অথর্বশিখা

.. অথর্বশিখোপনিষত্ ..     ২৩ ..
ওঙ্কারার্থতযা ভাতং তুর্যোঙ্কারাগ্রভাসুরম্ .
তুর্যতুর্যংত্রিপাদ্রামং স্বমাত্রং কলযেঽন্বহম্ ..
ॐ ভদ্রং কর্ণেভিঃ শৃণুযাম দেবাঃ . ভদ্রং পশ্যেমাক্ষভির্যজত্রাঃ .
স্থিরৈরঙ্গৈস্তুষ্টুবাঁসস্তনূভির্ব্যশেম দেবহিতং যদাযুঃ .
স্বস্তি ন ইন্দ্রো বৃদ্ধশ্রবাঃ . স্বস্তি নঃ পূষা বিশ্ববেদাঃ .
স্বস্তি নস্তার্ক্ষ্যো অরিষ্টনেমিঃ . স্বস্তি নো বৃহস্পতির্দধাতু ..
ॐ   শান্তিঃ   শান্তিঃ   শান্তিঃ ..
ॐ অথ হৈনং পৈপ্পলাদোঽঙ্গিরাঃ সনত্কুমারশ্চাথর্বণমুবাচ ভগবন্কিমাদৌ প্রযুক্তং ধ্যানং ধ্যাযিতব্যং কিং তদ্ধ্যানং কো বা ধ্যাতা কশ্চ ধ্যেযঃ .
স এভ্যোথর্বা প্রত্যুবাচ .
ওমিত্যেতদক্ষরমাদৌ প্রযুক্তং ধ্যানং ধ্যাযিতব্যমিত্যেতদক্ষরং পরং ব্রহ্মাস্য পাদাশ্চত্বারো বেদাশ্চতুষ্পাদিদমক্ষরং পরং ব্রহ্ম .
পূর্বাস্য মাত্রা পৃথিব্যকারঃ ঋগ্ভিরৃগ্বেদো ব্রহ্মা বসবো গাযত্রী গার্হপত্যঃ .
দ্বিতীযান্তরিক্ষং স উকারঃ স যজুভির্যজুর্বেদো বিষ্ণুরুদ্রাস্ত্রিষ্টুব্দক্ষিণাগ্নিঃ .
তৃতীযঃ দ্যৌঃ স মকারঃ স সামভিঃ সামবেদো রুদ্রা আদিত্যা জগত্যাহবনীযঃ .
যাবসানেঽস্য চতুর্থ্যর্ধমাত্রা সা সোমলোক ওঙ্কারঃ সাথর্বণমন্ত্রৈরথর্ববেদঃ সংবর্তকোঽগ্নির্মরুতো বিরাডেকর্ষির্ভাস্বতী স্মৃতা .
প্রথমা রক্তপীতা মহদ্ব্রহ্ম দৈবত্যা .
দ্বিতীযা বিদ্যুমতী কৃষ্ণা বিষ্ণুদৈবত্যা .
তৃতীযা শুভাশুভা শুক্লা রুদ্রদৈবত্যা .
যাবাসানেঽস্য চতুর্থ্যর্ধমাত্রা সা বিদ্যুমতী সর্ববর্ণা পুরুষদৈবত্যা .
স এষ হ্যোঙ্কারশ্চতুরক্ষরশ্চতুষ্পাদশ্চতুঃশিরশ্চতুর্থমাত্রঃ স্থূলমেতদ্হ্রস্বদীর্ঘপ্লুত ইতি ..
ॐ ॐ ॐ ইতি ত্রিরুক্ত্বা চতুর্থঃ শান্ত আত্মাপ্লুতপ্রণবপ্রযোগেণ সমস্তমোমিতি প্রযুক্ত আত্মজ্যোতিঃ সকৃদাবর্ততে সকৃদুচ্চারিতমাত্রঃ স এষ ঊর্ধ্বমন্নমযতীত্যোঙ্কারঃ .
