তৈত্তিরীয

.. তৈত্তিরীযোপনিষত্ ..

ॐ শ্রী গুরুভ্যো নমঃ . হরিঃ ॐ .

ॐ শং নো  মিত্রঃ শং বরুণঃ . শং নো ভবত্বর্যমা .
শং ন ইন্দ্রো বৃহস্পতিঃ . শং নো বিষ্ণুরুরুক্রমঃ .
নমো ব্রহ্মণে . নমস্তে বাযো . ত্বমেব প্রত্যক্ষং ব্রহ্মাসি .
ত্বমেব প্রত্যক্ষং ব্রহ্ম বদিষ্যামি . ঋতং বদিষ্যামি .
সত্যং বদিষ্যামি . তন্মামবতু . তদ্বক্তারমবতু .
অবতু মাম্ . অবতু বক্তারম্ .

ॐ শান্তিঃ শান্তিঃ শান্তিঃ .. ১.. ইতি প্রথমোঽনুবাকঃ ..

ॐ শীক্ষাং ব্যাখ্যাস্যামঃ . বর্ণঃ স্বরঃ . মাত্রা বলম্ .
সাম সন্তানঃ . ইত্যুক্তঃ শীক্ষাধ্যাযঃ .. ১..
 ইতি দ্বিতীযোঽনুবাকঃ ..

সহ নৌ যশঃ . সহ নৌ ব্রহ্মবর্চসম্ .
অথাতঃ সংহিতাযা উপনিষদম্ ব্যাখ্যাস্যামঃ .
পঞ্চস্বধিকরণেষু .
অধিলোকমধিজ্যৌতিষমধিবিদ্যমধিপ্রজমধ্যাত্মম্ .
তা মহাসঁ হিতা   ইত্যাচক্ষতে . অথাধিলোকম্ .

পৃথিবী পূর্বরূপম্ . দ্যৌরুত্তররূপম্ .
আকাশঃ সন্ধিঃ .. ১..

বাযুঃ সন্ধানম্ . ইত্যধিলোকম্ . অথাধিজৌতিষম্ .
অগ্নিঃ পূর্বরূপম্ . আদিত্য উত্তররূপম্ . আপঃ সন্ধিঃ .
বৈদ্যুতঃ সন্ধানম্ . ইত্যধিজ্যৌতিষম্ . অথাধিবিদ্যম্ .
আচার্যঃ পূর্বরূপম্ .. ২..

অন্তেবাস্যুত্তররূপম্ . বিদ্যা সন্ধিঃ . প্রবচনঁ  সন্ধানম্ .
ইত্যধিবিদ্যম্ . অথাধিপ্রজম্ . মাতা পূর্বরূপম্ .
পিতোত্তররূপম্ . প্রজা সন্ধিঃ . প্রজননঁ  সন্ধানম্ .
ইত্যধিপ্রজম্ .. ৩..

অথাধ্যাত্মম্ . অধরা হনুঃ পূর্বরূপম্ .
উত্তরা হনুরুত্তররূপম্ . বাক্সন্ধিঃ . জিহ্বা সন্ধানম্ .
ইত্যধ্যাত্মম্ . ইতীমা মহাসঁ হিতাঃ .
য এবমেতা মহাসঁ হিতা ব্যাখ্যাতা বেদ .
সন্ধীযতে প্রজযা পশুভিঃ .
ব্রহ্মবর্চসেনান্নাদ্যেন সুবর্গ্যেণ লোকেন .. ৪..
ইতি তৃতীযোঽনুবাকঃ ..

যশ্ছন্দসামৃষভো বিশ্বরূপঃ .
ছন্দোভ্যোঽধ্যমৃতাত্সংবভূব .
স মেন্দ্রো মেধযা স্পৃণোতু .

অমৃতস্য দেব ধারণো ভূযাসম্ .
শরীরং মে বিচর্ষণম্ . জিহ্বা মে মধুমত্তমা .
কর্ণাভ্যাং ভূরি বিশ্রুবম্ .

ব্রহ্মণঃ কোশোঽসি মেধযা পিহিতঃ .
শ্রুতং মে গোপায . আবহন্তী বিতন্বানা .. ১..

কুর্বাণাঽচীরমাত্মনঃ . বাসাঁ সি মম গাবশ্চ .
অন্নপানে চ সর্বদা . ততো মে শ্রিযমাবহ .

লোমশাং পশুভিঃ সহ স্বাহা . আ মা যন্তু ব্রহ্মচারিণঃ স্বাহা .
বি মাঽঽযন্তু ব্রহ্মচারিণঃ স্বাহা .

প্র মাঽঽযন্তু ব্রহ্মচারিণঃ স্বাহা .
দমাযন্তু ব্রহ্মচারিণঃ স্বাহা .
শমাযন্তু ব্রহ্মচারিণঃ স্বাহা .. ২..

