সিতা

.. সীতোপনিষত্ ..

ইচ্ছাজ্ঞানক্রিযাশক্তিত্রযং যদ্ভাবসাধনম্ .
তদ্ব্রহ্মসত্তাসামান্যং সীতাতত্ত্বমুপাস্মহে ..
ॐ ভদ্রং কর্ণেভিঃ শ্রুণুযাম দেবাঃ .
ভদ্রং পশ্যেমাক্ষভির্যজত্রাঃ .
স্থিরৈরঙ্গৈস্তুষ্টুবাঁসস্তনূভিঃ .
ব্যশেম দেবহিতং যদাযুঃ .
স্বস্তি ন ইন্দ্রো বৃদ্ধশ্রবাঃ . স্বস্তি নঃ পূষা বিশ্ববেদাঃ .
স্বস্তি নস্তার্ক্ষ্যো অরিষ্টনেমিঃ . স্বস্তি নো বৃহস্পতির্দধাতু .
ॐ শান্তিঃ শান্তিঃ শান্তিঃ ..
দেবা হ বৈ প্রজাপতিমব্রুবন্কা সীতা কিং রূপমিতি .
স হোবাচ প্রজাপতিঃ সা সীতেতি . মূলপ্রকৃতিরূপত্বাত্সা
সীতা প্রকৃতিঃ স্মৃতা . প্রণবপ্রকৃতিরূপত্বাত্সা সীতা
প্রকৃতিরুচ্যতে . সীতা ইতি ত্রিবর্ণাত্মা সাক্ষান্মাযামযী
ভবেত্ . বিষ্ণুঃ প্রপঞ্চবীজং চ মাযা ঈকার উচ্যতে .
সকারঃ সত্যমমৃতং প্রাপ্তিঃ সোমশ্চ কীর্ত্যতে .
তকারস্তারলক্ষ্ম্যা চ বৈরাজঃ প্রস্তরঃ স্মৃতঃ .
ঈকাররূপিণী সোমামৃতাবযবদিব্যালঙ্কারস্রঙ্মৌক্তিকা-
দ্যাভরণলঙ্কৃতা মহামাযাঽব্যক্তরূপিণী ব্যক্তা ভবতি .
প্রথমা শব্দব্রহ্মমযী স্বাধ্যাযকালে প্রসন্না
উদ্ভাবনকরী সাত্মিকা দ্বিতীযা ভূতলে হলাগ্রে সমুত্পন্না
তৃতীযা ঈকাররূপিণী অব্যক্তস্বরূপা ভবতীতি সীতা
ইত্যুদাহরন্তি . শৌনকীযে . শ্রীরামসান্নিধ্যবশা-
জ্জগদানন্দকারিণী . উত্পত্তিস্থিতিসংহারকারিণী সর্বদেহিনাম্ .
সীতা ভগবতী জ্ঞেযা মূলপ্রকৃতিসংজ্ঞিতা . প্রণবত্বা-
ত্প্রকৃরিতি বদন্তি ব্রহ্মবাদিন ইতি . অথাতো ব্রহ্মজিজ্ঞাসেতি চ .
সা সর্ববেদমযী সর্বদেবমযী সর্বলোকমযী সর্বকীর্তিমযী
সর্বধর্মমযী সর্বাধারকার্যকারণমযী মহালক্ষ্মী-
র্দেবেশস্য ভিন্নাভিন্নরূপা চেতনাচেতনাত্মিকা
ব্রহ্মস্থাবরাত্মা তদ্গুণকর্মবিভাগভেদাচ্ছরীরূপা
দেবর্ষিমনুষ্যগন্ধর্বরূপা অসুররাক্ষসভূতপ্রেত-
পিশাচভূতাদিভূতশরীরূপা ভূতেন্দ্রিযমনঃপ্রাণরূপেতি
চ বিজ্ঞাযতে .
