অক্ষি

.. অক্ষ্যুপনিষত্ ..
যত্সপ্তভূমিকাবিদ্যাবেদ্যানন্দকলেবরম্ .
বিকলেবরকৈবল্যং রামচন্দ্রপদং ভজে ..
ॐ সহ নাববতু সহ নৌ ভুনক্তু
সহ বীর্যং করবাবহৈ .
তেজস্বিনাবধীতমস্তু মা বিদ্বিষাবহৈ ..
ॐ শান্তিঃ শান্তিঃ শান্তিঃ ..
হরিঃ ॐ ..
অথ হ সাংকৃতির্ভগবানাদিত্যলোকং জগাম .
তমাদিত্যং নত্বা চাক্ষুষ্মতীবিদ্যযা
তমস্তুবত্ . ॐ নমো ভগবতে শ্রীসূর্যা-
যাক্ষিতেজসে নমঃ . ॐ খেচরায নমঃ .
ॐ মহাসেনায নমঃ . ॐ তমসে নমঃ .
ॐ রজসে নমঃ . ॐ সত্ত্বায নমঃ .
ॐ অসতো মা সদ্গময . তমসো মা জ্যোতির্গময .
মৃত্যোর্মাঽমৃতং গময . হংসো ভগবা-
ঞ্ছুচিরূপঃ প্রতিরূপঃ . বিশ্বরূপং ঘৃণিনং
জাতবেদসং হিরণ্মযং জ্যোতীরূপং তপন্তম্ .
সহস্ররশ্মিঃ শতধা বর্তমানঃ পুরুষঃ
প্রজানামুদযত্যেষ সূর্যঃ . ॐ নমো
ভগবতে শ্রীসূর্যাযাদিত্যাযাক্ষিতেজসেঽহোবাহিনি
বাহিনি স্বাহেতি . এবং চাক্ষুষ্মতীবিদ্যযা স্তুতঃ
শ্রীসূর্যনারাযণঃ সুপ্রীতোঽব্রবীচ্চাক্ষুষ্মতী-
বিদ্যাং ব্রাহ্মণো যো নিত্যমধীতে ন তস্যাক্ষিরোগো
ভবতি . ন তস্য কুলেঽন্ধো ভবতি . অষ্টৌ
ব্রাহ্মণান্গ্রাহযিত্বাথ বিদ্যাসিদ্ধির্ভবতি .
য এবং বেদ স মহান্ভবতি .. ১..
অথ হ সাংকৃতিরাদিত্যং পপ্রচ্ছ ভগবন্-
ব্রহ্মবিদ্যাং মে ব্রূহীতি . তমাদিত্যো হোবাচ .
সাংকৃতে শৃণু বক্ষ্যামি তত্ত্বজ্ঞানং সুদুর্লভম্ .
যেন বিজ্ঞাতমাত্রেণ জীবন্মুক্তো ভবিষ্যসি ..১..
সর্বমেকমজং শান্তমনন্তং ধ্রুবমব্যযম্ .
পশ্যন্ভূতার্থচিদ্রূপং শান্ত আস্ব যথাসুখম্ .. ২..
অবেদনং বিদুর্যোগং চিত্তক্ষযমকৃত্রিমম্ .
যোগস্থঃ কুরু কর্মাণি নীরসো বাথ মা কুরু .. ৩..
বিরাগমুপযাত্যন্তর্বাসনাস্বনুবাসরম্ .
ক্রিযাসূদাররূপাসু ক্রমতে মোদতেঽন্বহম্ .. ৪..
গ্রাম্যাসু জডচেষ্টাসু সততং বিচিকিত্সতে .
নোদাহরতি মর্মাণি পুণ্যকর্মাণি সেবতে .. ৫..
অনন্যোদ্বেগকারীণি মৃদুকর্মাণি সেবতে .
পাপাদ্বিভেতি সততং ন চ ভোগমপেক্ষতে .. ৬..
স্নেহপ্রণযগর্ভাণি পেশলান্যুচিতানি চ .
দেশকালোপপন্নানি বচনান্যভিভাষতে .. ৭..
মনসা কর্মণা বাচা সজ্জনানুপসেবতে .
যতঃ কুতশ্চিদানীয নিত্যং শাস্ত্রাণ্যবেক্ষতে .. ৮..
তদাসৌ প্রথমামেকাং প্রাপ্তো ভবতি ভূমিকাম্ .
এবং বিচারবান্যঃ স্যাত্সংসারোত্তরণং প্রতি .. ৯..
স ভূমিকাবানিত্যুক্তঃ শেষস্ত্বার্য ইতি স্মৃতঃ .
