যাজ্ঞবল্ক

.. যাজ্ঞবল্ক্যোপনিষত্  ..

সংন্যাসজ্ঞানসংপন্না যান্তি যদ্বৈষ্ণবং পদম্ .
তদ্বৈ পদং ব্রহ্মতত্ত্বং রামচন্দ্রপদং ভজে ..
ॐ পূর্ণমদঃ পূর্ণমিদং পূর্ণাত্পূর্ণমুদচ্যতে .
পূর্ণস্য পূর্ণমাদায পূর্ণমেবাবশিষ্যতে ..
ॐ শান্তিঃ শান্তিঃ শান্তিঃ ..
হরিঃ ॐ .. অথ জনকো হ বৈদেহো যাজ্ঞবল্ক্যমুপসমেত্যোবাচ
ভগবন্সংন্যাসমনুব্রূহীতি কথং সংন্যাসলক্ষণম্ . স
হোবাচ যাজ্ঞবল্ক্যো ব্রহ্মচর্যং সমাপ্য গৃহী ভবেত্ .
গৃহাদ্বনী ভূত্বা প্রব্রজেত্ . যদি বেতরথা ব্রহ্মচর্যাদেব
প্রব্রজেদ্গৃহাদ্বা বনাদ্বা . অথ পুনর্ব্রতী বাব্রতী বা স্নাতকো
বাঽস্নাতকো বা উত্সন্নাগ্নিরনগ্নোকোঽবা যদহরেব বিরজেত্তদহরেব
প্রব্রজেত্ . তদেকে প্রাজাপত্যামেবেষ্টিং কুর্বন্তি . অথ বা ন
কুর্যাদাগ্নেয্যামেব কুর্যাত্ . অগ্নির্হি প্রাণঃ . প্রাণমেবৈতযা করোতি .
ত্রৈধাতবীযামেব কুর্যাত্ . এতযৈব ত্রযো ধাতবো যদুত সত্ত্বং
রজস্তম ইতি অযং তে যোনিরৃত্বিজো যতো জাতো অরোচথাঃ . তং জানন্নগ্ন
আরোহাথানো বর্ধযা রযিমিত্যনেন মন্ত্রেণাগ্নিমাজিঘ্রেত্ . এষ বা
অগ্নের্যোনির্যঃ প্রাণং গচ্ছ স্বাং যোনিং গচ্ছ স্বাহেত্যেবমেবৈত-
দাগ্রামাদগ্নিমাহৃত্য পূর্ববদগ্নিমাজিঘ্রেত্ যদগ্নিং ন বিন্দেদপ্সু
জুহুযাদাপো বৈ সর্বা দেবতাঃ সর্বাভ্যো দেবতাভ্যো জুহোমি স্বাহেতি
সাজ্যং হবিরনামযম্ . মোক্ষমন্ত্রস্ত্রয্যেবং বেদ তদ্ব্রহ্ম
তদুপাসিতব্যম্ . শিখাং যজ্ঞোপবীতং ছিত্ত্বা সংন্যস্তং মযেতি
ত্রিবারমুচ্চরেত্ . এবমেবৈতদ্ভগবন্নিতি বৈ যাজ্ঞবল্ক্যঃ .. ১..
