রামরহস্য

.. রামরহস্যোপনিষত্ ..

কৈবল্যশ্রীস্বরূপেণ রাজমানং মহোঽব্যযম্ .
প্রতিযোগিবিনির্মুক্তং শ্রীরামপদমাশ্রযে ..
ॐ ভদ্রং কর্ণেভিঃ শ্রুণুযাম দেবাঃ . ভদ্রং পশ্যেমাক্ষভির্যজত্রাঃ .
স্থিরৈরঙ্গৈস্তুষ্টুবাঁসস্তনূভিঃ . ব্যশেম দেবহিতং যদাযুঃ ..
স্বস্তি ন ইন্দ্রো বৃদ্ধশ্রবাঃ . স্বস্তি নঃ পূষা বিশ্ববেদাঃ .
স্বস্তি নস্তার্ক্ষ্যো অরিষ্টনেমিঃ . স্বস্তি নো বৃহস্পতির্দধাতু ..
ॐ শান্তিঃ শান্তিঃ শান্তিঃ ..
ॐ রহস্যং রমতপতং বাসুদেবং চ মুদ্গলম্ .
শাণ্ডিল্যং পৈঙ্গলং ভিক্ষুং মহচ্ছারীরকং শিখা .. ১..
সনকাদ্যা যোগিবর্যা অন্যে চ ঋষযস্তথা .
প্রহ্লাদাদ্যা বিষ্ণুভক্তা হনূমন্তমথাব্রুবন্ .. ২..
বাযুপুত্র মহাবাহো কিংতত্ত্বং ব্রহ্মবাদিনাম্ .
পুরাণেষ্বষ্টাদশসু স্মৃতিষ্বষ্টাদশস্বপি .. ৩..
চতুর্বেদেষু শাস্ত্রেষু বিদ্যাস্বাধ্যাত্মিকেঽপি চ .
সর্বেষু বিদ্যাদানেষু বিঘ্নসূর্যেশশক্তিষু .
এতেষু মধ্যে কিং তত্ত্বং কথয ত্বং মহাবল .. ৪..
হনূমান্হোবাচ ..
ভো যোগীন্দ্রাশ্চৈব ঋষযো বিষ্ণুভক্তাস্তথৈব চ .
শ্রুণুধ্বং মামকীং বাচং ভববন্ধবিনাশিনীম্ .. ৫..
এতেষু চৈব সর্বেষু তত্ত্বং চ ব্রহ্ম তারকম্ .
রাম এব পরং ব্রহ্ম তত্ত্বং শ্রীরামো ব্রহ্ম তারকম্ .. ৬..
বাযুপ্ত্রেণোক্তাস্তে যোগীন্দ্রা ঋষযো বিষ্ণুভক্তা
হনূমন্তং পপ্রচ্ছুঃ রামস্যাঙ্গানি নো ব্রূহীতি .
হনূমান্হোবাচ . বাযুপুত্রং বিঘ্নেশং বাণীং দুর্গাং
ক্ষেত্রপালকং সূর্যং চন্দ্রং নারাযণং নারসিংহং
বাযুদেবং বারাহং তত্সর্বান্ত্সমাত্রান্ত্সীতং লক্ষ্মণং
শত্রুঘ্নং ভরতং বিভীষণং সুগ্রীবমঙ্গদং
জাম্ববন্তং প্রণবমেতানি রামস্যাঙ্গানি জানীথাঃ .
তান্যঙ্গানি বিনা রামো বিঘ্নকরো ভবতি .
পুনর্বাযুপুত্রেণোক্তাস্তে হনূমন্তং পপ্রচ্ছুঃ .
আঞ্জনেয মহাবল বিপ্রাণাং গৃহস্থানাং প্রণবাধিকারঃ
কথং স্যাদিতি . স হোবাচ শ্রীরাম এবোবাচেতি . যেষামেব
ষডক্ষরাধিকারো বর্ততে তেষাং প্রণবাধিকারঃ স্যান্নান্যেষাম্ .
কেবলমকারোকারমকারার্ধমাত্রাসহিতং প্রণবমূহ্য
যো রামমন্ত্রং জপতি তস্য শুভকরোঽহং স্যাম্ . তস্য
প্রণবস্থাকারস্যোকারস্য মকরাস্যার্ধমাত্রাযাশ্চ
ঋষিশ্ছন্দো দেবতা তত্তদ্বর্ণাবর্ণাবস্থানং
স্বরবেদাগ্নিগুণানুচ্চার্যান্বহং প্রণবমন্ত্রদ্দ্বিগুণং
জপ্ত্বা পশ্চাদ্রামমন্ত্রং যো জপেত্ স রামো ভবতীতি
রামেণোক্তাস্তস্মাদ্রামাঙ্গং প্রণবঃ কথিত ইতি ..
বিভীষণ উবাচ ..
সিংহাসনে সমাসীনং রামং পৌলস্ত্যসূদনম্ .
প্রণম্য দণ্ডবদ্ভূমৌ পৌলস্ত্যো বাক্যমব্রবীত্ . . ৭..
রঘুনাথ মহাবাহো কেবলং কথিতং ত্বযা .
অঙ্গানাং সুলভং চৈব কথনীযং চ সৌলভম্ .. ৮..
শ্রীরাম উবাচ . অথ পঞ্চ দণ্ডকানি পিতৃঘ্নো
মাতৃঘ্নো ব্রহ্মঘ্নো গুরুহননঃ কোটিযতিঘ্নোঽনেককৃতপাপো
যো মম ষণ্ণবতিকোটিনামানি জপতি স তেভ্যঃ পাপেভ্যঃ
প্রমুচ্যতে . স্বযমেব সচ্চিদানন্দস্বরূপো ভবেন্ন কিম্ .
পুনরুবাচ বিভীষণঃ . তত্রাপ্য শক্তোঽযং কিং করোতি .
