মুক্তিকোপনিষত্

.. মুক্তিকোপনিষত্ ..

ঈশাদ্যষ্টোত্তরশতবেদান্তপটলাশযম্ .
মুক্তিকোপনিষদ্বেদ্যং রামচন্দ্রপদং ভজে ..
হরিঃ ॐ পূর্ণমদঃ পূর্ণমিদং পূর্ণাত্পূর্ণমুদচ্যতে .
পূর্ণস্য পূর্ণমাদায পূর্ণমেবাবশিষ্যতে ..
ॐ শান্তিঃ শান্তিঃ শান্তিঃ ..
ॐ অযোধ্যানগরে রম্যে রত্নমণ্ডপমধ্যমে .
সীতাভরতসৌমিত্রিশত্রুঘ্নাদ্যৈঃ সমন্বিতম্ .. ১..
সনকাদ্যৈর্মুনিগণৈর্বসিষ্ঠাদ্যৈঃ শুকাদিভিঃ .
অন্যৈর্ভাগবতৈশ্চাপি স্তূযমানমহর্নিশম্ .. ২..
ধীবিক্রিযাসহস্রাণাং সাক্ষিণং নির্বিকারিণম্ .
স্বরূপধ্যাননিরতং সমাধিবিরমে হরিম্ .. ৩..
ভক্ত্যা শুশ্রূষযা রামং স্তুবন্পপ্রচ্ছ মারুতিঃ .
রাম ত্বং পরমাত্মসি সচ্চিদানন্দবিগ্রহঃ .. ৪..
ইদানীং ত্বাং রঘুশ্রেষ্ঠ প্রণমামি মুহুর্মুহুঃ .
ত্বদ্রূপং জ্ঞাতুমিচ্ছামি তত্ত্বতো রাম মুক্তযে .. ৫..
অনাযাসেন যেনাহং মুচ্যেযং ভববন্ধনাত্ .
কৃপযা বদ মে রাম যেন মুক্তো ভবাম্যহম্ .. ৬..
সাধু পৃষ্টং মহাবাহো বদামি শৃণু তত্ত্বতঃ .
বেদান্তে সুপ্রতিষ্ঠোঽহং বেদান্তং সমুপাশ্রয .. ৭..
বেদান্তাঃ কে রঘুশ্রেষ্ঠ বর্তন্তে কুত্র তে বদ .
হনূমঞ্ছৃণু বক্ষ্যামি বেদান্তস্থিতিমঞ্জসা .. ৮..
নিশ্বাসভূতা মে বিষ্ণোর্বেদা জাতাঃ সুবিস্তরাঃ .
তিলেষু তৈলবদ্বেদে বেদান্তঃ সুপ্রতিষ্ঠিতঃ .. ৯..
রাম বেদাঃ কতিবিধাস্তেষাং শাখাশ্চ রাঘব .
তাসূপনিষদাঃ কাঃ স্যুঃ কৃপযা বদ তত্ত্বতঃ .. ১০..
শ্রীরাম উবাচ .
ঋগ্বেদাদিবিভাগেন বেদাশ্চত্বার ঈরিতাঃ .
তেষাং শাখা হ্যনেকাঃ স্যুস্তাসূপনিষদস্তথা .. ১১..
ঋগ্বেদস্য তু শাখাঃ স্যুরেকবিংশতিসঙ্খ্যকাঃ .
নবাধিকশতং শাখা যজুষো মারুতাত্মজ .. ১২..
সহস্রসঙ্খ্যযা জাতাঃ শাখাঃ সাম্নঃ পরন্তপ .
অথর্বণস্য শাখাঃ স্যুঃ পঞ্চাশদ্ভেদতো হরে .. ১৩..
একৈকস্যাস্তু শাখাযা একৈকোপনিষন্মতা .
তাসামেকামৃচং যশ্চ পঠতে ভক্তিতো মযি .. ১৪..
স মত্সাযুজ্যপদবীং প্রাপ্নোতি মুনিদুর্লভাম্ .
রাম কেচিন্মুনিশ্রেষ্ঠা মুক্তিরেকেতি চক্ষিরে .. ১৫..
কেচিত্ত্বন্নামভজনাত্কাশ্যাং তারোপদেশতঃ .
অন্যেতু সাঙ্খ্যযোগেন ভক্তিযোগেন চাপরে .. ১৬..
অন্যে বেদান্তবাক্যার্থবিচারাত্পরমর্ষযঃ .
সালোক্যাদিবিভাগেন চতুর্ধা মুক্তিরীরিতা .. ১৭..
সহোবাচ শ্রীরামঃ .
কৈবল্যমুক্তিরেকৈব পরমার্থিকরূপিণী .
