হযগ্রীব

.. হযগ্রীবোপনিষত্ ..

স্বজ্ঞোঽপি যত্প্রসাদেন জ্ঞানং তত্ফলমাপ্নুযাত্ .
সোঽযং হযাস্যো ভগবান্হৃদি মে ভাতু সর্বদা ..
ॐ ভদ্রং কর্ণেভিঃ শ্রুণুযাম দেবাঃ .
ভদ্রং পশ্যেমাক্ষভির্যজত্রাঃ .
স্থিরৈরঙ্গৈস্তুষ্টুবাঁসস্তনূভিঃ .
ব্যশেম দেবহিতং যদাযুঃ ..
স্বস্তি ন ইন্দ্রো বৃদ্ধশ্রবাঃ . স্বস্তি নঃ পূষা বিশ্ববেদাঃ .
স্বস্তি নস্তার্ক্ষ্যো অরিষ্টনেমিঃ . স্বস্তি নো বৃহস্পতির্দধাতু ..
ॐ শান্তিঃ শান্তিঃ শান্তিঃ ..
হরিঃ ॐ .. নারদো ব্রহ্মাণমুপসমেত্যোবাচাধীহি ভগবন্
ব্রহ্মবিদ্যাং বরিষ্ঠাং যযা চিরাত্সর্বপাপং ব্যপোহ্য
ব্রহ্মবিদ্যাং লব্ধ্বৈশ্বর্যবান্ভবতি . ব্রহ্মোবাচ
হযগ্রীবদৈবত্যান্মন্ত্রান্যো বেদ স শ্রুতিস্মৃতীতিহাসপুরাণানি বেদ .
স সর্বৈশ্বর্যবান্ভবতি . ত এতে মন্ত্রাঃ .
বিশ্বোত্তীর্ণস্বরূপায চিন্মযানন্দরূপিণে .
তুভ্যং নমো হযগ্রীব বিদ্যারাজায স্বাহা স্বাহা নমঃ .. ১..
ঋগ্যজুঃসামরূপায বেদাহরণকর্মণে .
প্রণবোদ্গীথবপুষে মহাশ্বশিরসে নমঃ স্বাহা স্বাহা নমঃ .. ২..
উদ্গীথ প্রণবোদ্গীথ সর্ববাগীশ্বরেশ্বর .
সর্ববেদমযাচিন্ত্য সর্বং বোধয বোধয স্বাহা স্বাহা নমঃ .. ৩..
ব্রহ্মাত্রিরবিসবিতৃভার্গবা ঋষযঃ . গাযত্রীত্রিষ্টুবনুষ্টুপ্ ছন্দাংসি .
শ্রীমান্ হযগ্রীবঃ পরমাত্মা দেবতেতি . ল্হৌমিতি বীজম্ .
সোঽহমিতি শক্তিঃ . ল্হূমিতি কীলকম্ . ভোগমোক্ষযোর্বিনিযোগঃ .
অকারোকারমকারৈরঙ্গন্যাসঃ . ধ্যানম্ .
শঙ্খচক্রমহামুদ্রাপুস্তকাঢ্যং চতুর্ভুজম্ .
সংপূর্ণচন্দ্রসংকাশং হযগ্রীবমুপাস্মহে ..
ॐ শ্রীমিতি দ্বে অক্ষরে . ল্হৌমিত্যেকাক্ষরম্ . ॐ নমো
ভগবত ইতি সপ্তাক্ষরাণি . হযগ্রীবাযেতি পঞ্চাক্ষরাণি .
বিষ্ণব ইতি ত্র্যক্ষরাণি . মহ্যং মেধাং প্রজ্ঞামিতি
ষডক্ষরাণি , প্রযচ্ছ স্বাহেতি পঞ্চাক্ষরাণি .
হযগ্রীবস্য তুরীযো ভবতি .. ৪..
ॐ শ্রীমিতি দ্বে অক্ষরে . ল্হৌমিত্যেকাক্ষরম্ . ঐমৈমৈমিতি
ত্রীণ্যক্ষরাণি . ক্লীং ক্লীমিতি দ্বে অক্ষরে . সৌঃ সৌরিতি দ্বে অক্ষরে .
হ্রীমিত্যেকাক্ষরম্ . ॐ নমো ভগবত ইতি সপ্তাক্ষরাণি .
মহ্যং মেধাং প্রজ্ঞামিতি ষডক্ষরাণি . প্রযচ্ছ
স্বাহেতি পঞ্চাক্ষরাণি . পঞ্চমো মনুর্ভবতি .. ৫..
