্দ্বযসমাযতে .
উপবিশ্যাসনং সম্যক্স্বস্তিকাদি যথারুচি .. ৯০..
বধ্বা প্রাগাসনং বিপ্রো ঋজুকাযঃ সমাহিতঃ .
নাসাগ্রন্যস্তনযনো দন্তৈর্দন্তানসংস্পৃশন্ .. ৯১..
রসনাং তালুনি ন্যস্য স্বস্থচিত্তো নিরামযঃ .
আকুঞ্চিতশিরঃ কিংচিন্নিবধ্নন্যোগমুদ্রযা .. ৯২..
হস্তৌ যথোক্তবিধিনা প্রাণাযামং সমাচরেত্ .
রেচনং পূরণং বাযোঃ শোধনং রেচনং তথা .. ৯৩..
চতুর্ভিঃ ক্লেশনং বাযোঃ প্রাণাযাম উদীর্যতে .
হস্তেন দক্ষিণেনৈব পীডযেন্নাসিকাপুটম্ .. ৯৪..
শনৈঃ শনৈরথ বহিঃ প্রক্ষিপেত্পিঙ্গলানিলম্ .
ইডযা বাযুমাপূর্য ব্রহ্মন্ষোডশমাত্রযা .. ৯৫..
পূরিতং কুম্ভযেত্পশ্চাচ্চতুঃষষ্ট্যা তু মাত্রযা .
দ্বাত্রিংশন্মাত্রযা সম্যগ্রেচযেত্পিঙ্গলানিলম্ .. ৯৬..
এবং পুনঃ পুনঃ কার্যং ব্যুত্ক্রমানুক্রমেণ তু .
সংপূর্ণকুম্ভবদ্দেহং কুম্ভযেন্মাতরিশ্বনা .. ৯৭..
পূরণান্নাডযঃ সর্বাঃ পূর্যন্তে মাতরিশ্বনা .
এবং কৃতে সতি ব্রহ্মংশ্চরন্তি দশ বাযবঃ .. ৯৮..
হৃদযাম্ভোরুহং চাপি ব্যাকোচং ভবতি স্ফুটম্ .
তত্র পশ্যেত্পরাত্মানং বাসুদেবমকল্মষম্ .. ৯৯..
প্রাতর্মধ্যন্দিনে সাযমর্ধরাত্রে চ কুম্ভকান্ .
শনৈরশীতিপর্যন্তং চতুর্বারং সমভ্যসেত্ .. ১০০..
একাহমাত্রং কুর্বাণঃ সর্বপাপৈঃ প্রমুচ্যতে .
সংবত্সরত্রযাদূর্ধ্বং প্রাণাযামপরো নরঃ .. ১০১..
যোগসিদ্ধো ভবেদ্যোগী বাযুজিদ্বিজিতেন্দ্রিযঃ .
অল্পাশী স্বল্পনিদ্রশ্চ তেজস্বী বলবান্ভবেত্ .. ১০২..
অপমৃত্যুমতিক্রম্য দীর্ঘমাযুরবাপ্নুযাত্ .
প্রস্বেদজননং যস্য প্রাণাযামস্তু সোঽধমঃ .. ১০৩..
কংপনং বপুষো যস্য প্রাণাযামেষু মধ্যমঃ .
উত্থানং বপুষো যস্য স উত্তম উদাহৃতঃ .. ১০৪..
অধমে ব্যাধিপাপানাং নাশঃ স্যান্মধ্যমে পুনঃ .
পাপরোগমহাব্যাধিনাশঃ স্যাদুত্তমে পুনঃ .. ১০৫..
অল্পমূত্রোঽল্পবিষ্ঠশ্চ লঘুদেহো মিতাশনঃ .
পট্বিন্দ্রিযঃ পটুমতিঃ কালত্রযবিদাত্মবান্ .. ১০৬..
রেচকং পূরকং মুক্ত্বা কুম্ভীকরণমেব যঃ .
করোতি ত্রিষু কালেষু নৈব তস্যাস্তি দুর্লভম্ .. ১০৭..
নাভিকন্দে চ নাসাগ্রে পাদাঙ্গুষ্ঠে চ যত্নবান্ .
ধারযেন্মনসা প্রাণান্সন্ধ্যাকালেষু বা সদা .. ১০৮..
সর্বরোগৈর্বিনির্মুক্তো জীবেদ্যোগী গতক্লমঃ .