দুরাচাররতো বাপি মন্নামভজনাত্কপে .. ১৮..
সালোক্যমুক্তিমাপ্নোতি ন তু লোকান্তরাদিকম্ .
কাশ্যাং তু ব্রহ্মনালেঽস্মিন্মৃতো মত্তারমাপ্নুযাত্ .. ১৯..
পুনরাবৃত্তিরহিতাং মুক্তিং প্রাপ্নোতি মানবঃ .
যত্র কুত্রাপি বা কাশ্যাং মরণে স মহেশ্বরঃ .. ২০..
জন্তোর্দক্ষিণকর্ণে তু মত্তারং সমুপাদিশেত্ .
নির্ধূতাশেষপাপৌঘো মত্সারূপ্যং ভজত্যযম্ .. ২১..
সৈব সালোক্যসারূপ্যমুক্তিরত্যভিধীযতে .
সদাচাররতো ভূত্বা দ্বিজো নিত্যমনন্যধীঃ .. ২২..
মযি সর্বাত্মকো ভাবো মত্সামীপ্যং ভজত্যযম্ .
সৈব সালোক্যসারূপ্যসামীপ্যা মুক্তিরিষ্যতে .. ২৩..
গুরূপদিষ্টমার্গেণ ধ্যাযন্মদ্গুণমব্যযম্ .
মত্সাযুজ্যং দ্বিজঃ সম্যগ্ভজেদ্ভ্রমরকীটবত্ .. ২৪..
সৈব সাযুজ্যমুক্তিঃ স্যাদ্ব্রহ্মানন্দকরী শিবা .
চতুর্বিধা তু যা মুক্তির্মদুপাসনযা ভবেত্ .. ২৫..
ইযং কৈবল্যমুক্তিস্তু কেনোপাযেন সিদ্ধ্যতি .
মাণ্ডূক্যমেকমেবালং মুমুক্ষূণাং বিমুক্তযে .. ২৬..
তথাপ্যসিদ্ধং চেজ্জ্ঞানং দশোপনিষদং পঠ .
জ্ঞানং লব্ধ্বা চিরাদেব মামকং ধাম যাস্যসি .. ২৭..
তথাপি দৃঢতা ন চেদ্বিদ্জ্ঞানস্যাঞ্জনাসুত .
দ্বাত্রিংশাখ্যোপনিষদং সমভ্যস্য নিবর্তয .. ২৮..
বিদেহমুক্তাবিচ্ছা চেদষ্টোত্তরশতং পঠ .
তাসাং ক্রম সশান্তিং চ শ্রুণু বক্ষ্যামি তত্ত্বতঃ .. ২৯..
ঈশকেনকঠপ্রশ্নমুণ্ডমাণ্ডূক্যতিত্তিরিঃ .
ঐতরেযং চ ছান্দোগ্যং বৃহদারণ্যকং তথা .. ৩০..
ব্রহ্মকৈবল্যজাবালশ্বেতাশ্বো হংস আরুণিঃ .
গর্ভো নারাযণো হংসো বিন্দুর্নাদশিরঃ শিখা .. ৩১..
মৈত্রাযণী কৌষীতকী বৃহজ্জাবালতাপনী .
কালাগ্নিরুদ্রমৈত্রেযী সুবালক্ষুরিমন্ত্রিকা .. ৩২..
সর্বসারং নিরালম্বং রহস্যং বজ্রসূচিকম্ .
তেজোনাদধ্যানবিদ্যাযোগতত্ত্বাত্মবোধকম্ .. ৩৩..
পরিব্রাট্ ত্রিশিখী সীতা চূডা নির্বাণমণ্ডলম্ .
দক্ষিণা শরভং স্কন্দং মহানারাযণাহ্বযম্ .. ৩৪..
রহস্যং রামতপনং বাসুদেবং চ মুদ্গলম্ .
শাণ্ডিল্যং পৈঙ্গলং ভিক্ষুমহচ্ছারীরকং শিখা .. ৩৫..
তুরীযাতীতসংন্যাসপরিব্রাজাক্ষমালিকা .
অব্যক্তৈকাক্ষরং পূর্ণা সূর্যাক্ষ্যধ্যাত্মকুণ্ডিকা .. ৩৬..
সাবিত্র্যাত্মা পাশুপতং পরং ব্রহ্মাবধূতকম্ .
ত্রিপুরাতপনং দেবীত্রিপুরা কঠভাবনা .
হৃদযং কুণ্ডলী ভস্ম রুদ্রাক্ষগণদর্শনম্ .. ৩৭..
তারসারমহাবাক্য পঞ্চব্রহ্মাগ্নিহোত্রকম্ .
গোপালতপনং কৃষ্ণং যাজ্ঞবল্ক্যং বরাহকম্ .. ৩৮..