যশো জনেঽসানি স্বাহা . শ্রেযান্ বস্যসোঽসানি স্বাহা .
তং ত্বা ভগ প্রবিশানি স্বাহা . স মা ভগ প্রবিশ স্বাহা .
তস্মিন্ ত্সহস্রশাখে নিভগাহং ত্বযি মৃজে স্বাহা .
যথাঽঽপঃ প্রবতাঽঽযন্তি যথা মাসা অহর্জরম্ .
এবং মাং ব্রহ্মচারিণঃ . ধাতরাযন্তু সর্বতঃ স্বাহা .
প্রতিবেশোঽসি প্র মা ভাহি প্র মা পদ্যস্ব .. ৩..
ইতি চতুর্থোঽনুবাকঃ ..

ভূর্ভুবঃ সুবরিতি বা এতাস্তিস্রো ব্যাহৃতযঃ .
তাসামু হ স্মৈতাং চতুর্থীম্ . মাহাচমস্যঃ প্রবেদযতে .
মহ ইতি . তত্ ব্রহ্ম . স আত্মা . অঙ্গান্যন্যা দেবতাঃ .
ভূরিতি বা অযং লোকঃ . ভুব ইত্যন্তরিক্ষম্ .
সুবরিত্যসৌ লোকঃ .. ১..

মহ ইত্যাদিত্যঃ . আদিত্যেন বাব সর্বে লোকা মহীযন্তে .
ভূরিতি বা অগ্নিঃ . ভুব ইতি বাযুঃ . সুবরিত্যাদিত্যঃ .
মহ ইতি চন্দ্রমাঃ . চন্দ্রমসা বাব
সর্বাণি জ্যোতীঁ ষি মহীযন্তে . ভূরিতি বা ঋচঃ .
ভুব ইতি সামানি .

সুবরিতি যজূঁ ষি .. ২..

মহ ইতি ব্রহ্ম . ব্রহ্মণা বাব সর্বে বেদা মহীযন্তে .
ভূরিতি বৈ প্রাণঃ . ভুব ইত্যপানঃ . সুবরিতি ব্যানঃ .
মহ ইত্যন্নম্ . অন্নেন বাব সর্বে প্রাণ মহীযন্তে .
তা বা এতাশ্চতস্রশ্চতুর্ধ . চতস্রশ্চতস্রো ব্যাহৃতযঃ .
তা যো বেদ .

স বেদ ব্রহ্ম . সর্বেঽস্মৈ দেবা বলিমাবহন্তি .. ৩..
ইতি পঞ্চমোঽনুবাকঃ ..

স য এষোঽন্তরহৃদয আকাশঃ . তস্মিন্নযং পুরুষো মনোমযঃ .
অমৃতো হিরণ্মযঃ . অন্তরেণ তালুকে . য এষ স্তন ইবাবলংবতে .
সেন্দ্রযোনিঃ . যত্রাসৌ কেশান্তো বিবর্ততে . ব্যপোহ্য শীর্ষকপালে .
ভূরিত্যগ্নৌ প্রতিতিষ্ঠতি .

ভুব ইতি বাযৌ .. ১..

সুবরিত্যাদিত্যে . মহ ইতি ব্রহ্মণি . আপ্নোতি স্বারাজ্যম্ .
আপ্নোতি মনসস্পতিম্ . বাক্পতিশ্চক্ষুষ্পতিঃ .
শ্রোত্রপতির্বিজ্ঞানপতিঃ . এতত্ততো ভবতি . আকাশশরীরং ব্রহ্ম .
সত্যাত্ম প্রাণারামং মন আনন্দম্ .

শান্তিসমৃদ্ধমমৃতম্ .
ইতি প্রাচীনযোগ্যোপাস্স্ব .. ২.. ইতি ষষ্ঠোঽনুবাকঃ ..

পৃথিব্যন্তরিক্ষং দ্যৌর্দিশোঽবান্তরদিশাঃ .
অগ্নির্বাযুরাদিত্যশ্চন্দ্রমা নক্ষত্রাণি .
আপ ওষধযো বনস্পতয আকাশ আত্মা . ইত্যধিভূতম্ .
অথাধ্যাত্মম্ . প্রাণো ব্যানোঽপান উদানঃ সমানঃ .
চক্ষুঃ শ্রোত্রং মনো বাক্ ত্বক্ .
চর্ম মাঁসঁ  স্নাবাস্থি মজ্জা .
এতদধিবিধায ঋষিরবোচত্ . পাঙ্ক্তং বা ইদঁ  সর্বম্ .
পাঙ্ক্তেনৈব পাঙ্ক্তঁ  স্পৃণোতীতি .. ১.. ইতি সপ্তমোঽনুবাকঃ ..

ওমিতি ব্রহ্ম . ওমিতীদঁ  সর্বম্ .
ওমিত্যেতদনুকৃতির্হ স্ম বা অপ্যো শ্রাবযেত্যাশ্রাবযন্তি .
ওমিতি সামানি গাযন্তি . ওঁ শোমিতি শস্ত্রাণি শঁ সন্তি .
ওমিত্যধ্বর্যুঃ প্রতিগরং প্রতিগৃণাতি . ওমিতি ব্রহ্মা প্রসৌতি .
ওমিত্যগ্নিহোত্রমনুজানাতি .
ওমিতি ব্রাহ্মণঃ প্রবক্ষ্যন্নাহ ব্রহ্মোপাপ্নবানীতি .
ব্রহ্মৈবোপাপ্নোতি .. ১.. ইত্যষ্টমোঽনুবাকঃ ..

