নিরালম্ব

.. নিরালম্বোপনিষত্ ..

যত্রালম্বালম্বিভাবো বিদ্যতে ন কদাচন .
জ্ঞবিজ্ঞসম্যগ্জ্ঞালম্বং নিরালম্বং হরিং ভজে ..
ॐ পূর্ণমদঃ পূর্ণমিদং পূর্ণাত্পূর্ণমুদচ্যতে .
পূর্ণস্য পূর্ণমাদায পূর্ণমেবাবশিষ্যতে ..
ॐ শান্তিঃ শান্তিঃ শান্তিঃ ..
ॐ নমঃ শিবায গুরবে সচ্চিদানন্দ মূর্তযে .
নিষ্প্রপঞ্চায শান্তায নিরালম্বায তেজসে ..
নিরালম্বং সমাশ্রিত্য সালম্বং বিজহাতি যঃ .
স সংন্যাসী চ যোগী চ কৈবল্যং পদমশ্নুতে .
এষমজ্ঞানজন্তূনাং সমস্তারিষ্টশান্তযে .
যদ্যদ্বোদ্ধব্যমখিলং তদাশঙ্ক্য ব্রবীম্যহম্ ..
কিং ব্রহ্ম . ক ঈশ্বরঃ . কো জীবঃ . কা প্রকৃতিঃ .
কঃ পরমাত্মা . কো ব্রহ্মা . কো বিষ্ণুঃ . কো রুদ্রঃ .
ক ইন্দ্রঃ . কঃ শমনঃ . কঃ সূর্যঃ . কশ্চন্দ্রঃ .
কে সুরাঃ . কে অসুরাঃ . কে পিশাচাঃ . কে মনুষ্যাঃ .
কাঃ স্ত্রিযঃ . কে পশ্বাদযঃ . কিং স্থাবরম্ .
কে ব্রাহ্মণাদযঃ . কা জাতিঃ . কিং কর্ম . কিমকর্ম .
কিং জ্ঞানম্ . কিমজ্ঞানম্ . কিং সুখম্ . কিং দুঃখম্ .
কঃ স্বর্গঃ . কো নরকঃ . কো বন্ধঃ . কো মোক্ষঃ .
ক উপাস্যঃ . কঃ শিষ্যঃ . কো বিদ্বান্ . কো মূঢঃ .
কিমাসুরম্ . কিং তপঃ . কিং পরমং পদম্ .
কিং গ্রাহ্যম্ . কিমগ্রাহ্যম্ . কঃ সংন্যাসীত্যাহশঙ্ক্যাহ
ব্রহ্মেতি . স হোবাচ মহদহঙ্কারপৃথিব্যপ্তেজোবায্বাকাশত্বেন
বৃহদ্রূপেণাণ্ডকোশেন কর্মজ্ঞানার্থরূপতযা
ভাসমানমদ্বিতীযমখিলোপাধিবিনির্মুক্তং
তত্সকলশক্ত্যুপবৃংহিতমনাদ্যনন্তং
শুদ্ধং শিবং শান্তং নির্গুণমিত্যাদি-
বাচ্যমনির্বাচ্যং চৈতন্যং ব্রহ্ম .. ঈশ্বর ইতি চ ..
ব্রহ্মৈব স্বশক্তিং প্রকৃত্যভিধেযামাশ্রিত্য
লোকান্সৃষ্ট্বা প্রবিশ্যান্তর্যামিত্বেন ব্রহ্মাদীনাং
বুদ্ধীন্দ্রিযনিযন্তৃত্বাদীশ্বরঃ .. জীব ইতি চ
ব্রহ্মবিষ্ণ্বীশানেন্দ্রাদীনাং নামরূপদ্বারা
স্থূলোঽহমিতি মিথ্যাধ্যাসবশাজ্জীবঃ .সোঽহমেকোঽপি
দেহারম্ভকভেদবশাদ্বহুজীবঃ . প্রকৃতিরিতি চ
ব্রহ্মণঃ সকাশান্নানাবিচিত্রজগন্নির্মাণ-
সামার্থ্যবুদ্ধিরূপা ব্রহ্মশক্তিরেব প্রকৃতিঃ .
