পন্চব্রহ্ম

.. পঞ্চব্রহ্মোপনিষত্ ..

ব্রহ্মাদিপঞ্চব্রহ্মাণো যত্র বিশ্রান্তিমাপ্নুযুঃ .
তদখণ্ডসুখাকারং রামচন্দ্রপদং ভজে ..
ॐ সহ নাববতু .. সহ নৌ ভুনক্তু .. সহ বীর্যং করবাবহৈ ..
তেজস্বিনাবধীতমস্তু  মা বিদ্বিষাবহৈ ..
ॐ শান্তিঃ শান্তিঃ শান্তিঃ ..
হরিঃ ॐ ..
অথ পৈপ্পলাদো ভগবান্ভো কিমাদৌ কিং জাতমিতি . সদ্যো জাতমিতি .
কিং ভগব ইতি . অঘোর ইতি . কিং ভগব ইতি . বামদেব ইতি .
কিং বা পুনরিমে ভগব ইতি . তত্পুরুষ ইতি . কিং বা পুনরিমে ভগব ইতি .
সর্বেষাং দিব্যানাং প্রেরযিতা ঈশান ইতি . ঈশানো ভূতভব্যস্য
সর্বেষাং দেবযোগিনাম্ . কতি বর্ণাঃ . কতি ভেদাঃ . কতি শক্তযঃ .
যত্সর্বং তদ্গুহ্যম্ . তস্মৈ নমো মহাদেবায মহারুদ্রায প্রোবাচ
তস্মৈ ভগবান্মহেশঃ .
গোপ্যাদ্গোপ্যতরং লোকে যদ্যস্তি শ্রুণু শাকল .
সদ্যো জাতং মহী পূষা রমা ব্রহ্মঃ ত্রিবৃত্স্বরঃ .. ১..
ঋগ্বেদো গার্হপত্যং চ মন্ত্রাঃ সপ্তস্বরাস্তথা .
বর্ণং পীতং ক্রিযা শক্তিঃ সর্বাভীষ্টফলপ্রদম্ .. ২..
অঘোরং সলিলং চন্দ্রং গৌরী বেদ দ্বিতীযকম্ .
নীর্দাভং স্বরং সান্দ্রং দক্ষিণাগ্নিরুদাহৃতম্ .. ৩..
পঞ্চাশদ্বর্ণসংযুক্তং স্থিতিরিচ্ছক্রিযান্বিতম্ .
শক্তিরক্ষণসংযুক্তং সর্বাঘৌঘবিনাশনম্ .. ৪..
সর্বদুষ্টপ্রশমনং সর্বৈশ্বর্যফলপ্রদম্ .
বামদেব মহাবোধদাযকং পাবনাত্মকম্ .. ৫..
বিদ্যালোকসমাযুক্তং ভানুকোটিসমপ্রভম্ .
প্রসন্নং সামবেদাখ্যং নানাষ্টকসমন্বিতম্ .. ৬..
ধীরস্বরমধীনং চাবহনীযমনুত্তমম্ .
জ্ঞানসংহারসংযুক্তং শক্তিদ্বযসমন্বিতম্ .. ৭..
বর্ণং শুক্লং তমোমিশ্রং পূর্ণবোধকরং স্বযম্ .
ধামত্রযনিযন্তারং ধামত্রযসমন্বিতম্ .. ৮..
সর্বসৌভাগ্যদং নৄণাং সর্বকর্মফলপ্রদম্ .
অষ্টাক্ষরসমাযুক্তমষ্টপত্রান্তরস্থিতম্ .. ৯..
যত্তত্পুরুষং প্রোক্তং বাযুমণ্ডলসংবৃতম্ .
পঞ্চাগ্নিনা সমাযুক্তং মন্ত্রশক্তিনিযামকম্ .. ১০..
পঞ্চাশত্স্বরবর্ণাখ্যমথর্ববেদস্বরূপকম্ .
কোটিকোটিগণাধ্যক্ষং ব্রহ্মাণ্ডাখণ্ডবিগ্রহম্ .. ১১..
বর্ণং রক্তং কামদং চ সর্বাধিব্যাধিভেষজম্ .
সৃষ্টিস্থিতিলযাদীনাং কারণং সর্বশক্তিধৃক্ .. ১২..
অবস্থাত্রিতযাতীতং তুরীযং ব্রহ্মসংজ্ঞিতম্ .
ব্রহ্মবিষ্ণ্বাদিভিঃ সেব্যং সর্বেষাং জনকং পরম্ .. ১৩..
ঈশানং পরমং বিদ্যাত্প্রেরকং বুদ্ধিসাক্ষিণম্ .
আকাশাত্মকমব্যক্তমোঙ্কারস্বরভূষিতম্ .. ১৪..
সর্বদেবমযং শান্তং শান্ত্যতীতং স্বরাদ্বহিঃ .
অকারাদিস্বরাধ্যক্ষমাকাশমযবিগ্রহম্ .. ১৫..
পঞ্চকৃত্যনিযন্তারং পঞ্চব্রহ্মাত্মকং বৃহত্ .
