জাবাল

.. জাবালোপনিষত্ ..
জাবালোপনিষত্খ্যাতং সংন্যাসজ্ঞানগোচরম্ .
বস্তুতস্ত্রৈপদং ব্রহ্ম স্বমাত্রমবশিষ্যতে ..
ॐ পূর্ণমদঃ পূর্ণমিদং পূর্ণাত্ পূর্ণমুদচ্যতে .
পূর্ণস্য পূর্ণমাদায পূর্ণমেবাবশিষ্যতে ..
ॐ   শান্তিঃ   শান্তিঃ   শান্তিঃ ..
ॐ বৃহস্পতিরুবাচ যাজ্ঞবল্ক্যং যদনু কুরুক্ষেত্রং
দেবানাং দেবযজনং সর্বেষাং ভূতানাং ব্রহ্মসদনম্ .
অবিমুক্তং বৈ কুরুক্ষেত্রং দেবানাং দেবযজনং সর্বেষাং
ভূতানাং ব্রহ্মসদনম্ .
তস্মাদ্যত্র ক্বচন গচ্ছতি তদেব মন্যেত তদবিমুক্তমেব .
ইদং বৈ কুরুক্ষেত্রং দেবানাং দেবযজনং সর্বেষাং
ভূতানাং ব্রহ্মসদনম্ ..
অত্র হি জন্তোঃ প্রাণেষূত্ক্রমমাণেষু রুদ্রস্তারকং ব্রহ্ম
ব্যাচষ্টে যেনাসাবমৃতী ভূত্বা মোক্ষী ভবতি
তস্মাদবিমুক্তমেব নিষেবেত অবিমুক্তং ন
বিমুঞ্চেদেবমেবৈতদ্যাজ্ঞবল্ক্যঃ .. ১..

অথ হৈনমত্রিঃ পপ্রচ্ছ যাজ্ঞবল্ক্যং য এষোঽনন্তোঽব্যক্ত
আত্মা তং কথমহং বিজানীযামিতি ..
স হোবাচ যাজ্ঞবল্ক্যঃ সোঽবিমুক্ত উপাস্যো য
এষোঽনন্তোঽব্যক্ত আত্মা সোঽবিমুক্তে প্রতিষ্ঠিত ইতি ..
সোঽবিমুক্তঃ কস্মিন্প্রতিষ্ঠিত ইতি . বরণাযাং নাশ্যাং চ
মধ্যে প্রতিষ্ঠিত ইতি ..
কা বৈ বরণা কা চ নাশীতি .
সর্বানিন্দ্রিযকৃতান্দোষান্বারযতীতি তেন বরণা ভবতি ..
সর্বানিন্দ্রিযকৃতান্পাপান্নাশযতীতি তেন নাশী ভবতীতি ..
কতমং চাস্য স্থানং ভবতীতি . ভ্রুবোর্ঘ্রাণস্য চ যঃ
সন্ধিঃ স এষ দ্যৌর্লোকস্য পরস্য চ সন্ধির্ভবতীতি . এতদ্বৈ
সন্ধিং সন্ধ্যাং ব্রহ্মবিদ উপাসত ইতি . সোঽবিমুক্ত উপাস্য ইতি
. সোঽবিমুক্তং জ্ঞানমাচষ্টে . যো বৈতদেবং বেদেতি .. ২..

অথ হৈনং ব্রহ্মচারিণ ঊচুঃ কিং জপ্যেনামৃতত্বং ব্রূহীতি ..
স হোবাচ যাজ্ঞবল্ক্যঃ . শতরুদ্রিযেণেত্যেতান্যেব হ বা
অমৃতস্য নামানি ..
এতৈর্হ বা অমৃতো ভবতীতি এবমেবৈতদ্যাজ্ঞবল্ক্যঃ .. ৩..