কুক্ষিরোগবিনাশঃ স্যান্নাভিকন্দেষু ধারণাত্ .. ১০৯..
নাসাগ্রে ধারণাদ্দীর্ঘমাযুঃ স্যাদ্দেহলাঘবম্ .
ব্রাহ্মে মুহূর্তে সংপ্রাপ্তে বাযুমাকৃষ্য জিহ্বযা .. ১১০..
পিবতস্ত্রিষু মাসেষু বাক্সিদ্ধির্মহতী ভবেত্ .
অভ্যাসতশ্চ ষণ্মাসান্মহারোগবিনাশনম্ .. ১১১..
যত্র যত্র ধৃতো বাযুরঙ্গে রোগাদিদূষিতে .
ধারণাদেব মরুতস্তত্তদারোগ্যমশ্নুতে .. ১১২..
মনসো ধারণাদেব পবনো ধারিতো ভবেত্ .
মনসঃ স্থাপনে হেতুরুচ্যতে দ্বিজপুঙ্গব .. ১১৩..
করণানি সমাহৃত্য বিষযেভ্যঃ সমাহিতঃ .
অপানমূর্ধ্বমাকৃষ্যেদুদরোপরি ধারযেত্ .. ১১৪..
বন্ধন্করাভ্যাং শ্রোত্রাদিকরণানি যথাতথম্ .
যুঞ্জানস্য যথোক্তেন বর্ত্মনা স্ববশং মনঃ .. ১১৫..
মনোবশাত্প্রাণবাযুঃ স্ববশে স্থাপ্যতে সদা .
নাসিকাপুটযোঃ প্রাণঃ পর্যাযেণ প্রবর্ততে .. ১১৬..
তিস্রশ্চ নাডিকাস্তাসু স যাবন্তং চরত্যযম্ .
শঙ্খিনীবিবরে যাম্যে প্রাণঃ প্রাণভৃতাং সতাম্ .. ১১৭..
তাবন্তং চ পুনঃ কালং সৌম্যে চরতি সন্ততম্ .
ইত্থং ক্রমেণ চরতা বাযুনা বাযুজিন্নরঃ .. ১১৮..
অহশ্চ রাত্রিং পক্ষং চ মাসমৃত্বযনাদিকম্ .
অন্তর্মুখো বিজানীযাত্কালভেদং সমাহিতঃ .. ১১৯..
অঙ্গুষ্ঠাদিস্বাবযবস্ফুরণাদশনেরপি .
অরিষ্টৈর্জীবিতস্যাপি জানীযাত্ক্ষযমাত্মনঃ ..১২০..
জ্ঞাত্বা যতেত কৈবল্যপ্রাপ্তযে যোগবিত্তমঃ .
পাদাঙ্গুষ্ঠে করাঙ্গুষ্ঠে স্ফুরণং যস্য ন শ্রুতিঃ .. ১২১..
তস্য সংবত্সরাদূর্ধ্বং জীবিতস্য ক্ষযো ভবেত্ .
মণিবন্ধে তথা গুল্ফে স্ফুরণং যস্য নশ্যতি .. ১২২..
ষণ্মাসাবধিরেতস্য জীবিতস্য স্থিতির্ভবেত্ .
কূর্পরে স্ফুরণং যস্য তস্য ত্রৈমাসিকী স্থিতিঃ .. ১২৩..
কুক্ষিমেহনপার্শ্বে চ স্ফুরণানুপলম্ভনে .
মাসাবধির্জীবিতস্য তদর্ধস্য তু দর্শনে .. ১২৪..
আশ্রিতে জঠরদ্বারে দিনানি দশ জীবিতম্ .
জ্যোতিঃ খদ্যোতবদ্যস্য তদর্ধং তস্য জীবিতম্ .. ১২৫..
জিহ্বাগ্রাদর্শনে ত্রীণি দিনানি স্থিতিরাত্মনঃ .
জ্বালাযা দর্শনে মৃত্যুর্দ্বিদিনে ভবতি ধ্রুবম্ .. ১২৬..
এবমাদীন্যরিষ্টানি দৃষ্টাযুঃক্ষযকারণম্ .
নিঃশ্রেযসায যুঞ্জীত জপধ্যানপরাযণঃ .. ১২৭..
মনসা পরমাত্মানং ধ্যাত্বা তদ্রূপতামিযাত্ .
যদ্যষ্টাদশভেদেষু মর্মস্থানেষু ধারণম্ .. ১২৮..