স হোবাচেমম্ . কৈকসেয পুরশ্চরণবিধাবশক্তো
যো মম মহোপনিষদং মম গীতাং মন্নামসহস্রং
মদ্বিশ্বরূপং মমাষ্টোত্তরশতং রামশতাভিধানং
নারদোক্তস্তবরাজং হনূমত্প্রোক্তং মন্ত্ররাজাত্মকস্তবং
সীতাস্তবং চ রামষডক্ষরীত্যাদিভির্মন্ত্রৈর্যো মাং
নিত্যং স্তৌতি তত্সদৃশো ভবেন্ন কিং ভবেন্ন কিম্ ..
ইতি প্রথমোঽধ্যাযঃ .. ১..
সনকাদ্যা মুনযো হনূমন্তং পপ্রচ্ছুঃ .
আঞ্জনেয মহাবল তারকব্রহ্মণো রামচন্দ্রস্য
মন্ত্রগ্রামং নো ব্রূহীতি .
হনূমান্হোবাচ .
বহ্নিস্থং শযনং বিষ্ণোরর্ধচন্দ্রবিভূষিতম্ .
একাক্ষরো মনুঃ প্রোক্তো মন্ত্ররাজঃ সুরদ্রুমঃ .. ১..
ব্রহ্মা মুনিঃ স্যাদ্গাযত্রং ছন্দো রামস্য দেবতা .
দীর্ঘার্ধেন্দুযুজাঙ্গানি কুর্যাদ্বহ্ন্যাত্মনো মনোঃ .. ২..
বীজশক্ত্যাদি বীজেন ইষ্টার্থে বিনিযোজযেত্ .
সরযূতীরমন্দারবেদিকাপঞ্কজাসনে .. ৩..
শ্যামং বিরাসনাসীনং জ্ঞানমুদ্রোপশোভিতম্ .
বামোরুন্যস্ততদ্ধস্তং সীতালক্ষ্মণসংযুতম্ .. ৪..
অবেক্ষমাণমাত্মানমাত্মন্যমিততেজসম্ .
শুদ্ধস্ফটিকসংকাশং কেবলং মোক্ষকাঙ্ক্ষযা .. ৫..
চিন্তযন্পরমাত্মানং ভানুলক্ষং জপেন্মনুম্ .
বহ্নির্নারাযণো নাড্যো জাঠরঃ কেবলোঽপি চ .. ৬..
দ্ব্যক্ষরো মন্ত্ররাজোঽযং সর্বাভীষ্টপ্রদস্ততঃ .
একাক্ষরোক্তমৃষ্যাদি স্যাদাদ্যেন ষডঙ্গকম্ .. ৭..
তারমাযারমানঙ্গবাক্স্ববীজৈশ্চ ষড্বিধঃ ,
ত্র্যক্ষরো মন্ত্ররাজঃ স্যাত্সর্বাভীষ্টফলপ্রদঃ .. ৮..
দ্ব্যক্ষরশ্চন্দ্রভদ্রান্তো দ্বিবিধশ্চতুরক্ষরঃ .
ঋষ্যাদি পূর্ববজ্জ্ঞেযমেতযোশ্চ বিচক্ষণৈঃ .. ৯..
সপ্রতিষ্ঠৌ রমৌ বাযৌ হৃত্পঞ্চার্ণো মনুর্মতঃ .
বিশ্বামিত্রঋষিঃ প্রোক্তঃ পঙ্ক্তিশ্ছন্দোঽস্য দেবতা ..১০..
রামভদ্রো বীজশক্তিঃ প্রথমার্ণমিতি ক্রমাত্ .
ভ্রূমধ্যে হৃদি নাভ্যূর্বোঃ পাদযোর্বিন্যসেন্মনুম্ .. ১১..
ষডঙ্গং পূর্ববদ্বিদ্যান্মন্ত্রার্ণৈর্মনুনাস্ত্রকম্ .
মধ্যে বনং কল্পতরোর্মূলে পুষ্পলতাসনে .. ১২..
লক্ষ্মণেন প্রগুণিতমক্ষ্ণঃ কোণেন সাযকম্ .
অবেক্ষমাণং জানক্যা কৃতব্যজনমীশ্বরম্ .. ১৩..
জটাভারলসচ্ছীর্ষং শ্যামং মুনিগণাবৃতম্ .
লক্ষ্মণেন ধৃতচ্ছত্রমথবা পুষ্পকোপরি .. ১৪..
দশাঅস্যমথনং শান্তং সসুগ্রীববিভীষণম্ .
এবং লব্ধ্বা জযার্থী তু বর্ণলক্ষং জপেন্মনুম্ .. ১৫..
স্বকামশক্তিবাগ্লক্ষ্মীস্তবাদ্যাঃ পঞ্চবর্ণকাঃ .
ষডক্ষরঃ ষড্বিধঃ স্যাচ্চতুর্বর্গফলপ্রদঃ .. ১৬..
পঞ্চাশন্মাতৃকামন্ত্রবর্ণপ্রত্যেকপূর্বকম্ .
লক্ষ্মীবাঙ্মন্মথাদিশ্চ তারাদিঃ স্যাদনেকধা .. ১৭..
শ্রীমাযামন্মথৈকৈক বীজাদ্যন্তর্গতো মনুঃ .
চতুর্বর্ণঃ স এব স্যাত্ষড্বর্ণো বাঞ্ছিতপ্রদঃ .. ১৮..
স্বাহান্তো হুংফডন্তো বা নত্যন্তো বা ভবেদযম্ .
অষ্টাবিংশত্যুত্তরশতভেদঃ ষড্বর্ণ ঈরিতঃ .. ১৯..
ব্রহ্মা সংমোহনঃ শক্তির্দক্ষিণামূর্তিরেব চ .
অগস্ত্যশ্চ শিবঃ প্রোক্তা মুনযোঽক্রমাদিমে .. ২০..
ছন্দো গাযত্রসংজ্ঞং চ শ্রীরামশ্চৈব দেবতা .
অথবা কামবীজাদের্বিশ্বামিত্রো মুনির্মনোঃ .. ২১..
ছন্দো দেব্যাদিগাযত্রী রামভদ্রোঽস্য দেবতা .
