তারসার

.. তারসারোপনিষত্ ..
যন্নারাযণতারার্থসত্যজ্ঞানসুখাকৃতি .
ত্রিপান্নারাযণাকরং তদ্ব্রহ্মৈবাস্মি কেবলম্ ..
ॐ পূর্ণমদঃ পূর্ণমিদং পূর্ণাত্পূর্ণমুদচ্যতে .
পূর্ণস্য পূর্ণমাদায পূর্ণমেবাবশিষ্যতে ..
ॐ শান্তিঃ শান্তিঃ শান্তিঃ ..
হরিঃ ॐ ..
বৃহস্পতিরুবাচ যাজ্ঞবল্ক্যং যদনু কুরুক্ষেত্রং দেবানাং
দেবযজনং সর্বেষাং ভূতানাং ব্রহ্মসদনং তস্মাদ্যত্র
ক্বচন গচ্ঘ্ছেত্তদেব মন্যেতেতি . ইদং বৈ কুরুক্ষেত্রং দেবানাং
দেবযজনং সর্বেষাং ভূতানাং ব্রহ্মসদনম্ . অত্র হি জন্তোঃ
প্রাণেষূত্ক্রমমাণেষু রুদ্রস্তারকং ব্রহ্ম ব্যাচষ্টে
যেনাসাবমৃতীভূত্বা মোক্ষী ভবতি . তস্মাদবিমুক্তমেব  নিষেবেত .
অবিমুক্তং ন বিমুঞ্চেত্ . এবমেবৈষ ভগবন্নিতি বৈ যাজ্ঞবল্ক্যঃ .. ১..
অথ হৈনং ভারদ্বাজঃ পপ্রচ্ছ যাজ্ঞবল্ক্যং কিং তারকম্ .
কিং তারযতীতি . স হোবাচ যাজ্ঞবল্ক্যঃ . ॐ নমো নারাযণাযেতি
তারকং চিদাত্মকমিত্যুপাসিতব্যম্ . ওমিত্যেকাক্ষরমাত্মস্বরূপম্ .
নম ইতি দ্ব্যক্ষরং প্রকৃতিস্বরূপম্ . নারাযণাযেতি পঞ্চাক্ষরং
পরংব্রহ্মস্বরূপম্ . ইতি য এবং বেদ . সোঽমৃতো ভবতি . ওমিতি ব্রহ্মা
ভবতি . নকারো বিষ্ণুর্ভবতি . মকারো রুদ্রো ভবতি . নকার ঈশ্বরো ভবতি .
রকারোঽণ্ডং বিরাড্ ভবতি . যকারঃ পুরুষো ভবতি . ণকারো ভগবান্ভবতি .
যকারঃ পরমাত্মা ভবতি . এতদ্বৈ নারাযণস্যাষ্টাক্ষরং বেদ
পরমপুরুষো ভবতি .
অযমৃগ্বেদঃ প্রথমঃ পাদঃ .. ১..
ॐইত্যেতদক্ষরং পরং ব্রহ্ম . তদেবোপাসিতব্যম্ . এতদেব
সূক্ষ্মাষ্টাক্ষরং ভবতি . তদেতদষ্টাত্মকোঽষ্টধা
ভবতি . অকারঃ প্রথমাক্ষরো ভবতি . উকারো দ্বিতীযাক্ষরো ভবতি .
মকারস্তৃতীযাক্ষরো ভবতি . বিন্দুস্তুরীযাক্ষরো ভবতি . নাদঃ
পঞ্চমাক্ষরো ভবতি . কলা ষষ্ঠাক্ষরো ভবতি . কলাতীতা
সপ্তমাক্ষরো ভবতি . তত্পরশ্চাষ্টমাক্ষরো ভবতি .
তারকত্ত্বাত্তারকো ভবতি . তদেব তারকং ব্রহ্ম ত্বং বিদ্ধি .
তদেবোপাসিতব্যম্ .. অত্রৈতে শ্লোকা ভবন্তি ..
অকারাদভবদ্ব্রহ্মা জাম্ববানিতিসংজ্ঞকঃ .
উকারাক্ষরসংভূত উপেন্দ্রো হরিনাযকঃ .. ১..
মকারাক্ষরসংভূতঃ শিবস্তু হনুমান্স্মৃতঃ .
বিন্দুরীশ্বরসংজ্ঞস্তু শত্রুঘ্নশ্চক্ররাট্ স্বযম্ .. ২..
নাদো মহাপ্রভুর্জ্ঞেযো ভরতঃ শঙ্খনামকঃ .
কলাযাঃ পুরুষঃ সাক্ষাল্লক্ষ্মণো ধরণীধরঃ .. ৩..
কলাতীতা ভগবতী স্বযং সীতেতি সংজ্ঞিতা .
তত্পরঃ পরমাত্মা চ শ্রীরামঃ পুরুষোত্তমঃ .. ৪..
ওমিত্যেতদক্ষরমিদং সর্বম্ . তস্যোপব্যাখ্যানং ভূতং
ভব্যং ভবিষ্যদ্যচ্চান্যত্তত্ত্বমন্ত্রবর্ণদেবতাছন্দো
ঋক্কলাশক্তিসৃষ্ট্যাত্মকমিতি . য এবং বেদ .
