গণপতি

.. গণপত্যুপনিষত্ ..

যং নত্বা মুনযঃ সর্বে নির্বিঘ্নং যান্তি তত্পদম্ .
গণেশোপনিষদ্বেদ্যং তদ্ব্রহ্মৈবাস্মি সর্বগম্ ..
ॐ ভদ্রং কর্ণেভিঃ শ্রুণুযাম দেবাঃ . ভদ্রং পশ্যেমাক্ষভির্যজত্রাঃ .
স্থিরৈরঙ্গৈস্তুষ্টুবাঁসস্তনূভির্ব্যশেম দেবহিতং যদাযুঅঃ ..
ॐ শান্তিঃ শান্তিঃ শান্তিঃ ..
হরিঃ ॐ.. নমস্তে গণপতযে . ত্বমেব প্রত্যক্ষং তত্ত্বমসি .
ত্বমেব কেবলং কর্তাসি . ত্বমেব কেবলং ধর্তাসি . ত্বমেব কেবলং হর্তাসি .
ত্বমেব সর্বং খল্বিদং ব্রহ্মাসি . ত্বং সাক্ষাদাত্মাসি নিত্যম্ .
ঋতং বচ্মি . সত্যং বচ্মি . অব ত্বং মাম্ . অব বক্তারম্ . অব শ্রোতারম্ .
অব দাতারম্ . অব ধাতারম্ . অবানূচানমব শিষ্যম্ .
অব পশ্চাত্তাত্ . অব পুরস্তাত্ . অব চোত্তরাত্তাত্ . অব দক্ষিণাত্তাত্ .
অব চোর্ধ্বাত্তাত্ . অবাধরাত্তাত্ . সর্বতো মাং পাহি পাহি সমন্তাত্ .
ত্বং বাঙ্মযস্ত্বং চিন্মযঃ . ত্বমানন্দমযস্ত্বং ব্রহ্মমযঃ .
ত্বং সচ্চিদানন্দাদ্বিতীযোঽসি . ত্বং প্রত্যক্ষং ব্রহ্মাসি .
ত্বং জ্ঞানমযো বিজ্ঞানমযোঽসি . সর্বং জগদিদং ত্বত্তো জাযতে .
সর্বং জগদিদং ত্বত্তস্তিষ্ঠতি . সর্বং জগদিদং ত্বযি লযমেষ্যতি .
সর্বং জগদিদং ত্বযি প্রত্যেতি . ত্বং ভূমিরাপোঽনলোঽনিলো নভঃ .
ত্বং চত্বারি বাক্পদানি . ত্বং গুণত্রযাতীতঃ . ত্বং কালত্রযাতীতঃ .
ত্বং দেহত্রযাতীতঃ . ত্বং মূলাধারস্থিতোঽসি নিত্যম্ . ত্বং শক্তিত্রযাত্মকঃ .
ত্বাং যোগিনো ধ্যাযন্তি নিত্যম্ . ত্বং ব্রহ্মা ত্বং বিষ্ণুস্ত্বং
রুদ্রস্ত্বমিন্দ্রস্ত্বমগ্নিস্ত্বং বাযুস্ত্বং সূর্যস্ত্বং চন্দ্রমাস্ত্বং
ব্রহ্ম ভূর্ভুবঃসুবরোম্ . গণাদিং পূর্বমুচ্চার্য বর্ণাদিং তদনন্তরম্ .
অনুস্বারঃ পরতরঃ . অর্ধেন্দুলসিতম্ .. ১..
তারেণ রুদ্ধম্ . এতত্তব মনুস্বরূপম্ . গকারঃ পূর্বরূপম্ .
অকারো মধ্যম রূপম্ . অনুস্বারশ্চান্ত্যরূপম্ . বিন্দুরুত্তররূপম্ .
নাদঃ সন্ধানম্ . সংহিতা সন্ধিঃ . সৈষা গণেশবিদ্যা .
গণক ঋষিঃ নিচৃদ্গাযত্রী ছন্দঃ . শ্রীমহাগণপতির্দেবতা .