ঋতং চ স্বাধ্যাযপ্রবচনে চ .
সত্যং চ স্বাধ্যাযপ্রবচনে চ .
তপশ্চ স্বাধ্যাযপ্রবচনে চ .
দমশ্চ স্বাধ্যাযপ্রবচনে চ .
শমশ্চ স্বাধ্যাযপ্রবচনে চ .
অগ্নযশ্চ স্বাধ্যাযপ্রবচনে চ .
অগ্নিহোত্রং চ স্বাধ্যাযপ্রবচনে চ .
অতিথযশ্চ স্বাধ্যাযপ্রবচনে চ .
মানুষং চ স্বাধ্যাযপ্রবচনে চ .
প্রজা চ স্বাধ্যাযপ্রবচনে চ .
প্রজনশ্চ স্বাধ্যাযপ্রবচনে চ .
প্রজাতিশ্চ স্বাধ্যাযপ্রবচনে চ .
সত্যমিতি সত্যবচা রাথীতরঃ .
তপ ইতি তপোনিত্যঃ পৌরুশিষ্টিঃ .
স্বাধ্যাযপ্রবচনে এবেতি নাকো মৌদ্গল্যঃ .
তদ্ধি তপস্তদ্ধি তপঃ .. ১.. ইতি নবমোঽনুবাকঃ ..

অহং বৃক্ষস্য রেরিবা . কীর্তিঃ পৃষ্ঠং গিরেরিব .
ঊর্ধ্বপবিত্রো বাজিনীব স্বমৃতমস্মি . দ্রবিণঁ  সবর্চসম্ .
সুমেধ অমৃতোক্ষিতঃ . ইতি ত্রিশঙ্কোর্বেদানুবচনম্ .. ১..
ইতি দশমোঽনুবাকঃ ..

বেদমনূচ্যাচার্যোন্তেবাসিনমনুশাস্তি .
সত্যং বদ . ধর্মং চর . স্বাধ্যাযান্মা প্রমদঃ .
আচার্যায প্রিযং ধনমাহৃত্য প্রজাতন্তুং মা ব্যবচ্ছেত্সীঃ .
সত্যান্ন প্রমদিতব্যম্ . ধর্মান্ন প্রমদিতব্যম্ .
কুশলান্ন প্রমদিতব্যম্ . ভূত্যৈ ন প্রমদিতব্যম্ .
স্বাধ্যাযপ্রবচনাভ্যাং ন প্রমদিতব্যম্ .. ১..

দেবপিতৃকার্যাভ্যাং ন প্রমদিতব্যম্ . মাতৃদেবো ভব .
পিতৃদেবো ভব . আচার্যদেবো ভব . অতিথিদেবো ভব .
যান্যনবদ্যানি কর্মাণি . তানি সেবিতব্যানি . নো ইতরাণি .
যান্যস্মাকঁ  সুচরিতানি .

তানি ত্বযোপাস্যানি .. ২..

নো ইতরাণি . যে কে চারুমচ্ছ্রেযাঁসো ব্রাহ্মণাঃ .
তেষাং ত্বযাঽঽসনেন প্রশ্বসিতব্যম্ . শ্রদ্ধযা দেযম্ .

অশ্রদ্ধযাঽদেযম্ . শ্রিযা দেযম্ . হ্রিযা দেযম্ . ভিযা দেযম্ .
সংবিদা দেযম্ .

অথ যদি তে কর্মবিচিকিত্সা বা বৃত্তবিচিকিত্সা বা স্যাত্ .. ৩..

যে তত্র ব্রাহ্মণাঃ সংমর্শিনঃ . যুক্তা আযুক্তাঃ .
অলূক্ষা ধর্মকামাঃ স্যুঃ . যথা তে তত্র বর্তেরন্ .

তথা তত্র বর্তেথাঃ . অথাভ্যাখ্যাতেষু .
যে তত্র ব্রাহ্মণাঃ সংমর্শিনঃ . যুক্তা আযুক্তাঃ .
অলূক্ষা ধর্মকামাঃ স্যুঃ . যথা তে তেষু বর্তেরন্ .
তথা তেষু বর্তেথাঃ . এষ আদেশঃ . এষ উপদেশঃ .
এষা বেদোপনিষত্ . এতদনুশাসনম্ . এবমুপাসিতব্যম্ .
এবমু চৈতদুপাস্যম্ .. ৪.. ইত্যেকাদশঽনুবাকঃ ..

শং নো মিত্রঃ শং বরুণঃ . শং নো ভবত্বর্যমা .
শং ন ইন্দ্রো বৃহস্পতিঃ . শং নো বিষ্ণুরুরুক্রমঃ .
নমো ব্রহ্মণে . নমস্তে বাযো . ত্বমেব প্রত্যক্ষং ব্রহ্মাসি .
ত্বামেব প্রত্যক্ষং ব্রহ্মাবাদিষম্ . ঋতমবাদিষম্ .
সত্যমবাদিষম্ . তন্মামাবীত্ . তদ্বক্তারমাবীত্ .
আবীন্মাম্ . আবীদ্বক্তারম্ .
ॐ শান্তিঃ শান্তিঃ শান্তিঃ .. ১.. ইতি দ্বাদশোঽনুবাকঃ ..