বীজশক্তী যথাপূর্বং ষড্বর্ণান্বিন্যসেত্ক্রমাত্ .. ২২..
ব্রহ্মরন্ধ্রে ভ্রুবোর্মধ্যে হৃন্নাভ্যূরুষু পাদযোঃ .
বীজৈঃ ষড্দীর্ঘযুক্তৈর্বা মন্ত্রার্ণৈবা ষডঙ্গকম্ .. ২৩..
কালাভোধরকান্তিকান্তমনিশং বীরাসনাধ্যাসিতং
  মুদ্রাং জ্ঞানমযীং দধানমপরং হস্তাংবুজং জানুনি .
সীতাং পার্শ্বগতাং সরোরুহকরাং বিদ্যুন্নিভাং রাঘবং
  পশ্যন্তং মুকুটাঙ্গদাদিবিবিধাকল্পোজ্জ্বলাঙ্গং ভজে .. ২৪..
শ্রীরামশ্চন্দ্রভদ্রান্তো ঙেন্তো নতিযুতো দ্বিধা .
সপ্তাক্ষরো মন্ত্ররাজঃ সর্বকামফলপ্রদঃ .. ২৫..
তারাদিসহিতঃ সোঽপি দ্বিবিধোঽষ্টাক্ষরো মতঃ .
তারং রামশ্চতুর্থ্যতঃ ক্রোডাস্ত্রং বহ্নিতল্পগা .. ২৬..
অষ্টার্ণোঽযং পরো মন্ত্রো ঋষ্যাদিঃ স্যাত্ষডর্ণবত্ .
পুনরষ্টাক্ষরস্যাথ রাম এব ঋষিঃ স্মৃতঃ .. ২৭..
গাযত্রং ছন্দ ইত্যস্য দেবতা রাম এব চ .
তারং শ্রীবীজযুগ্মং চ বীজশক্ত্যাদযো মতাঃ .. ২৮..
ষডঙ্গং চ ততঃ কুর্যান্মন্ত্রার্ণৈরেব বুদ্ধিমান্ .
তারং শ্রীবীজযুগ্মং চ রামায নম উচ্চরেত্ .. ২৯..
গ্লৌংমোং বীজং বদেন্মাযাং হৃদ্রামায পুনশ্চ তাম্ .
শিবোমারামমন্ত্রোঽযং বস্বর্ণস্তু বসুপ্রদঃ .. ৩০..
ঋষিঃ সদাশিবঃ প্রোক্তো গাযত্রং ছন্দ উচ্যতে .
শিবোমারামচন্দ্রোঽত্র দেবতা পরিকীর্তিতঃ .. ৩১..
দীর্ঘযা মাযযাঙ্গানি তারপঞ্চার্ণযুক্তযা .
রামং ত্রিনেত্রং সোমার্ধধারিণং শূলিনং পরম্ .
ভস্মোদ্ধূলিতসর্বাঙ্গং কপর্দিনমুপাস্মহে .. ৩২..
রামাভিরামাং সৌন্দর্যসীমাং সোমাবতংসিকাম্ .
পাশাঙ্কুশধনুর্বাণধরাং ধ্যাযেত্ত্রিলোচনাম্ .. ৩৩..
ধ্যাযন্নেবং বর্ণলক্ষং জপতর্পণতত্পরঃ .
বিল্বপত্রৈঃ ফলৈঃ পুষ্পৈস্তিলাজ্যৈঃ পঙ্কজৈর্হুনেত্ .. ৩৪..
স্বযমাযান্তি নিধযঃ সিদ্ধযশ্চ সুরেপ্সিতাঃ .
পুনরষ্টাক্ষরস্যাথ ব্রহ্মগাযত্র রাঘবাঃ .. ৩৫..
ঋষ্যাদযস্তু বিজ্ঞেযাঃ শ্রীবীজং মম শক্তিকম্ .
তত্প্রীত্যৈ বিনিযোগশ্চ মন্ত্রার্ণৈরঙ্গকল্পনা .. ৩৬..
কেযূরাঙ্গদকঙ্কণৈর্মণিগতৈর্বিদ্যোতমানং সদা
  রামং পার্বণচন্দ্রকোটিসদৃশচ্ছত্রেণ বৈ রাজিতম্ .
হেমস্তম্ভসহস্রষোডশযুতে মধ্যে মহামণ্ডপে
  দেবেশং ভরতাদিভিঃ পরিবৃতং রামং ভজে শ্যামলম্ .. ৩৭..
কিং মন্ত্রৈর্বহুভির্বিনশ্বরফলৈরাযাসসাধ্যৈর্বৃতা
  কিংচিল্লোভবিতানমাত্রবিফলৈঃ সংসারদুঃখাবহৈঃ .
একঃ সন্নপি সর্বমন্ত্রফলদো লোভাদিদোষোজ্ঝিতঃ
  শ্রীরামঃ শরণং মমেতি সততং মন্ত্রোঽযমষ্টাক্ষরঃ .. ৩৮..
এবমষ্টাক্ষরঃ সম্যক্ সপ্তধা পরিকীর্তিতঃ .
রামসপ্তাক্ষরো মন্ত্র আদ্যন্তে তারসংযুতঃ .. ৩৯..
নবার্ণো মন্ত্ররাজঃ স্যাচ্ছেষং ষড্বর্ণবন্ন্যসেত্ .
জানকীবল্লভং ঙেন্তং বহ্নের্জাযাহুমাদিকম্ .. ৪০..
দশাক্ষরোঽযং মন্ত্রঃ স্যাত্সর্বাভীষ্টফলপ্রদঃ .
দশাক্ষরস্য মন্ত্রস্য বসিষ্ঠোঽস্য ঋষির্বিরাট্ .. ৪১..
ছন্দোঽস্য দেবতা রামঃ সীতাপাণিপরিগ্রহঃ .
আদ্যো বীজং দ্বিঠঃ শক্তিঃ কামেনাঙ্গক্রিযা মতা .. ৪২..