ॐ গম্ . গণপতযে নমঃ . একদন্তায বিদ্মহে বক্রতুণ্ডায ধীমহি .
তন্নো দন্তী প্রচোদযাত্ ..
একদন্তং চতুর্হস্তং পাশমঙ্কুশধারিণম্ .
অভযং বরদং হস্তৈর্বিভ্রাণং মূশকধ্বজম্ ..
রক্তং লম্বোদরং শূর্পকর্ণকং রক্তবাসসম্ .
রক্তগন্ধানুলিপ্তাঙ্গং রক্তপুষ্পৈঃ সুপূজিতম্ ..
ভক্তানুকংপিনং দেবং জগত্কারণমচ্যুতম্ .
আবির্ভূতং চ সৃষ্ট্যাদৌ প্রকৃতেঃ পুরুষাত্পরম্ ..
এবং ধ্যাযতি যো নিত্যং স যোগী যোগিনাং বরঃ .
নমো ব্রাতপতযে নমো গণপতযে নমঃ প্রথমপতযে
নমস্তেঽস্তু লম্বোদরাযৈকদন্তায বিঘ্নবিনাশিনে শিবসুতায
শ্রীবরদমূর্তযে নমোনমঃ ..  ..
এতদথর্বশিরো যোধীতে স ব্রহ্মভূযায কল্পতে .
স সর্ববিঘ্নৈর্ন বাধ্যতে . স সর্বতঃ সুখমেধতে .
স পঞ্চমহাপাতকোপপাতকাত্প্রমুচ্যতে .
সাযমধীযানো দিবসকৃতং পাপং নাশযতি .
প্রাতরধীযানো রাত্রিকৃতং পাপং নাশযতি .
সাযং প্রাতঃ প্রযুঞ্জানোঽপাপো ভবতি .
ধর্মার্থকামমোক্ষং চ বিন্দতি .
ইদমথর্বসীর্ষমশিষ্যায ন দেযম্ .
যো যদি মোহাদ্দাস্যতি স পাপীযান্ভবতি .
সহস্রাবর্তনাদ্যং যং কামমধীতে তং তমনেন সাধযেত্ .
অনেন গণপতিমভিশিঞ্চতি স বাগ্মী ভবতি .
চতুর্থ্যামনশ্নঞ্জপতি স বিদ্যাবান্ভবতি .
ইত্যথর্বণবাক্যম্ . ব্রহ্মাদ্যাচরণং বিদ্যাত্ .
ন বিভেতি কদাচনেতি . যো দুর্বাঙ্কুরৈর্যজতি স বৈশ্রবণোপমো ভবতি .
যো লাজৈর্যজতি স যশোবান্ভবতি . স মেধাবান্ভবতি .
যো মোদকসহস্রেণ যজতি স বাঞ্ছিতফলমবাপ্নোতি .
যঃ সাজ্যসমিদ্ভির্যজতি স সর্বং লভতে স সর্বং লভতে .
অষ্টৌ ব্রাহ্মণান্সম্যগ্গ্রাহযিত্বা সূর্যবর্চস্বী ভবতি .
সূর্যগ্রহে মহানদ্যাং প্রতিমাসংনিধৌ বা জপ্ত্বা সিদ্ধমন্ত্রো ভবতি .
মহাবিঘ্নাত্প্রমুচ্যতে . মহাদোষাত্প্রমুচ্যতে .
স সর্ববিদ্ভবতি স সর্ববিদ্ভবতি . য এবং বেদেত্যুপনিষত্ ..
ॐ ভদ্রং কর্ণেভিঃ শ্রুণুযাম দেবাঃ . ভদ্রং পশ্যেমাক্ষভির্যজত্রাঃ .
স্থিরৈরঙ্গৈস্তুষ্টুবাঁসস্তনূভির্ব্যশেম দেবহিতং যদাযুঃ ..
ॐ শান্তিঃ শান্তিঃ শান্তিঃ ..
ইতি গণপত্যুপনিষত্সমাপ্তা ..