.. ইতি শীক্ষাবল্লী সমাপ্তা ..

ॐ সহ নাববতু . সহ নৌ ভুনক্তু . সহ বীর্যং করবাবহৈ .
তেজস্বি নাবধীতমস্তু মা বিদ্বিষাবহৈ .

ॐ শান্তিঃ শান্তিঃ শান্তিঃ ..
——————————————————————————–

ॐ ব্রহ্মবিদাপ্নোতি পরম্ . তদেষাঽভ্যুক্তা .

সত্যং জ্ঞানমনন্তং ব্রহ্ম . যো বেদ নিহিতং গুহাযাং পরমে ব্যোমন্ .
সোঽশ্নুতে সর্বান্ কামান্ সহ . ব্রহ্মণা বিপশ্চিতেতি ..
তস্মাদ্বা এতস্মাদাত্মন আকাশঃ সংভূতঃ . আকাশাদ্বাযুঃ .
বাযোরগ্নিঃ . অগ্নেরাপঃ . অদ্ভ্যঃ পৃথিবী .

পৃথিব্যা ওষধযঃ . ওষধীভ্যোঽন্নম্ . অন্নাত্পুরুষঃ .
স বা এষ পুরুষোঽন্ন্নরসমযঃ .
তস্যেদমেব শিরঃ .

অযং দক্ষিণঃ পক্ষঃ . অযমুত্তরঃ পক্ষঃ .
অযমাত্মা . ইদং পুচ্ছং প্রতিষ্ঠা .

তদপ্যেষ শ্লোকো ভবতি .. ১.. ইতি প্রথমোঽনুবাকঃ ..

অন্নাদ্বৈ প্রজাঃ প্রজাযন্তে . যাঃ কাশ্চ পৃথিবীঁ
শ্রিতাঃ .
অথো অন্নেনৈব জীবন্তি . অথৈনদপি যন্ত্যন্ততঃ .
অন্নঁ হি ভূতানাং জ্যেষ্ঠম্ . তস্মাত্ সর্বৌষধমুচ্যতে .
সর্বং বৈ তেঽন্নমাপ্নুবন্তি . যেঽন্নং ব্রহ্মোপাসতে .
অন্নঁ হি ভূতানাং জ্যেষ্ঠম্ . তস্মাত্ সর্বৌষধমুচ্যতে .
অন্নাদ্ ভূতানি জাযন্তে . জাতান্যন্নেন বর্ধন্তে .
অদ্যতেঽত্তি চ ভূতানি . তস্মাদন্নং তদুচ্যত ইতি .
তস্মাদ্বা এতস্মাদন্নরসমযাত্ . অন্যোঽন্তর আত্মা প্রাণমযঃ .
তেনৈষ পূর্ণঃ . স বা এষ পুরুষবিধ এব .
তস্য পুরুষবিধতাম্ . অন্বযং পুরুষবিধঃ .
তস্য প্রাণ এব শিরঃ . ব্যানো দক্ষিণঃ পক্ষঃ .
অপান উত্তরঃ পক্ষঃ . আকাশ আত্মা .
পৃথিবী পুচ্ছং প্রতিষ্ঠা . তদপ্যেষ শ্লোকো ভবতি .. ১..
ইতি দ্বিতীযোঽনুবাকঃ ..

প্রাণং দেবা অনু প্রাণন্তি . মনুষ্যাঃ পশবশ্চ যে .
প্রাণো হি ভূতানামাযুঃ . তস্মাত্ সর্বাযুষমুচ্যতে .
সর্বমেব ত আযুর্যন্তি . যে প্রাণং ব্রহ্মোপাসতে .
প্রাণো হি ভূতানামাযুঃ . তস্মাত্ সর্বাযুষমুচ্যত ইতি .
তস্যৈষ এব শারীর আত্মা . যঃ পূর্বস্য .
তস্মাদ্বা এতস্মাত্ প্রাণমযাত্ . অন্যোঽন্তর আত্মা মনোমযঃ .
তেনৈষ পূর্ণঃ . স বা এষ পুরুষবিধ এব .
তস্য পুরুষবিধতাম্ . অন্বযং পুরুষবিধঃ .
তস্য যজুরেব শিরঃ . ঋগ্দক্ষিণঃ পক্ষঃ . সামোত্তরঃ পক্ষঃ .
আদেশ আত্মা . অথর্বাঙ্গিরসঃ পুচ্ছং প্রতিষ্ঠা .
তদপ্যেষ শ্লোকো ভবতি .. ১.. ইতি তৃতীযোঽনুবাকঃ ..

