.. নির্বাণোপনিষত্ ..

.. নির্বাণোপনিষত্ ..
( ঋগ্বেদীয সংন্যাসোপনিষত্)

নির্বাণোপনিষদ্বেদ্যং নির্বাণানন্দতুন্দিলম্ .
ত্রৈপদানন্দসাম্রাজ্যং স্বমাত্রমিতি চিন্তযেত্ ..

ॐ বাঙ্মে মনসি প্রতিষ্ঠিতা . মনো মে বাচি প্রতিষ্ঠিতম্ .
আবিরাবীর্ম এধি . বেদস্য মা আণীস্থঃ .
শ্রুতং মে মা প্রহাসীঃ . অনেনাধীতেনাহোরাত্রান্সন্দধামি .
ঋতং বদিষ্যামি . সত্যং বদিষ্যামি .
তন্মামবতু . তদ্বক্তারমবতু .
অবতু মামবতু বক্তারম্ .
ॐ শান্তিঃ শান্তিঃ শান্তিঃ ..

অথ নির্বাণোপনিষদং ব্যাখ্যাস্যামঃ .
পরমহংসঃ সোঽহম্ . পরিব্রাজকাঃ পশ্চিমলিঙ্গাঃ .
মন্মথ ক্ষেত্রপালাঃ . গগনসিদ্ধান্তঃ অমৃতকল্লোলনদী .
অক্ষযং নিরঞ্জনম্ . নিঃসংশয ঋষিঃ .
নির্বাণোদেবতা . নিষ্কুলপ্রবৃত্তিঃ . নিষ্কেবলজ্ঞানম্ .
ঊর্ধ্বাম্নাযঃ . নিরালম্ব পীঠঃ . সংযোগদীক্ষা .
বিযোগোপদেশঃ . দীক্ষাসন্তোষপানং চ .
দ্বাদশাবদিত্যাবলোকনম্ . বিবেকরক্ষা .
করুণৈব কেলিঃ . আনন্দমালা .
একান্তগুহাযাং মুক্তাসনসুখগোষ্টী . অকল্পিতভিক্ষাশী .
হংসাচারঃ .সর্বভূতান্তর্বর্তী হংস ইতি প্রতিপাদনম্ .
ধৈর্যকন্থা . উদাসীন কৌপীনম্ . বিচারদণ্ডঃ .
ব্রহ্মাবলোকযোগপট্টঃ .শ্রিযাং পাদুকা . পরেচ্ছাচরণম্ .
কুণ্ডলিনীবন্ধঃ . পরাপবাদমুক্তো জীবন্মুক্তঃ .
শিবযোগনিদ্রা চ . খেচরীমুদ্রা চ . পরমানন্দী .
নির্গতগুণত্রযম্ . বিবেকলভ্যং মনোবাগগোচরম্ .
অনিত্যং জগদ্যজ্জনিতং স্বপ্নজগদভ্রগজাদিতুল্যম্ .
তথা দেহাদিসঙ্ঘাতং মোহগুণজালকলিতং তদ্রজ্জুসর্পবত্কল্পিতম্ . বিষ্ণুবিধ্যাদিশতাভিধানলক্ষ্যম্ .
অঙ্কুশো মার্গঃ . শূন্যং ন সঙ্কেতঃ .
পরমেশ্বরসত্তা . সত্যসিদ্ধযোগো মঠঃ .
অমরপদং তত্স্বরূপম্ .
আদিব্রহ্মস্বসংবিত্ . অজপা গাযত্রী . বিকারদণ্ডো ধ্যেযঃ .
মনোনিরোধিনী কন্থা . যোগেন সদানন্দস্বরূপদর্শনম্ .
আনন্দ ভিক্ষাশী . মহাশ্মশানেঽপ্যানন্দবনে বাসঃ .
একান্তস্থানম্ . আনন্দমঠম্ . উন্মন্যবস্থা .
শারদা চেষ্টা . উন্মনী গতিঃ . নির্মলগাত্রম্ .
নিরালম্বপীঠম্ . অমৃতকল্লোলানন্দক্রিযা .
পাণ্ডরগগনম্ . মহাসিদ্ধান্তঃ .
শমদমাদিদিব্যশক্ত্যাচরণে ক্ষেত্রপাত্রপটুতা .
পরাবরসংযোগঃ . তারকোপদেশাঃ . অদ্বৈতসদানন্দো দেবতা .
নিযমঃ স্বাতরিন্দ্রিযনিগ্রহঃ .
ভযমোহশোকক্রোধত্যাগস্ত্যাগঃ . অনিযামকত্বনির্মলশক্তিঃ .
স্বপ্রকাশব্রহ্মতত্ত্বে শিবশক্তিসম্পুটিত প্রপঞ্চচ্ছেদনম্ .
তথা পত্রাক্ষাক্ষিকমণ্ডলুঃ .
ভবাভাবদহনম্ . বিভ্রত্যাকাশাধারম্ .
শিবং তুরীযং যজ্ঞোপবীতম্ . তন্মযা শিখা .
চিন্মযং চোত্সৃষ্টিদণ্ডম্ . সন্ততাক্ষিকমণ্ডলুম্ .
কর্মনির্মূলনং কন্থা . মাযামমতাহঙ্কারদহনম্ .
স্প্রশানে অনাহতাঙ্গী . নিস্ত্রৈগুণ্যস্বরূপানুসন্ধানং সমযম্ .
ভ্রান্তিহরণম্ . কামাদিবৃত্তিদহনম্ . কাঠিন্যদৃঢকৌপীনম্ . চীরাজিনবাসঃ . অনাহতমন্ত্রঃ . অক্রিযযৈব জুষ্টম্ .
স্বেচ্ছাচারস্বস্বভাবো মোক্ষঃ পরং ব্রহ্ম .
প্লববদাচরণম্ . ব্রহ্মচর্যশান্তিসংগ্রহণম্ .
ব্রহ্মচর্যাশ্রমেঽধীত্য সসর্বসংবিন্ন্যাসং সংন্যাসম্ .
অন্তে ব্রহ্মাখণ্ডাকারম্ . নিত্যং সর্বসন্দেহনাশনম্ .
এতন্নির্বাণদর্শনম্ .
শিষ্যং পুত্রং বিনা ন দেযমিত্যুপনিষত্ .
ॐ বাঙ্মে মনসীতি শান্তিঃ ..
ইতি নির্বাণোপনিষত্সমাপ্তা .