পরমাত্মেতি চ দেহাদেঃ পরতরত্বদ্ব্রাহ্মৈব  পরমাত্মা
স ব্রহ্মা স বিষ্ণুঃ স ইন্দ্রঃ স শমনঃ স সূর্যঃ
স চন্দ্রস্তে সুরাস্তে অসুরাস্তে পিশাচাস্তে মনুষ্যাস্তাঃ
স্ত্রিযস্তে পশ্বাদযস্তত্স্থাবরং তে ব্রাহ্মণাদযঃ .
সর্বং খল্বিদং ব্রহ্ম নেহ নানাস্তি কিঞ্চন . জাতিরিতি চ .
ন চর্মণো ন রক্তস্য ন মাংসস্য ন চাস্থিনঃ .
ন জাতিরাত্মনো জাতির্ব্যবহারপ্রকল্পিতা . কর্মেতি চ
ক্রিযমাণেন্দ্রিযৈঃ কর্মণ্যহং করোমীত্যধ্যাত্মনিষ্ঠতযা
কৃতং কর্মৈব কর্ম . অকর্মেতি চ কর্তৃত্বভোক্তৃত্বা-
দ্যহঙ্কারতযা বন্ধরূপং জন্মাদিকারণং
নিত্যনৈমিত্তিকযাগব্রততপোদানাদিষু ফলাভিসন্ধানং
যত্তদকর্ম .
জ্ঞানমিতি চ দেহেন্দ্রিযনিগ্রহসদ্গুরূপাসন-
শ্রবণমনননিদিধ্যাসনৈর্যদ্যদৃগ্দৃশ্যস্বরূপং
সর্বান্তরস্থং সর্বসমং ঘটপটাদিপদার্থ-
মিবাবিকারং বিকারেষু চৈতন্যং বিনা কিঞ্চিন্নাস্তীতি
সাক্ষাত্কারানুভবো জ্ঞানম্ . অজ্ঞানমিতি চ
রজ্জৌ সর্পভ্রান্তিরিবাদ্বিতীযে সর্বানুস্যূতে সর্বমযে
ব্রহ্মণি দেবতির্যঙ্নরস্থাবরস্ত্রীপুরুষবর্ণাশ্রম-
বন্ধমোক্ষোপাধিনানাত্মভেদকল্পিত জ্ঞানমজ্ঞানম্ .
সুখমিতি চ সচ্চিদানন্দস্বরূপং জ্ঞাত্বানন্দরূপা
যা স্থিতিঃ সৈব সুখম্ . দুঃখমিতি অনাত্মরূপঃ
বিষযসঙ্কল্প এব দুঃখম্ . স্বর্গ ইতি চ সত্সংসর্গঃ
স্বর্গঃ . নরক ইতি চ অসত্সংসারবিষযজনসংসর্গ এব
নরকঃ . বন্ধ ইতি চ অনাদ্যবিদ্যাবাসনযা জাতোঽহমি-
ত্যাদিসঙ্কল্পো বন্ধঃ . পিতৃমাতৃসহোদরদারাপত্য-
গৃহারামক্ষেত্রমমতা সংসারাবরণসঙ্কল্পো বন্ধঃ .
কর্তৃত্বাদ্যহঙ্কারসঙ্কল্পো বন্ধঃ . অণিমাদ্যষ্টৈশ্ব-
র্যাশাসিদ্ধসঙ্কল্পো বন্ধঃ . দেবমনুষ্যাদ্যুপাসনা-
কামসঙ্কল্পো বন্ধঃ . যমাদ্যষ্টাঙ্গযোগসঙ্কল্পো
বন্ধঃ . বর্ণাশ্রমধর্মকর্মসঙ্কল্পো বন্ধঃ .