পঞ্চব্রহ্মোপসংহারং কৃত্বা স্বাত্মনি সংস্থিতঃ .. ১৬..
স্বমাযাবৈভবান্সর্বান্সংহৃত্য স্বাত্মনি স্থিতঃ .
পঞ্চব্রহ্মাত্মকাতীতো ভাসতে স্বস্বতেজসা .. ১৭..
আদাবন্তে চ মধ্যে চ ভাসসে নান্যহেতুনা .
মাযযা মোহিতাঃ শম্ভোর্মহাদেবং জগদ্গুরুম্ .. ১৮..
ন জানন্তি সুরাঃ সর্বে সর্বকারণকারণম্ .
ন সন্দৃশে তিষ্ঠতি রূপমস্য পরাত্পরং পুরুষং বিশ্বধাম .. ১৯..
যেন প্রকাশতে বিশ্বং যত্রৈব প্রবিলীযতে .
তদ্ব্রহ্ম পরমং শান্তং তদ্ব্রহ্মাস্মি পরমং পদম্ .. ২০..
পঞ্চব্রহ্ম পরং বিদ্যাত্সদ্যোজাতাদিপূর্বকম্ .
দৃশ্যতে শ্রূযতে যচ্চ পঞ্চব্রহ্মাত্মকং স্বযম্ .. ২১..
পঞ্চধা বর্তমানং তং ব্রহ্মকার্যমিতি স্মৃতম্ .
ব্রহ্মকার্যমিতি জ্ঞাত্বা ঈশানং প্রতিপদ্যতে .. ২২..
পঞ্চব্রহ্মাত্মকং সর্বং স্বাত্মনি প্রবিলাপ্য চ .
সোঽহমস্মীতি জানীযাদ্বিদ্বান্ব্রহ্মাঽমৃতো ভবেত্ .. ২৩..
ইত্যেতদ্ব্রহ্ম জানীযাদ্যঃ স মুক্তো ন সংশযঃ .
পঞ্চাক্ষরমযং শম্ভুং পরব্রহ্মস্বরূপিণম্ .. ২৪..
নকারাদিযকারান্তং জ্ঞাত্বা পঞ্চাক্ষরং জপেত্ .
সর্বং পঞ্চাত্মকং বিদ্যাত্পঞ্চব্রহ্মাত্মতত্ত্বতঃ .. ২৫..
পঞ্চব্রহ্মাত্মিকীং বিদ্যাং যোঽধীতে ভক্তিভাবিতঃ .
স পঞ্চাত্মকতামেত্য ভাসতে পঞ্চধা স্বযম্ .. ২৬..
এবমুক্ত্বা মহাদেবো গালবস্য মহাত্মনঃ .
কৃপাং চকার তত্রৈব স্বান্তর্ধিমগমত্স্বযম্ .. ২৭..
যস্য শ্রবণমাত্রেণাশ্রুতমেব শ্রুতং ভবেত্ .
অমতং চ মতং জ্ঞাতমবিজ্ঞাতং চ শাকল .. ২৮..
একেনৈব তু পিণ্ডেন মৃত্তিকাযাশ্চ গৌতম .
বিজ্ঞাতং মৃণ্মযং সর্বং মৃদভিন্নং হি কাযকম্ .. ২৯..
একেন লোহমণিনা সর্বং লোহমযং যথা .
বিজ্ঞাতং স্যাদথৈকেন নখানাং কৃন্তনেন চ .. ৩০..
সর্বং কার্ষ্ণাযসং জ্ঞাতং তদভিন্নং স্বভাবতঃ .
কারণাভিন্নরূপেণ কার্যং কারণমেব হি .. ৩১..
তদ্রূপেণ সদা সত্যং ভেদেনোক্তির্মৃষা খলু .
তচ্চ কারণমেকং হি ন ভিন্নং নোভযাত্মকম্ .. ৩২..
ভেদঃ সর্বত্র মিথ্যৈব ধর্মাদেরনিরূপণাত্ .
অতশ্চ কারণং নিত্যমেকমেবাদ্বযং খলু .. ৩৩..
অত্র কারণমদ্বৈতং শুদ্ধচৈতন্যমেব হি .
অস্মিন্ব্রহ্মপুরে বেশ্ম দহরং যদিদং মুনে .. ৩৪..
পুণ্ডরীকং তু তন্মধ্যে আকাশো দহরোঽস্তি তত্ .
স শিবঃ সচ্চিদানন্দঃ সোঽন্বেষ্টব্যো মুমুক্ষিভিঃ .. ৩৫..
অযং হৃদি স্থিতঃ সাক্ষী সর্বেষামবিশেষতঃ .
তেনাযং হৃদযং প্রোক্তঃ শিবঃ সংসারমোচকঃ .. ৩৬..
ইত্যুপনিষত্ ..
ॐ সহ নাববতু .. সহ নৌ ভুনক্তু .. সহ বীর্যং করবাবহৈ ..
তেজস্বিনাবধীতমস্তু মা বিদ্বিষাবহৈ ..
ॐ শান্তিঃ শান্তিঃ শান্তিঃ ..
ইতি পঞ্চব্রহ্মোপনিষত্সমাপ্তা ..