কুণ্ডিকা

.. কুণ্ডিকোপনিষত্ ..
কুণ্ডিকোপনিষত্খ্যাতপরিব্রাজকসংততিঃ .
যত্র বিশ্রান্তিমগমত্তদ্রামপদমাশ্রযে ..
ॐ আপ্যাযন্তু মমাঙ্গানি বাক্প্রাণশ্চক্ষুঃ
শ্রোত্রমথো বলমিন্দ্রিযাণি চ .. সর্বাণি সর্বং
ব্রহ্মোপনিষদং মাহং ব্রহ্ম নিরাকুর্যাং
মা মা ব্রহ্ম নিরাকরোদনিরাকরণমস্ত্বনিরাকরণং
মেস্তু তদাত্মনি নিরতে য উপনিষত্সু ধর্মাস্তে মযি
সন্তু তে মযি সন্তু .. ॐ শান্তিঃ শান্তিঃ শান্তিঃ ..
হরিঃ ॐ
ব্রহ্মচর্যাশ্রমে ক্ষীণে গুরুশুশ্রূষণে  রতঃ .
বেদানধীত্যানুজ্ঞাত উচ্যতে গুরুণাশ্রমী .. ১..
দারমাহৃত্য সদৃশমগ্নিমাধায শক্তিতঃ .
ব্রাহ্মীমিষ্টিং যজেত্তাসামহোরাত্রেণ নির্বপেত্ .. ২..
সংবিভজ্য সুতানর্থে গ্রাম্যকামান্বিসৃজ্য চ .
সংচরন্বনমার্গেণ শুচৌ দেশে পরিভ্রমন্ .. ৩..
বাযুভক্ষোঽম্বুভক্ষো বা বিহিতৈঃ কন্দমূলকৈঃ .
স্বশরীরে সমাপ্যাথ পৃথিব্যাং নাশ্রু পাতযেত্ .. ৪..
সহ তেনৈব পুরুষঃ কথং সংন্যস্ত উচ্যতে .
সনামধেযো যস্মিংস্তু কথং সংন্যস্ত উচ্যতে .. ৫..
তস্মাত্ফলবিশুদ্ধাঙ্গী সংন্যাসং সংহিতাত্মনাম্ .
অগ্নিবর্ণং বিনিষ্ক্রম্য বানপ্রস্থং প্রপদ্যতে .. ৬..
লোকবদ্ভার্যযাসক্তো বনং গচ্ছতি সংযতঃ .
সংত্যক্ত্বা সংসৃতিসুখমনুতিষ্ঠতি কিং মুধা .. ৭..
কিংবা দুঃখমনুস্মৃত্য ভোগাংস্ত্যজতি চোচ্ছ্রিতান্ .
গর্ভবাসভযাদ্ভীতঃ শীতোষ্ণাভ্যাং তথৈব চ .. ৮..
গুহ্যং প্রবেষ্টুমিচ্ছামি পরং পদমনামযমিতি .
সংন্যস্যাগ্নিমপুনরাবর্তনং যন্মৃত্যুর্জাযমাবহমিতি ..
অথাধ্যাত্মমন্ত্রাঞ্জপেত্ . দীক্ষামুপেযাত্কাষাযবাসাঃ .
কক্ষোপস্থলোমানি বর্জযেত্ . ঊর্ধ্ববাহুর্বিমুক্তমার্গো ভবতি .
অনিকেতশ্চরেভিক্ষাশী . নিদিধ্যাসনং দধ্যাত্ . পবিত্রং
ধারযেজ্জন্তুসংরক্ষণার্থম্ . তদপি শ্লোকা বহ্বন্তি .
কুণ্ডিকাং চমকং শিক্যং ত্রিবিষ্টপমুপানহৌ .
শীতোপঘাতিনীং কন্যাং কৌপীনাচ্ছাদনং তথা .. ৯..
পবিত্রং স্নানশাটীং চ উত্তরাসঙ্গমেব চ .
অতোঽতিরিক্তং যত্কিংচিত্সর্বং তদ্বর্জযেদ্যতিঃ .. ১০..
নদীপুলিনশাযী স্যাদ্দেবাগারেষু বাহ্যতঃ .
নাত্যর্থং সুখদুঃখাভ্যাং শরীরমুপতাপযেত্ .. ১১..
স্নানং পানং তথা শৌচমদ্ভিঃ পূতাভিরাচিরেত্ .
স্তূযমানো ন তুষ্যেত নিন্দিতো ন শপেত্পরান্ .. ১২..
ভিক্ষাদিবৈদলং পাত্রং স্নানদ্রব্যমবারিতম্ .
এবং বৃত্তিমুপাসীনো যতেন্দ্রিযো জপেত্সদা .. ১৩..
বিশ্বায মনুসংযোগং মনসা ভাবযেত্সুধীঃ .
