.. ক্ষুরিকোপনিষত্ ..
কৈবল্যনাডীকান্তস্থপরাভূমিনিবাসিনম্ .
ক্ষুরিকোপনিষদ্যোগভাসুরং রামমাশ্রযে ..
ॐ সহনাববতু .. সহ নৌ ভুনক্তু .. সহ বীর্যং করবাবহৈ ..
তেজস্বিনাবধীতমস্তু মা বিদ্বিষাবহৈ ..
ॐ শান্তিঃ শান্তিঃ শান্তিঃ ..
ॐ ক্ষুরিকাং সম্প্রবক্ষ্যামি ধারণাং যোগসিদ্ধযে .
যং প্রাপ্য ন পুনর্জন্ম যোগযুক্তস্য জাযতে .. ১..
বেদতত্ত্বার্থবিহিতং যথোক্তং হি স্বযংভুবা .
নিঃশব্দং দেশমাস্থায তত্রাসনমবস্থিতঃ .. ২..
কূর্মোঽঙ্গানীব সংহৃত্য মনো হৃদি নিরুধ্য চ .
মাত্রাদ্বাদশযোগেন প্রণবেন শনৈঃ শনৈঃ .. ৩..
পূরযেত্সর্বমাত্মানং সর্বদ্বারং নিরুধ্য চ .
উরোমুখকটিগ্রীবং কিঞ্চিদ্ভূদযমুন্নতম্ .. ৪..
প্রাণান্সন্ধারযেত্তস্মিনাসাভ্যন্তরচারিণঃ .
ভূত্বা তত্র গতঃ প্রাণঃ শনৈরথ সমুত্সৃজেত্ .. ৫..
স্থিরমাত্রাদৃঢং কৃত্বা অঙ্গুষ্ঠেন সমাহিতঃ .
দ্বে গুল্ফে তু প্রকুর্বীত জঙ্ঘে চৈব ত্রযস্ত্রযঃ .. ৬..
দ্বে জানুনী তথোরুভ্যাং গুদে শিশ্নে ত্রযস্ত্রযঃ .
বাযোরাযতনং চাত্র নাভিদেশে সমাশ্রযেত্ .. ৭..
তত্র নাডী সুষুম্না তু নাডীভির্বহুভির্বৃতা ..
অণু রক্তশ্চ পীতাশ্চ কৃষ্ণাস্তাম্রা বিলোহিতাঃ .. ৮..
অতিসূক্ষ্মাং চ তন্বীং চ শুক্লাং নাডীং সমাশ্রযেত্ .
তত্র সংচারযেত্প্রাণানূর্ণনাভীব তন্তুনা .. ৯..
ততো রক্তোত্পলাভাসং পুরুষাযতনং মহত্
দহরং পুণ্ডরীকং তদ্বেদান্তেষু নিগদ্যতে .. ১০..
তদ্ভিত্ত্বা কণ্ঠমাযাতি তাং নাডীং পূরযন্যতঃ .
মনসস্তু ক্ষুরং গৃহ্য সুতীক্ষ্ণং বুদ্ধিনির্মলম্ .. ১১..
পাদস্যোপরি যন্মধ্যে তদ্রূপং নাম কৃন্তযেত্ .
মনোদ্বারেণ তীক্ষ্ণেন যোগমাশ্রিত্য নিত্যশঃ .. ১২..
ইন্দ্রবজ্র ইতি প্রোক্তং মর্মজঙ্ঘানুকীর্তনম্ .
তদ্ধ্যানবলযোগেন ধারণাভির্নিকৃন্তযেত্ .. ১৩..
ঊর্বোর্মধ্যে তু সংস্থাপ্য মর্মপ্রাণবিমোচনম্ .
চতুরভ্যাসযোগেন ছিন্দেদনভিশঙ্কিতঃ ..১৪..
ততঃ কণ্ঠান্তরে যোগী সমূহন্নাডিসঞ্চযম্ .
একোত্তরং নাডিশতং তাসাং মধ্যে বরাঃ স্মৃতাঃ .. ১৫..
সুষুম্না তু পরে লীনা বিরজা ব্রহ্মরূপিণী .
ইডা তিষ্ঠতি বামেন পিঙ্গলা দক্ষিণেন চ .. ১৬..
তযোর্মধ্যে বরং স্থানং যস্তং বেদ স বেদবিত্ .
দ্বাসপ্ততিসহস্রাণি প্রতিনাডীষু তৈতিলম্ .. ১৭..
ছিদ্যতে ধ্যানযোগেন সুষুম্নৈকা ন ছিদ্যতে .
যোগনির্মলধারেণ ক্ষুরেণানলবর্চসা .. ১৮..
ছিন্দেন্নাডীশতং ধীরঃ প্রভাবাদিহ জন্মনি .
জাতীপুষ্পসমাযোগৈর্যথা বাস্যতি তৈতিলম্ .. ১৯..
এবং শুভাশুভৈর্ভাবৈঃ সা নাডীতি বিভাবযেত্ .
তদ্ভাবিতাঃ প্রপদ্যন্তে পুনর্জন্মবিবর্জিতাঃ .. ২০..
তপোবিজিতচিত্তস্তু নিঃশব্দং দেশমাস্থিতঃ .
নিঃসঙ্গতত্ত্বযোগজ্ঞো নিরপেক্ষঃ শনৈঃ শনৈঃ .. ২১..
পাশং ছিত্ত্বা যথা হংসো নির্বিশঙ্কং খমুত্ক্রমেত্ .
ছিন্নপাশস্তথা জীবঃ সংসারং তরতে সদা .. ২২..
যথা নির্বাণকালে তু দীপো দগ্ধ্বা লযং ব্রজেত্ .
তথা সর্বাণি কর্মাণি যোগী দগ্ধ্বা লযং ব্রজেত্ .. ২৩..
প্রাণাযামসুতীক্ষ্ণেন মাত্রাধারেণ যোগবিত্ .
বৈরাগ্যোপলঘৃষ্টেন ছিত্ত্বা তং তু ন বধ্যতে .. ২৪..
অমৃতত্বং সমাপ্নোতি যদা কামাত্স মুচ্যতে .
সর্বেষণাবিনির্মুক্তশ্ছিত্ত্বা তং তু ন বধ্যত ইত্যুপনিষত্ ..
ॐ সহ নাববতু .. সহ নৌ ভুনক্তু .. সহ বীর্যং করবাবহৈ ..
তেজস্বিনাবধীতমস্তু মা বিদ্বিষাবহৈ ..
ॐ শান্তিঃ শান্তিঃ শান্তিঃ ..
.. ইতি ক্ষুরিকোপনিষত্সমাপ্তা ..