হযগ্রীবৈকাক্ষরেণ ব্রহ্মবিদ্যাং প্রবক্ষ্যামি . ব্রহ্মা
মহেশ্বরায মহেশ্বরঃ সংকর্ষণায সংকর্ষণো নারদায
নারদো ব্যাসায ব্যাসো লোকেভ্যঃ প্রাযচ্ছদিতি
হকারোংসকারোমকারোং ত্রযমেকস্বরূপং ভবতি . ল্হৌ
বীজাক্ষরং ভবতি . বীজাক্ষরেণ ল্হৌং রূপেণ তজ্জাপকানাং
সংপত্সারস্বতৌ ভবতঃ . তত্স্বরূপজ্ঞানাং বৈদেহী
মুক্তিশ্চ ভবতি . দিক্পালানাং রাজ্ঞাং নাগানাং
কিন্নরাণামধিপতির্ভবতি . হযগ্রীবৈকাক্ষরজপশীলাজ্ঞযা
সূর্যাদযঃ স্বতঃ স্বস্বকর্মণি প্রবর্তন্তে . সর্বেষাং
বীজানাং হযগ্রীবৈকাক্ষরবীজমনুত্তমং মন্ত্ররাজাত্মকং
ভবতি . ল্হৌং হযগ্রীবস্বরূপো ভবতি . অমৃতং কুরুকুরু স্বাহা .
তজ্জাপকানাং বাক্সিদ্ধিঃ শ্রীসিদ্ধিরষ্টাঙ্গযোগসিদ্ধিশ্চ
ভবতি . অগম্যাগমনাত্পূতো ভবতি . পতিতসংভাষণাত্পূতো
ভবতি . ব্রহ্মহত্যাদিপাতকৈর্মুক্তো ভবতি . গৃহং গৃহপতিরিব
দেহী দেহান্তে পরমাত্মানং প্রবিশতি . প্রজ্ঞানমানন্দং ব্রহ্ম
তত্ত্বমসি অযমাত্মা ব্রহ্ম অহং ব্রহ্মাস্মীতি মহাবাক্যৈঃ
প্রতিপাদিতমর্থং ত এতে মন্ত্রাঃ প্রতিপাদযন্তি . স্বরব্যঞ্জনভেদেন
দ্বিধা এতে . অথানুমন্ত্রাঞ্জপতি .
যদ্বাগ্বদন্ত্যবিচেতনানি রাষ্ট্রী দেবানাং নিষসাদ মন্দ্রা .
চতস্র ঊর্জং দুদুহে পযাংসি ক্ব স্বিদস্যাঃ পরমং জগাম .. ১..
গৌরীর্মিমায সলিলানি তক্ষত্যেকপদী দ্বিপদী সা চতুষ্পদী .
অষ্টাপদী নবপদী বভূবুষী সহস্রাক্ষরা পরমে ব্যোমন্ .. ২..
ওষ্ঠাপিধানা নকুলী দন্তৈঃ পরিবৃতা পবিঃ .
সর্বস্যৈ বাচ ঈশানা চারু মামিহ বাদযেতি চ বাগ্রসঃ .. ৩..
সসর্পরীরমতিং বাধমান বৃহন্মিমায জমদগ্নিদত্ত .
আসূর্যস্য দুরিতা তনান শ্রবো দেবেষ্বমৃতমজুর্যম্ .. ৪..
য ইমাং ব্রহ্মবিদ্যামেকাদশ্যাং পঠেদ্ধযগ্রীবপ্রভাবেন
মহাপুরুষো ভবতি . স জীবন্মুক্তো ভবতি . ॐ নমো ব্রহ্মণে
ধারণং মে অস্ত্বনিরাকরণং ধারযিতা ভূযাসং কর্ণযোঃ
শ্রুতং মাচ্যোঢ্বং মমামুষ্য ওমিত্যুপনিষত্ ..
ॐ ভদ্রং কর্ণেভিঃ শ্রুণুযাম দেবাঃ . ভদ্রং পশ্যেমাক্ষভির্যজত্রাঃ .
স্থিরৈরঙ্গৈস্তুষ্টুবাঁসস্তনূভির্ব্যশেম দেবহিতং যদাযুঃ ..
ॐ স্বস্তি ন ইন্দ্রো বৃদ্ধশ্রবাঃ . স্বস্তি নঃ পূষা বিশ্ববেদাঃ .
স্বস্তি নস্তার্ক্ষ্যো অরিষ্টনেমিঃ . স্বস্তি নো বৃহস্পতির্দধাতু ..
ॐ শান্তিঃ শান্তিঃ শান্তিঃ .. হরিঃ ॐ তত্সত্ ..
অথ হযগ্রীবোপনিষত্সমাপ্তা ..