বিচারনাম্নীমিতরামাগতো যোগভূমিকাম্ .. ১০..
শ্রুতিস্মৃতিসদাচারধারণাধ্যানকর্মণঃ .
মুখ্যযা ব্যাখ্যযাখ্যাতাঞ্ছ্রযতি শ্রেষ্ঠপণ্ডিতান্ .. ১১..
পদার্থপ্রবিভাগজ্ঞঃ কার্যাকার্যবিনির্ণযম্ .
জানাত্যধিগতশ্চান্যো গৃহং গৃহপতির্যথা .. ১২..
মদাভিমানমাত্সর্যলোভমোহাতিশাযিতাম্ .
বহিরপ্যাস্থিতামীষত্যজত্যহিরিব ত্বচম্ .. ১৩..
ইত্থংভূতমতিঃ শাস্ত্রগুরুসজ্জনসেবযা .
সরহস্যমশেষেণ যথাবদধিগচ্ছতি .. ১৪..
অসংসর্গাভিধামন্যাং তৃতীযাং যোগভূমিকাম্ .
ততঃ পতত্যসৌ কান্তঃ পুষ্পশয্যামিবামলাম্ .. ১৫..
যথাবচ্ছাস্ত্রবাক্যার্থে মতিমাধায নিশ্চলাম্ .
তাপসাশ্রমবিশ্রান্তৈরধ্যাত্মকথনক্রমৈঃ .
শিলাশয্যাসনাসীনো জরযত্যাযুরাততম্ .. ১৬..
বনাবনিবিহারেণ চিত্তোপশমশোভিনা .
অসঙ্গসুখসৌখ্যেন কালং নযতি নীতিমান্ .. ১৭..
অভ্যাসাত্সাধুশাস্ত্রাণাং করণাত্পুণ্যকর্মণাম্ .
জন্তোর্যথাবদেবেযং বস্তুদৃষ্টিঃ প্রসীদতি .. ১৮..
তৃতীযাং ভূমিকাং প্রাপ্য বুদ্ধোঽনুভবতি স্বযম্ .. ১৯..
দ্বিপ্রকারসংসর্গং তস্য ভেদমিমং শ্রুণু .
দ্বিবিধোঽযমসংসর্গঃ সামান্যঃ শ্রেষ্ঠ এব চ .. ২০..
নাহং কর্তা ন ভোক্তা চ ন বাধ্যো ন চ বাধকঃ .
ইত্যসংজনমর্থেষু সামান্যাসঙ্গনামকম্ .. ২১..
প্রাক্কর্মনির্মিতং সর্বমীশ্বরাধীনমেব বা .
সুখং বা যদি বা দুঃখং কৈবাত্র তব কর্তৃতা .. ২২..
ভোগাভোগা মহারোগাঃ সংপদঃ পরমাপদঃ .
বিযোগাযৈব সংযোগা আধযো ব্যাধযো ধিযাম্ .. ২৩..
কালশ্চ কলনোদ্যুক্তঃ সর্বভাবাননারতম্ .
অনাস্থযেতি ভাবানাং যদভাবনমান্তরম্ .
বাক্যার্থলব্ধমনসঃ সমান্যোঽসাবসঙ্গমঃ .. ২৪..
অনেন ক্রমযোগেন সংযোগেন মহাত্মনাম্ .
নাহং কর্তেশ্বরঃ কর্তা কর্ম বা প্রাক্তনং মম .. ২৫..
কৃত্বা দূরতরে নূনমিতি শব্দার্থভাবনম্ .
যন্মৌনমাসনং শান্তং তচ্ছ্রেষ্ঠাসঙ্গ উচ্যতে .. ২৬..
সন্তোষামোদমধুরা প্রথমোদেতি ভূমিকা .
ভূমিপ্রোদিতমাত্রোঽন্তরমৃতাঙ্কুরিকেব সা .. ২৭..
এষা হি পরিমৃষ্টান্তঃ সংন্যাসা প্রসবৈকভূঃ .
দ্বিতীযাং চ তৃতীযাং চ ভূমিকাং প্রাপ্নুযাত্ততঃ .. ২৮..
শ্রেষ্ঠা সর্বগতা হ্যেষা তৃতীযা ভূমিকাত্র হি .
ভবতি প্রোজ্ঝিতাশেষসংকল্পকলনঃ পুমান্ .. ২৯..
ভূমিকাত্রিতযাভ্যাসাদজ্ঞানে ক্ষযমাগতে .
সমং সর্বত্র পশ্যন্তি চতুর্থীং ভূমিকাং গতাঃ .. ৩০..
