.. একাক্ষরোপনিষত্ ..
একাক্ষরপদারূঢং সর্বাত্মকমখণ্ডিতম্ .
সর্ববর্জিতচিন্মাত্রং ত্রিপান্নারাযণং ভজে ..
ॐ সহ নাববতু সহ নৌ ভুনক্তু .
সহ বীর্যং করবাবহৈ .
তেজস্বিনাবধীতমস্তু মা বিদ্বিষাবহৈ ..
ॐ শান্তিঃ শান্তিঃ শান্তিঃ ..
হরিঃ ॐ
একাক্ষরং ত্বক্ষরেঽত্রাস্তি সোমে
সুষুম্নাযাং চেহ দৃঢী স একঃ .
ত্বং বিশ্বভূর্ভূতপতিঃ পুরাণঃ
পর্জন্য একো ভুবনস্য গোপ্তা .. ১..
বিশ্বে নিমগ্নপদবীঃ কবীনাং
ত্বং জাতবেদো ভুবনস্য নাথঃ .
অজাতমগ্রে স হিরণ্যরেতা
যজ্ঞৈস্ত্বমেবৈকবিভুঃ পুরাণঃ .. ২..
প্রাণঃ প্রসূতির্ভুবনস্য যোনি-
র্ব্যাপ্তং ত্বযা একপদেন বিশ্বম্ .
ত্বং বিশ্বভূর্যোনিপারঃ স্বগর্ভে
কুমার একো বিশিখঃ সুধন্বা .. ৩..
বিতত্য বাণং তরুণার্কবর্ণং
ব্যোমান্তরে ভাসি হিরণ্যগর্ভঃ .
ভাসা ত্বযা ব্যোম্নি কৃতঃ সুতার্ক্ষ্য-
স্তবং বৈ কুমারস্ত্বমরিষ্টনেমিঃ .. ৪..
ত্বং বজ্রভৃদ্ভূতপতিস্ত্বমেব .
কামঃ প্রজানাং নিহিতোঽসি সোমে .
স্বাহা স্বধা যচ্চ বষট্ করোতি
রুদ্রঃ পশূনাং গুহযা নিমগ্নঃ .. ৫..
ধাতা বিধাতা পবনঃ সুপর্ণো
বিষ্ণুর্বরাহো রজনী রহশ্চ .
ভূতং ভবিষ্যত্প্রভবঃ ক্রিযাশ্চ .
কালঃ ক্রমস্ত্বং পরমাক্ষরং চ .. ৬..
ঋচো যজূংশি প্রসবন্তি বক্ত্রা-
ত্সামানি সম্রাড্বসুবন্তরিক্ষম্ .
ত্বং যজ্ঞনেতা হুতভুগ্বিভুশ্চ
রুদ্রাস্তথ দৈত্যগণা বসুশ্চ .. ৭..
স এষ দেবোঽম্বরগশ্চ চক্রে
অন্যেঽভ্যধিষ্ঠেত তমো নিরুন্ধ্যঃ .
হিরণ্মযং যস্য বিভাতি সর্বং
ব্যোমান্তরে রশ্মিমিবাংশুনাভিঃ .. ৮..
স সর্ববেত্তা ভুবনস্য গোপ্তা
তাভিঃ প্রজানাং নিহিতা জনানাম্ .
প্রোতা ত্বমোতা বিচিতিঃ ক্রমাণাং
প্রজাপতিশ্ছন্দমযো বিগর্ভঃ .. ৯..
সামৈশ্চিদন্তো বিরজশ্চ বাহূং
হিরণ্মযং বেদবিদাং বরিষ্ঠম্ .
যমধ্বরে ব্রহ্মবিদঃ স্তুবন্তি
সামৈর্যজুর্ভিঃ ক্রতুভিস্ত্বমেব .. ১০..
ত্বং স্ত্রী পুমাংস্ত্বং চ কুমার এক-
স্ত্বং বৈ কুমারী হ্যথ ভূস্ত্বমেব .
ত্বমেব ধাতা বরুণশ্চ রাজা
ত্বং বত্সরোঽগ্ন্যর্যম এব সর্বম্ .. ১১..
মিত্রঃ সুপর্ণশ্চন্দ্র ইন্দ্রো রুদ্র-
স্ত্বষ্টা বিষ্ণুঃ সবিতা গোপতিস্ত্বম্ .
ত্বং বিষ্ণুর্ভূতানি তু ত্রাসি দৈত্যাং-
স্ত্বযাবৃতং জগদুদ্ভবগর্ভঃ .. ১২..
ত্বং ভূর্ভুবঃ স্বস্ত্বং হি
স্বযংভূরথ বিশ্বতোমুখঃ .
য এবং নিত্যং বেদযতে গুহাশযং
প্রভুং পুরাণং সর্বভূতং হিরণ্মযম্ .. ১৩..
হিরণ্মযং বুদ্ধিমতাং পরাং গতিং
স বুদ্ধিমান্বুদ্ধিমতীত্য তিষ্ঠতীত্যুপনিষত্ ..
ॐ সহ নাববতু সহ নৌ ভুনক্তু .
সহ বীর্যং করবাবহৈ .
তেজস্বিনাবধীতমস্তু মা বিদ্বিষাবহৈ ..
ॐ শান্তিঃ শান্তিঃ শান্তিঃ ..
ইত্যেকাক্ষরোপনিষত্সমাপ্তা ..
নোট নিতে এবং টেক্সট হাইলাইট করতে লগইন করুন
লগইন