শাট্যাযনী হযগ্রীবং দত্তাত্রেযং চ গারুডম্ .
কলিজাবালিসৌভাগ্যরহস্যঋচমুক্তিকা .. ৩৯..
এবমষ্টোত্তরশতং ভাবনাত্রযনাশনম্ .
জ্ঞানবৈরাগ্যদং পুংসাং বাসনাত্রযনাশনম্ .. ৪০..
পূর্বোত্তরেষু বিহিততত্তচ্ছান্তিপুরঃসরম্ .
বেদবিদ্যাব্রতস্নাতদেশিকস্য মুখাত্স্বযম্ .. ৪১..
গৃহীত্বাষ্টোত্তরশতং যে পঠন্তি দ্বিজোত্তমাঃ .
প্রারব্ধক্ষযপর্যন্তং জীবন্মুক্তা ভবন্তি তে .. ৪২..
ততঃ কালবশাদেব প্রারব্ধে তু ক্ষযং গতে .
বৈদেহীং মামকীং মুক্তিং যান্তি নাস্ত্যত্রসংশযঃ .. ৪৩..
সর্বোপনিষদাং মধ্যে সারমষ্টোত্তরশতম্ .
সকৃচ্ছ্রবণমাত্রেণ সর্বাঘৌঘনিকৃন্তনম্ .. ৪৪..
মযোপদিষ্টং শিষ্যায তুভ্যং পবননন্দন .
ইদং শাস্ত্রং মযাদিষ্টং গুহ্যমষ্টোত্তরং শতম্ .. ৪৫..
জ্ঞানতোঽজ্ঞানতো বাপি পঠতাং বন্ধমোচকম্ .
রাজ্যং দেযং ধনং দেযং যাচতঃ কামপূরণম্ .. ৪৫..
ইদমষ্টোত্তরশতং ন দেযং যস্য কস্যচিত্ .
নাস্তিকায কৃতঘ্নায দুরাচাররতায বৈ .. ৪৭..
মদ্ভক্তিবিমুখাযাপি শাস্ত্রগর্তেষু মুহ্যতে .
গুরুভক্তিবিহীনায দাতব্যং ন কদাচন .. ৪৮..
সেবাপরায শিষ্যায হিতপুত্রায মারুতে .
মদ্ভক্তায সুশীলায কুলীনায সুমেধসে .. ৪৯..
সম্যক্ পরীক্ষ্য দাতব্যমেবমষ্টোত্তরং শতম্ .
যঃ পঠেচ্ছৃণুযাদ্বাপি স মামেতি ন সংশযঃ .
তদেতদৃচাভ্যুক্তম্ .
বিদ্যা হ বৈ ব্রাহ্মণমাজগাম
     গোপায মা শেবধিষ্টেএঽহমস্মি .
অসূযকাযানৃজবে শঠায
     মা মা ব্রূযা বীর্যবতী তথা স্যাম্ .
যমেব বিদ্যাশ্রুতমপ্রমত্তং
     মেধাবিনং ব্রহ্মচর্যোপপন্নম্ .
তস্মা ইমামুপসন্নায সম্যক্
     পরীক্ষ্য দদ্যাদ্বৈষ্ণবীমাত্মনিষ্ঠাম্ .. ১.. ইতি ..
অথ হৈনং শ্রীরামচন্দ্রং মারুতিঃ পপ্রচ্ছ
ঋগ্বেদাদিবিভাগেন পৃথক্ শান্তিমনুব্রূহীতি .
স হোবাচ শ্রীরামঃ .
ঐতরেযকৌষীতকীনাদবিন্দ্বাত্মপ্রবোধনির্বাণ-
মুদ্গলাক্ষমালিকাত্রিপুরাসৌভাগ্যবহ্বৃচা
নামৃগ্বেদগতানাং দশসংখ্যাকানামুপনিষদাং
বাঙ্মে মনসীতি শান্তিঃ .. ১..
ঈশাবাস্যবৃহদারণ্যজাবালহংসপরমহংসসুবাল-
মন্ত্রিকানিরালম্বত্রিশিখীব্রাহ্মণমণ্ডলব্রাহ্মণাদ্বযতারক-
পৈঙ্গলভিক্ষুতুরীযাতীতাধ্যাত্মতারসারযাজ্ঞবল্ক্য-
শাট্যাযনীমুক্তিকানাং শুক্লযজুর্বেদগতানামেকোনবিংশতি-
সংখ্যাকানামুপনিষদাং পূর্ণমদ ইতি শান্তিঃ .. ২..