শিরোললাটভ্রূমধ্যে তালুকর্ণেষু হৃদ্যপি .
নাভূরুজানুপাদেষু দশার্ণান্বিন্যসেন্মনোঃ .. ৪৩..
অযোধ্যানগরে রত্নচিত্রে সৌবর্ণমণ্ডপে .
মন্দারপুষ্পৈরাবদ্ধবিতানে তোরণাঞ্চিতে .. ৪৪..
সিংহাসনে সমাসীনং পুষ্পকোপরি রাঘবম্ .
রক্ষোভির্হরিভির্দেবৈর্দিব্যযানগতৈঃ শুভৈঃ .. ৪৫..
সংস্তূযমানং মুনিভিঃ প্রহ্বৈশ্চ পরিসেবিতম্ .
সীতালঙ্কৃতবামাঙ্গং লক্ষ্মণেনোপসেবিতম্ ..৪৬..
শ্যামং প্রসন্নবদনং সর্বাভরণভূষিতম্ .
ধ্যাযন্নেবং জপেন্মন্ত্রং বর্ণলক্ষমনন্যধীঃ .. ৪৭..
রামং ঙেন্তং ধনুষ্পাণযেঽন্তঃ স্যাদ্বহ্নিসুন্দরী .
দশাক্ষরোঽযং মন্ত্রঃ স্যান্মুনির্ব্রহ্মা বিরাট্ স্মৃতঃ .. ৪৮..
ছন্দস্তু দেবতা প্রোক্তো রামো রাক্ষসমর্দনঃ .
শেষং তু পূর্ববত্কুর্যাচ্চাপবাণধরং স্মরেত্ .. ৪৯..
তারমাযারমানঙ্গবাক্স্ববীজৈশ্চ ষড্বিধঃ .
দশার্ণো মন্ত্ররাজঃ স্যাদ্রুদ্রবর্ণাত্মকো মনুঃ .. ৫০..
শেষং ষডর্ণবজ্জ্ঞেযং ন্যাসধ্যানাদিকং বুধৈঃ .
দ্বাদশাক্ষরমন্ত্রস্য শ্রীরাম ঋষিরুচ্যতে .. ৫১..
জগতী ছন্দ ইত্যুক্তং শ্রীরামো দেবতা মতঃ .
প্রণবো বীজমিত্যুক্তঃ ক্লীং শক্তির্হ্রীং চ কীলকম্ .. ৫২..
মন্ত্রেণাঙ্গানি বিন্যস্য শিষ্টং পূর্ববদাচরেত্ .
তারং মাযাং সমুচ্চার্য ভরতাগ্রজ ইত্যপি .. ৫৩..
রামং ক্লীং বহ্নিজাযান্তং মন্ত্রোযং দ্বাদশাক্ষরঃ .
ॐ হৃদ্ভগবতে রামচন্দ্রভদ্রৌ চ ঙেযুতৌ .. ৫৪..
অর্কার্ণো দ্বিবিধোঽপ্যস্য ঋষিধ্যানাদিপূর্ববত্ .
ছন্দস্তু জগতী চৈব মন্ত্রার্ণৈরঙ্গকল্পনা .. ৫৫..
শ্রীরামেতি পদং চোক্ত্বা জযরাম ততঃ পরম্ .
জযদ্বযং বদেত্প্রাজ্ঞো রামেতি মনুরাজকঃ .. ৫৬..
ত্রযোদশার্ণ ঋষ্যাদি পূর্ববত্সর্বকামদঃ .
পদদ্বযদ্বিরাবৃত্তেরঙ্গং ধ্যানং দশার্ণবত্ .. ৫৭..
তারাদিসহিতঃ সোঽপি স চতুর্দশবর্ণকঃ .
ত্রযোদশার্ণমুচ্চার্য পশ্চাদ্রামেতি যোজযেত্ .. ৫৮..
স বৈ পঞ্চদশার্ণস্তু জপতাং কল্পভূরুহঃ .
নমশ্চ সীতাপতযে রামাযেতি হনদ্বযম্ .. ৫৯..
ততস্তু কবচাস্ত্রান্তঃ ষোডশাক্ষর ঈরিতঃ .
তস্যাগস্ত্যঋষিশ্ছন্দো বৃহতী দেবতা চ সঃ .. ৬০..
রাং বীজং শক্তিরস্ত্রং চ কীলকং হুমিতীরিতম্ .
দ্বিপঞ্চত্রিচতুর্বর্ণৈঃ সর্বৈরঙ্গং ন্যসেত্ক্রমাত্ .. ৬১..
তারাদিসহিতঃ সোঽপি মন্ত্রঃ সপ্তদশাক্ষরঃ .
তারং নমো ভগবতে রাং ঙেন্তং মহা ততঃ .. ৬২..
পুরুষায পদং পশ্চাদ্ধৃদন্তোঽষ্টদশাক্ষরঃ .
বিশ্বামিত্রো মুনিশ্ছন্দো গাযত্রং দেবতা চ সঃ .. ৬৩..
কামাদিসহিতঃ সোঽপি মন্ত্র একোনবিংশকঃ .
তারং নামো ভগবতে রামাযেতি পদং বদেত্ .. ৬৪..
সর্বশব্দং সমুচ্চার্য সৌভাগ্যং দেহি মে বদেত্ .
বহ্নিজাযাং তথোচ্চার্য মন্ত্রো বিংশার্ণকো মতঃ .. ৬৫..
তারং নমো ভগবতে রামায সকলং বদেত্ .
আপন্নিবারণাযেতি বহ্নিজাযাং ততো বদেত্ .. ৬৬..
একবিংশার্ণকো মন্ত্রঃ সর্বাভীষ্টফলপ্রদঃ .
তারং রমা স্ববীজং চ ততো দাশরথায চ .. ৬৭..
ততঃ সীতাবল্লভায সর্বাভীষ্টপদং বদেত্ .
ততো দায হৃদন্তোঽযং মন্ত্রো দ্বাবিংশদক্ষরঃ .. ৬৮..
তারং নমো ভগবতে বীররামায সংবদেত্ .