প্রাণান্সর্বান্প্রলীযত ইতি প্রলযঃ .
প্রাণান্সর্বান্পরমাত্মনি প্রণানযতীত্যেতস্মাত্প্রণবঃ .
চতুর্থাবস্থিত ইতি সর্বদেববেদযোনিঃ সর্ববাচ্যবস্তু প্রণবাত্মকম্ .. ১..
দেবাশ্চেতি সংধত্তাং সর্বেভ্যো দুঃখভযেভ্যঃ সংতারযতীতি তারণাত্তারঃ . সর্বে দেবাঃ সংবিশন্তীতি বিষ্ণুঃ . সর্বাণি বৃহযতীতি ব্রহ্মা . সর্বেভ্যোঽন্তস্থানেভ্যো ধ্যেযেভ্যঃ প্রদীপবত্প্রকাশযতীতি প্রকাশঃ . প্রকাশেভ্যঃ সদোমিত্যন্তঃ শরীরে বিদ্যুদ্বদ্দ্যোতযতি মুহুর্মুহুরিতি বিদ্যুদ্বত্প্রতীযাদ্দিশং দিশং ভিত্ত্বা সর্বাংল্লোকান্ব্যাপ্নোতি ব্যাপযতীতি ব্যাপনাদ্ব্যাপী মহাদেবঃ .. ২..
পূর্বাস্য মাত্রা জাগর্তি জাগরিতং দ্বিতীযা স্বপ্নং তৃতীযা সুষুপ্তিশ্চতুর্থী তুরীযং মাত্রা মাত্রাঃ প্রতিমাত্রাগতাঃ সম্যক্সমস্তানপি পাদাঞ্জযতীতি স্বযংপ্রকাশঃ স্বযং ব্রহ্ম ভবতীত্যেষ সিদ্ধিকর এতস্মাদ্ধ্যানাদৌ প্রযুজ্যতে . সর্ব করণোপসংহারত্বাদ্ধার্যধারণাদ্ব্রহ্ম তুরীযম্ . সর্বকরণানি মনসি সংপ্রতিষ্ঠাপ্য ধ্যানং বিষ্ণুঃ প্রাণং মনসি সহ করণৈঃ সংপ্রতিষ্ঠাপ্য ধ্যাতা রুদ্রঃ প্রাণং মনসি সহকরণৈর্নাদান্তে পরমাত্মনি সংপ্রতিষ্ঠাপ্য ধ্যাযীতেশানং প্রধ্যাযিতব্যং সর্বমিদং ব্রহ্মবিষ্ণুরুদ্রেন্দ্রাস্তে সংপ্রসূযন্তে সর্বাণি চেন্দ্রিযাণি সহ ভূতৈর্ন কারণং কারণানাং ধ্যাতা কারণং তু ধ্যেযঃ সর্বৈশ্বর্যসংপন্নঃ শংভুরাকাশমধ্যে ধ্রুবং স্তব্ধ্বাধিকং ক্ষণমেকং ক্রতুশতস্যাপি চতুঃসপ্তত্যা যত্ফলং তদবাপ্নোতি কৃত্স্নমোঙ্কারগতিং চ সর্বধ্যানযোগজ্ঞানানাং যত্ফলমোঙ্কারো বেদ পর ঈশো বা শিব একো ধ্যেযঃ শিবংকরঃ সর্বমন্যত্পরিত্যজ্য সমস্তাথর্বশিখৈতামধীত্য দ্বিজো গর্ভবাসাদ্বিমুক্তো বিমুচ্যত এতামধীত্য দ্বিজো গর্ভবাসাদ্বিমুক্তো বিমুচ্যত ইত্যোঁসত্যমিত্যুপনিষত্ .. ৩..
ॐ ভদ্রং কর্ণেভিরিতি শান্তিঃ ..
.. ইতি অথর্ববেদীয অথর্বশিখোপনিষত্সমাপ্তা ..