অবধূত

.. অবধূতোপনিষত্ ..
গৌণমুখ্যাবধূতালিহৃদযাম্বুজবর্তি যত্ .
তত্ত্রৈপদং ব্রহ্মতত্ত্বং স্বমাত্রমবশিষ্যতে ..
ॐ সহ নাববতু .. সহ নৌ ভুনক্তু .. সহ বীর্যং করবাবহৈ ..
তেজস্বিনাবধীতমস্তু মা বিদ্বিষাবহৈ ..
ॐ শান্তিঃ শান্তিঃ শান্তিঃ ..
হরিঃ ॐ অথ হ সাংকৃতির্ভগবন্তমবধূতং দত্তাত্রেযং
পরিসমেত্য পপ্রচ্ছ ভগবন্কোঽবধূতস্য কা স্থিতিঃ কিং
লক্ষ্ম কিং সংসরণমিতি . তং হোবাচ ভগবো দত্তাত্রেযঃ
পরমকারুণিকঃ ..
অক্ষরত্বাদ্বরেণ্যত্বাদ্ধৃতসংসারবন্ধনাত্ .
তত্ত্বমস্যাদিলক্ষ্যত্বাদবধূত ইতীর্যতে .. ১..
যো বিলঙ্ঘ্যাশ্রমান্বর্ণানাত্মন্যেব স্থিতঃ সদা .
অতিবর্ণাশ্রমী যোগী অবধূতঃ স কথ্যতে .. ২..
তস্য প্রিযং শিরঃ কৃত্বা মোদো দক্ষিণপক্ষকঃ .
প্রমোদ উত্তরঃ পক্ষ আনন্দো গোষ্পদাযতে .. ৩..
গোপালসদৃশাং শীর্ষে নাপি মধ্যে ন চাপ্যধঃ .
ব্রহ্মপুচ্ছং প্রতিষ্ঠেতি পুচ্ছাকারেণ কারযেত্ .. ৪..
এবং চতুষ্পথং কৃত্বা তে যান্তি পরমাং গতিম্ .
ন কর্মণা ন প্রজযা ধনেন ত্যাগেনৈকে অমৃতত্বমানশুঃ .. ৫..
স্বৈরং স্বৈরবিহরণং তত্সংসরণম্ . সাংবরা বা দিগংবরা বা .
ন তেষাং ধর্মাধর্মৌ ন মেধ্যামেধৌ . সদা
সাংগ্রহণ্যেষ্ট্যাশ্বমেধমন্তযাগং যজতে .
স মহামখো মহাযোগঃ . কৃত্স্নমেতচ্চিত্রং কর্ম.
স্বৈরং ন বিগাযেত্তন্মহাব্রতম্ . ন স মূঢবল্লিপ্যতে .
যথা রবিঃ সর্বরসান্প্রভুঙ্ক্তে
    হুতাশনশ্চাপি হি সর্বভক্ষঃ .
তথৈব যোগী বিষযান্প্রভুঙ্ক্তে
    ন লিপ্যতে পুণ্যপাপৈশ্চ শুদ্ধঃ .. ৬..
আপূর্যমাণমচলপ্রতিষ্ঠং
    সমুদ্রমাপঃ প্রবিশন্তি যদ্বত্ .
তদ্বত্কামা যং প্রবিশন্তি সর্বে
    স শান্তিমাপ্নোতি ন কামকামী .. ৭..
ন নিরোধো ন চোত্পত্তির্ন বদ্ধো ন চ সাধকঃ .
ন মুমুক্ষুর্ন বৈ মুক্ত ইত্যেষা পরমার্থতা .. ৮..
ঐহিকামুষ্মিকব্রাতসিদ্ধৈ মুক্তেশ্চ সিদ্ধযে .
বহুকৃত্যং পুরা স্যান্মে তত্সর্বমধুনা কৃতম্ .. ৯..
তদেব কৃতকৃত্যত্বং প্রতিযোগিপুরঃসরম্ .
অনুসন্দধদেবাযমেবং তৃপ্যতি নিত্যশঃ .. ১০..
দুঃখিনোঽজ্ঞাঃ সংসরন্তু কামং পুত্রাদ্যপেক্ষযা .
পরমানন্দপূর্ণোঽহং সংসরামি কিমিচ্ছযা .. ১১..
অনুতিষ্ঠন্তু কর্মাণি পরলোকযিযাসবঃ .
সর্বলোকাত্মকঃ কস্মাদনুতিষ্ঠামি কিং কথম্ .. ১২..
ব্যাচক্ষতাং তে শাস্ত্রাণি বেদানধ্যাপযন্তু বা .
যেঽত্রাধিকারিণো মে তু নাধিকারোঽক্রিযত্বতঃ .. ১৩..
নিদ্রাভিক্ষে স্নানশৌচে নেচ্ছামি ন করোমি চ .
দ্রষ্টারশ্চেত্কল্পযন্তু কিং মে স্যাদন্যকল্পনাত্ .. ১৪..
গুঞ্জাপুঞ্জাদি দহ্যেত নান্যারোপিতবহ্নিনা .
নান্যারোপিতসংসারধর্মা নৈবমহং ভজে .. ১৫..