কল শত্রূন্ হন দ্বন্দ্বং বহ্নিজাযাং ততো বদেত্ .. ৬৯..
ত্রযোবিংশাক্ষরোমন্ত্রঃ সর্বশত্রুনিবর্হণঃ .
বিশ্বামিত্রো মুনিঃ প্রোক্তো গাযত্রীছন্দ উচ্যতে .. ৭০..
দেবতা বীররামোঽসৌ বীজাদ্যাঃ পূর্ববন্মতাঃ .
মূলমন্ত্রবিভাগেন ন্যাসান্কৃত্বা বিচক্ষণঃ .. ৭১..
শরং ধনুষি সন্ধায তিষ্ঠন্তং রাবণোন্মুখম্ .
বজ্রপাণিং রথারূঢং রামং ধ্যাত্বা জপেন্মনুম্ .. ৭২..
তারং নমো ভগবতে শ্রীরামায পদং বদেত্ .
তারকব্রহ্মণে চোক্ত্বা মাং তারয পদং বদেত্ .. ৭৩..
নমস্তারাত্মকো মন্ত্রশ্চতুর্বিংশতিমন্ত্রকঃ .
বীজাদিকং যথা পূর্বং সর্বং কুর্যাত্ষডর্ণবত্ .. ৭৪..
কামস্তারো নতিশ্চৈব ততো ভগবতেপদম্ .
রামচন্দ্রায চোচ্চার্য সকলেতি পদং বদেত্ .. ৭৫..
জনবশ্যকরাযেতি স্বাহা কামাত্মকো মনুঃ .
সর্ববশ্যকরো মন্ত্রঃ পঞ্চবিংশতিবর্ণকঃ .. ৭৬..
আদৌ তারেণ সংযুক্তো মন্ত্রঃ ষড্বিংশদক্ষরঃ .
অন্তেঽপি তারসংযুক্তঃ সপ্তবিংশতিবর্ণকঃ .. ৭৭..
তারং নমো ভগবতে রক্ষোঘ্নবিশদায চ .
সর্ববিঘ্নান্ত্সমুচ্চার্য নিবারয পদদ্বযম্ .. ৭৮..
স্বাহান্তো মন্ত্ররাজোঽযমষ্টাবিংশতিবর্ণকঃ .
অন্তে তারেণ সংযুক্ত একোনত্রিংশদক্ষরঃ .. ৭৯..
আদৌ স্ববীজসংযুক্তস্ত্রিংশদ্বর্ণাত্মকো মনুঃ .
অন্তেঽপি তেন সংযুক্ত একত্রিংশাত্মকঃ স্মৃতঃ .. ৮০..
রামভদ্র মহেশ্বাস রঘুবীর নৃপোত্তম .
ভো দশাস্যান্তকাস্মাকং শ্রিযং দাপয দেহি মে .. ৮১..
আনুষ্টুভ ঋষী রামশ্ছন্দোঽনুষ্টুপ্স দেবতা .
রাং বীজমস্য যং শক্তিরিষ্টার্থে বিনিযোজযেত্ .. ৮২..
পাদং হৃদি চ বিন্যস্য পাদং শিরসি বিন্যসেত্ .
শিখাযাং পঞ্চভির্ন্যস্য ত্রিবর্ণৈঃ কবচং ন্যসেত্ .. ৮৩..
নেত্রযোঃ পঞ্চবর্ণৈশ্চ দাপযেত্যস্ত্রমুচ্যতে .
চাপবাণধরং শ্যামং সসুগ্রীববিভীষণম্ .. ৮৪..
হত্বা রাবণমাযান্তং কৃতত্রৈলোক্যরক্ষণম্ .
রামচন্দ্রং হৃদি ধ্যাত্বা দশলক্ষং জপেন্মনুম্ .. ৮৫..
বদেদ্দাশরথাযেতি বিদ্মহেতি পদং ততঃ .
সীতাপদং সমুদ্ধৃত্য বল্লভায ততো বদেত্ .. ৮৬..
ধীমহীতি বদেত্তন্নো রামশ্চাপি প্রচোদযাত্
তারাদিরেষা গাযত্রী মুক্তিমেব প্রযচ্ছতি .. ৮৭..
মাযাদিরপি বৈদুষ্ট্যং রামাদিশ্চ শ্রিযঃপদম্ .
মদনেনাপি সংযুক্তঃ স মোহযতি মেদিনীম্ .. ৮৮..
পঞ্চ ত্রীণি ষডর্ণৈশ্চ ত্রীণি চত্বারি বর্ণকৈঃ .
চত্বারি চ চতুর্বর্ণৈরঙ্গন্যাসং প্রকল্পযেত্ .. ৮৯..
বীজধ্যানাদিকং সর্বং কুর্যাত্ষড্বর্ণবত্ক্রমাত্ .
তারং নমো ভগবতে চতুর্থ্যা রঘুনন্দনম্ .. ৯০..
রক্ষোঘ্নবিশদং তদ্বন্মধুরেতি বদেত্ততঃ .
প্রসন্নবদনং ঙেন্তং বদেদমিততেজসে .. ৯১..
বলরামৌ চতুর্থ্যন্তৌ বিষ্ণুং ঙেন্তং নতিস্ততঃ .
প্রোক্তো মালামনুঃ সপ্তচত্বারিংশদ্ভিরক্ষরৈঃ .. ৯২..
ঋষিশ্ছন্দো দেবতাদি ব্রহ্মানুষ্টুভরাঘবাঃ .
সপ্তর্তুসপ্তদশ ষড্রুদ্রসংখ্যৈঃ ষডঙ্গকম্ .. ৯৩..
ধ্যানং দশাক্ষরং প্রোক্তং লক্ষমেকং জপেন্মনুম্ .
শ্রিযং সীতাং চতুর্থ্যন্তাং স্বাহান্তোঽযং ষডক্ষরঃ .. ৯৪..
জনকোঽস্য ঋষিশ্ছন্দো গাযত্রী দেবতা মনোঃ .