স্থানাত্স্থানং সমাকৃষ্য প্রত্যাহারঃ স উচ্যতে .
পাদাঙ্গুষ্ঠং তথা গুল্ফং জঙ্গামধ্যং তথৈব চ .. ১২৯..
মধ্যমূর্বোশ্চ মূলং পাযুর্হৃদযমেব চ .
মেহনং দেহমধ্যং চ নাভিং চ গলকূর্পরম্ .. ১৩০..
তালুমূলং চ মূলং চ ঘ্রাণস্যাক্ষ্ণোশ্চ মণ্ডলম্ .
ভ্রুবোর্মধ্যে ললাটং চ মূলমূর্ধ্বং চ জানুনী .. ১৩১..
মূলং চ করযোর্মূলং মহান্ত্যেতানি বৈ দ্বিজ .
পঞ্চভূতমযে দেহে ভূতেষ্বেতেষু পঞ্চসু .. ১৩২..
মনসো ধারণং যত্যদ্যুক্তস্য চ যমাদিভিঃ .
ধারণা সা চ সংসারসাগরোত্তরকারণম্ .. ১৩৩..
আজানুপাদপর্যন্তং পৃথিবীস্থানমিষ্যতে .
পিত্তলা চতুরস্রা চ বসুধা বজ্রলাঞ্ছিতা .. ১৩৪..
স্মর্তব্যা পঞ্চঘটিকাস্তত্রারোপ্যপ্রভঞ্জনম্ .
আজানুকটিপর্যন্তমপাং স্থানং প্রকীর্তিতম্ .. ১৩৫..
অর্ধচন্দ্রসমাকারং শ্বেতমর্জুনলাঞ্ছিতম্ .
স্মর্তব্যমম্ভঃশ্বসনমারোপ্য দশনাডিকাঃ .. ১৩৬..
আদেহমধ্যকট্যন্তমগ্নিস্থানমুদাহৃতম্ .
তত্র সিন্দূরবর্ণোঽগ্নির্জ্বলনং দশপঞ্চ চ .. ১৩৭..
স্মর্তব্যো নাডিকাঃ প্রাণং কৃত্বা কুম্ভে তথেরিতম্ .
নাভেরুপরি নাসান্তং বাযুস্থানং তু তত্র বৈ .. ১৩৮..
বেদিকাকারবদ্ধূম্রো বলবান্ভূতমারুতঃ .
স্মর্তব্যঃ কুম্ভকেনৈব প্রাণমারোপ্য মারুতম্ .. ১৩৯..
ঘটিকাবিংশতিস্তস্মাদ্ঘ্রাণাদ্ব্রহ্মবিলাবধি .
ব্যোমস্থানং নভস্তত্র ভিন্নাঞ্জনসমপ্রভম্ .. ১৪০..
ব্যোম্নি মারুতমারোপ্য কুম্ভকেনৈব যত্নবান্ .
পৃথিব্যংশে তু দেহস্য চতুর্বাহুং কিরীটিনম্ .. ১৪১..
অনিরুদ্ধং হরিং যোগী যতেত ভবমুক্তযে .
অবংশে পূরযেদ্যোগী নারাযণমুদগ্রধীঃ .. ১৪২..
প্রদ্যুম্নমগ্নৌ বায্বংশে সংকর্ষণমতঃ পরম্ .
ব্যোমাংশে পরমাত্মানং বাসুদেবং সদা স্মরেত্ .. ১৪৩..
অচিরাদেব তত্প্রাপ্তির্যুঞ্জানস্য ন সংশযঃ .
বধ্বা যোগাসনং পূর্বং হৃদ্দেশে হৃদযাঞ্জলিঃ .. ১৪৪..
নাসাগ্রন্যস্তনযনো জিহ্বাং কৃত্বা চ তালুনি .
দন্তৈর্দন্তানসংস্পৃশ্য ঊর্ধ্বকাযঃ সমাহিতঃ .. ১৪৫..
সংযমেচ্চেন্দ্রিযগ্রামমাত্মবুদ্ধ্যা বিশুদ্ধযা .
চিন্তনং বাসুদেবস্য পরস্য পরমাত্মনঃ .. ১৪৬..
স্বরূপব্যাপ্তরূপস্য ধ্যানং কৈবল্যসিদ্ধিদম্ .
যামমাত্রং বাসুদেবং চিন্তযেত্কুম্ভকেন যঃ .. ১৪৭..