অথ হৈনমত্রিঃ পপ্রচ্ছ যাজ্ঞবল্ক্যং যজ্ঞোপবীতী
কথং ব্রাহ্মণ ইতি . স হোবাচ যাজ্ঞবল্ক্য ইদং
প্রণবমেবাস্য তদ্যজ্ঞোপবীতং য আত্মা . প্রাশ্যাচম্যাযং
বিধিরথ বা পরিব্রাড্বিবর্ণবাসা মুণ্ডোঽপরিগ্রহঃ শুচিরদ্রোহী
ভৈক্ষমাণো ব্রহ্ম ভূযায ভবতি . এষ পন্থাঃ
পরিব্রাজকানাং বীরাধ্বনি বাঽনাশকে বাপাং প্রবেশে
বাগ্নিপ্রবেশে বা মহাপ্রস্থানে বা . এষ পন্থা ব্রহ্মণা
হানুবিত্তস্তেনেতি স সংন্যাসী ব্রহ্মবিদিতি . এবমেবৈষ ভগবন্নিতি
বৈ যাজ্ঞবল্ক্য . তত্র পরমহংসা নাম সংবর্তকারুণি-
শ্বেতকেতুদূর্বাসঋভুনিদাঘদত্তাত্রেযশুকবামদেব-
হারীতকপ্রভৃতযোঽব্যক্তলিঙ্গাঽব্যক্তাচারা অনুন্মত্তা
উন্মত্তবদাচরন্তঃ পরস্ত্রীপুরপরাঙ্মুখাস্ত্রিদণ্ডং
কমণ্ডলুং ভুক্তপাত্রং জলপবিত্রং শিখাং যজ্ঞোপবীতং
বহিরন্তশ্চেত্যেতত্সর্বং ভূঃ স্বাহেত্যপ্সু পরিত্যজ্যাত্মান-
মন্বিচ্ছেত্ . যথা জাতরূপধরা নির্দ্বন্দ্বা নিষ্পরিগ্রহা-
স্তত্ত্বব্রহ্মমার্গে সম্যক্সংপন্নাঃ শুদ্ধমানসাঃ
প্রাণসন্ধারণার্থং যথোক্তকালে বিমুক্তো ভৈক্ষমাচর-
ন্নুদরপাত্রেণ লাভালাভৌ সমৌ ভূত্বা করপাত্রেণ বা
কমণ্ডলূদকপো ভৈক্ষমাচরন্নুদরমাত্রসংগ্রহঃ
পাত্রান্তরশূন্যো জলস্থলকমণ্ডলুরবাধকরহঃস্থল-
নিকেতনো লাভালাভৌ সমৌ ভূত্বা শূন্যাগারদেবগৃহ-
তৃণকূটবল্মীকবৃক্ষমূলকুলালশালাগ্নিহোত্রশালানদী-
পুলুনগিরিকুহরকোটরকন্দরনির্ঝরস্থণ্ডিলেষ্বনিকেতনিবাস্য-
প্রযত্নঃশুভাশুভকর্মনির্মূলনপরঃ সংন্যাসেন
দেহত্যাগং করোতি স পরমহংসো নামেতি . আশাম্বরো ন
নমস্কারো ন দারপুত্রাভিলাষী লক্ষ্যালক্ষ্যনির্বর্তকঃ
পরিব্রাট্ পরমেশ্বরো ভবতি . অত্রৈতে শ্লোকা ভবন্তি .
যো ভবেত্পূর্বসংন্যাসী তুল্যো বৈ ধর্মতো যদি .
তস্মৈ প্রণামঃ কর্তব্যো নেতরায কদাচন .. ১..
প্রমাদিনো বহিশ্চিত্তাঃ পিশুনাঃ কলহোত্সুকাঃ .
সংন্যাসিনোঽপি দৃশ্যন্তে দেবসংদূষিতাশযাঃ .. ২..
নামাদিভ্যঃ পরে ভূম্নি স্বারাজ্যে চেত্স্থিতোঽদ্বথে .
প্রণমেত্কং তদাত্মজ্ঞো ন কার্যং কর্মণা তদা .. ৩..
ঈশ্বরো জীবকলযা প্রবিষ্টো ভগবানিতি .
প্রণমেদ্দণ্ডবদ্ভূমাবাশ্বচণ্ডালগোখরম্ .. ৪..
মাংসপাঞ্চালিকাযাস্তু যন্ত্রলোকেঽঙ্গপঞ্জরে .
স্নায্বস্থিগ্রন্থিশালিন্যঃ স্ত্রিযঃ কিমিব শোভনম্ .. ৫..
ত্বঙ্মাংসরক্তবাষ্পাম্বু পৃথক্কৃত্বা বিলোচনে .
সমালোকয রম্যং চেত্কিং মুধা পরিমুহ্যসি .. ৬..
মেরুশৃঙ্গতটোল্লাসি গঙ্গাজলস্যোপমা .
দৃষ্টা যস্মিন্মুনে মুক্তাহারস্যোল্লসশালিতা .. ৭..
শ্মনানেষু দিগন্তেষু স এব ললনাস্তনঃ .
