গর্ভ

.. গর্ভোপনিষত্ ১৭ ..

যদ্গর্ভোপনিষদ্বেদ্যং গর্ভস্য স্বাত্মবোধকম্ .
শরীরাপহ্নবাত্সিদ্ধং স্বমাত্রং কলযে হরিম্ ..
ॐ সহনাববত্বিতি শান্তিঃ ..
ॐ পঞ্চাত্মকং পঞ্চসু বর্তমানং ষডাশ্রযং
ষড্গুণযোগযুক্তম্ .
তত্সপ্তধাতু ত্রিমলং দ্বিযোনি
চতুর্বিধাহারমযং শরীরং ভবতি ..
পঞ্চাত্মকমিতি কস্মাত্ পৃথিব্যাপস্তেজোবাযুরাকাশমিতি .
অস্মিন্পঞ্চাত্মকে
শরীরে কা পৃথিবী কা আপঃ কিং তেজঃ কো বাযুঃ কিমাকাশম্ .
তত্র যত্কঠিনং সা পৃথিবী যদ্দ্রবং তা আপো যদুষ্ণং
তত্তেজো যত্সঞ্চরতি স বাযুঃ যত্সুষিরং তদাকাশমিত্যুচ্যতে ..
তত্র পৃথিবী ধারণে আপঃ পিণ্ডীকরণে তেজঃ প্রকাশনে
বাযুর্গমনে আকাশমবকাশপ্রদানে . পৃথক্ শ্রোত্রে
শব্দোপলব্ধৌ ত্বক্ স্পর্শে চক্ষুষী রূপে জিহ্বা রসনে
নাসিকাঽঽঘ্রাণে উপস্থশ্চানন্দনেঽপানমুত্সর্গে বুদ্ধ্যা
বুদ্ধ্যতি মনসা সঙ্কল্পযতি বাচা বদতি . ষডাশ্রযমিতি
কস্মাত্ মধুরাম্ললবণতিক্তকটুকষাযরসান্বিন্দতে .
ষড্জর্ষভগান্ধারমধ্যমপঞ্চমধৈবতনিষাদাশ্চেতি .
ইষ্টানিষ্টশব্দসংজ্ঞাঃ প্রতিবিধাঃ সপ্তবিধা ভবন্তি .. ১..
শুক্লো রক্তঃ কৃষ্ণো ধূম্রঃ পীতঃ কপিলঃ পাণ্ডুর ইতি .
সপ্তধাতুমিতি কস্মাত্ যদা দেবদত্তস্য দ্রব্যাদিবিষযা
জাযন্তে .. পরস্পরং সৌম্যগুণত্বাত্ ষড্বিধো রসো
রসাচ্ছোণিতং শোণিতান্মাংসং মাংসান্মেদো মেদসঃ
স্নাবা স্নাব্নোঽস্থীন্যস্থিভ্যো মজ্জা মজ্জ্ঞঃ শুক্রং
শুক্রশোণিতসংযোগাদাবর্ততে গর্ভো হৃদি ব্যবস্থাং
নযতি . হৃদযেঽন্তরাগ্নিঃ অগ্নিস্থানে পিত্তং পিত্তস্থানে
বাযুঃ বাযুস্থানে হৃদযং প্রাজাপত্যাত্ক্রমাত্ .. ২..
ঋতুকালে সংপ্রযোগাদেকরাত্রোষিতং কলিলং ভবতি
সপ্তরাত্রোষিতং বুদ্বুদং ভবতি অর্ধমাসাভ্যন্তরেণ পিণ্ডো
ভবতি মাসাভ্যন্তরেণ কঠিনো ভবতি মাসদ্বযেন শিরঃ
সংপদ্যতে মাসত্রযেণ পাদপ্রবেশো ভবতি . অথ চতুর্থে মাসে
জঠরকটিপ্রদেশো ভবতি . পঞ্চমে মাসে পৃষ্ঠবংশো ভবতি .
ষষ্ঠে মাসে মুখনাসিকাক্ষিশ্রোত্রাণি ভবন্তি . সপ্তমে
মাসে জীবেন সংযুক্তো ভবতি . অষ্টমে মাসে সর্বসংপূর্ণো
ভবতি . পিতূ রেতোঽতিরিক্তাত্ পুরুষো ভবতি . মাতুঃ
রেতোঽতিরিক্তাত্স্ত্রিযো ভবন্ত্যুভযোর্বীজতুল্যত্বান্নপুংসকো
ভবতি . ব্যাকুলিতমনসোঽন্ধাঃ খঞ্জাঃ কুব্জা বামনা
ভবন্তি . অন্যোন্যবাযুপরিপীডিতশুক্রদ্বৈধ্যাদ্দ্বিধা
তনুঃ স্যাত্ততো যুগ্মাঃ প্রজাযন্তে .. পঞ্চাত্মকঃ সমর্থঃ
পঞ্চাত্মকতেজসেদ্ধরসশ্চ সম্যগ্জ্ঞানাত্ ধ্যানাত্
অক্ষরমোঙ্কারং চিন্তযতি . তদেতদেকাক্ষরং জ্ঞাত্বাঽষ্টৌ
প্রকৃতযঃ ষোডশ বিকারাঃ শরীরে তস্যৈবে দেহিনাম্ . অথ
মাত্রাঽশিতপীতনাডীসূত্রগতেন প্রাণ আপ্যাযতে . অথ
নবমে মাসি সর্বলক্ষণসংপূর্ণো ভবতি পূর্বজাতীঃ স্মরতি
কৃতাকৃতং চ কর্ম বিভাতি শুভাশুভং চ কর্ম বিন্দতি .. ৩..
