.. তেজবিন্দু ..

তেজবিন্দূপনিষত্

ॐ ভদ্রং কর্ণেভিঃ শৃণুযাম দেবাঃ ভদ্রং পশ্যেমাক্ষভির্যজত্রাঃ .
স্থিরৈরঙ্গৈস্তুষ্টুবাংসস্তনূভির্ব্যশেম দেবহিতং যদাযুঃ .
স্বস্তি ন ইন্দ্রো বৃদ্ধশ্রবাঃ স্বস্তি নঃ পূষা বিশ্ববেদাঃ .
স্বস্তি নস্তার্ক্ষ্যোঽরিষ্টনেমিঃ স্বস্তি নো বৃহস্পতির্দধাতু .

ॐ শান্তিঃ শান্তিঃ শান্তিঃ.

ॐ তেজবিন্দুঃ পরং ধ্যানং বিশ্বাত্মং হৃদি সংস্থিতম্ .
আণবং শাংববং শাক্তং স্থূলং সূক্ষ্মং পরং চ যত্ .. ১..

দুঃসাধ্যং চ দুরারাধ্যং দুষ্প্রেক্ষ্যং চ মুক্তমব্যম্ .
দুর্লক্ষং দুস্তরং ধ্যানং মুনীনাং চ মনীষিণাম্ .. ২..

জিতাহারো জিতক্রোধো জিতসঙ্গো জিতেন্দ্রযঃ .
নির্দ্বংদ্বো নিরহংকারো নিরাশীরপরিগ্রহঃ .. ৩..

অগম্যগম্যকর্তা চ গুরুমানার্থমানসঃ .
মুখানি ত্রীণি বিন্দন্তি ত্রিধামা হংস উচ্যতে .. ৪..

পরং গুহ্যমিদং স্থানমব্যক্তং ব্রহ্ম নিরাশ্রযম্ .
ব্যোমরূপং কলাসূক্ষ্মং বিষ্ণোস্তত্পরং পদম্ .. ৫..

ত্র্যম্বকং ত্রিগুণং স্থানং ত্রিঘাতু রূপবর্জিতম্ .
নিশ্চলং নির্বিকল্পং চ নিরাধারং নিরাশ্র্যম্ .. ৬..

উপাধিরহিতং স্থানং বাঙ্মনোঽতীতগোচরম্ .
স্বভাবভাবনাগ্রাহ্যং সংঘাতৈকপদোজ্ঝিতম্ .. ৭..

আনন্দং নন্দনাতীতং দুষ্প্রেক্ষ্যমজমব্যযম্ .
চিত্তবৃত্তিবিনির্মুক্তং শাশ্বতং ধ্রুবমচ্যুতম্ .. ৮..

তদ্ব্রহ্মাণং তদধ্যাতং তন্নিষ্ঠা তত্পরাযণম্ .
আচিত্তচিত্তমাত্মানং তদ্ব্যোম পরমং স্থিতম্ .. ৯..

শূন্যে শূন্যভাবং চ শূন্যাতীতমবস্থিতম্ .
ন ধ্যানং ন চ বা ধ্যাতা ন ধেযো ধ্যেয এব চ .. ১০..

সর্বং তত্পরমং শূন্যং ন পরং পরমাত্পরম্ .
অচিন্ত্যমপ্রবুদ্ধং চ ন চ সত্যং ন সংবিদুঃ .. ১১..

মুনীনাং তত্ত্বযুক্তং তু ন দেবা ন পরং বিদুঃ .
লোভং মোহং ভযং দর্পং কামং ক্রোধং চ কিল্বিষম্ . ১২..

শীতোষ্ণং ক্ষুত্পিপাসং চ সংকল্পং চ বিকল্পকম্ .
ন ব্রহ্মকুলদর্পং চ ন মুক্তিং গ্রন্থসংচযম্ .. ১৩..

ন ভযং সুখদুঃখং চ তথা মানাপমানযোঃ .
এতদ্ভাববিনির্মুক্তং তদ্গ্রাহ্যং ব্রহ্ম তত্পরং .. ১৪..

ॐ শান্তিঃ শান্তিঃ শান্তিঃ.

ইত্যথর্ববেদে তেজবিন্দূপন্নিষত্সমাপ্তা ..