.. বহ্বৃচ উপনিষত্ ..
.. অথ বহ্বৃচোপনিষত্..
ॐ বাঙ্মে মনসি প্রতিষ্ঠিতা | মনো মে বাচি প্রতিষ্ঠিতম্ |
আবিরাবীর্ম এধি | বেদস্য ম আণীস্থঃ | শ্রুতং মে মা প্রহাসীঃ |
অনেনাধীতেনাহোরাত্রান্সন্দধামি | ঋতং বদিষ্যামি |
সত্যং বদিষ্যামি | তন্মামবতু | তদ্বক্তারমবতু | অবতু মাম্ |
অবতু বক্তারম্ | অবতু বক্তারম্ |
ॐ শান্তিঃ শান্তিঃ শান্তিঃ ||
বহ্বৃচাখ্যব্রহ্মবিদ্যামহাখণ্ডার্থবৈভবম্ .
অখণ্ডানন্দসাম্রাজ্যং রামচন্দ্রপদং ভজে ..
হরিঃ ॐ ..
দেবী হ্যেকাগ্র এবাসীত্ | সৈব জগদণ্ডমসৃজত্ |
কামকলেতি বিজ্ঞাযতে | শ্রৃংগারকলেতি বিজ্ঞাযতে || ১||
তস্যা এব ব্রহ্মা অজীজনত্ | বিষ্ণুরজীজনত্ |
রুদ্রোঽজীজনত্ | সর্বে মরুদ্গণা অজীজনত্ |
গন্ধর্বাপ্সরসঃ কিন্নরা বাদিত্রবাদিনঃ সমন্তাদজীজনত্ |
ভোগ্যমজীজনত্| সর্বমজীজনত্ | সর্বং শাক্তমজীজনত্ |
অণ্ডজং স্বেদজমুদ্ভিজ্জং জরাযুজম্ যত্কিংচৈতত্ প্রাণি
স্থাবরজংগমং মনুষ্যমজীজনত্ || ২||
সৈষা পরা শক্তিঃ | সৈষা শাংভবীবিদ্যা
কাদিবিদ্যেতি বা হাদিবিদ্যেতি বা সাদিবিদ্যেতি বা |
রহস্যমোমোং বাচি প্রতিষ্ঠা || ৩||
সৈব পুরত্রযং শরীরত্রযং ব্যাপ্য বহিরন্তরবভাসযন্তী
দেশকালবস্ত্বন্তরসংগান্মহাত্রিপুরসুন্দরী বৈ প্রত্যক্চিতিঃ ||
৪||
সৈবাত্মা ততোঽন্যমসত্যমনাত্মা | অত এষা
ব্রহ্মাসংবিত্তির্ভাবভাবকলাবিনির্মুক্তা
চিদ্বিদ্যাঽদ্বিতীযব্রহ্মসংবিত্তিঃ সচ্চিদানন্দলহরী
মহাত্রিপুরসুন্দরী বহিরন্তরনুপ্রবিশ্য স্বযমেকৈব বিভাতি |
যদস্তি সন্মাত্রম্ | যদ্বিভাতি চিন্মাত্রম্ |
যত্প্রিযমানন্দং তদেতত্ পূর্বাকারা মহাত্রিপুরসুন্দরী |
ত্বং চাহং চ সর্বং বিশ্বং সর্বদেবতা ইতরত্
সর্বং মহাত্রিপুরসুন্দরী | সত্যমেকং ললিতাখ্যং বস্তু
তদদ্বিতীযমখণ্ডার্থং পরং ব্রহ্ম || ৫||
পঞ্চরূপপরিত্যাগা দর্বরূপপ্রহাণতঃ |
অধিষ্ঠানং পরং তত্ত্বমেকং সচ্ছিষ্যতে মহত্ || ইতি || ৬||
প্রজ্ঞানং ব্রহ্মেতি বা অহং ব্রহ্মাস্মীতি বা ভাষ্যতে |
তত্ত্বমসীত্যেব সংভাষ্যতে |
অযমাত্মা ব্রহ্মেতি বা ব্রহ্মৈবাহমস্মীতি বা || ৭||
যোঽহমস্মীতি বা সোহমস্মীতি বা যোঽসৌ সোঽহমস্মীতি বা
যা ভাব্যতে সৈষা ষোডশী শ্রীবিদ্যা পঞ্চদশাক্ষরী
শ্রীমহাত্রিপুরসুন্দরী বালাংবিকেতি বগলেতি বা মাতংগীতি
স্বযংবরকল্যাণীতি ভুবনেশ্বরীতি চামুণ্ডেতি চণ্ডেতি
বারাহীতি তিরস্করিণীতি রাজমাতংগীতি বা শুকশ্যামলেতি বা
লঘুশ্যামলেতি বা অশ্বারূঢেতি বা প্রত্যংগিরা ধূমাবতী
সাবিত্রী গাযত্রী সরস্বতী ব্রহ্মানন্দকলেতি || ৮||
ঋচো অক্ষরে পরমে ব্যোমন্ | যস্মিন্ দেবা অধি বিশ্বে নিষেদুঃ |
যস্তন্ন বেদ কিং ঋচা করিষ্যতি|
য ইত্তদ্বিদুস্ত ইমে সমাসতে| ইত্যুপনিষত্ || ৯||
ॐ বাঙ্মে মনসি প্রতিষ্ঠিতা | মনো মে বাচি প্রতিষ্ঠিতম্ |
আবিরাবীর্ম এধি | বেদস্য ম আণীস্থঃ | শ্রুতং মে মা প্রহাসীঃ |
অনেনাধীতেনাহোরাত্রান্ সংদধামি | ঋতং বদিষ্যামি |
সত্যং বদিষ্যামি | তন্মামবতু | তদ্বক্তারমবতু | অবতু মাম্ |
অবতু বক্তারম্ | অবতু বক্তারম্ |
ॐ শান্তিঃ শান্তিঃ শান্তিঃ ||
|| ইতি বহ্বৃচোপনিষত্ ||
নোট নিতে এবং টেক্সট হাইলাইট করতে লগইন করুন
লগইন