কঠবল্লীতৈত্তিরীযকব্রহ্মকৈবল্যশ্বেতাশ্বতরগর্ভ-
নারাযণামৃতবিন্দ্বমৃতনাদকালাগ্নিরুদ্রক্ষুরিকা-
সর্বসারশুকরহস্যতেজোবিন্দুধ্যানবিন্দুব্রহ্মবিদ্যা-
যোগতত্ত্বদক্ষিণামূর্তিস্কন্দশারীরকযোগশিখৈকাক্ষর-
অক্ষ্যবধূতকঠরুদ্রহৃদযযোগকুণ্ডলিনীপঞ্চব্রহ্ম-
প্রাণাগ্নিহোত্রবরাহকলিসন্তরণসরস্বতীরহস্যানাং
কৃষ্ণযজুর্বেদগতানাং দ্বাত্রিংশত্সংখ্যাকানমুপনিষদাং
সহ নাববত্বিতি শান্তিঃ .. ৩..
কেনছান্দোগ্যারুণিমৈত্রাযণিমৈত্রেযীবজ্রসূচিকাযোগচূডামণি-
বাসুদেবমহত্সংন্যাসাব্যক্তকুণ্ডিকাসাবিত্রীরুদ্রাক্ষজাবালদর্শন-
জাবালীনাং সামবেদগতানাং ষোডশসংখ্যাকানা-
মুপনিষদানামাপ্যাযন্ত্বিতি শান্তিঃ .. ৪..
প্রশ্নমুণ্ডকমাণ্ডুক্যাথর্বশিরোঽথর্বশিখাবৃহজ্জাবাল-
নৃসিংহতাপনীনারদপরিব্রাজকসীতাশরভমহানারাযণ-
রামরহস্যরামতাপনীশাণ্ডিল্যপরমহংসপরিব্রাজক-
অন্নপূর্ণাসূর্যাত্মপাশুপতপরব্রহ্মত্রিপুরাতপনদেবীভাবনা-
ব্রহ্মজাবালগণপতিমহাবাক্যগোপালতপনকৃষ্ণহযগ্রীব-
দত্তাত্রেযগারুডানামথর্ববেদগতানামেকত্রিংশত্সংখ্যাকানা-
মুপনিষদাং ভদ্রং কর্ণেভিরিতি শান্তিঃ .. ৫..
মুমুক্ষবঃ পুরুষাঃ সাধনচতুষ্টযসংপন্নাঃ
শ্রদ্ধাবন্তঃ সুকুলভবং শ্রোত্রিযং শাস্ত্রবাত্সল্য-
গুণবন্তমকুটিলং সর্বভূতহিতেরতং দযাসমুদ্রং সদ্গুরুং
বিধিবদুপসংগম্যোপহারপাণযোঽষ্টোত্তরশতোপনিষদং
বিধিবদধীত্য শ্রবণমনননিদিধ্যাসনানি নৈরন্তর্যেণ কৃত্বা
প্রারব্ধক্ষযাদ্দেহত্রযভংগং প্রাপ্যোপাধিবিনির্মুক্ত-
ঘটাকাশবত্পরিপূর্ণতা বিদেহমুক্তিঃ . সৈব কৈবল্যমুক্তিরিতি .
অত এব ব্রহ্মলোকস্থা অপি ব্রহ্মমুখাদ্বেদান্তশ্রবণাদি কৃত্বা
তেন সহ কৈবল্যং লভন্তে . অতঃ সর্বেষাং কৈবল্যমুক্তির্জ্ঞানমাত্রেণোক্তা .
ন কর্মসাংখ্যযোগোপাসনাদিভিরিত্যুপনিষত্ ..
ইতি প্রথমোঽধ্যাযঃ .. ১..
তথা হৈনং শ্রীরামচন্দ্রং মারুতিঃ পপ্রচ্ছ .
কেযং বা তত্সিদ্ধিঃ সিদ্ধ্যা বা কিং প্রযোজনমিতি .
সহোবাচ শ্রীরামঃ . পুরুষস্য কর্তৃত্বভোক্তৃত্ব-
সুখদুঃখাদিলক্ষণশ্চিত্তধর্মঃ ক্লেশরূপত্বাদ্বন্ধো
ভবতি . তন্নিরোধনং জীবন্মুক্তিঃ . উপাধিবিনির্মুক্ত-
ঘটাকাশবত্প্রারব্ধক্ষযাদ্বিদেহমুক্তিঃ .
জীবন্মুক্তিবিদেহমুক্ত্যোরষ্টোত্তরশতোপনিষদঃ প্রমাণম্ .