যতো বাচো নিবর্তন্তে . অপ্রাপ্য মনসা সহ .
আনন্দং ব্রহ্মণো বিদ্বান্ . ন বিভেতি কদাচনেতি .
তস্যৈষ এব শারীর আত্মা . যঃ পূর্বস্য .
তস্মাদ্বা এতস্মান্মনোমযাত্ . অন্যোঽন্তর আত্মা বিজ্ঞানমযঃ .
তেনৈষ পূর্ণঃ . স বা এষ পুরুষবিধ এব .
তস্য পুরুষবিধতাম্ .
অন্বযং পুরুষবিধঃ . তস্য শ্রদ্ধৈব শিরঃ .
ঋতং দক্ষিণঃ পক্ষঃ .
সত্যমুত্তরঃ পক্ষঃ . যোগ আত্মা . মহঃ পুচ্ছং প্রতিষ্ঠা .
তদপ্যেষ শ্লোকো ভবতি .. ১.. ইতি চতুর্থোঽনুবাকঃ ..

বিজ্ঞানং যজ্ঞং তনুতে . কর্মাণি তনুতেঽপি চ .
বিজ্ঞানং দেবাঃ সর্বে .
ব্রহ্ম জ্যেষ্ঠমুপাসতে . বিজ্ঞানং ব্রহ্ম চেদ্বেদ .

তস্মাচ্চেন্ন প্রমাদ্যতি . শরীরে পাপ্মনো হিত্বা .
সর্বান্কামান্সমশ্নুত ইতি . তস্যৈষ এব শারীর আত্মা .

যঃ পূর্বস্য . তস্মাদ্বা এতস্মাদ্বিজ্ঞানমযাত্ .
অন্যোঽন্তর আত্মাঽঽনন্দমযঃ . তেনৈষ পূর্ণঃ .

স বা এষ পুরুষবিধ এব . তস্য পুরুষবিধতাম্ .
অন্বযং পুরুষবিধঃ . তস্য প্রিযমেব শিরঃ . মোদো দক্ষিণঃ পক্ষঃ .

প্রমোদ উত্তরঃ পক্ষঃ . আনন্দ আত্মা . ব্রহ্ম পুচ্ছং প্রতিষ্ঠা .
তদপ্যেষ শ্লোকো ভবতি .. ১.. ইতি পঞ্চমোঽনুবাকঃ ..

অসন্নেব স ভবতি . অসদ্ব্রহ্মেতি বেদ চেত্ .
অস্তি ব্রহ্মেতি চেদ্বেদ . সন্তমেনং ততো বিদুরিতি .
তস্যৈষ এব শারীর আত্মা . যঃ পূর্বস্য .
অথাতোঽনুপ্রশ্নাঃ . উতাবিদ্বানমুং লোকং প্রেত্য .
কশ্চন গচ্ছতী৩ উ .footnoteThis is a mark for prolonging the vowel in the form ঽঽঽ.
আহো বিদ্বানমুং লোকং প্রেত্য কশ্চিত্সমশ্নুতা ৩ উ . সোঽকামযত .
বহু স্যাং প্রজাযেযেতি . স তপোঽতপ্যত . স তপস্তপ্ত্বা .
ইদঁ সর্বমসৃজত . যদিদং কিঞ্চ . তত্সৃষ্ট্বা .
তদেবানুপ্রাবিশত্ . তদনুপ্রবিশ্য . সচ্চ ত্যচ্চাভবত্ .
নিরুক্তং চানিরুক্তং চ . নিলযনং চানিলযনং চ .
বিজ্ঞানং চাবিজ্ঞানং চ . সত্যং চানৃতং চ সত্যমভবত্ .
যদিদং কিঞ্চ . তত্সত্যমিত্যাচক্ষতে .
তদপ্যেষ শ্লোকো ভবতি .. ১.. ইতি ষষ্ঠোঽনুবাকঃ ..

অসদ্বা ইদমগ্র আসীত্ . ততো বৈ সদজাযত .
তদাত্মানঁ স্বযমকুরুত .
তস্মাত্তত্সুকৃতমুচ্যত ইতি .

যদ্বৈ তত্ সুকৃতম্ . রসো বৈ সঃ .
রসঁ হ্যেবাযং লব্ধ্বাঽঽনন্দী ভবতি . কো হ্যেবান্যাত্কঃ
প্রাণ্যাত্ . যদেষ আকাশ আনন্দো ন স্যাত্ .
এষ হ্যেবাঽঽনন্দযাতি .
যদা হ্যেবৈষ এতস্মিন্নদৃশ্যেঽনাত্ম্যেঽনিরুক্তেঽনিলযনেঽভযং

প্রতিষ্ঠাং বিন্দতে . অথ সোঽভযং গতো ভবতি .
যদা হ্যেবৈষ এতস্মিন্নুদরমন্তরং কুরুতে .
অথ তস্য ভযং ভবতি . তত্বেব ভযং বিদুষোঽমন্বানস্য .
তদপ্যেষ শ্লোকো ভবতি .. ১.. ইতি সপ্তমোঽনুবাকঃ ..