যজুর্বেদো দ্বিতীযঃ পাদঃ .. ২..
অথ হৈনং ভারদ্বাজো যাজ্ঞবল্ক্যমুবাচাথ কৈর্মন্ত্রৈঃ
পরমাত্মা প্রীতো ভবতি স্বাত্মানং দর্শযতি তন্নো ব্রূহি
ভগব ইতি . স হোবাচ যাজ্ঞবল্ক্যঃ .
ॐ যো হ বৈ শ্রীপরমাত্মা নারাযণঃ স ভগবানকারবাচ্যো
জাম্ববান্ভূর্ভুবঃ সুবস্তস্মৈ বৈ নমোনমঃ .. ১..
ॐ যো হ বৈ শ্রীপরমাত্মা নারাযণঃ স ভগবানুকারবাচ্য
উপেন্দ্রস্বরূপো হরিনাযকো ভূর্ভুবঃ সুবস্তস্মৈ বৈ নমোনমঃ .. ২..
ॐ যো হ বৈ শ্রীপরমাত্মা নারাযণঃ স ভগবান্মকারবাচ্যঃ
শিবস্বরূপো হনূমান্ভূর্ভুবঃ সুবস্তস্মৈ নমোনমঃ .. ৩..
ॐ যো হ বৈ শ্রীপরমাত্মা নারাযণঃ স ভগবান্বিন্দুস্বরূপঃ
শত্রুঘ্নো ভূর্ভুবঃ সুবস্তস্মৈ বৈ নমোনমঃ .. ৪..
ॐ যো হ বৈ শ্রীপরমাত্মা নারাযণঃ স ভগবান্নাদস্বরূপো
ভরতো ভূর্ভুবঃ সুবস্তস্মৈ বৈ নমোনমঃ .. ৫..
ॐ যো হ বৈ শ্রীপরমাত্মা নারাযণঃ স ভগবান্কলাস্বরূপো
লক্ষ্মণো ভূর্ভুবঃ সুবস্তস্মৈ বৈ নমোনমঃ .. ৬..
ॐ যো হ বৈ শ্রীপরমাত্মা নারাযণঃ স ভগবান্কলাতীতা
ভগবতী সীতা চিত্স্বরূপা ভূর্ভুবঃ সুবস্তস্মৈ বৈ নমোনমঃ .. ৭..
যথা প্রথমমন্ত্রোক্তাবাদ্যন্তৌ তথা সর্বমন্ত্রেষু দ্রষ্টব্যম্ .
উকারবাচ্য উপেন্দ্রস্বরূপো হরিনাযকঃ ২ মকারবাচ্যঃ
শিবস্বরূপো হনুমান্ ৩ বিন্দুস্বরূপঃ শত্রুঘ্নঃ ৪ নাদস্বরূপো
ভরতঃ ৫ কলাস্বরূপো লক্ষ্মণঃ ৬ কলাতীতা ভগবতী সীতা
চিত্স্বরূপা ৭ ॐ যো হ বৈ শ্রীপরমাত্মা নারাযণঃ স ভগবাংস্তত্পরঃ
পরমপুরুষঃ পুরাণপুরুষোত্তমো নিত্যশুদ্ধবুদ্ধমুক্তসত্য-
পরমানন্তাদ্বযপরিপূর্ণঃ পরমাত্মা ব্রহ্মৈবাহং রামোঽস্মি
ভূর্ভুবঃ সুবস্তস্মৈ নমোনমঃ .. ৮..
এতদষ্টবিধমন্ত্রং যোঽধীতে সোঽগ্নিপূতো ভবতি . স বাযুপূতো
ভবতি . স আদিত্যপূতো ভবতি . স স্থাণুপূতো ভবতি . স সর্বৈর্দেবৈর্জ্ঞাতো
ভবতি . তেনেতিহাসপুরাণানং রুদ্রাণাং শতসহস্রাণি জপ্তানি ফলানি
ভবন্তি . শ্রীমন্নারাযণাষ্টাক্ষরানুস্মরণেন গাযত্র্যাঃ
শতসহস্রং জপ্তং ভবতি . প্রণবানামযুতং জপ্তং ভবতি .
দশপূর্বান্দশোত্তরান্পুনাতি . নারাযণপদমবাপ্নোতি য এবং বেদ .
তদ্বিষ্ণোঃ পরমং পদং সদা পশ্যন্তি সূরযঃ . দিবীব চক্ষুরাততম্ .
তদ্বিপ্রাসো বিপন্যবো জাগৃবাংসঃ সমিন্ধতে . বিষ্ণোর্যত্পরমং পদম্ ..
ইত্যুপনিষত্ ..
সামবেদস্তৃতীযঃ পাদঃ .. ৩..
ॐ পূর্ণমদঃ পূর্ণমিদং পূর্ণাত্পূর্ণমুদচ্যতে .
পূর্ণস্য পূর্ণমাদায পূর্ণমেবাবশিষ্যতে ..
ॐ শান্তিঃ শান্তিঃ শান্তিঃ ..
ইতি তারসারোপনিষত্সমাপ্তা ..