কর্তৃত্বাদিদুঃখনিবৃত্তিদ্বারা নিত্যানন্দাবাপ্তিঃ প্রযোজনং
ভবতি . তত্পুরুষপ্রযত্নসাধ্যং ভবতি . যথা পুত্রকামেষ্টিনা
পুত্রং বাণিজ্যাদিনা বিত্তং জ্যোতিষ্টোমেন স্বর্গং তথা
পুরুষপ্রযত্নসাধ্যবেদান্তশ্রবণাদিজনিতসমাধিনা
জীবন্মুক্ত্যাদিলাভো ভবতি . সর্ববাসনাক্ষযাত্তল্লাভঃ .
অত্র শ্লোকা ভবন্তি ..
উচ্ছাস্ত্রং শাস্ত্রিতং চেতি পৌরুষং দ্বিবিধং মতম্ .
অত্রোচ্ছস্ত্রমনর্থায পরমার্থায শাস্ত্রিতম্ .. ১..
লোকবাসনযা জন্তোঃ শাস্ত্রবাসনযাপি চ .
দেহবাসনযা জ্ঞানং যথাবন্নৈব জাযতে .. ২..
দ্বিবিধা বাসনাব্যূহঃ শুভশ্চৈবাশুভশ্চ তৌ .
বাসনৌঘেন শুদ্ধেন তত্র চেদনুনীযসে .. ৩..
তত্ক্রমেণাশু তেনৈব মামকং পদমাপ্নুহি .
অথ চেদশুভো ভাবস্ত্বাং যোজযতি সংকটে .. ৪..
প্রাক্তনস্তদসৌ যত্নাজ্জেতব্যো ভবতা কপে .
শুভাশুভাভ্যাং মার্গাভ্যাং বহন্তী বাসনাসরিত্ .. ৫..
পৌরুষেণ প্রযত্নেন যোজনীযা শুভে পথি .
অশুভেষু সমাবিষ্টং শুভেষ্বেবাবতারযেত্ .. ৬..
অশুভাচ্চালিতং যাতি শুভং তস্মাদপীতরত্ .
পৌরুষেণ প্রযত্নেন লালযেচ্চিত্তবালকম্ ..৭..
দ্রাগভ্যাসবশাদ্যাতি যদা তে বাসনোদযম্ .
তদাভ্যাসস্য সাফল্যং বিদ্ধি ত্বমমরিমর্দন .. ৮..
সন্দিগ্ধাযামপি ভৃশং শুভামেব সমাচর .
শুভাযাং বাসনাবৃদ্ধৌ ন দোষায মরুত্সুত .. ৯..
বাসনাক্ষযবিজ্ঞানমনোনাশা মহামতে .
সমকালং চিরাভ্যস্তা ভবন্তি ফলদা মতাঃ .. ১০..
ত্রয এবং সমং যাবন্নাভ্যস্তাশ্চ পুনঃ পুনঃ .
তাবন্ন পদসংপ্রাপ্তির্ভবত্যপি সমাশতৈঃ .. ১১..
একৈকশো নিষেব্যন্তে যদ্যেতে চিরমপ্যলম্ .
তন্ন সিদ্ধিং প্রযচ্ছন্তি মন্ত্রাঃ সংকীর্তিতা ইব .. ১২..
ত্রিভিরেতৈশ্চিরাভ্যস্তৈর্হৃদযগ্রন্থযো দৃঢাঃ .
নিঃশঙ্কমেব ত্রুঠ্যন্তি বিসচ্ছেদাদ্গুণা ইব .. ১৩..
জন্মান্তশতাভ্যস্তা মিথ্যা সংসারবাসনা .
সা চিরাভ্যাসযোগেন বিনা ন ক্ষীযতে ক্বচিত্ .. ১৪..
তস্মাত্সৌম্য প্রযত্নেন পৌরুষেণ বিবেকিনা .
ভোগেচ্ছাং দূরতস্ত্যক্ত্বা ত্রযমেব সমাশ্রয .. ১৫..
তস্মাদ্বাসনযা যুক্তং মনো বদ্ধং বিদুর্বুধাঃ .
সম্যগ্বাসনযা ত্যক্তং মুক্তমিত্যভিধীযতে .
মনোনির্বাসনীভাবমাচরাশু মহাকপে .. ১৬..
সম্যগালোচনাত্সত্যাদ্বাসনা প্রবিলীযতে .
বাসনাবিলযে চেতঃ শমমাযাতি দীপবত্ .. ১৭..
বাসনাং সংপরিত্যজ্য মযি চিন্মাত্র বিগ্রহে .
যস্তিষ্ঠতি গতো ব্যগ্রঃ সোঽহং সচ্চিত্সুখাত্মকঃ .. ১৮..
সমাধিমথ কার্যাণি মা করোতু করোতু বা .
হৃদযেনাত্তসর্বেহো মুক্ত এবোত্তমাশযঃ .. ১৯..