নানাযোনিসহস্রাণি দৃষ্ট্বা চৈব ততো মযা .
আহারা বিবিধা ভুক্তাঃ পীতাশ্চ বিবিধাঃ স্তনাঃ ..
জাতস্যৈব মৃতস্যৈব জন্ম চৈব পুনঃ পুনঃ .
অহো দুঃখোদধৌ মগ্নঃ ন পশ্যামি প্রতিক্রিযাম্ ..
যন্মযা পরিজনস্যার্থে কৃতং কর্ম শুভাশুভম্ .
একাকী তেন দহ্যামি গতাস্তে ফলভোগিনঃ ..
যদি যোন্যাং প্রমুঞ্চামি সাংখ্যং যোগং সমাশ্রযে .
অশুভক্ষযকর্তারং ফলমুক্তিপ্রদাযকম্ ..
যদি যোন্যাং প্রমুঞ্চামি তং প্রপদ্যে মহেশ্বরম্ .
অশুভক্ষযকর্তারং ফলমুক্তিপ্রদাযকম্ ..
যদি যোন্যাং প্রমুঞ্চামি তং প্রপদ্যে
ভগবন্তং নারাযণং দেবম্ .
অশুভক্ষযকর্তারং ফলমুক্তিপ্রদাযকম্ .
যদি যোন্যাং প্রমুঞ্চামি ধ্যাযে ব্রহ্ম সনাতনম্ ..
অথ জন্তুঃ স্ত্রীযোনিশতং যোনিদ্বারি
সংপ্রাপ্তো যন্ত্রেণাপীড্যমানো মহতা দুঃখেন জাতমাত্রস্তু
বৈষ্ণবেন বাযুনা সংস্পৃশ্যতে তদা ন স্মরতি জন্মমরণং
ন চ কর্ম শুভাশুভম্ .. ৪..
শরীরমিতি কস্মাত্
সাক্ষাদগ্নযো হ্যত্র শ্রিযন্তে জ্ঞানাগ্নির্দর্শনাগ্নিঃ
কোষ্ঠাগ্নিরিতি . তত্র কোষ্ঠাগ্নির্নামাশিতপীতলেহ্যচোষ্যং
পচতীতি . দর্শনাগ্নী রূপাদীনাং দর্শনং করোতি .
জ্ঞানাগ্নিঃ শুভাশুভং চ কর্ম বিন্দতি . তত্র ত্রীণি
স্থানানি ভবন্তি হৃদযে দক্ষিণাগ্নিরুদরে গার্হপত্যং
মুখমাহবনীযমাত্মা যজমানো বুদ্ধিং পত্নীং নিধায
মনো ব্রহ্মা লোভাদযঃ পশবো ধৃতির্দীক্ষা সন্তোষশ্চ
বুদ্ধীন্দ্রিযাণি যজ্ঞপাত্রাণি কর্মেন্দ্রিযাণি হবীংষি শিরঃ
কপালং কেশা দর্ভা মুখমন্তর্বেদিঃ চতুষ্কপালং
শিরঃ ষোডশ পার্শ্বদন্তোষ্ঠপটলানি সপ্তোত্তরং
মর্মশতং সাশীতিকং সন্ধিশতং সনবকং স্নাযুশতং
সপ্ত শিরাসতানি পঞ্চ মজ্জাশতানি অস্থীনি চ হ
বৈ ত্রীণি শতানি ষষ্টিশ্চার্ধচতস্রো রোমাণি কোট্যো
হৃদযং পলান্যষ্টৌ দ্বাদশ পলানি জিহ্বা পিত্তপ্রস্থং
কফস্যাঢকং শুক্লং কুডবং মেদঃ প্রস্থৌ দ্বাবনিযতং
মূত্রপুরীষমাহারপরিমাণাত্ . পৈপ্পলাদং মোক্ষশাস্ত্রং
পরিসমাপ্তং পৈপ্পলাদং মোক্ষশাস্ত্রং পরিসমাপ্তমিতি ..
ॐ
সহ নাববত্বিতি শান্তিঃ ..
ইতি গর্ভোপনিষত্সমাপ্তা ..