ভীষাঽস্মাদ্বাতঃ পবতে . ভীষোদেতি সূর্যঃ .
ভীষাঽস্মাদগ্নিশ্চেন্দ্রশ্চ . মৃত্যুর্ধাবতি পঞ্চম ইতি .
সৈষাঽঽনন্দস্য মীমাঁসা ভবতি .
যুবা স্যাত্সাধুযুবাঽধ্যাযকঃ .
আশিষ্ঠো দৃঢিষ্ঠো বলিষ্ঠঃ .
তস্যেযং পৃথিবী সর্বা বিত্তস্য পূর্ণা স্যাত্ .
স একো মানুষ আনন্দঃ . তে যে শতং মানুষা আনন্দাঃ .. ১..

স একো মনুষ্যগন্ধর্বাণামানন্দঃ . শ্রোত্রিযস্য চাকামহতস্য .
তে যে শতং মনুষ্যগন্ধর্বাণামানন্দাঃ .

স একো দেবগন্ধর্বাণামানন্দঃ . শ্রোত্রিযস্য চাকামহতস্য .
তে যে শতং দেবগন্ধর্বাণামানন্দাঃ .
স একঃ পিতৃণাং চিরলোকলোকানামানন্দঃ .
শ্রোত্রিযস্য চাকামহতস্য .
তে যে শতং পিতৃণাং চিরলোকলোকানামানন্দাঃ .

স এক আজানজানাং দেবানামানন্দঃ .. ২..

শ্রোত্রিযস্য চাকামহতস্য .
তে যে শতং আজানজানাং দেবানামানন্দাঃ .
স একঃ কর্মদেবানাং দেবানামানন্দঃ .
যে কর্মণা দেবানপিযন্তি . শ্রোত্রিযস্য চাকামহতস্য .
তে যে শতং কর্মদেবানাং দেবানামানন্দাঃ .
স একো দেবানামানন্দঃ . শ্রোত্রিযস্য চাকামহতস্য .
তে যে শতং দেবানামানন্দাঃ . স এক ইন্দ্রস্যাঽঽনন্দঃ .. ৩..

শ্রোত্রিযস্য চাকামহতস্য . তে যে শতমিন্দ্রস্যাঽঽনন্দাঃ .
স একো বৃহস্পতেরানন্দঃ . শ্রোত্রিযস্য চাকামহতস্য .
তে যে শতং বৃহস্পতেরানন্দাঃ . স একঃ প্রজাপতেরানন্দঃ .
শ্রোত্রিযস্য চাকামহতস্য .

তে যে শতং প্রজাপতেরানন্দাঃ .
স একো ব্রহ্মণ আনন্দঃ . শ্রোত্রিযস্য চাকামহতস্য .. ৪..

স যশ্চাযং পুরুষে . যশ্চাসাবাদিত্যে . স একঃ .
স য এবংবিত্ . অস্মাল্লোকাত্প্রেত্য .

এতমন্নমযমাত্মানমুপসঙ্ক্রামতি .
এতং প্রাণমযমাত্মানমুপসঙ্ক্রামতি .
এতং মনোমযমাত্মানমুপসঙ্ক্রামতি .

এতং বিজ্ঞানমযমাত্মানমুপসঙ্ক্রামতি .
এতমানন্দমযমাত্মানমুপসঙ্ক্রামতি .

তদপ্যেষ শ্লোকো ভবতি .. ৫.. ইত্যষ্টমোঽনুবাকঃ ..

যতো বাচো নিবর্তন্তে . অপ্রাপ্য মনসা সহ .
আনন্দং ব্রহ্মণো বিদ্বান্ .
ন বিভেতি কুতশ্চনেতি .

এতঁ হ বাব ন তপতি .
কিমহঁ সাধু নাকরবম্ . কিমহং পাপমকরবমিতি .

স য এবং বিদ্বানেতে আত্মানঁ স্পৃণুতে .
উভে হ্যেবৈষ এতে আত্মানঁ স্পৃণুতে . য এবং বেদ .
ইত্যুপনিষত্ .. ১.. ইতি নবমোঽনুবাকঃ ..

.. ইতি ব্রহ্মানন্দবল্লী সমাপ্তা ..

ॐ সহ নাববতু . সহ নৌ ভুনক্তু . সহ বীর্যং করবাবহৈ .
তেজস্বি নাবধীতমস্তু মা বিদ্বিষাবহৈ .

ॐ শান্তিঃ শান্তিঃ শান্তিঃ ..

——————————————————————————–

ভৃগুর্বৈ বারুণিঃ . বরুণং পিতরমুপসসার .
অধীহি ভগবো ব্রহ্মেতি . তস্মা এতত্প্রোবাচ .
অন্নং প্রাণং চক্ষুঃ শ্রোত্রং মনো বাচমিতি .
তঁ হোবাচ . যতো বা ইমানি ভূতানি জাযন্তে .
যেন জাতানি জীবন্তি .
যত্প্রযন্ত্যভিসংবিশন্তি . তদ্বিজিজ্ঞাসস্ব . তদ্ ব্রহ্মেতি .
স তপোঽতপ্যত . স তপস্তপ্ত্বা .. ১.. ইতি প্রথমোঽনুবাকঃ ..