নৈষ্কর্ম্যেণ ন তস্যার্থস্তস্যার্থোঽস্তি ন কর্মভিঃ .
ন সসাধনজাপ্যাভ্যাং যস্য নির্বাসনং মনঃ .. ২০..
সংত্যক্তবাসনান্মৌনাদৃতে নাস্ত্যুত্তমং পদম্ .. ২১..
বাসনাহীনমপ্যেতচ্চক্ষুরাদীন্দ্রিযং স্বতঃ .
প্রবর্ততে বহিঃ স্বাঽর্থে বাসনামাত্রকারণম্ .. ২২..
অযত্নোপনতেষ্বক্ষি দৃগ্দ্রব্যেষু যথা পুনঃ .
নীরাগমেব পততি তদ্বত্কার্যেষু ধীরধীঃ .. ২৩..
ভাবসংবিত্প্রকটিতামনুরূপা চ মারুতে .
চিত্তস্যোত্পত্যুপরমা বাসনাং মুনযো বিদুঃ .. ২৪..
দৃঢাভ্যস্তপদার্থৈকভাবনাদতিচঞ্চলম্ .
চিত্তং সংজাযতে জন্মজরামরণকারণম্ .. ২৫..
বাসনাবশতঃ প্রাণস্পন্দস্তেন চ বাসনা .
ক্রিযতে চিত্তবীজস্য তেন বীজাঙ্কুরক্রমঃ .. ২৬..
দ্বে বীজে চিত্তবৃক্ষস্য প্রাণস্পন্দনবাসনে .
একস্মিংশ্চ তযোঃ ক্ষীণে ক্ষিপ্রং দ্বে অপি নশ্যতঃ .. ২৭..
অসঙ্গব্যবহারত্বাদ্ভবভাবনবর্জনাত্ .
শরীরনাশদর্শিত্বাদ্বাসনা ন প্রবর্ততে .
বাসনাসংপরিত্যাগাচ্চিতং গচ্ছত্যচিত্ততাম্ .. ২৮..
অবাসনত্বাত্সততং যদা ন মনুতে মনঃ .
অমনস্তা তদোদেতি পরমোপশমপ্রদা .. ২৯..
অব্যুত্পন্নমনা যাবদ্ভবানজ্ঞাততত্পদঃ .
গুরুশাস্ত্রপ্রমাণৈস্তু নির্ণীতং তাবদাচর .. ৩০..
ততঃ পক্বকষাযেণ নূনং বিজ্ঞাত বস্তুনা .
শুভোঽপ্যসৌ ত্বযা ত্যাজ্যো বাসনৌঘো নিরাধিনা .. ৩১..
দ্বিবিধচিত্তনাশোঽস্তি সরূপোঽরূপ এব চ .
জীবন্মুক্তঃ সরূপঃ স্যাদরূপো দেহমুক্তিগঃ .. ৩২..
অস্য নাশমিদানীং ত্বং পাবনে শ্রুণু সাদরম্ .. ৩৩.
চিত্তানাশাভিধানং হি যদা তে বিদ্যতে পুনঃ .
মৈত্র্যাদিভির্গুণৈর্যুক্তং শান্তিমেতি ন সংশযঃ .
ভূযোজন্মবিনির্মুক্তং জীবন্মুক্তস্য তন্মনঃ .. ৩৪..
সরূপোঽসৌ মনোনাশো জীবন্মুক্তস্য বিদ্যতে .
অরূপস্তু মনোনাশো বৈদেহী মুক্তিগো ভবেত্ .. ৩৫..
সহস্রাঙ্কুরশাখাত্মফলপল্লবশালিনঃ .. ৩৬..
অস্য সংসারবৃক্ষস্য মনোমূলমিদং স্থিতম্ .
সংকল্প এব তন্মন্যে সংকল্পোপশমেন তত্ .. ৩৭..
শোষযাশু যথা শোষমেতি সংসারপাদপঃ .
উপায এক এবাস্তি মনসঃ স্বস্য নিগ্রহে .. ৩৮..
মনসোঽভ্যুদযো নাশো মনোনাশো মহোদযঃ .
জ্ঞমনো নাশমভ্যেতি মনো জ্ঞস্য হি শৃঙ্খলা .. ৩৯..
তাবন্নিশীব বেতালা বল্গন্তি হৃদি বাসনাঃ .
একতত্ত্বদৃঢাভ্যাসাদ্যাবন্ন বিজিতং মনঃ .. ৪০..
প্রক্ষীণচিত্তদর্পস্য নিগৃহীতেন্দ্রিযদ্বিষঃ .
পদ্মিন্য ইব হেমন্তে ক্ষীযন্তে ভোগবাসনাঃ .. ৪১..