সপ্তজন্মার্জিতং পাপং তস্য নশ্যতি যোগিনঃ .
নাভিকন্দাত্সমারভ্য যাবদ্ধৃদযগোচরম্ .. ১৪৮..
জাগ্রদ্বৃত্তিং বিজানীযাত্কণ্ঠস্থং স্বপ্নবর্তনম্ .
সুষুপ্তং তালুমধ্যস্থং তুর্যং ভ্রূমধ্যসংস্থিতম্ .. ১৪৯..
তুর্যাতীতং পরং ব্রহ্ম ব্রহ্মরন্ধ্রে তু লক্ষযেত্ .
জাগ্রদ্বৃত্তিং সমারভ্য যাবদ্ব্রহ্মবিলান্তরম্ .. ১৫০..
তত্রাত্মাযং তুরীযস্য তুর্যান্তে বিষ্ণুরুচ্যতে .
ধ্যানেনৈব সমাযুক্তো ব্যোম্নি চাত্যন্তনির্মলে .. ১৫১..
সূর্যকোটিদ্যুতিরথং নিত্যোদিতমধোক্ষজম্ .
হৃদযাম্বুরুহাসীনং ধ্যাযেদ্বা বিশ্বরূপিণম্ .. ১৫২..
অনেকাকারখচিতমনেকবদনান্বিতম্ .
অনেকভুজসংযুক্তমনেকাযুধমণ্ডিতম্ .. ১৫৩..
ননাবর্ণধরং দেবং শাতমুগ্রমুদাযুধম্ .
অনেকনযানাকীর্ণং সূর্যকোটিসমপ্রভম্ .. ১৫৪..
ধ্যাযতো যোগিনঃ সর্বমনোবৃত্তির্বিনশ্যতি .
হৃত্পুণ্ডরীকমধ্যস্থং চৈতন্যজ্যোতিরব্যযম্ .. ১৫৫..
কদম্বগোলকাকারং তুর্যাতীতং পরাত্পরম্ .
অনন্তমানন্দমযং চিন্মযং ভাস্করং বিভুম্ .. ১৫৬..
নিবাতদীপসদৃশমকৃত্রিমমণিপ্রভম্ .
ধ্যাযতো যোগিনস্তস্য মুক্তিঃ করতলে স্থিতা .. ১৫৭..
বিশ্বরূপস্য দেবস্য রূপং যত্কিঞ্চিদেব হি .
স্থবীযঃ সূক্ষ্মমন্যদ্বা পশ্যন্হৃদযপঙ্কজে .. ১৫৮..
ধ্যাযতো যোগিনো যস্তু সাক্ষাদেব প্রকাশতে .
অণিমাদিফলং চৈব সুখেনৈবোপজাযতে .. ১৫৯..
জীবাত্মনঃ পরস্যাপি যদ্যেবমুভযোরপি .
অহমেব পরংব্রহ্ম ব্রহ্মাহমিতি সংস্থিতিঃ .. ১৬০..
সমাধিঃ স তু বিজ্ঞেযঃ সর্ববৃত্তিবিবর্জিতঃ .
ব্রহ্ম সম্পদ্যতে যোগী ন ভূযঃ সংসৃতিং ব্রজেত্ .. ১৬১..
এবং বিশোধ্য তত্ত্বানি যোগী নিঃস্পৃহচেতসা .
যথা নিরিন্ধনো বহ্নিঃ স্বযমেব প্রশাম্যতি .. ১৬২..
গ্রাহ্যাভাবে মনঃ প্রাণো নিশ্চযজ্ঞানসংযুতঃ .
শুদ্ধসত্ত্বে পরে লীনো জীবঃ সৈন্ধবপিণ্ডবত্ .. ১৬৩..
মোহজালকসংঘাতো বিশ্বং পশ্যতি স্বপ্নবত্ .
সুষুপ্তিবদ্যশ্চরতি স্বভাবপরিনিশ্চলঃ .. ১৬৪..
নির্বাণপদমাশ্রিত্য যোগী কৈবল্যমশ্নুত ইত্যুপনিষত্ ..
ॐ পূর্ণমদঃ পূর্ণমিদং পূর্ণাত্পূর্ণমুদচ্যতে .
পূর্ণস্য পূর্ণমাদায পূর্ণমেবাবশিষ্যতে ..
ॐ শান্তিঃ শান্তিঃ শান্তিঃ ..
ইতি ত্রিশিখিব্রাহ্মণোপনিষত্সমাপ্তা ..