.. শারীরকোপনিষত্ .. ৬২..

তত্ত্বগ্রামোপাযসিদ্ধং পরতত্ত্বস্বরূপকম্ .
শারীরোপনিষদ্বেদ্যং শ্রীরামব্রহ্ম মে গতিঃ ..
ॐ সহ নাববতু . সহ নৌ ভুনক্তু . সহ বীর্যং করবাবহৈ .
তেজস্বি নাবধীতমস্তু . মা বিদ্বিষাবহৈ ..
ॐ শান্তিঃ শান্তিঃ শান্তিঃ ..
ॐ অথাতঃ পৃথিব্যাদিমহাভূতানাং সমবাযং শরীরম্ .
যত্কঠিনং সা পৃথিবী যদ্দ্রবং তদাপো যদুষ্ণং তত্তেজো যত্সংচরতি
স বাযুর্যত্সুষিঅরং তদাকাশম্
শ্রোত্রাদীনি জ্ঞানেন্দ্রিযাণি . শ্রোত্রমাকাশে বাযৌ ত্বগগ্নৌ চক্ষুরপ্সু
জিহ্বা পৃথিব্যাং ঘ্রাণমিতি .
এবমিন্দ্রিযাণাং যথাক্রমেণ শব্দস্পর্শরূপরসগন্ধাশ্চৈতে
বিষযাঃ পৃথিব্যাদিমহাভূতেষু ক্রমেণোত্পন্নাঃ .
বাক্পাণিপাদপাযূপস্থাখ্যানি কর্মেন্দ্রিযাণি .
তেষাং ক্রমেণ বচনাদানগমনবিসর্গানন্দশ্চৈতে বিষযাঃ
পৃথিব্যাদিমহাভূতেষু ক্রমেণোত্পনাঃ .
মনোবুদ্ধিরহঙ্কারশ্চিত্তমত্যন্তঃকরণচতুষ্টযম্ .
তেষাং ক্রমেণ সঙ্কল্পবিকল্পাধ্যবসাযাভিমানাবধারণাস্বরূপশ্চৈতে
বিষযাঃ .
মনঃস্থানং গলান্তং বুদ্ধের্বদনমহঙ্কারস্য হৃদযং চিত্তস্য নাভিরিতি .
অস্থিচর্মনাডীরোমমাংসাশ্চেতি পৃথিব্যংশাঃ .
মূত্রশ্লেষ্মরক্তশুক্রস্বেদা অবংশাঃ .
ক্ষুত্তৃষ্ণালস্যমোহমৈথুনান্যগ্নেঃ .
প্রচারণবিলেখনস্থূলাক্ষ্যুন্মেষনিমেষাদি বাযোঃ .
কামক্রোধলোভমোহভযান্যাকাশস্য .
শব্দস্পর্শরূপরসগন্ধাঃ পৃথিবীগুণাঃ .
শব্দস্পর্শরূপরসাশ্চাপাং গুণাঃ .
শব্দস্পর্শরূপাণ্যগ্নিগুণাঃ .
শব্দস্পর্ষাবিতি বাযুগুণৌ .
শব্দ এক আকাশস্য .
সাত্ত্বিকরাজসতামসলক্ষণানি ত্রযো গুণাঃ ..
অহিংসা সত্যমস্তেযব্রহ্মচর্যাপরিগ্রহাঃ .
অক্রোধো গুরুশুশ্রুষা শৌচং সন্তোষ আর্জবম্ .. ১..
অমানিত্বমদম্ভিত্বমাস্তিকত্বমহিংস্রতা .
এতে সর্বে গুণা জ্ঞেযাঃ সাত্ত্বিকস্য বিশেষতঃ .. ২..
অহং কর্তাঽস্ম্যহং ভোক্তাঽস্ম্যহং বক্তাঽভিমানবান্ .
এতে গুণা রাজসস্য প্রোচ্যন্তে ব্রহ্মবিত্তমৈঃ .. ৩..
নিদ্রালস্যে মোহরাগৌ মৈথুনং চৌর্যমেব চ .
এতে গুণস্তামসস্য প্রোচ্যন্তে ব্রহ্মবাদিভিঃ .. ৪..
ঊর্ধ্বে সাত্বিকো মধ্যে রজসোঽধস্তামস ইতি .
সত্যজ্ঞানং সাত্ত্বিকম্ . ধর্মজ্ঞানং রাজসম্ . তিমিরান্ধং তামসমিতি .
জাগ্রত্স্বপ্নসুষুপ্তিতুরীযমিতি চতুর্বিধা অবস্থাঃ .
জ্ঞানেন্দ্রিযকর্মেন্দ্রিযান্তঃকরণচতুষ্টযং চতুর্দশকরণযুক্তং জাগ্রত্ .
অন্তঃকরণচতুষ্টযৈরেব সংযুক্তঃ স্বপ্নঃ .
চিত্তৈককরণা সুষুপ্তিঃ .
কেবলজীবযুক্তমেব তুরীযমিতি .
উন্মীলিতনিমীলিতমধ্যস্থজীবপরমাত্মনোর্মধ্যে জীবাত্মা ক্ষেত্রজ্ঞ ইতি বিজ্ঞাযতে ..
বুদ্ধিকর্মেন্দ্রিযপ্রাণপঞ্চকৈর্মনসা ধিযা .
শরীরং সপ্তদশভিঃ সূক্ষ্মং তল্লিঙ্গমুচ্যতে .. ৫..
মনো বুদ্ধিরহঙ্কারঃ খানিলাগ্নিজলানি ভূঃ .
এতাঃ প্রকৃতযস্ত্বষ্টৌ বিকারাঃ ষোডশাপরে .. ৬..
শ্রোত্রং ত্বক্চক্ষুষী জিহ্বা ঘ্রাণং চৈব তু পঞ্চমম্ .
পাযূপস্থৌ করৌ পাদৌ বাক্চৈব দশমী মতা .. ৭..
শব্দঃ স্পর্শশ্চ রূপং চ রসো গন্ধস্তথৈব চ .
ত্রযোবিংশতিরেতানি তত্ত্বানি প্রকৃতানি তু .
চতুর্বিংশতিরব্যক্তং প্রধানং পুরুষঃ পরঃ .. ৮..
ইত্যুপনিষত্ ..
ॐ সহ নাববতু . সহ নৌ ভুনক্তু . সহ বীর্যং করবাবহৈ .
তেজস্বি নাবধীতমস্তু . মা বিদ্বিষাবহৈ ..
ॐ শান্তিঃ শান্তিঃ শান্তিঃ ..
.. ইতি কৃষ্ণযজুর্বেদীয শারীরকোপনিষত্সমাপ্তা ..