হস্তং হস্তেন সংপীড্য দন্তৈর্দন্তান্বিচূর্ণ্য চ .
অঙ্গান্যঙ্গৈঃ সমাক্রম্য জযেদাদৌ স্বকং মনঃ .. ৪২..
উপবিশ্যোপবিশ্যৈকাং চিন্তকেন মুহুর্মুহুঃ .
ন শক্যতে মনো জেতুং বিনা যুক্তিমনিন্দিতাম্ .. ৪৩..
অঙ্কুশেন বিনা মত্তো যথা দুষ্টমতঙ্গজঃ .
অধ্যাত্মবিদ্যাধিগমঃ সাধুসংগতিরেব চ .. ৪৪..
বাসনাসংপরিত্যাগঃ প্রাণস্পন্দনিরোধনম্ .
এতাস্তা যুক্তযঃ পুষ্টাঃ সন্তি চিত্তজযে কিল .. ৪৫..
সতীষু যুক্তিষ্বেতাসু হঠান্নিযমন্তি যে .
চেতসো দীপমুত্সৃজ্য বিচিন্বন্তি তমোঽঞ্জনৈঃ .. ৪৬..
বিমূঢাঃ কর্তুমুদ্যুক্তা যে হঠাচ্চেতসো জযম্ .
তে নিবধ্নন্তি নাগেন্দ্রমুন্মত্তং বিসতন্তুভিঃ .. ৪৭..
দ্বে বীজে চিত্তবৃক্ষস্য বৃত্তিব্রততিধারণঃ .
একং প্রাণপরিস্পন্দো দ্বিতীযং দৃঢভাবনা .. ৪৮..
সা হি সর্বগতা সংবিত্প্রাণাস্পন্দেন চাল্যতে .
চিত্তৈকাগ্র্যাদ্যতো জ্ঞানমুক্তং সমুপজাযতে .. ৪৯..
তত্সাধনমথো ধ্যানং যথাবদুপদিশ্যতে .
বিনাপ্যবিকৃতিং কৃত্স্নাং সংভবব্যত্যযক্রমাত্ .
যশোঽরিষ্টং চ চিন্মাত্রং চিদানন্দং বিচিন্তয .. ৫০..
অপানেঽস্তংগতে প্রাণো যাবন্নাভ্যুদিতো হৃদি .
তাবত্সা কুংভকাবস্থা যোগিভির্যানুভূযতে .. ৫১..
বহিরস্তংগতে প্রাণে যাবন্নাপান উদ্গতঃ .
তাবত্পূর্ণাং সমাবস্থাং বহিষ্ঠং কুম্ভকং বিদুঃ .. ৫২..
ব্রহ্মাকারমনোবৃত্তিপ্রবাহোঽহংকৃতং বিনা .
সংপ্রজ্ঞাতসমাধিঃ স্যাদ্ধ্যানাভ্যাসপ্রকর্ষতঃ .. ৫৩..
প্রশান্তবৃত্তিকং চিত্তং পরমানন্দদাযকম্ .
অসংপ্রজ্ঞাতনামাযং সমাধির্যোগিনাং প্রিযঃ .. ৫৪..
প্রভাশূন্যং মনঃশূন্যং বুদ্ধিশূন্যং চিদাত্মকম্ .
অতদ্ব্যাবৃত্তিরূপোঽসৌ সমাধির্মুনিভাবিতঃ .. ৫৫..
ঊর্ধ্বপূর্ণমধঃপূর্ণং মধ্যপূর্ণং শিবাত্মকম্ .
সাক্ষাদ্বিধিমুখো হ্যেষ সমাধিঃ পারমার্থিকঃ .. ৫৬..
দৃঢভাবনযা ত্যক্তপূর্বাপরবিচারণম্ .
যদাদানং পদার্থস্য বাসনা সা প্রকীর্তিতা .. ৫৭..
ভাবিতং তীব্রসংবেগাদাত্মনা যত্তদেব সঃ .
ভবত্যাশু কপিশ্রেষ্ঠ বিগতেতরবাসনঃ .. ৫৮..
তাদৃগ্রূপো হি পুরুষো বাসনাবিবশীকৃতঃ .
সংপশ্যতি যদৈবৈতত্সদ্বস্ত্বিতি বিমুহ্যতি .. ৫৯..
বাসনাবেগবৈচিত্র্যাত্স্বরূপং ন জহাতি তত্ .
ভ্রান্তং পশ্যতি দুর্দৃষ্টিঃ সর্বং মদবশাদিব .. ৬০..
বাসনা দ্বিবিধা প্রোক্তা শুদ্ধা চ মলিনা তথা .
মলিনা জন্মহেতুঃ স্যাচ্ছুদ্ধা জন্মবিনাশিনী .. ৬১..