সীতা ভগবতী প্রোক্তা শ্রীং বীজং নতিশক্তিকম্ .. ৯৫..
কীলং সীতা চতুর্থ্যন্তমিষ্টার্থে বিনিযোজযেত্ .
দীর্ঘস্বরযুতাদ্যেন ষডঙ্গানি প্রকল্পযেত্ .. ৯৬..
স্বর্ণাভামম্বুজকরাং রামালোকনতত্পরাম্ .
ধ্যাযেত্ষট্কোণমধ্যস্থরামাঙ্কোপরি শোভিতাম্ .. ৯৭..
লকারং তু সমুদ্ধৃত্য লক্ষ্মণায নমোন্তকঃ .
অগস্ত্যঋষিরস্যাথ গাযত্রং ছন্দ উচ্যতে .. ৯৮..
লক্ষ্মণো দেবতা প্রোক্তো লং বীজং শক্তিরস্য হি .
নমস্তু বিনিযোগো হি পুরুষার্থ চতুষ্টযে .. ৯৯..
দীর্ঘভাজা স্ববীজেন ষডঙ্গানি প্রকল্পযেত্ .
দ্বিভুজং স্বর্ণরুচিরতনুং পদ্মনিভেক্ষণম্ .. ১০০..
ধনুর্বাণধরং দেবং রামারাধনতত্পরম্ .
ভকারং তু সমুদ্ধৃত্য ভরতায নমোন্তকঃ .. ১০১..
অগস্ত্যঋষিরস্যাথ শেষং পূর্ববদাচরেত্ .
ভরতং শ্যামলং শান্তং রামসেবাপরাযণম্ .. ১০২..
ধনুর্বাণধরং বীরং কৈকেযীতনযং ভজে .
শং বীজং তু সমুদ্ধৃত্য শত্রুঘ্নায নমোন্তকঃ .
ঋষ্যাদযো যথাপূর্বং বিনিযোগোঽরিনিগ্রহে .. ১০৩..
দ্বিভুজং স্বর্ণবর্ণাভং রামসেবাপরাযণম্ .
লবণাসুরহন্তারং সুমিত্রাতনযং ভজে .. ১০৪..
হৃং হনুমাংশ্চতুর্থ্যন্তং হৃদন্তো মন্ত্ররাজকঃ .
রামচন্দ্র ঋষিঃ প্রোক্তো যোজযেত্পূর্ববত্ক্রমাত্ .. ১০৫..
দ্বিভুজং স্বর্ণবর্ণাভং রামসেবাপরাযণম্ .
মৌঞ্জীকৌপীনসহিতং মাং ধ্যাযেদ্রামসেবকম্ .. ইতি.. ১০৬..
ইতি রমরহস্যোপনিষদি দ্বিতীযোঽধ্যাযঃ .. ২..
সনকাদ্যা মুনযো হনূমন্তং পপ্রচ্ছুঃ .
আঞ্জনেয মহাবল পূর্বোক্তমন্ত্রাণাং
পূজাপীঠমনুব্রূহীতি . হনুমান্ হোবাচ .
আদৌ ষট্কোণম্ . তন্মধ্যে রামবীজং সশ্রীকম্ .
তদধোভাগে দ্বিতীযান্তং সাধ্যম্ . বীজোর্ধ্বভাগে
ষষ্ঠ্যন্তং সাধকম্ . পার্শ্বে দৃষ্টিবীজে তত্পরিতো
জীবপ্রাণশক্তিবশ্যবীজানি . তত্সর্বং সন্মুখোন্মুখাভ্যাং
প্রণবাভ্যাং বেষ্টনম্ . অগ্নীশাসুরবাযব্যপুরঃপৃষ্ঠেষু
ষট্কোণেষু দীর্ঘভাঞ্জি . হৃদযাদিমন্ত্রাঃ ক্রমেণ .
রাং রীং রূং রৈং রৌং রঃ ইতি দীর্ঘভাজি তদ্যুক্তহৃদযাদ্যস্ত্রান্তম্ .
ষট্কোণপার্শ্বে রমামাযাবীজে . কোণাগ্রে বারাহং হুমিতি .
তদ্বীজান্তরালে কামবীজম্ . পরিতো বাগ্ভবম্ . ততো বৃত্তত্রযং
সাষ্টপত্রম্ . তেষু দলেষু স্বরানষ্টবর্গান্প্রতিদলং
মালামনুবর্ণষট্কম্ . অন্তে পঞ্চাক্ষরম্ .
তদ্দলকপোলেষ্বষ্টবর্ণান্ . পুনরষ্টদলপদ্মম্ .
তেষু দলেষু নারাযণাষ্টাক্ষরো মন্ত্রঃ . তদ্দলকপোলেষু
শ্রীবীজম্ . ততো বৃত্তম্ . ততো দ্বাদশদলম্ . তেষু দলেষু
বাসুদেবদ্বাদশাক্ষরো মন্ত্রঃ . তদ্দলকপোলেষ্বাদিক্ষান্তান্ .
ততো বৃত্তম্ . ততঃ ষোডশদলম্ . তেষু দলেষু হুং ফট্
নতিসহিতরামদ্বাদশাক্ষরম্ . তদ্দলকপোলেষু মাযাবীজম্ .
সর্বত্র প্রতিকপোলং দ্বিরাবৃত্ত্যা হ্রং স্রং ভ্রং ব্রং ভ্রমং শ্রুং
জ্রম্ . ততো বৃত্তম্ . ততো দ্বাত্রিংশদ্দলপদ্মম্ . তেষু দলেষু
নৃসিংহমন্ত্ররাজানুষ্টুভমন্রঃ . তদ্দলকপোলেশ্বষ্টব-
স্বেকাদশরুদ্রদ্বাদশাদিত্যমন্ত্রাঃ প্রণবাদিনমোন্তা-
শ্চতুর্থ্যন্তাঃ ক্রমেণ . তদ্বহির্বষট্কারং পরিতঃ . ততো
রেখাত্রযযুক্তং ভূপুরম্ . দ্বাদশদিক্ষু রাশ্যাদিভূষিতম্ .