অদ্বৈতে স্থৈর্যমাযাতে দ্বৈতে চ প্রশমং গতে .
পশ্যন্তি স্বপ্নবল্লোকং চতুর্থীং ভূমিকাং গতাঃ .. ৩১..
ভূমিকাত্রিতযং জাগ্রচ্চতুর্থী স্বপ্ন উচ্যতে .. ৩২..
চিত্তং তু শরদভ্রাংশবিলযং প্রবিলীযতে .
সত্ত্বাবশেষ এবাস্তে পঞ্চমীং ভূমিকাং গতঃ .. ৩৩..
জগদ্বিকল্পো নোদেতি চিত্তস্যাত্র বিলাপনাত্ .
পঞ্চমীং ভূমিকামেত্য সুষুপ্তপদনামিকাম্ .
শান্তাশেষবিশেষাংশস্তিষ্ঠত্যদ্বৈতমাত্রকঃ .. ৩৪..
গলিতদ্বৈতনির্ভাসো মুদিতোঽতঃপ্রবোধবান্ .
সুষুপ্তমন এবাস্তে পঞ্চমীং ভূমিকাং গতঃ .. ৩৫..
অন্তর্মুখতযাতিষ্ঠন্বহির্বৃত্তিপরোঽপি সন্ .
পরিশ্রান্ততযা নিত্যং নিদ্রালুরিব লক্ষ্যতে .. ৩৬..
কুর্বন্নভ্যাসমেতস্যাং ভূমিকাযাং বিবাসনঃ .
ষষ্ঠীং তুর্যাভিধামন্যাং ক্রমাত্পততি ভূমিকাম্ .. ৩৭..
যত্র নাসন্নসদ্রূপো নাহং নাপ্যহংকৃতিঃ .
কেবলং ক্ষীণমননমাস্তেঽদ্বৈতেঽতিনির্ভযঃ .. ৩৮..
নির্গ্রন্থিঃ শান্তসন্দেহো জীবন্মুক্তো বিভাবনঃ .
অনির্বাণোঽপি নির্বাণশ্চিত্রদীপ ইব স্থিতঃ .. ৩৯..
ষষ্ঠ্যাং ভূমাবসৌ স্থিত্বা সপ্তমীং ভূমিমাপ্নুযাত্ .. ৪০..
বিদেহমুক্ততাত্রোক্তা সপ্তমী যোগভূমিকা .
অগম্যা বচসাং শান্তা সা সীমা সর্বভূমিষু .. ৪১..
লোকানুবর্তনং ত্যক্ত্বা ত্যক্ত্বা দেহানুবর্তনম্ .
শাস্ত্রানুবর্তনং ত্যক্ত্বা স্বাধ্যাসাপনযং কুরু .. ৪২..
ওঙ্কারমাত্রমখিলং বিশ্বপ্রাজ্ঞাদিলক্ষণম্ .
বাচ্যবাচ্যকতাভেদাভেদেনানুপলব্ধিতঃ .. ৪৩..
অকারমাত্রং বিশ্বঃ স্যাদুকারতৈজসঃ স্মৃতঃ .
প্রাজ্ঞো মকার ইত্যেবং পরিপশ্যেত্ক্রমেণ তু .. ৪৪..
সমাধিকালাত্প্রাগেব বিচিন্ত্যাতিপ্রযত্নতঃ .
স্থুলসূক্ষ্মক্রমাত্সর্বং চিদাত্মনি বিলাপযেত্ .. ৪৫..
চিদাত্মানং নিত্যশুদ্ধবুদ্ধমুক্তসদদ্বযঃ .
পরমানন্দসন্দেহো বাসুদেবোঽহওমিতি .. ৪৬..
আদিমধ্যাবসানেষু দুঃখং সর্বমিদং যতঃ .
তস্মাত্সর্বং পরিত্যজ্য তত্ত্বনিষ্ঠো ভবানঘ .. ৪৭..
অবিদ্যাতিমিরাতীতং সর্বাভাসবিবর্জিতম্ .
আনন্দমমলং শুদ্ধং মনোবাচামগোচরম্ .. ৪৮..
প্রজ্ঞানঘনমানন্দং ব্রহ্মাস্মীতি বিভাবযেত্ .. ৪৯..
ইত্যুপনিষত্ ..
ॐ সহ নাববতু . সহ নৌ ভুনক্তু . সহ বীর্যং করবাবহৈ .
তেজস্বিনাবধীতমস্তু মা বিদ্বিষাবহৈ ..
ॐ শান্তিঃ শান্তিঃ শান্তিঃ ..
হরিঃ ॐ তত্সত্ ..
ইত্যলক্ষ্যুপনিষত্ ..