শৃণ্বন্ত্বজ্ঞাততত্ত্বাস্তে জানন্কস্মাঞ্ছৃণোম্যহম্ .
মন্যন্তাং সংশযাপন্না ন মন্যেঽহমসংশযঃ .. ১৬..
বিপর্যস্তো নিদিধ্যাসে কিং ধ্যানমবিপর্যযে .
দেহাত্মত্ববিপর্যাসং ন কদাচিদ্ভজাম্যহম্ .. ১৭..
অহং মনুষ্য ইত্যাদিব্যবহারো বিনাপ্যমুম্ .
বিপর্যাসং চিরাভ্যস্তবাসনাতোঽবকল্পতে .. ১৮..
আরব্ধকর্মণি ক্ষীণে ব্যবহারো নিবর্ততে .
কর্মক্ষযে ত্বসৌ নৈব শামেদ্ধ্যানসহস্রতঃ .. ১৯..
বিরলত্বং ব্যবহৃতেরিষ্টং চেদ্ধ্যানমস্তু তে .
বাধিকর্মব্যবহৃতিং পশ্যন্ধ্যাযাম্যহং কুতঃ .. ২০..
বিক্ষেপো নাস্তি যস্মান্মে ন সমাধিস্ততো মম .
বিক্ষেপো বা সমাধির্বা মনসঃ স্যাদ্বিকারিণঃ .
নিত্যানুভবরূপস্য কো মেঽত্রানুভবঃ পৃথক্ .. ২১..
কৃতং কৃত্যং প্রাপণীযং প্রাপ্তমিত্যেব নিত্যশঃ .
ব্যবহারো লৌকিকো বা শাস্ত্রীযো বান্যথাপি বা .
মমাকর্তুরলেপস্য যথারব্ধং প্রবর্ততাম্ .. ২২..
অথবা কৃতকৃত্যেঽপি লোকানুগ্রহকাম্যযা .
শাস্ত্রীযেণৈব মার্গেন বর্তেঽহং মম কা ক্ষতিঃ .. ২৩..
দেবার্চনস্নানশৌচভিক্ষাদৌ বর্ততাং বপুঃ .
তারং জপতু বাক্তদ্বত্পঠত্বাম্নাযমস্তকম্ .. ২৪..
বিষ্ণুং ধ্যাযতু ধীর্যদ্বা ব্রহ্মানন্দে বিলীযতাম্ .
সাক্ষ্যহং কিংচিদপ্যত্র ন কুর্বে নাপি কারযে .. ২৫..
কৃতকৃত্যতযা তৃপ্তঃ প্রাপ্তপ্রাপ্যতযা পুনঃ .
তৃপ্যন্নেবং স্বমনসা মন্যতেসৌ নিরন্তরম্ .. ২৬..
ধন্যোঽহং ধন্যোঽহং নিত্যং স্বাত্মানমঞ্জসা বেদ্মি .
ধন্যোঽহং ধন্যোঽহং ব্রহ্মানন্দো বিভাতি মে স্পষ্টম্ .. ২৭..
ধন্যোঽহং ধন্যোঽহং দুঃখং সাংসারিকং ন বীক্ষেঽদ্য .
ধন্যোঽহং ধন্যোঽহং স্বস্যাজ্ঞানং পলাযিতং ক্বাপি .. ২৮..
ধন্যোঽহং ধন্যোঽহং কর্তব্যং মে ন বিদ্যতে কিংচিত্ .
ধন্যোঽহং ধন্যোঽহং প্রাপ্তব্যং সর্বমত্র সংপন্নম্ .. ২৯..
ধন্যোঽহং ধন্যোঽহং তৃপ্তের্মে কোপমা ভবেল্লোকে .
ধন্যোঽহং ধন্যোঽহং ধন্যো ধন্যঃ পুনঃ পুনর্ধন্যঃ .. ৩০..
অহো পুণ্যমহো পুণ্যং ফলিতং ফলিতং দৃঢম্ .
অস্য পুণ্যস্য সংপত্তেরহো বযমহো বযম্ .. ৩১..
অহো জ্ঞানমহো জ্ঞানমহো সুখমহো সুখম্ .
অহো শাস্ত্রমহো শাস্ত্রমহো গুরুরহো গুরুঃ .. ৩২..
ইতি য ইদমধীতে সোঽপি কৃতকৃত্যো ভবতি . সুরাপানাত্পূতো ভবতি .
স্বর্ণস্তেযাত্পূতো ভবতি . ব্রহ্মহত্যাত্পূতো ভবতি .
কৃত্যাকৃত্যাত্পূতো ভবতি . এবং বিদিত্বা স্বেচ্ছাচারপরো
ভূযাদোংসত্যমিত্যুপনিষত্ ..
ॐ সহ নাববতু .. সহ নৌ ভুনক্তু .. সহ বীর্যং করবাবহৈ ..
তেজস্বিনাবধীতমস্তু মা বিদ্বিষাবহৈ ..
ॐ শান্তিঃ শান্তিঃ শান্তিঃ ..
ইত্যবধূতোপনিষত্সমাপ্তা ..