অষ্টনাগৈরধিষ্ঠিতম্ . চতুর্দিক্ষু নারসিংহবীজম্ .
বিদিক্ষু বারাহবীজম্ . এতত্সর্বাত্মকং যন্ত্রং সর্বকামপ্রদং
মোক্ষপ্রদং চ . একাক্ষরাদিনবাক্ষরান্তানামেতদ্যন্ত্রং
ভবতি . তদ্দশাবরণাত্মকং ভবতি . ষট্কোণমধ্যে
সাঙ্গং রাঘবং যজেত্ . ষট্কোণেষ্বঙ্গৈঃ
প্রথমা বৃতিঃ . অষ্টদলমূলে আত্মাদ্যাবরণম্ .
তদগ্রে বাসুদেবাদ্যাবরণম্ . দ্বিতীযাষ্টদলমূলে
ঘৃষ্টাদ্যাবরণম্ . তদগ্রে হনূমদাদ্যাবরণম্ .
দ্বাদশদলেষু বসিষ্ঠাদ্যাবরণম্ . ষোডশদলেশু
নীলাদ্যাবরণম্ . দ্বাত্রিংশদ্দলেষু ধ্রুবাদ্যাবরণম্ .
ভূপুরান্তরিন্দ্রাদ্যাবরণম্ . তদ্বহির্বজ্রাদ্যাবরণম্ .
এবমভ্যর্চ্য মনুং জপেত্ ..
অথ দশাক্ষরাদিদ্বাত্রিংশদক্ষরান্তানাং মন্ত্রাণাং
পূজাপীঠমুচ্যতে . আদৌ ষট্কোণম্ . তন্মধ্যে স্ববীজম্ .
তন্মধ্যে সাধ্যনামানি . এবং কামবীজবেষ্টনম্ . তং
শিষ্টেন নবার্ণেন বেষ্টনম্ . ষট্কোণেষু
ষডঙ্গান্যগ্নীশাসুরবাযব্যপূর্বপৃষ্ঠেষু .
তত্কপোলেষু শ্রীমাযে . কোণাগ্রে ক্রোধম্ . ততো বৃত্তম্ .
ততোঽষ্টদলম্ . তেষু দলেষু ষট্সংখ্যযা
মালামনুবর্ণান্ . তদ্দলকপোলেষু ষোডশ স্বরাঃ .
ততো বৃত্তম্ . তত্পরিত আদিক্ষান্তম্ . তদ্বহির্ভূপুরম্
সাষ্টশূলাগ্রম্ . দিক্ষু বিদিক্ষু নারসিংহবারাহে .
এতন্মহাযন্ত্রম্ . আধারশক্ত্যাদিবৈষ্ণবপীঠম্ .
অঙ্গৈঃ প্রথমা বৃতিঃ . মধ্যে রামম্ . বামভাগে
সীতাম্ . তত্পুরতঃ শার্ঙ্গং শরং চ . অষ্টদলমূলে
হনুমদাদিদ্বিতীযাবরণম্ . ঘৃষ্ট্যাদিতৃতীযাবরণম্ .
ইন্দ্রাদিভিশ্চতুর্থী . বজ্রাদিভিঃ পঞ্চমী . এতদ্যন্ত্রারাধন-
পূর্বকং দশাক্ষরাদিমন্ত্রং জপেত্ . ..
ইতি রামরহস্যোপনিষদি তৃতীযোঽধ্যাযঃ .. ৩..
সনকাদ্যা মুনযো হনূমন্তং পপ্রচ্ছুঃ .
শ্রীরামমন্ত্রাণাং পুরশ্চরণবিধিমনুব্রূহীতি .
হনূমান্হোবাচ .
নিত্যং ত্রিষবণস্নাযী পযোমূলফলাদিভুক্ .
অথবা পাযসাহারো হবিষ্যান্নাদ এব বা .. ১..
ষড্সৈশ্চ পরিত্যক্তঃ স্বাশ্রমোক্তবিধিং চরন্ .
বনিতাদিষু বাক্কর্মমনোভির্নিঃস্পৃহঃ শুচিঃ .. ২..
ভূমিশাযী ব্রহ্মচারী নিষ্কামো গুরুভক্তিমান্ .
স্নানপূজাজপধ্যানহোমতর্পণতত্পরঃ .. ৩..
গুরূপদিষ্টমার্গেণ ধ্যাযন্রামমনন্যধীঃ .
সূর্যেন্দুগুরুদীপাদিগোব্রাহ্মণসমীপতঃ .. ৪..
শ্রীরামসন্নিধৌ মৌনী মন্ত্রার্থমনুচিন্তযন্ .
ব্যাঘ্রচর্মাসনে স্থিত্বা স্বস্তিকাদ্যাসনক্রমাত্ .. ৫..
তুলসীপারিজাতশ্রীবৃক্ষমূলাদিকস্থলে .
পদ্মাক্ষতুলসীকাষ্ঠরুদ্রাক্ষকৃতমালযা .. ৬..
মাতৃকামালযা মন্ত্রী মনসৈব মনুং জপেত্ .
অভ্যর্চ্য বৈষ্ণবে পীঠে জপেদক্ষরলক্ষকম্ .. ৭..
তর্পযেত্তদ্দশাংশেন পাযসাত্তদ্দশাংশতঃ .
জুহুযাদ্গোঘৃতেনৈব ভোজযেত্তদ্দশাংশতঃ .. ৮..
ততঃ পুষ্পাঞ্জলিং মূলমন্ত্রেণ বিধিবচ্চরেত্ .
ততঃ সিদ্ধমনুর্ভূত্বা জীবন্মুক্তো ভবেন্মুনিঃ .. ৯..
অণিমাদির্ভজত্যেনং যূনং বরবধূরিব .
ঐহিকেষু চ কার্যেষু মহাপত্সু চ সর্বদা .. ১০..
নৈব যোজ্যো রামমন্ত্রঃ কেবলং মোক্ষসাধকঃ .