শ্বভিরাস্বাদ্যতে কালে লঘুপিণ্ড ইবান্ধসঃ .. ৮..
কেশকজ্জলধারিণ্যো দুঃস্পর্শা লোচনপ্রিযাঃ .
দুষ্কৃতাগ্নিশিখা নার্যো দহন্তি তৃণবন্নরম্ .. ৯..
জ্বলনা অতিদূরেঽপি সরসা অপি নীরসাঃ .
স্ত্রিযো হি নরকাগ্নীনামিন্ধনং চারু দারুণম্ .. ১০..
কামনাম্না কিরাতেন বিকীর্ণা মুগ্ধচেতসঃ .
নার্যো নরবিহঙ্গানামঙ্গবন্ধনবাগুরাঃ .. ১১..
জন্মপল্বলমত্স্যানাং চিত্তকর্দমচারিণাম্ .
পুংসাং দুর্বাসনারজ্জুর্নারীবডিশপিণ্ডিকা .. ১২..
সর্বেষাং দোষরত্নানাং সুসমুদ্গিকযানযা .
দুঃখশৃঙ্খলযা নিত্যমলমস্তু মম স্ত্রিযা .. ১৩..
যস্য স্ত্রী তস্য ভোগেচ্ছা নিস্ত্রীকস্য ক্ব ভোগভূঃ .
স্ত্রিযং ত্যক্ত্বা জগত্ত্যক্তং জগত্ত্যক্ত্বা সুখী ভবেত্ .. ১৪..
অলভ্যমানস্তনযঃ পিতরৌ ক্লেশযেচ্চিরম্ .
লব্ধো হি গর্ভপাতেন প্রসবেন চ বাধতে .. ১৫..
জাতস্য গ্রহরোগাদি কুমারস্য চ ধূর্ততা .
উপনীতেঽপ্যবিদ্যত্বমনুদ্বাহশ্চ পণ্ডিতে .. ১৬..
যূনশ্চ পরদারাদি দারিদ্র্যং চ কুটুম্বিনঃ .
পুত্রদুঃখস্য নাস্ত্যন্তো ধনী চেন্ম্রিযতে তদা .. ১৭..
ন পাণিপাদচপলো ন নেত্রচপলো যতিঃ .
ন চ বাক্চপলশ্চৈব ব্রহ্মভূতো জিতেন্দ্রিযঃ .. ১৮..
রিপৌ বদ্ধে স্বদেহে চ সমৈকাত্ম্যং প্রপশ্যতঃ .
বিবেকিনঃ কুতঃ কোপঃ স্বদেহাবযবেষ্বিব .. ১৯..
অপকারিণি কোপশ্চেত্কোপে কোপঃ কথং ন তে .
ধর্মার্থকামমোক্ষাণাং প্রসহ্য পরিপন্থিনি .. ২০..
নমোঽস্তু মম কোপায স্বাশ্রযজ্বালিনে ভৃশম্ .
কোপস্য মম বৈরাগ্যদাযিনে দোষবোধিনে .. ২১..
যত্র সুপ্তা জনা নিত্যং প্রবুদ্ধস্তত্র সংযমী .
প্রবুদ্ধা যত্র তে বিদ্বান্সুষুপ্তিং যাতি যোগিরাট্ .. ২২..
চিদিহাস্তীতি চিন্মাত্রমিদং চিন্মযমেব চ .
চিত্ত্বং চিদহমেতে চ লোকাশ্চিদিতি ভাবয .. ২৩..
যতীনাং তদুপাদেযং পারহংস্যং পরং পদম্ .
নাতঃ পরতরং কিঞ্চিদ্বিদ্যতে মুনিপুঙ্গবঃ .. ২৪..
ইত্যুপনিষত্ ..
ॐ পূর্ণমদঃ পূর্ণমিদং পূর্ণাত্পূর্ণমুদচ্যতে .
পূর্ণস্য পূর্ণমাদায পূর্ণমেবাবশিষ্যতে ..
ॐ শান্তিঃ শান্তিঃ শান্তিঃ .. হরিঃ ॐ তত্সত্ ..
ইতি যাজ্ঞবল্ক্যোপনিষত্সমাপ্তা ..