আজ্ঞাভযসংশযাত্মগুণসঙ্কল্পো বন্ধঃ . যাগব্রত-
তপোদানবিধিবিধানজ্ঞানসম্ভবো বন্ধঃ . কেবলমোক্ষা-
পেক্ষাসঙ্কল্পো বন্ধঃ . সঙ্কল্পমাত্রসংভবো বন্ধঃ .
মোক্ষ ইতি চ নিত্যানিত্যবস্তুবিচারাদনিত্যসংসারসুখ-
দুঃখবিষযসমস্তক্ষেত্রমমতাবন্ধক্ষযো মোক্ষঃ .
উপাস্য ইতি চ সর্বশরীরস্থচৈতন্যব্রহ্মপ্রাপকো গুরুরুপাস্যঃ .
শিষ্য ইতি চ বিদ্যাধ্বস্তপ্রপঞ্চাবগাহিতজ্ঞানাবশিষ্টং
ব্রহ্মৈব শিষ্যঃ . বিদ্বানিতি চ সর্বান্তরস্থস্বসংবিদ্রূপবি-
দ্বিদ্বান্ . মূঢ ইতি চ কর্তৃত্বাদ্যহঙ্কারভাবারূঢো মূঢঃ .
আসুরমিতি চ ব্রহ্মবিষ্ণ্বীশানেন্দ্রাদীনা-
মৈশ্বর্যকামনযা নিরশনজপাগ্নিহোত্রাদি-
ষ্বন্তরাত্মানং সন্তাপযতি চাত্যুগ্ররাগ-
দ্বেষবিহিংসা দম্ভাদ্যপেক্ষিতং তপ আসুরম্ .
তপ ইতি চ ব্রহ্ম সত্যং জগন্মিথ্যেত্যপরোক্ষ-
জ্ঞানাগ্নিনা ব্রহ্মাদ্যৈশ্বর্যাশাসিদ্ধসঙ্কল্প-
বীজসন্তাপং তপঃ . পরমং পদমিতি চ
প্রাণেন্দ্রিযাদ্যন্তঃকরণগুণাদেঃ পরতরং
সচ্চিদানন্দমযং নিত্যমুক্তব্রহ্মস্থানং
পরমং পদম্ . গ্রাহ্যমিতি চ দেশকালবস্তু-
পরিচ্ছেদরাহিত্যচিন্মাত্রস্বরূপং গ্রাহ্যম্ .
অগ্রাহ্যমিতি চ স্বস্বরূপব্যতিরিক্তমাযাময-
বুদ্ধীন্দ্রিযগোচরজগত্সত্যত্বচিন্তনমগ্রাহ্যম্ .
সংন্যাসীতি চ সর্বধর্মান্পরিত্যজ্য নির্মমো
নিরহঙ্কারো ভূত্বা ব্রহ্মেষ্টং শরণমুপগম্য
তত্ত্বমসি অহং ব্রহ্মাস্মি সর্বং খল্বিদং ব্রহ্ম
নেহ নানাস্তি কিঞ্চনেত্যাদিমহাবাক্যার্থা-
নুভবজ্ঞানাদ্ব্রহ্মৈবাহমস্মীতি নিশ্চিত্য
নির্বিকল্পসমাধিনা স্বতন্ত্রো যতিশ্চরতি স সংন্যাসী
স মুক্তঃ স পূজ্যঃ স যোগী স পরমহংসঃ সোঽবধূতঃ
স ব্রাহ্মণ ইতি . ইদং নিরালম্বোপনিষদং যোঽধীতে
গুর্বনুগ্রহতঃ সোঽগ্নিপূতো ভবতি স বাযুপূতো ভবতি
ন স পুনরাবর্ততে ন স পুনরাবর্ততে পুনর্নাভিজাযতে
পুনর্নাভিজাযত ইত্যুপনিষত্ ..
ॐ পূর্ণমদঃ পূর্ণমিদং পূর্ণাত্পূর্ণমুদচ্যতে .
পূর্ণস্য পূর্ণমাদায পূর্ণমেবাবশিষ্যতে ..
ॐ শান্তিঃ শান্তিঃ শান্তিঃ ..
ইতি নিরালম্বোপনিষত্সমাপ্তা ..