ঐহিকে সমনুপ্রাপ্তে মাং স্মরেদ্রামসেবকম্ .. ১১..
যো রামং সংস্মরেন্নিত্যং ভক্ত্যা মনুপরাযণঃ .
তস্যাহমিষ্টসংসিদ্ধ্যৈ দীক্ষিতোঽস্মি মুনীশ্বরাঃ .. ১২..
বাঞ্ছিতার্থং প্রদাস্যামি ভক্তানাং রাঘবস্য তু .
সর্বথা জাগরূকোঽস্মি রামকার্যধুরন্ধরঃ .. ১৩..
ইতি রামরহস্যোপনিষদি চতুর্থোঽধ্যাযঃ .. ৪..
সনকাদ্যা মুনযো হনূমন্তং পপ্রচ্ছুঃ .
শ্রীরামমন্ত্রার্থমনুব্রূহীতি . হনূমান্হোবাচ .
সর্বেষু রামমন্ত্রেষু মন্ত্ররাজঃ ষডক্ষরঃ .
একধায দ্বিধা ত্রেধা চতুর্ধা পঞ্চধা তথা .. ১..
ষট্সপ্তধাষ্টধা চৈব বহুধাযং ব্যবস্থিতঃ .
ষডক্ষরস্য মাহাত্ম্যং শিবো জানাতি তত্ত্বতঃ .. ২..
শ্রীরামমন্ত্ররাজস্য সম্যগর্থোঽযমুচ্যতে .
নারাযণাষ্টাক্ষরে চ শিবপঞ্চাক্ষরে তথা .
সার্থকার্ণদ্বযং রামো রমন্তে যত্র যোগিনঃ .
রকারো বহ্নিবচনঃ প্রকাশঃ পর্যবস্যতি .. ৩..
সচ্চিদানন্দরূপোঽস্য পরমাত্মার্থ উচ্যতে .
ব্যঞ্জনং নিষ্কলং ব্রহ্ম প্রাণো মাযেতি চ স্বরঃ .. ৪..
ব্যঞ্জনৈঃ স্বরসংযোগং বিদ্ধি তত্প্রাণযোজনম্ .
রেফো জ্যোতির্মযে তস্মাত্কৃতমাকরযোজনম্ .. ৫..
মকারোঽভ্যুদযার্থত্বাত্স মাযেতি চ কীর্ত্যতে .
সোঽযং বীজং স্বকং যস্মাত্সমাযং ব্রহ্ম চোচ্যতে .. ৬..
সবিন্দুঃ সোঽপি পুরুষঃ শিবসূর্যেন্দুরূপবান্ .
জ্যোতিস্তস্য শিখা রূপং নাদঃ সপ্রকৃতির্মতঃ .. ৭..
প্রকৃতিঃ পুরুষশ্চোভৌ সমাযাদ্ব্রহ্মণঃ স্মৃতৌ .
বিন্দুনাদাত্মকং বীজং বহ্নিসোমকলাত্মকম্ .. ৮..
অগ্নীষোমাত্মকং রূপং রামবীজে প্রতিষ্ঠিতম্ .
যথৈব বটবীজস্থঃ প্রাকৃতশ্চ মহাদ্রুমঃ .. ৯..
তথৈব রামবীজস্থং জগদেতচ্চরাচরম্ .
বীজোক্তমুভযার্থত্বং রামনামনি দৃশ্যতে .. ১০..
বীজং মাযাবিনির্মুক্তং পরং ব্রহ্মেতি কীর্ত্যতে .
মুক্তিদং সাধকানাং চ মকারো মুক্তিদো মতঃ .. ১১..
মারূপত্বাদতো রামো ভুক্তিমুক্তিফলপ্রদঃ .
আদ্যো র তত্পদার্থঃ স্যান্মকরস্ত্বংপদার্থবান্ .. ১২..
তযোঃ সংযোজনমসীত্যর্থে তত্ত্ববিদো বিদুঃ .
নমস্ত্বমর্থো বিজ্ঞেযো রামস্তত্পদমুচ্যতে .. ১৩..
অসীত্যর্থে চতুর্থী স্যাদেবং মন্ত্রেষু যোজযেত্ .
তত্ত্বমস্যাদিবাক্যং তু কেবলং মুক্তিদং যতঃ .. ১৪..
ভুক্তিমুক্তিপ্রদং চৈতত্তস্মাদপ্যতিরিচ্যতে .
মনুষ্বেতেষু সর্বেষামধিকারোঽস্তি দেহিনাম্ .. ১৫..
মুমুক্ষূণাং বিরক্তানাং তথা চাশ্রমবাসিনাম্ .
প্রণবত্বাত্সদা ধ্যেযো যতীনাং চ বিশেষতঃ .
রামমন্ত্রার্থবিজ্ঞানী জীবন্মুক্তো ন সংশযঃ .. ১৬..
য ইমামুপনিষদমধীতে সোঽগ্নিপূতো ভবতি .
স বাযুপূতো ভবতি . সুরাপানাত্পূতো ভবতি .
স্বর্ণস্তেযাত্পূতো ভবতি . ব্রহ্মহত্যাপূতো ভবতি .
স রামমন্ত্রাণাং কৃতপুরশ্চরণো রামচন্দ্রো ভবতি .
তদেতদৃচাভ্যুক্তম্ .
সদা রামোঽহমস্মীতি তত্ত্বতঃ প্রবদন্তি যে .
ন তে সংসারিণো নূনং রাম এব ন সংশযঃ .. ॐ সত্যমিত্যুপনিষত্ ..
ॐ ভদ্রং কর্ণেভিঃ শ্রুণুযাম দেবা ভদ্রং পশ্যেমাক্ষভির্যজত্রাঃ .
স্থিরৈরঙ্গৈস্তুষ্টুবাঁসস্তনূভির্ব্যশেম দেবহিতং যদাযুঃ ..
ॐ শান্তিঃ শান্তিঃ শান্তিঃ ..
ইতি শ্রীরমরহস্যোপনিষত্সমাপ্তা ..