সা দেবী ত্রিবিধা ভবতি শক্ত্যাসনা ইচ্ছাশক্তিঃ
ক্রিযাশক্তিঃ সাক্ষাচ্ছক্তিরিতি . ইচ্ছাশক্তিস্ত্রিবিধা
ভবতি . শ্রীভূমিনীলাত্মিকা ভদ্ররূপিণী প্রভাবরূপিণী
সোমসূর্যাগ্নিরূপা ভবতি . সোমাত্মিকা ওষধীনাং
প্রভবতি কল্পবৃক্ষপুষ্পফললতাগুল্মাত্মিকা
ঔষধভেষজাত্মিকা অমৃতরূপা দেবানাং মহস্তোম-
ফলপ্রদা অমৃতেন তৃপ্তিং জনযন্তী দেবানামন্নেন
পশূনাং তৃণেন তত্তজ্জীবানাং সূর্যাদিসকলভুবন-
প্রকাশিনী দিবা চ রাত্রিঃ কালকলানিমেষমারভ্য
ঘটিকাষ্টযামদিবস(বার)রাত্রিভেদেন
পক্ষমাসর্ত্বযনসংবত্সরভেদেন মনুষ্যাণাং
শতাযুঃকল্পনযা প্রকাশমানা চিরক্ষিপ্রব্যপদেশেন
নিমেষমারভ্য পরার্ধপর্যন্তং কালচক্রং
জগচ্চক্রমিত্যাদিপ্রকারেণ চক্রবত্পরিবর্তমানাঃ
সর্বস্যৈতস্যৈব কালস্য বিভাগবিশেষাঃ প্রকাশরূপাঃ
কালরূপা ভবন্তি . অগ্নিরূপা অন্নপানাদিপ্রাণিনাং
ক্ষুত্তৃষ্ণাত্মিকা দেবানাং মুখরূপা বনৌষধীনাং
শীতোষ্ণরূপা কাষ্ঠেষ্বন্তর্বহিশ্চ নিত্যানিত্যরূপা
ভবতি . শ্রীদেবী ত্রিবিধং রূপং কৃত্বা ভগবত্সঙ্কল্পানু-
গুণ্যেন লোকরক্ষণার্থং রূপং ধারযতি . শ্রীরিতি লক্ষ্মীরিতি
লক্ষ্যমাণা ভবতীতি বিজ্ঞাযতে . ভূদেবী সসাগরাংভঃ-
সপ্তদ্বীপা বসুন্ধরা ভূরাদিচতুর্দশভুবনানা-
মাধারাধেযা প্রণবাত্মিকা ভবতি . নীলা চ মুখ-
বিদ্যুন্মালিনী সর্বৌষধীনাং সর্বপ্রাণিনাং পোষণার্থং
সর্বরূপা ভবতি . সমস্তভুবনস্যাধোভাগে জলাকারাত্মিকা
মণ্ডূকমযেতি ভুবনাধারেতি বিজ্ঞাযতে ..
ক্রিযাশক্তিস্বরূপং হরের্মুখান্নাদঃ . তন্নাদাদ্বিন্দুঃ .
বিন্দোরোঙ্কারঃ . ওঙ্কারাত্পরতো রাম বৈখানসপর্বতঃ .
তত্পর্বতে কর্মজ্ঞানমযীভির্বহুশাখা ভবন্তি . তত্র
ত্রযীমযং শাস্ত্রমাদ্যং সর্বার্থদর্শনম্ .
ঋগ্যজুঃসামরূপত্বাত্ত্রযীতি পরিকীর্তিতা . কার্যসিদ্ধেন চতুর্ধা
পরিকীর্তিতা . ঋচো যজূংষি সামানি অথর্বাঙ্গিরসস্তথা .
চাতুর্হোত্রপ্রধানত্বাল্লিঙ্গাদিত্রিতযং ত্রযী . অথর্বাঙ্গিরসং
রূপং সামঋগ্যজুরাত্মকম্ . তথা দিশন্ত্যাভিচার-
সামান্যেন পৃথক্পৃথক্ . একবিংশতিশাখাযামৃগ্বেদঃ
পরিকীর্তিতঃ . শতং চ নবশাখাসু যজুষামেব জন্মনাম্ .
সাম্নঃ সহস্রশাখাঃ স্যুঃ পঞ্চশাখা অথর্বণঃ .
বৈখানসমতস্তস্মিন্নাদৌ প্রত্যক্ষদর্শনম্ . স্মর্যতে
মুনিভির্নিত্যং বৈখানসমতঃ পরম্ . কল্পো ব্যাকরণং শিক্ষা
নিরুক্তং জ্যোতিষং ছন্দ এতানি ষডঙ্গানি ..
উপাঙ্গমযনং চৈব মীমাংসান্যাযবিস্তরঃ .
ধর্মজ্ঞসেবিতার্থং চ বেদবেদোঽধিকং তথা .
নিবন্ধাঃ সর্বশাখা চ সমযাচারসঙ্গতিঃ .
ধর্মশাস্ত্রং মহর্ষিণামন্তঃকরণসম্ভৃতম্ .
ইতিহাসপুরাণাখ্যমুপাঙ্গং চ প্রকীর্তিতম্ .
বাস্তুবেদো ধনুর্বেদো গান্ধর্বশ্চ তথা মুনে .
আযুর্বেদশ্চ পঞ্চৈতে উপবেদাঃ প্রকীর্তিতাঃ .
দণ্ডো নীতিশ্চ বার্তা চ বিদ্যা বাযুজযঃ পরঃ .
একবিংশতিভেদোঽযং স্বপ্রকাশঃ প্রকীর্তিতঃ .