অজ্ঞানসুঘনাকারা ঘনাহংকারশালিনী .
পুনর্জন্মকরী প্রোক্তা মলিনা বাসনা বুধৈঃ .
পুনর্জন্মাঙ্কুরং ত্যক্ত্বা স্থিতিঃ সংভৃষ্টবীজবত্ .. ৬২..
বহুশাস্ত্রকথাকন্থারোমন্থেন বৃথৈব কিম্ .
অন্বেষ্টব্যং প্রযত্নেন মারুতে জ্যোতিরান্তরম্ .. ৬৩..
দর্শনাদর্শনে হিত্বা স্বযং কেবলরূপতঃ .
য আস্তে কপিশার্দূল ব্রহ্ম স ব্রহ্মবিত্স্বযম্ .. ৬৪..
অধীত্য চতুরো বেদান্সর্বশাস্ত্রাণ্যনেকশঃ .
ব্রহ্মতত্ত্বং ন জানাতি দর্বী পাকরসং যথা .. ৬৫..
স্বদেহাশুচিগন্ধেন ন বিরজ্যেত যঃ পুমান্ .
বিরাগকারণং তস্য কিমন্যদুপদিশ্যতে .. ৬৬..
অত্যন্তমলিনো দেহো দেহী চাত্যন্তনির্মলঃ .
উভযোরন্তরং জ্ঞাত্বা কস্য শৌচং বিধীযতে .. ৬৭..
বদ্ধো হি বাসনাবদ্ধো মোক্ষঃ স্যাদ্বাসনাক্ষযঃ .
বাসনাং সংপরিত্যজ্য মোক্ষার্থিত্বমপি ত্যজ .. ৬৮..
মানসীর্বাসনাঃ পূর্বং ত্যক্ত্বা বিষযবাসনাঃ .
মৈত্র্যাদিবাসনানাম্নীর্গৃহাণামলবাসনাঃ .. ৬৯..
তা অপ্যতঃ পরিত্যজ্য তাভির্ব্যবহরন্নপি .
অন্তঃশান্তঃ সমস্নেহো ভব চিন্মাত্রবাসনঃ .. ৭০..
তামপ্যথ পরিত্যজ্য মনোবুদ্ধিসমন্বিতাম্ .
শেষস্থিরসমাধানো মযি ত্বং ভব মারুতে .. ৭১..
অশব্দমস্পর্শমরূপমব্যযং
     তথাঽরসং নিত্যমগন্ধবচ্চ যত্ .
অনামগোত্রং মম রূপমীদৃশং
     ভজস্ব নিত্যং পবনাত্মজার্তিহন্ .. ৭২..
দৃশিস্বরূপং গগনোপমং পরং
     সকৃদ্বিভাতং ত্বজমেকমক্ষরম্ .
অলেপকং সর্বগতং যদদ্বযং
     তদেব চাহং সকলং বিমুক্তॐ .. ৭৩..
দৃশিস্তু শুদ্ধোঽহমবিক্রিযাত্মকো
     ন মেঽস্তি কশ্চিদ্বিষযঃ স্বভাবতঃ .
পুরস্তিরশ্চোর্ধ্বমধশ্চ সর্বতঃ
     সুপূর্ণভূমাহমিতীহ ভাবয .. ৭৪..
অজোঽমরশ্চৈব তথাজরোঽমৃতঃ
     স্বযংপ্রভঃ সর্বগতোঽহমব্যযঃ .
ন কারণং কার্যমতীত্য নির্মলঃ
     সদৈব তৃপ্তোঽহমিতীহ ভাবয .. ৭৫..
জীবন্মুক্তপদং ত্যক্ত্বা স্বদেহে কালসাত্কৃতে .
বিশত্যদেহমুক্তত্বং পবনোঽস্পন্দতামিব .. ৭৬..
তদেতদৃচাভ্যুক্তম্ ..
তদ্বিষ্ণোঃ পরমং পদং সদা পশ্যন্তি সূরযঃ . দিবীব চক্ষুরাততম্ ..
তদ্বিপ্রাসো বিপন্যবো জাগৃবাংসঃ সমিন্ধতে . বিষ্ণোর্যত্পরমং পদম্ ..
ॐ সত্যমিত্যুপনিষত্ .
ॐ পূর্ণমদঃ পূর্ণমিদং পূর্ণাত্পূর্ণমুদচ্যতে .
পূর্ণস্য পূর্ণমাদায পূর্ণমেবাবশিষ্যতে ..
ॐ শান্তিঃ শান্তিঃ শান্তিঃ .. হরিঃ ॐ তত্সত্ ..
ইতি মুক্তিকোপনিষত্সমাপ্তা ..