অন্নং ব্রহ্মেতি ব্যজানাত্ . অন্নাদ্ধ্যেব খল্বিমানি
ভুতানি জাযন্তে . অন্নেন জাতানি জীবন্তি .
অন্নং প্রযন্ত্যভিসংবিশন্তীতি . তদ্বিজ্ঞায .
পুনরেব বরুণং পিতরমুপসসার . অধীহি ভগবো ব্রহ্মেতি .
তঁ হোবাচ . তপসা ব্রহ্ম বিজিজ্ঞাসস্ব . তপো ব্রহ্মেতি .
স তপোঽতপ্যত . স তপস্তপ্ত্বা .. ১.. ইতি দ্বিতীযোঽনুবাকঃ ..

প্রাণো ব্রহ্মেতি ব্যজানাত্ .
প্রাণাদ্ধ্যেব খল্বিমানি ভূতানি জাযন্তে .
প্রাণেন জাতানি জীবন্তি . প্রাণং প্রযন্ত্যভিসংবিশন্তীতি .
তদ্বিজ্ঞায . পুনরেব বরুণং পিতরমুপসসার .
অধীহি ভগবো ব্রহ্মেতি . তঁ হোবাচ .
তপসা ব্রহ্ম বিজিজ্ঞাসস্ব . তপো ব্রহ্মেতি .
স তপোঽতপ্যত . স তপস্তপ্ত্বা .. ১.. ইতি তৃতীযোঽনুবাকঃ ..

মনো ব্রহ্মেতি ব্যজানাত্ . মনসো হ্যেব খল্বিমানি
ভূতানি জাযন্তে . মনসা জাতানি জীবন্তি .

মনঃ প্রযন্ত্যভিসংবিশন্তীতি . তদ্বিজ্ঞায .
পুনরেব বরুণং পিতরমুপসসার . অধীহি ভগবো ব্রহ্মেতি .
তঁ হোবাচ . তপসা ব্রহ্ম বিজিজ্ঞাসস্ব . তপো ব্রহ্মেতি .
স তপোঽতপ্যত . স তপস্তপ্ত্বা .. ১.. ইতি চতুর্থোঽনুবাকঃ ..

বিজ্ঞানং ব্রহ্মেতি ব্যজানাত্ .
বিজ্ঞানাদ্ধ্যেব খল্বিমানি ভূতানি জাযন্তে .
বিজ্ঞানেন জাতানি জীবন্তি .
বিজ্ঞানং প্রযন্ত্যভিসংবিশন্তীতি . তদ্বিজ্ঞায .
পুনরেব বরুণং পিতরমুপসসার . অধীহি ভগবো ব্রহ্মেতি .
তঁ হোবাচ . তপসা ব্রহ্ম বিজিজ্ঞাসস্ব . তপো ব্রহ্মেতি .
স তপোঽতপ্যত . স তপস্তপ্ত্বা .. ১.. ইতি পঞ্চমোঽনুবাকঃ ..

আনন্দো ব্রহ্মেতি ব্যজানাত্ .
আনন্দাধ্যেব খল্বিমানি ভূতানি জাযন্তে .
আনন্দেন জাতানি জীবন্তি . আনন্দং প্রযন্ত্যভিসংবিশন্তীতি .
সৈষা ভার্গবী বারুণী বিদ্যা . পরমে ব্যোমন্প্রতিষ্ঠিতা .
স য এবং বেদ প্রতিতিষ্ঠতি . অন্নবানন্নাদো ভবতি .

মহান্ভবতি প্রজযা পশুভির্ব্রহ্মবর্চসেন .
মহান্ কীর্ত্যা .. ১.. ইতি ষষ্ঠোঽনুবাকঃ ..

অন্নং ন নিন্দ্যাত্ . তদ্ব্রতম্ . প্রাণো বা অন্নম্ .
শরীরমন্নাদম্ . প্রাণে শরীরং প্রতিষ্ঠিতম্ .
শরীরে প্রাণঃ প্রতিষ্ঠিতঃ . তদেতদন্নমন্নে প্রতিষ্ঠিতম্ .
স য এতদন্নমন্নে প্রতিষ্ঠিতং বেদ প্রতিতিষ্ঠতি .
অন্নবানন্নাদো ভবতি .

মহান্ভবতি প্রজযা
পশুভির্ব্রহ্মবর্চসেন . মহান্ কীর্ত্যা .. ১..
ইতি সপ্তমোঽনুবাকঃ ..

অন্নং ন পরিচক্ষীত . তদ্ব্রতম্ . আপো বা অন্নম্ .
জ্যোতিরন্নাদম্ . অপ্সু জ্যোতিঃ প্রতিষ্ঠিতম্ .
জ্যোতিষ্যাপঃ প্রতিষ্ঠিতাঃ . তদেতদন্নমন্নে প্রতিষ্ঠিতম্ .
স য এতদন্নমন্নে প্রতিষ্ঠিতং বেদ প্রতিতিষ্ঠতি .
অন্নবানন্নাদো ভবতি .

মহান্ভবতি প্রজযা
পশুভির্ব্রহ্মবর্চসেন .