আকাশাদ্বাযুর্বাযোর্জ্যোতির্জ্যোতিষ আপোঽদ্ভ্যঃ পৃথিবী .
এষাং ভূতানাং ব্রহ্ম প্রপদ্যে . অজরমমরমক্ষরমব্যযং প্রপদ্যে .
ময্যখণ্ডসুখাংভোধৌ বহুধা বিশ্ববীচযঃ .
উত্পদ্যন্তে বিলীযন্তে মাযামারুতবিভ্রমাত্ .. ১৪..
ন মে দেহেন সংবন্ধো মেঘেনেব বিহাযসঃ .
অতঃ কুতো মে তদ্ধর্মা জাগ্রত্স্বপ্নসুষুপ্তিষু .. ১৫..
আকাশবত্কল্পবিদূরগোহ-
     মাদিত্যবদ্ভাস্যবিলক্ষণোঽহম্ .
অহার্যবন্নিত্যবিনিশ্চলোঽহ-
     মম্বোধিবত্পারবিবর্জিতোঽহম্ .. ১৬..
নারাযণোঽহং নরকান্তকোঽহং
     পুরান্তকোঽহং পুরুষোঽহমীশঃ .
অখণ্ডবোধোঽহমশেষসাক্ষী
     নিরীশ্বরোঽহং নিরহং চ নির্মমঃ .. ১৭..
তদভ্যাসেন প্রাণাপানৌ সংযম্য তত্র শ্লোকা ভবন্তি ..
বৃষণাপানযোর্মধ্যে পাণী আস্থায সংশ্রযেত্ .
সংদশ্য শনকৈর্জিহ্বাং যবমাত্রে বিনির্গতাম্ .. ১৮..
মাষমাত্রাং তথা দৃষ্টিং শ্রোত্রে স্থাপ্য তথা ভুবি .
শ্রবণে নাসিকে গন্ধা যতঃ স্বং ন চ সংশ্রযেত্ .. ১৯..
অথ শৈবপদং যত্র তদ্ব্রহ্ম ব্রহ্ম তত্পরম্ .
তদভ্যাসেন লভ্যেত পূর্বজন্মার্জিতাত্মনাম্ .. ২০..
সংভূতৈর্বাযুসংশ্রাবৈর্হৃদযং তপ উচ্যতে .
ঊর্ধ্বং প্রপদ্যতে দেহাদ্ভিত্ত্বা মূর্ধানমব্যযম্ .. ২১..
স্বদেহস্য তু মূর্ধানং যে প্রাপ্য পরমাং গতিম্ .
ভূযস্তে ন নিবর্তন্তে পরাবরবিদো জনাঃ .. ২২..
ন সাক্ষিণং সাক্ষ্যধর্মাঃ সংস্পৃশন্তি বিলক্ষণম্ .
অবিকারমুদাসীনং গৃহধর্মাঃ প্রদীপবত্ .. ২৩..
জলে বাপি স্থলে বাপি লুঠত্বেষ জডাত্মকঃ .
নাহং বিলিপ্যে তদ্ধর্মৈর্ঘটধর্মৈর্নভো যথা .. ২৪..
নিষ্ক্রিযোঽস্ম্যবিকারোঽস্মি নিষ্কলোঽস্মি নিরাকৃতিঃ .
নির্বিকল্পোঽস্মি নিত্যোঽস্মি নিরালম্বোঽস্মি নির্দ্বযঃ .. ২৫..
সর্বাত্মকোঽহং সর্বোঽহং সর্বাতীতোঽহমদ্বযঃ .
কেবলাখণ্ডবোধোঽহং স্বানন্দোঽহং নিরন্তরঃ .. ২৬..
স্বমেব সর্বতঃ পশ্যন্মন্যমানঃ স্বমদ্বযম্ .
স্বানন্দমনুভুঞ্জানো নির্বিকল্পো ভবাম্যহম্ .. ২৭..
গচ্ছংস্তিষ্ঠন্নুপবিশঞ্ছযানো বান্যথাপি বা .
যথেচ্ছযা বসেদ্বিদ্বানাত্মারামঃ সদা মুনিঃ .. ২৮.. ইত্যুপনিষত্ ..
ॐ আপ্যাযন্তু মমাঙ্গানি বাক্প্রাণশ্চক্ষুঃ
শ্রোত্রমথো বলমিন্দ্রিযাণি চ .. সর্বাণি সর্বং
ব্রহ্মোপনিষদং মাহং ব্রহ্ম নিরাকুর্যাং
মা মা ব্রহ্ম নিরাকরোদনিরাকরণমস্ত্বনিরাকরণং
মেস্তু তদাত্মনি নিরতে য উপনিষত্সু ধর্মাস্তে মযি
সন্তু তে মযি সন্তু .. ॐ শান্তিঃ শান্তিঃ শান্তিঃ ..
হরিঃ ॐ তত্সত্ ..
ইতি কুণ্ডিকোপনিষত্সমাপ্তা ..