বৈখানসঋষেঃ পূর্বং বিষ্ণোর্বাণী সমুদ্ভবেত্ .
ত্রযীরূপেণ সঙ্কল্প্য বৈখানসঋষেঃ পুরা .
উদিতো যাদৃশঃ পূর্বং তাদৃশং শৃণু মেঽখিলম্ .
শশ্বদ্ব্রহ্মমযং রূপং ক্রিযাশক্তিরুদাহৃতা .
সাক্ষাচ্ছক্তির্ভগবতঃ স্মরণমাত্ররূপাবির্ভাব-
প্রাদুর্ভাবাত্মিকা নিগ্রহানুগ্রহরূপা ভগবত্সহচারিণী
অনপাযিনী অনবরতসহাশ্রযিণী উদিতানুদিতাকারা
নিমেষোন্মেষসৃষ্টিস্থিতিসংহারতিরোধানানুগ্রহাদি-
সর্বশক্তিসামর্থ্যাত্সাক্ষাচ্ছক্তিরিতি গীযতে .
ইচ্ছাশক্তিস্ত্রিবিধা প্রলযাবস্থাযাং বিশ্রমণার্থং
ভগবতো দক্ষিণবক্ষঃস্থলে শ্রীবত্সাকৃতির্ভূত্বা
বিশ্রাম্যতীতি সা যোগশক্তিঃ . ভোগশক্তির্ভোগরূপা
কল্পবৃক্ষকামধেনুচিন্তামণিশঙ্খপদ্ম-
নিধ্যাদিনবনিধিসমাশ্রিতা ভগবদুপাসকানাং
কামনযা অকামনযা বা ভক্তিযুক্তা নরং
নিত্যনৈমিত্তিককর্মভিরগ্নিহোত্রাদিভির্বা যমনিযমাসন-
প্রাণাযামপ্রত্যাহারধ্যানধারণাসমাধিভি-
র্বালমণন্বপি গোপুরপ্রাকারাদিভির্বিমানাদিভিঃ সহ
ভগবদ্বিগ্রহার্চাপূজোপকরণৈরর্চনৈঃ স্নানাধিপর্বা
পিতৃপূজাদিভিরন্নপানাদিভির্বা ভগবত্প্রীত্যর্থমুক্ত্বা
সর্বং ক্রিযতে . অথাতো বীরশক্তিশ্চতুর্ভুজাঽভযবরদ-
পদ্মধরা কিরীটাভরণযুতা সর্বদেবৈঃ পরিবৃতা
কল্পতরুমূলে চতুর্ভির্গজৈ রত্নঘটৈরমৃতজলৈ-
রভিষিচ্যমানা সর্বদৈবতৈর্ব্রহ্মাদিভির্বন্দ্যমানা
অণিমাদ্যষ্টৈশ্বর্যযুতা সংমুখে কামধেনুনা
স্তূযমানা বেদশাস্ত্রাদিভিঃ স্তূযমানা জযাদ্যপ্সর-
স্স্ত্রীভিঃ পরিচর্যমাণা আদিত্যসোমাভ্যাং দীপাভ্যাং
প্রকাশ্যমানা তুম্বুরুনারদাদিভির্গাযমানা
রাকাসিনীবালীভ্যাং ছত্রেণ হ্লাদিনীমাযাভ্যাং চামরেণ
স্বাহাস্বধাভ্যাং ব্যজনেন ভৃগুপুণাদিভিরভ্যর্চ্যমানা
দেবী দিব্যসিংহাসনে পদ্মাসনরূঢা সকলকারণকার্যকরী
লক্ষ্মীর্দেবস্য পৃথগ্ভবনকল্পনা . অলংচকার স্থিরা
প্রসন্নলোচনা সর্বদেবতৈঃ পূজ্যমানা বীরলক্ষ্মীরিতি
বিজ্ঞাযত ইত্যুপনিষত্ ..
ॐ ভদ্রং কর্ণেভিঃ শৃণুযাম দেবাঃ .
ভদ্রং পশ্যেমাক্ষভির্যজত্রাঃ .
স্থিরৈরঙ্গৈস্তুষ্টুবাঁসস্তনূভিঃ .
ব্যশেম দেবহিতং যদাযুঃ .
স্বস্তি ন ইন্দ্রো বৃদ্ধশ্রবাঃ . স্বস্তি নঃ পূষা বিশ্ববেদাঃ .
স্বস্তি নস্তার্ক্ষ্যো অরিষ্টনেমিঃ . স্বস্তি নো বৃহস্পতির্দধাতু ..
ॐ শান্তিঃ শান্তিঃ শান্তিঃ ..
ইতি সীতোপনিষত্সমাপ্তা ..