মহান্ কীর্ত্যা .. ১..
ইত্যষ্টমোঽনুবাকঃ ..

অন্নং বহু কুর্বীত . তদ্ব্রতম্ . পৃথিবী বা অন্নম্ .
আকাশোঽন্নাদঃ . পৃথিব্যামাকাশঃ প্রতিষ্ঠিতঃ .
আকাশে পৃথিবী প্রতিষ্ঠিতা .
তদেতদন্নমন্নে প্রতিষ্ঠিতম্ .
স য এতদন্নমন্নে প্রতিষ্ঠিতং বেদ প্রতিতিষ্ঠতি .
অন্নবানন্নাদো ভবতি .

মহান্ভবতি প্রজযা
পশুভির্ব্রহ্মবর্চসেন . মহান্কীর্ত্যা .. ১..
ইতি নবমোঽনুবাকঃ ..

ন কঞ্চন বসতৌ প্রত্যাচক্ষীত . তদ্ব্রতম্ .
তস্মাদ্যযা কযা চ বিধযা বহ্বন্নং প্রাপ্নুযাত্ .
অরাধ্যস্মা অন্নমিত্যাচক্ষতে .
এতদ্বৈ মুখতোঽনঁ রাদ্ধম্ .
মুখতোঽস্মা অন্নঁ রাধ্যতে .
এতদ্বৈ মধ্যতোঽনঁ রাদ্ধম্ .

মধ্যতোঽস্মা অন্নঁ রাধ্যতে .
এদদ্বা অন্ততোঽন্নঁ রাদ্ধম্ .
অন্ততোঽস্মা অন্নঁ রাধ্যতে .. ১..

য এবং বেদ . ক্ষেম ইতি বাচি . যোগক্ষেম ইতি প্রাণাপানযোঃ .
কর্মেতি হস্তযোঃ . গতিরিতি পাদযোঃ . বিমুক্তিরিতি পাযৌ .
ইতি মানুষীঃ সমাজ্ঞাঃ . অথ দৈবীঃ . তৃপ্তিরিতি বৃষ্টৌ .
বলমিতি বিদ্যুতি .. ২..

যশ ইতি পশুষু . জ্যোতিরিতি নক্ষত্রেষু .
প্রজাতিরমৃতমানন্দ ইত্যুপস্থে . সর্বমিত্যাকাশে .
তত্প্রতিষ্ঠেত্যুপাসীত . প্রতিষ্ঠাবান্ ভবতি .
তন্মহ ইত্যুপাসীত . মহান্ভবতি . তন্মন ইত্যুপাসীত .
মানবান্ভবতি .. ৩..

তন্নম ইত্যুপাসীত . নম্যন্তেঽস্মৈ কামাঃ .
তদ্ব্রহ্মেত্যুপাসীত . ব্রহ্মবান্ভবতি .
তদ্ব্রহ্মণঃ পরিমর ইত্যুপাসীত .
পর্যেণং ম্রিযন্তে দ্বিষন্তঃ সপত্নাঃ .
পরি যেঽপ্রিযা ভ্রাতৃব্যাঃ .
স যশ্চাযং পুরুষে . যশ্চাসাবাদিত্যে . স একঃ .. ৪..

স য এবংবিত্ . অস্মাল্লোকাত্প্রেত্য .
এতমন্নমযমাত্মানমুপসঙ্ক্রম্য .
এতং প্রাণমযমাত্মানমুপসঙ্ক্রম্য .
এতং মনোমযমাত্মানমুপসঙ্ক্রম্য .
এতং বিজ্ঞানমযমাত্মানমুপসঙ্ক্রম্য .
এতমানন্দমযমাত্মানমুপসঙ্ক্রম্য .
ইমাঁল্লোকন্কামান্নী কামরূপ্যনুসঞ্চরন্ .
এতত্ সাম গাযন্নাস্তে . হা ৩ বু হা ৩ বু হা ৩ বু .. ৫..

অহমন্নমহমন্নমহমন্নম্ .
অহমন্নাদো৩ঽহমন্নাদো৩ঽঅহমন্নাদঃ .
অহঁ শ্লোককৃদহঁ শ্লোককৃদহঁ শ্লোককৃত্ .
অহমস্মি প্রথমজা ঋতা৩স্য .
পূর্বং দেবেভ্যোঽমৃতস্য না৩ভাযি .
যো মা দদাতি স ইদেব মা৩ঽঽবাঃ .
অহমন্নমন্নমদন্তমা৩দ্মি .
অহং বিশ্বং ভুবনমভ্যভবা৩ম্ .
সুবর্ন জ্যোতীঃ . য এবং বেদ . ইত্যুপনিষত্ .. ৬..
ইতি দশমোঽনুবাকঃ ..

.. ইতি ভৃগুবল্লী সমাপ্তা ..

ॐ সহ নাববতু . সহ নৌ ভুনক্তু . সহ বীর্যং করবাবহৈ .
তেজস্বি নাবধীতমস্তু মা বিদ্বিষাবহৈ .

.. ॐ শান্তিঃ শান্তিঃ শান্তিঃ ..

.. হরিঃ ওম্ ..