অথ হৈনং জনকো বৈদেহো যাজ্ঞবল্ক্যমুপসমেত্যোবাচ
ভগবন্সংন্যাসং ব্রূহীতি . স হোবাচ যাজ্ঞবল্ক্যঃ .
ব্রহ্মচর্যং পরিসমাপ্য গৃহী ভবেত্ . গৃহী ভূত্বা বনী
ভবেত্ . বনী ভূত্বা প্রব্রজেত্ . যদি বেতরথা
ব্রহ্মচর্যাদেব প্রব্রজেদ্গৃহাদ্বা বনাদ্বা ..
অথ পুনরব্রতী বা ব্রতী বা স্নাতকো বাঽস্নাতকো
বোত্সন্নগ্নিকো বা যদহরেব বিরজেত্তদহরেব প্রব্রজেত্ .
তদ্ধৈকে প্রাজাপত্যামেবেষ্টি, ন্ কুর্বন্তি . তদু তথা ন
কুর্যাদাগ্নেযীমেব কুর্যাত্ ..
অগ্নির্হ বৈ প্রাণঃ প্রাণমেব তথা করোতি ..
ত্রৈধাতবীযামেব কুর্যাত্ . এতযৈব ত্রযো ধাতবো যদুত
সত্ত্বং রজস্তম ইতি ..
অযং তে যোনিরৃত্বিজো যতো জাতঃ প্রাণাদরোচথাঃ . তং
প্রাণং জানন্নগ্ন আরোহাথা নো বর্ধয রযিম্ . ইত্যনেন
মন্ত্রেণাগ্নিমাজিঘ্রেত্ ..
এষ হ বা অগ্নের্যোনির্যঃ প্রাণঃ প্রাণং গচ্ছ
স্বাহেত্যেবমেবৈতদাহ ..
গ্রামাদগ্নিমাহৃত্য পূর্বদগ্নিমাঘ্রাপযেত্ ..
যদ্যগ্নিং ন বিন্দেদপ্সু জুহুযাত্ . আপো বৈ সর্বা দেবতাঃ
সর্বাভ্যো দেবতাভ্যো জুহোমি স্বাহেতি হুত্বোধৃত্য
প্রাশ্নীযাত্সাজ্যং হবিরনামযং মোক্ষমন্ত্রঃ ত্রয্যৈবং
বদেত্ . এতদ্ব্রহ্মৈতদুপাসিতব্যম্ . এবমেবৈতদ্ভগবন্নিতি বৈ
যাজ্ঞবল্ক্যঃ .. ৪..

অথ হৈনমত্রিঃ পপ্রচ্ছ যাজ্ঞবল্ক্যং পৃচ্ছামি ত্বা
যাজ্ঞবল্ক্য অযজ্ঞোপবীতি কথং ব্রাহ্মণ ইতি . স হোবাচ
যাজ্ঞবল্ক্যঃ . ইদমেবাস্য তদ্যজ্ঞোপবীতং য আত্মাপঃ
প্রাশ্যাচম্যাযং বিধিঃ পরিব্রাজকানাম্ . বীরাধ্বানে বা
অনাশকে বা অপাং প্রবেশে বা অগ্নিপ্রবেশে বা মহাপ্রস্থানে বা
. অথ পরিব্রাড্বিবর্ণবাসা মুণ্ডোঽপরিগ্রহঃ শুচিরদ্রোহী
ভৈক্ষণো ব্রহ্মভূযায ভবতীতি . যদ্যাতুরঃ স্যান্মনসা
বাচা সংন্যসেত্ . এষ পন্থা ব্রহ্মণা হানুবিত্তস্তেনৈতি
সংন্যাসী ব্রহ্মবিদিত্যেবমেবৈষ ভগবন্যাজ্ঞবল্ক্য .. ৫..

তত্র
পরমহংসানামসংবর্তকারুণিশ্বেতকেতুদুর্বাসঋভুনিদাঘজড
ভরতদত্তাত্রেযরৈবতক-
প্রভৃতযোঽব্যক্তলিঙ্গা অব্যক্তাচারা অনুন্মত্তা
উন্মত্তবদাচরন্তস্ত্রিদণ্ডং কমণ্ডলুং শিক্যং পাত্রং
জলপবিত্রং শিখাং যজ্ঞোপবীতং চ ইত্যেতত্সর্বং
ভূঃস্বাহেত্যপ্সু পরিত্যজ্যাত্মানমন্বিচ্ছেত্ ..
যথা জাতরূপধরো নির্গ্রন্থো নিষ্পরিগ্রহস্তত্তদ্ব্রহ্মমার্গে
সম্যক্সংপন্নঃ শুদ্ধমানসঃ প্রাণসন্ধারণার্থং
যথোক্তকালে বিমুক্তো ভৈক্ষমাচরন্নুদরপাত্রেণ
লাভালাভযোঃ সমো ভূত্বা
শূন্যাগারদেবগৃহতৃণকূটবল্মীকবৃক্ষমূলকুলালশালাগ্
নিহোত্রগৃহনদীপুলিনগিরিকুহরকন্দরকোটরনির্ঝরস্থণ্ডিলেষু
তেষ্বনিকেতবাস্য প্রযত্নো নির্মমঃ
শুক্লধ্যানপরাযণোঽধ্যাত্মনিষ্ঠোঽশুভকর্ম-
নির্মূলনপরঃ সংন্যাসেন দেহত্যাগং করোতি স পরমহংসো
নাম পরমহংসো নামেতি .. ৬..

ॐ পূর্ণমদ ইতি শাতিঃ ..

ইত্যথর্ববেদীযা জাবালোপনিষত্সমাপ্তা ..